གནའ་བོའི་ཞང་ཞུང་གི་རྒྱལ་རབས་ལོ་རྒྱུས།

1རྟག་གཟིགས་ཞང་ཞུང་བོད་བཅས་ཀྱི། །མི་རིགས་ས་ཡུལ་ལས་སོགས་ཞིབ་བཤད་ན། །རྟག་གཟིགས་ཕུགས་པ་དག་ཞིང་འོལ་མོ་གླིང༌། །མུ་ཁྱུད་བདལ་མཚོ་དབལ་སོ་གངས་རིས་བསྐོར། །གཡུང་དྲུང་དགུ་བརྩེགས་ཕོ་བྲང་གླིང་བརྒྱད་དང༌། །ཕྱི་ནང་བར་གྱི་གླིང་དང་མཐའ་གླིང་ལ། །ནང་བཅུད་དམུ་གཤེན་ཧོས་ཤག་དཔོ་རྒྱ་གཏོ་དཔྱད་གཉན། །རྒྱལ་རིགས་རྗེ་རིགས་དམངས་རིགས་བྲམ་ཟེ་བཅས། །རྒྱལ་བློན་འབངས་བཅས་བསམ་མཐའ་ཡས་པས་ཁེངས། །སྐད་ནི་ནང་གླིང་གཡུང་དྲུང་ལྷ་ཡི་སྐད། །བར་གླིང་བཅུ་གཉིས་དེ་ལས་བསྒྱུར་བའི་སྐད། །འབབ་ཆུ་བརྒྱད་བརྒྱུད་བསྒྱུར་བའི་སྐད་བརྒྱད་ནི། །གཙང་མ་ལྷ་སྐད་ན་ར་ཛ་རའི་རྒྱུད། །དག་པ་ལྷ་སྐད་པཀྵུ་བྱང་གི་རྒྱུད། །སཾསྐྲྀཏ་ལྷ་སྐད་གྱིམ་ཤང་ནུབ་ཀྱི་རྒྱུད། ཁྲི་ཝེར་ལྷ་སྐད་སིན་དྷུ་ལྷོ་རྒྱུད་བསྒྱུར། །ཧོ་ཅི་འཕྲུལ་སྐད་ལྷོ་ཤར་གངྒཱའི་རྒྱུད། །སྤོས་ཅི་འཕྲུལ་སྐད་ལྷོ་ནུབ་སི་ཏའི་རྒྱུད། །ཅི་གུང་འཕྲུལ་སྐད་སེང་ག་བྱང་ནུབ་རྒྱུད། །ཅུང་ཙེ་འཕྲུལ་སྐད་བྱང་ཤར་གསེར་ལྡན་རྒྱུད། །བཅུས་གཙོས་སྐད་རིགས་བརྒྱ་དང་དྲུག་ཅུ་བཞི། །ཡི་གེའི་གཟུགས་ནི་སྤུངས་སོ་ཆེ་ཆུང་སོགས། །གཟུགས་དབྱིབས་བཀོད་པ་མི་འདྲ་དུ་མར་གསུངས། །འདི་ཉིད་དག་ཞིང་མོས་པའི་ཡིད་ཡུལ་ལས། །ས་སྟེང་འདི་ན་བརྟག་སྟེ་བཙལ་བ་བླུན། །གལ་ཏེ་ཏི་སེའི་སྐོར་དང་པར་ཤ་སོགས། །ཡིན་པར་འདོད་པ་ངེས་ན་དེར་སྐྱེ་བའི། །སྨོན་ལམ་འདེབས་ཡུལ་ཁོ་ན་བྱེད་དགོས་པ་ཅིའི་ཕྱིར་ཡོད།
དེ་ཡང་བདག་ཅག་གི་སྟོན་པས། སྐྱེ་སྒོ་གཅོད་པའི་མདོ་ལས། འོལ་མོ་ལུང་རིང་གནས་སུ་སྐྱེ་བར་ཤོག །ལུས་ངན་འཁོར་བའི་ལུས་སུ་མི་སྐྱེ་ཞིང༌། །ཞེས་གསུངས་པས། ཞིང་འདི་ཉིད་འཁོར་ཞིང་ཐུན་མོང་བ་ལས་ངེས་པར་ཁྱད་པར་འཕགས་པ་ཞིག་ཡིན་དགོས་པས་ སོ། །རང་ཅག་འགྲོ་བ་ཕལ་པའི་དབང་པོའི་ཡུལ་དུ་མ་གྱུར་ན་མེད་པར་འདོད་པ་དང༌། འཛམ་གླིང་གི་ས་དང་འབྲེལ་ཏེ་ཡོད་ན་རང་རེས་མཐོང་དགོས་པ་སོགས་ནི་ཧ་ཅང་གི་བློ་ སྒོ་དོགས་པས། དེ་ལྟར་ན་སྲིད་པའི་ཡུལ་ས་གཡེན་སྡེ་དང༌། ལྷ་རིགས་གཉན་སྡེ་ཀླུ་རིགས་སོགས་མི་དང་རང་བཞིན་གྱིས་བསྐལ་དོན་ཅན་རྣམས་མེད་ པར་འདོད་དགོས་ལ། དེ་ལྟར་ན་གཞུང་རྣམས་ལས་རྒྱང་འཕན་ལ་དགག་པ་བྱས་པའི་རིགས་པ་རྣམས་འདིར་དྲན་ཆོག་ པ་འདྲ་སྙམ།
ལན་ཅིག་འོལ་གླིང་གི་དཔྱད་པ་བཞག་ནས་སྐབས་ཀྱི་བརྗོད་བྱ་རྒྱལ་རབས་ལ་འཇུག་པ་ ཡིན་པས། དེ་ལ་རྟག་གཟིགས་ཀྱི་ཡུལ་ལམ་ཞང་ཞུང་སྒོ་བར་མའི་ཡུལ་ཡང་འབོད་པའི་གནས་སུ་འཁོད་ པའི་མི་རིགས་ནི་འགའ་ཞིག་རྟག་གཟིགས་ཧོས་རིགས་ལས་གྲོལ་ཞིང༌། ཕལ་ཆེར་གྱི་མི་ཡི་རིགས་ནི་སྔོན་བཤད་པ་ལྟར། རྒྱལ་བུ་འཐིང་གེའི་རྒྱུད་ལས་བྱུང་ཚུལ་བཤད་པ་ལྟར་ལ། འདི་ལ་སྒོ་བར་མ་འབོད་ན་ཕུགས་པ་གང་ཞེ་ན། རྟག་གཟིགས་འོལ་མོའི་གླིང་སྒོ་ཕུགས་དང༌། རྟག་གཟིགས་ཡུལ་ལ་བར་མ་དང༌། ཕྱི་མ་ཞང་ཞུང་ཞེས་པའི་སྒྲ་གཉིས་ལ། འདྲ་མཐུན་མང་བས་འཁྲུལ་གཞི་ཆེ་བ་ཡིན་འདུག་ཀྱང༌། ཁུངས་ལྡན་གྱི་གཞུང་ལས་བྱུང་ཚུལ་ལ་ཞིབ་ཏུ་འདྲིས་པའི་ངལ་བ་བྱེད་མཁན་ཡོད་ན་ ངེས་པར་གསལ་བར་རྟོགས་ནུས་སོ། །དེ་ལྟར་ཞིབ་ཏུ་བརྟག་ལོང་མེད་པར་ཚིག་སྤྱི་ཙམ་ཞིག་གོ་བས་དྲངས་ཏེ་བསྟོད་སྨད་ བྱེད་པ་ལ་རིངས་ན་དཔྱད་པའི་ཕུགས་ཐག་ཐུང་བས་གནད་དོན་དཔྱིས་ཕྱིན་པར་དཀའོ། །
རྒྱལ་གཤེན་མི་ལུས་བསམ་ལེགས་ཀྱིས་མཛད་པའི་མ་རྒྱུད་སངས་རྒྱས་རྒྱུད་གསུམ་ གྱི་འགྲེལ་བའི་དབུ་འཆད་ལས། ཞང་ཞུང་བར་པའི་ཡུལ་སྲིད་པའི་ཞིང་ཁམས་རྣམ་པར་དག་པ་འཛམ་གླིང་ས་ཡི་སྙིང་པོ་ཞང་ ཞུང་བོན་གྱི་རྒྱལ་པོའི་ཞིང་ཁམས་ན། ཡབ་གཡུང་དྲུང་བོན་གྱི་རྒྱལ་པོ་གྱེར་ཝེར་ཐ་ཚན་ཧི་པང་རྐྱ་ཞེས་བྱ་བ། འཛམ་བུ་གླིང་གི་རྒྱལ་ཁམས་ལ་དབང་བསྒྱུར་བ་ཞིག་ཡོད་པ་ལ། ཡང་སྐུ་བགྲེས་ནས་དགུང་དུ་གཤེགས་པའི་དུས་ལ་ཐུག་པ་ལ་སྲས་མེད་ནས། མཐའ་གམ་གྱི་རྒྱལ་ཕྲན་བཅུ་གཉིས་ཀྱིས་རྒྱལ་པོ་དགུང་དུ་གཤེགས་ན་འབངས་ཀྱིས་ རྒྱལ་ས་མི་ཟིན་པས། རང་ཅག་རྣམས་ཀྱིས་དབུས་གྱུར་རྒྱལ་ཁམས་དམག་གིས་བཅོམ་ལ་ལོངས་སྤྱོད་བླངས་ཞེས་ བགྲོས་པས། དབུས་ཀྱི་རྒྱལ་འབངས་ཀུན་ཤིན་ཏུ་སྡུག་ཅིང་བྲེད་ནས་གཤེན་རབས་ཐམས་ཅད་ཀྱིས་ལྷ་ རྣམས་ལ་གསོལ་བ་བཏབ་པས། ཡུམ་སྲིད་པའི་ལྷ་མོ་འཁོར་དང་བཅས་པ་ནམ་མཁའ་ལ་བྱོན་ནས་ལུང་བསྟན་ཏེ། ལོ་གཅིག་ནས་རྒྱལ་བུ་འབྱོན་ཏེ་ཐོས་པ་རྒྱ་མཚོས་བོན་གྱི་བསྟན་པ་བསྐྱང་བར་ལུང་ བསྟན་པས། བཙུན་མོ་ལྷ་ཟ་གཡུང་དྲུང་རྒྱན་ཞེས་བྱ་བ་ལས་མེ་ཏོག་ཨུད་དུ་འབར་བ་ཁ་ཟུམ་པ་ཞིག་ བཙས་པར་གྱུར་ཏོ།།ཞེས་པས། ཞང་ཞུང་བར་པའི་ཡུལ་དང༌། ཡང་མཁས་དབང་ཧ་རོ་སྦོ་ལེས། རྒྱའི་རྒྱལ་རབས་ལས་ཡེ་ཤུ་མ་ཤི་ཀ་འཁྲུངས་རྗེས་ཕྱི་ལོ་ ༦༡༥ ནང་སྐོར་ཨ་རབ་པའི་སྐུ་ཚབ་དོན་གཅོད་རྒྱ་ནག་གི་ཡུལ་དུ་བཞག ཨ་རབ་པའི་ཡུལ་ལ་རྒྱ་ཡིས་ཏ་ཞིག་དང༌། ཏ་ཟིག་སོགས་འབོད་སྐད་གསུངས། འོན་ཀྱང་ཏ་ཟིག་ཅེས་པའི་མིང་དེ་རྒྱ་ཡིས་ཡུལ་དེ་ལ་གསར་དུ་བཏགས་པའི་རྒྱུ་མཚན་ གང་ཡང་བཤད་རྒྱུ་མེད་པས་ཆེས་སྔ་མོའི་དུས་ནས་ཡུལ་འདི་རྣམས་ལ་མིང་དེ་སྐད་ བརྗོད་པ་ཡིན་པར་གསལ། དུས་དེར་རྒྱ་ནག་ནས་ཨ་རབ་པས་གོས་ཆེན་གྱི་འབུ་དང༌། དེ་གསོ་བྱེད་ཀྱི་ཤིང་བཅས་བླངས་ཏེ། ཨ་རབ་པའི་ཡུལ་དུ་དར། དེའི་དུས་ཡུལ་གཉིས་ཀྱི་བར་འགྲོ་ལམ་དེང་སྐབས་ཤིན་ཅང་ཟེར་བའི་ལུང་པ་འདིའི་ བརྒྱུད་ནས་འགྲོ་བས་འདིར་གོས་ཆེན་གྱི་ལམ་ཟེར་བའི་མིང་ཡང་ཆགས་ཡོད། ཇི་ལྟར་བཤད་པའི་ཞང་ཞུང་བར་པའི་ཡུལ་དང༌། རྟག་གཟིགས་ཞེས་པའི་ལུང་གིས་བསྟན་པའི་ས་དེ་ཨ་རབ་པའི་ལུང་པ་འདི་ཡིན་ཞེས་མཐའ་ གཅིག་ཏུ་ངེས་པའི་རྒྱུ་མཚན་ད་དུང་མ་རྟོགས་པས་བཤད་པ་འདི་ཙམ་དུ་ལུས།
བསྟན་འབྱུང་༡༡༠ལས། ཕྱི་མ་སྒོ་པ་ཞང་ཞུང་དངོས་ཀྱི་ཡུལ། །སྟོད་ན་ཁ་ཆེའི་ཡུལ་མཚམས་སེང་པའི་ཕྱིན། །བྱང་ཕྱོགས་ཧོར་གྱི་གངས་རྒྱུད་ཚུན་དང་སྨད། །སུམ་པ་གླང་གི་གྱིམ་ཤོད་ཡན་ཆད་དང༌། །ལྷོ་རྒྱུད་རྒྱ་གར་བལ་པོའི་ཡུལ་ཁམས་ཚུན།།ཞེས་དང༌། སྐྱབས་སྟོན་ཁྲོ་འགྲེལ་༣༡།༤ལས། བྱབྱསྤྱིར་ཞང་ཞུང་དང་བོད་གཉིས་དང་པོ་ས་བགོས་ལ། གཙང་ཁ་རག་ཡན་མན་ཡིན་ལ། ལིག་མི་རྐྱ་ཡི་དུས་ཞང་ཞུང་ལ་དམག་སྟོང་སྡེ་དགུ་ཁྲི་དགུ་འབུམ། སུམ་པའི་སྟོང་བུ་ཆུང་ཡང་དེའི་མངའ་རིས།ཞེས་དང༌། བྱབྱམར་པ། སྟག་ལོ། གུ་རིབ། ཁྱུང་བྱིད། ཁྱུང་པོ། འུ་སངས། སུམ་པའོ། །ཞེས་སོ། །
སྦལ་ཏི། རྐང་ཕྲན། ལ་དྭགས། ཟངས་མཁར། གར་ཞྭ། ཉུང་ཏི། སྤི་ཏི། ཁུ་ནུ། ཚང་ས། དྲུག་ཉི། ཉི་ཏི། ཀྱོ་ནམ། ཤ་ཁོག མགར་ཡང༌། ཚང་རོ། ཏི་དཀར། སླེ་མི། ཝོམ་གློ། སེ་རིབ། དོལ་པོ། ཀྲུག་སྐྱེས་སོགས། ཀྵོར་མང་ཡུལ་ཡན་གྱི་ལྷོ་རྒྱུད་དང༌། རུ་ཐོག་གུ་གེ་སྤུ་ཧྲེང་བསྐོར་གསུམ་དབུས། །བཟུང་པའི་ཁ་ཡུག་ཁ་སྐྱོར་ཁ་རག་ཡུལ། །ཅི་ཤང་ཅི་ན་གུ་རུབ་ཚོ་བཅུ་དང༌། །ར་སངས་ནག་ཙང་ཤང་གྱེར་བྱང་རྒྱུད་བཅས། །ཡུལ་ཁམས་དྲུག་ཅུ་ཁྲི་སྡེ་བརྒྱད་ཅུའི་ཞིང༌། །བྱ་རུ་ཐོག་པའི་རྒྱལ་པོ་བཅོ་བརྒྱད་བྱོན། །དེ་ཡང་གང་ཏི་སེའི་མདུན་ཉེ། རི་སྤོས་རི་ངད་ལྡན་གྱི་རྩ་བ། མཚོ་མུ་ལེ་ཁྱུད་ཀྱི་འགྲམ་དུ་ཞང་ཞུང་སྲིད་པའི་རྒྱལ་པོ་ཁྲི་ཝེར་ལ་རྗེ་གུ་ལང་ གསེར་གྱི་བྱ་རུ་ཅན་བྱོན། དེས་གངས་ཏི་སེའི་མདུན་ཞོལ་དུ་གསས་ཁང་ནོར་བུ་སྤུངས་རྩིགས་བཞེངས། སངས་རྒྱས་སྟོན་པའི་ཞལ་མཇལ། ཁྲི་རྗེ་ལུང་བསྟན་མདོ་གསུངས། ག་ལྗང་གཡུ་ལོ་རྫོང་མཁར་དུ་བཞུགས། དེང་སྐབས་རྒྱང་གྲགས་དགོན་ཟེར་བའི་ས་གནས་ཀྱི་སྐོར་ཡིན་ཟེར། པུ་མར་ཧྲིང་གི་སྤུ་རེངས་ཡུལ་དུ་སྟག་ཆེན་རྔམ་རྫོང་མཁར་ཞེས་བྱ་བར། སྤུངས་རྒྱུང་གྱེར་གྱི་རྒྱལ་པོ་འོད་ཀྱི་བྱ་རུ་ཅན་བཞུགས། ཞང་ཞུང་ཙུ་ནའི་ཡུལ་ཤོད་དུམ་པ་ཚལ་དེང་སང་གུང་དུམ་ཟེར་དུ་གསེར་གྱི་མཁར་ཞེས་ བྱ་བ་དེ་རུ་གུ་ཝེར་ནོར་གྱི་རྒྱལ་པོ་ག་ལྗང་འོད་ཀྱི་བྱ་རུ་ཅན་བཞུགས། ཞང་ཞུང་ཙི་ཎའི་ཡུལ་སྤོས་རི་ངད་ལྡན་རྩ་བར། གྲོང་ཁྱེར་སྟག་སྣ་གླིང་གི་དབུས། དེང་དུས་བོན་རི་སྟག་སྣ་རོང་ཟེར་སྟག་སྣ་དབལ་གྱི་རྫོང་མཁར་ཞེས་བྱ་བ་དེ་རུ། ལ་དྭགས་ཀྱི་ཡུལ་དུ་ཡོད་པའི་སྟག་སྣ་ཟེར་བ་འདི་ལ་སྟག་སྣ་གཟི་བརྗིད་རྒྱལ་པོའི་ ཕོ་བྲང་ཡོད་པ་ཡིན་ནམ་སྙམ་ཡང་དཔྱད། སྟག་སྣ་གཟི་བརྗིད་རྒྱལ་པོ་ཁྲི་ལྡེམ་ལྕགས་ཀྱི་བྱ་རུ་ཅན་བཞུགས། ཞང་ཞུང་ཁ་ཡུག་གི་ཡུལ་མུ་རྫོང་ཆེན་པོ་ཁྲོ་ཆུ་མཁར་ཞེས་བྱ་བ་དེ་རུ། སད་ཧྲི་གྱེར་གྱི་རྒྱལ་པོ་ཨུ་དཔལ་འོད་ཀྱི་བྱ་རུ་ཅན་གྱིས་དབང་བསྒྱུར། ཞང་ཞུང་ཁྱུང་ལུང་གི་གྲོང་ཁྱེར་རྒྱལ་བ་མཉེས་ཡུལ་གྱི་ཁབ་ཁྱུང་ཆེན་སྤུངས་པའི་ རི་དེང་སྐབས་མཁར་གདོང་ཟེར་ལ་གཡུང་དྲུང་སེམས་དཔའི་འདུས་སྡེ་ཆགས། ཡུལ་དབུས་སུ་དངུལ་མཁར་དཀར་པོ་ཁྲོ་ཆུའི་རྨིང་རྡོ་ཅན་དེ་རུ། སླེ་ཀྲ་གུ་གེའི་རྒྱལ་པོ་རིན་ཆེན་འོད་ཀྱི་བྱ་རུ་ཅན་གྱིས་མངའ་བསྒྱུར། ཞང་ཞུང་རུ་ཐོག་གི་ཡུལ་དུ། རུ་ཐོག་གནམ་རྫོང་མཁར་དུ། མུ་མར་ཐོག་རྒོད་རྒྱལ་པོ་ཨེནྜ་འོད་ཀྱི་བྱ་རུ་ཅན་བཞུགས་སོ། །
གཞན་ཡང་དེ་རྣམས་གངས་རིའི་དཀར་ཆག་༥༩༩ལས། སྲིད་པ་གནམ་ནས་བསྐོས་པའི་ཞང་ཞུང་སྲིད་པའི་རྒྱལ་པོ། ཁྲི་ཝེར་ལ་རྗེ་གུ་ལང་གསེར་གྱི་བྱ་རུ་ཅན་དང༌། ཞང་ཞུང་ཟིལ་གནོན་རྒྱལ་པོ་རླབས་ཆེན་ཁྱུང་གི་བྱ་རུ་ཅན་དང༌། ཧྲི་དོ་གྱེར་སྤུངས་རྒྱལ་པོ་ཀང་ཀ་ཤེལ་གྱི་བྱ་རུ་ཅན་དང་གསུམ་ནི། གངས་རི་ཆེན་པོའི་མདུན་རྒྱང་རི་གཡུ་ལོ་ལྗོན་པའི་རྫོང་མཁར་དུ་ཆགས་སོ། །ཁྱུང་ལུང་རྒྱལ་བ་མཉེས་ཡུལ་དུ་སླས་ཀྲ་གུ་གེའི་རྒྱལ་པོ་རིན་ཆེན་འོད་ཀྱི་བྱ་ རུ་ཅན་དང༌། རྒྱུང་ཡར་མུ་ཁོད་རྒྱལ་པོ་གཞའ་ཚོན་འོད་ཀྱི་བྱ་རུ་ཅན་དང༌། ཀྱི་ལེ་གུ་གེ་རྒྱལ་པོ་ཨུན་ཆེན་དུང་གི་བྱ་རུ་ཅན་དང་གསུམ་མོ། །ཞང་ཞུང་པུ་མར་ཧྲེང་དེང་སྤུ་ཧྲེང་ཟེར་གི་ཡུལ་སྤུང་རྒྱུང་གྱེར་གྱི་རྒྱལ་པོ་ བྱི་རུ་འོད་ཀྱི་བྱ་རུ་ཅན་དང༌། ཉེ་ལོ་ཝེར་ཡ་རྒྱལ་པོ་ཕྲ་མེན་འོད་ཀྱི་བྱ་རུ་ཅན་དང་གཉིས་སོ། །ཞང་ཞུང་ཙི་ཎའི་ལ་དྭགས་དང་འདི་གཉིས་ལ་བརྟག་དགོས་ཡུལ་དུ་སྟག་སྣ་གཟི་བརྗིད་ རྒྱལ་པོ་ཟོམ་ཤང་ལྕགས་ཀྱི་བྱ་རུ་ཅན་དང༌། རྫོ་དམར་ཐིས་སྤུངས་རྒྱལ་པོ་མེ་དཔུང་འོད་ཀྱི་བྱ་རུ་ཅན་དང་གཉིས་སོ། །ཞང་ཞུང་དྭ་རོག་ཡུལ་དུ་བདུད་འདུལ་དབལ་གྱི་རྒྱལ་པོ་ཉི་ཤེལ་འོད་ཀྱི་བྱ་རུ་ཅན་ དང༌། ལི་ཝེར་གྱེར་གྱི་རྒྱལ་པོ་ཟླ་ཤེལ་འོད་ཀྱི་བྱ་རུ་ཅན་དང་གཉིས་སོ། །ཞང་ཞུང་རྟ་སྒོའི་ཡུལ་དུ་ཤེལ་རྒྱུང་ཧྲི་དོ་རྒྱལ་པོ་ཛོ་དམར་འོད་ཀྱི་བྱ་རུ་ ཅན་དང༌། ལིག་མུར་ནམ་མཁའི་རྒྱལ་པོ་བཻཌཱུརྱ་འོད་ཀྱི་བྱ་རུ་ཅན་དང་གཉིས་སོ། །ཞང་ཞུང་ཁ་སྐྱོར་ཡུལ་དུ་མུ་ཝེར་ནོར་གྱི་རྒྱལ་པོ་ག་ལྗང་འོད་ཀྱི་བྱ་རུ་ཅན་ དང༌། ཞང་ཞུང་ཁ་ཡུག་ཡུལ་དུ་སད་ཧྲི་གྱེར་གྱི་རྒྱལ་པོ་ཨུ་དཔལ་འོད་ཀྱི་བྱ་རུ་ཅན་དང༌། ཞང་ཞུང་ལ་དྭགས་ཡུལ་དུ་ཉེ་ལོ་ཝེར་ཡ་རྒྱལ་པོ་གནམ་ལྕགས་དབལ་གྱི་བྱ་རུ་ཅན་དང༌། ཞང་ཞུང་རུ་ཐོག་ཡུལ་དུ་མུ་མར་ཐོག་རྒོད་རྒྱལ་པོ་ཨེནྜ་འོད་ཀྱི་བྱ་རུ་ཅན་སོགས། ཞང་ཞུང་གི་རྒྱལ་པོ་བྱ་རུ་ཅན་བཅོ་བརྒྱད་འདི་རྣམས་ཀྱི་རིང་ལ་ཞང་ཞུང་ཁྲི་སྡེ་ བཅོ་བརྒྱད་ལ་སོགས་ཡུལ་ཆེན་བཅོ་བརྒྱད་ཀྱི་མགོ་བོ་ནོན་པ་དང༌། གཡུང་དྲུང་བོན་གྱི་བསྟན་པ་ཕྱོགས་བཅུར་རྒྱས་ཤིང༌། དེ་རྣམས་སྐུ་ཚེ་ཡང་མི་ལོ་སྟོང་ཕྲག་བར་དུ་བཞུགས་པ་དང༌། ཕུང་པོ་ལྷག་མེད་དུ་སངས་རྒྱས་པ་ཡང་ཡོད་པའོ། །ཞེས་སོ། །འདི་རྣམས་ཀྱིས་བླ་ན་བཀུར་བའི་བོན་གཤེན་གཡུང་དྲུང་སེམས་དཔའ་འདུས་པའི་སྡེ་ ཡང་གྲངས་མང་དུ་འཕེལ་བའི་ཚུལ་བཤད་དོ། །འདིར་བཤད་བྱ་རུ་ཞེས་པའི་གོ་གནས་ཀྱི་ཐོབ་ཐང་བྱུང་བའི་རྟགས་དེ་བྱ་ཁྱུང་གི་ རྭ་ཡི་དབྱིབས་ལྟ་བུ་དབུ་རྒྱན་བཟོ་བའི་སྲོལ་འདུག་ཅིང༌། གཞན་ཡང་མི་ཡི་རྒྱལ་པོ་རྣམས་ཀྱི་ཆེ་རྟགས་ཙམ་དུ་མ་ཟད་མཆོད་པའི་ཞིང་དང་བཀུར་ བའི་གནས་ལ་ཡང་བརྒྱན་སྲོལ་ཡོད་དོ། །མཆོད་རྟེན་གྱི་རྩེ་ལ་བྱ་རུ་ཁྱུང་རུས་བརྒྱན་པ་དང༌། ཡི་དམ་ཁྲོ་བོའི་འཁོར་འགའ་ལ་ཡང་དབུ་ལ་གནམ་ལྕགས་བྱ་རུ་ཁྱུང་རུ་འཁྲུངས་ཞེས་ དང༌། རྣམ་དག་སྒྲུབ་པ་༣༡༢ལས། བྱ་རུ་ཐོབ་པའི་གཤེན་བརྒྱད་དེ། །འགྱུར་མེད་གསེར་གྱི་བྱ་རུ་ཅན།བྱབྱ །ཞེས་སོགས་བརྒྱད་བཤད་དོ། བྱ་ཡི་སྤྱི་རྗེ་ཁྱུང་ཡིན་པར་བཤད་ཅིང༌། དེ་ཡི་མགོའི་གཡས་གཡོན་དུ་རྭ་ཡི་རྣམ་པ་ཅན་ཕྲ་སྦོམ་དང་རིང་ཐུང་གི་ཚད་དབྱིབས་ སོགས་གསལ་བར་      ཞང་ཞུང་གི་རྒྱལ་ས་གྲགས་ཆེ་བ་དབུས་ཕྱོགས་སུ་མཁར་བཞི་དང༌། ཕྱོགས་ཀྱི་རྫོང་བཞིའོ། །མཁར་བཞི་ནི། ཁྱུང་ལུང་དངུལ་མཁར། སྤུ་ཧྲེང་སྟག་ལ་མཁར། སྨེ་ཤང་བྱི་བ་མཁར། མ་པང་སྤོས་མོ་མཁར། གཞན་ཡང་གད་ཀྱི་བྱི་བ་མཁར་ནི། སྐྱབས་སྟོན་གྱི་ཁྲོ་འགྲེལ་༥༩ལས། མཁར་ལྔའི་ནང་ཚན་གད་ཀྱི་བྱི་བ་མཁར་ཟེར་བ་གཡག་དང་རྐྱང་གི་ཐོད་པ་བ་གམ་དུ་བཏགས་ པ་དེ་རུ་རིག་འཛིན་ཀུན་འཚོགས་ཏེ།བྱབྱ ཞེས་དང༌། ཁ་ཡུག་འདམ་མཁར། གུ་གེ་རྩ་ཧྲིང་མཁར། བྱང་གི་ར་བཞི་མཁར། དེ་སོགས་མཁར་གཞན་ཡང་མང་དུ་ཡོད་པར་བཤད།
ཕྱོགས་ཀྱི་རྫོང་བཞི་ནི། དྭང་ར་ཁྱུང་རྫོང༌། སེ་རིབ་འབྲུག་མོ་རྫོང༌། རུ་ཐོག་སེང་གེ་རྫོང༌། མང་ཡུལ་སྟག་མོ་རྫོང༌། གཞན་ཡང་སྦིལ་ཏི་ཧྲང་རྫོང་སོགས་མང་ཞིག་ཡོད་སྐད་དོ། །གནའ་བོའི་གནས་ཡུལ་ཁང་རྫས་མི་རིགས་སོགས་རིམ་བཞིན་འགྱུར་ནས་སྔར་སྲོལ་ཇེ་ཉམས་ སུ་གྱུར་པས་ད་ལྟ་ཞང་ཞུང་གི་ཡུལ་དང་སྐད་ཡིག་མི་རིགས་བཅས་འདིར་ཡོད་འདི་ཡིན་ ཞེས་སྨྲ་མི་ཤེས་པ་ལྟ་བུར་གྱུར་བཞག འོན་ཀྱང༌།ད་ལྟའི་སྐབས་སུ་སྟོད་ཕྱོགས་ཀྱི་ས་གནས་ཀྱི་རི་དང་ལུང་པ་ཆུ་སོགས་ ཀྱི་མིང་སྔར་བཞིན་བསྡད་པ་དཔེར་ན། རྒྱུང་དགུ་དང༌། དྭ་རོག དྭང་ར། རྟ་སྒོ། མ་མིག རུ་ཐོག ཏི་རྩེ། གུ་གེ། ཁ་རྩེ། རི་ཏི། ཟ་ལང༌། མ་པང༌། ཏིང་རྩེ། ཡི་ཏི། ཏི་འོབ། སུ་སྨུར་སོགས་མང་པོ་ཡོད་ཅིང༌། སྦིལ་ཏི། ཁུ་ནུ་སོགས་མཐའ་མཚམས་ཞང་ཞུང་གི་ཡུལ་སྐད་མ་བཅོས་པ་ཡི་ནང་དུ་ཞིབ་ཏུ་བརྟགས་ན་ ཞང་སྐད་མང་པོ་འདྲེས་པ་ཤེས་པར་ནུས་སོ། །དེ་ནི་སྔར་གྱི་གོམས་གཤིས་རྙིང་པའི་འཕྲོ་ཡིན་ནོ། །བོད་རྒྱལ་རྒྱུད་པ་འཁྱར་བས་སྟོད་ཞང་ཞུང༌། ལ་དྭགས་གི་ས་གནས་བཟུང་ཕྱིན་ཡུལ་གྱི་མིང་ཡང་མངའ་རིས་སྐོར་གསུམ་དུ་ཆགས་སོ། །
ཞང་ཞུང་སྒོ་པ་འདི་ལ་ཡང་སྒོ་ཕུགས་བར་གསུམ་ཡོད་དེ། ཕུགས་པ་ཁྱུང་ལུང་གི་སྐོར་དང༌། བར་པ་དྭང་ར་རྟ་སྒོའི་སྐོར། ཕྱི་མ་གྱིམ་ཤོད་ཤེ་ལེ་རྫོང་དྲུག་གི་སྐོར་ཞེས་འབོད་སྲོལ་ཡོད། གཞན་ཡང་ཞང་ཞུང་རྒྱལ་པོའི་དམག་གི་རུ་གྲལ་ལ་སུམ་པའི་སྟོང་བུ་ཆུང་ཞེས་སོགས་ བཤད་པས་ཁྱུང་ཡུལ་རྩེ་དྲུག་འདི་ཡན་ཆད་ཞང་ཞུང་གི་མངའ་རིས་སུ་བྱ་བར་གྲགས། མདོ་སྨད་དུ་སུམ་པ་ཞེས་པའི་ཡུལ་རིགས་སོགས་ཡོད་པར་བཤད་འདུག་ཀྱང་དེ་ཞང་ཞུང་གི་ མངའ་སྡེའི་སུམ་པ་ཡིན་མིན་བརྗོད་མ་ཤེས་སོ། །
དེ་དུས་ཡོད་པའི་ཞང་ཞུང་གི་སྐད་དུ་སཾསྐྲྀཏའི་སྐད་དུ་མ་འདྲེས་པ་འདིས་ཞང་ ཞུང་གི་བོན་ལ་རྒྱ་གར་གྱི་ཆོས་དང་རིག་གཞུང་གི་འབྲེལ་བ་དམ་པོར་ཡོད་པ་ལྟ་བུའི་ བཤད་པ་བྱེད་འདུག་ཀྱང༌། གོང་གི་སྐད་ཀྱི་བྱུང་ཁུངས་འདི་རྣམས་ལ་བརྟགས་ན། སཾསྐྲྀཏ་སྨྲ་བ་ཡིན་ན་རྒྱ་གར་བ་ཡིན་པས་ཁྱབ་པ་མེད་ཅིང༌། སྐད་དེ་ལས་བྱུང་ན་སངས་རྒྱས་བཅོམ་ལྡན་འདས་ཀྱི་ཆོས་དང་མུ་སྟེགས་ཀྱི་ཆོས་གཉིས་ པོ་གང་རུང་ཡིན་དགོས་པའི་རྒྱུ་མཚན་ཡང་མ་མཐོང་ངོ༌། །
སྟོད་རྒྱུད་ཞང་ཞུང་གི་ས་སྐོར་འདི་ལ་སོག་པོའི་ཇག་དཔུང་བྱུང་ནས་ནོར་འཕྲོག་ མི་ཁྲིད་བྱེད་པ་ཐེངས་དུ་མ་བྱུང་བ་དང༌། སྟོད་ཧོར་རམ་སེང་པས་ཀྱང་ཇག་དང་དམག་ཐེངས་དུ་མ་བྱས་པ་དབང་བསྒྱུར་བ་སོགས་ཇི་ སྙེད་བྱུང་སྟེ། དྲང་དོན་མུན་སེལ་གྱི་གཏམ་རྒྱུད་༡༤༥ལས། སྔོན་པུ་རང་གི་རྒྱལ་པོ་དང་གར་ལོག་སོག་པོ་སྐྱུང་སྐད་སྐད་མ་ཤེས་ནས་བྱ་སྐྱུང་ ཀའི་སྐད་ལྟར་གྲགས་པ་ཞིག་གོ་ནས་མིང་དུ་བཏགས་པར་མངོན་ཀྱི་དམག་འཐབ་པ་ལ་མི་ཐམས་ ཅད་གྲི་རུ་བསད། ནོར་ཟས་ཐམས་ཅད་ནི་གར་ལོག་དམག་གིས་ཁྱེར། བུད་མེད་ཐམས་ཅད་ནི་ཁོའི་ཡུལ་དུ་ཁྱེར་ནས། རང་ཡུལ་མིག་གིས་མི་མཐོང་ཞིང༌། ལོ་རེ་བཞིན་དམག་དཔུང་སྡུད་ཀྱིན་ནོར་ཐམས་ཅད་བརླག་པར་བཏང་བ་ལ། བྲུ་ཤ་ཡུལ་གྱི་དྲང་སྲོང་བདེ་བ་རྒྱས་བྱ་བ་ཕྱི་ཡི་སྐྱབས་འགྲོ་ལ་ཡི་དམ་བྱེད་པ་ ཞིག་གིས། སྐྱབས་འགྲོ་རྣམ་པ་གསུམ་པོ་དེ། སྟག་པའི་བྱང་བུ་སོར་གསུམ་པ་རེར་བྲིས་ཕྲག་པ་ལ་བཏགས་པས། གནོད་པ་དང་སྨས་པ་མི་འབྱུང་བར་གྱུར་ནས་མི་ཐམས་ཅད་ཡིད་ཆེས་པར་གྱུར།བྱབྱ ཞེས་དང༌། པན་ཏའི་ཧོ་ཤ་བྱ་བ་ལ་སྟོན་པ་དགའ་ལྡན་བྱ་བ་སྐྱབས་འགྲོ་ཕྱི་ནང་གསང་བ་གསུམ། ཀློང་དུ་གྱུར་བ་ཞིག་གིས་ཁུམས་ནས།བྱབྱ ཞེས་པ་ནས། པུ་ཧྲེང་དུ་བྱོན་ནས་བཞུགས་ཡོད་པ་ལ།བྱབྱ སོགས་ནས། བྱབྱགར་ལོག་གི་རྒྱལ་པོ་ཡི་དམག་དཔུང་ཤིན་ཏུ་ཚབས་ཆེ་བ་བྱུང་བ་ལ།བྱབྱ ཞེས་སོགས་གསུངས་པའི་ཕྱིར། ཡི་གེ་འདི་ཡི་ནང་དུ་སྔར་པུ་ཧྲིང་ལ། དེང་སང་པུ་རང་ནས་ཁྱེར་ནས་བོད་མིག་གིས་མི་མཐོང་ཞེས་ཟེར་ལུགས་ལ་གཞིགས་ན་པུ་ རོང་བོད་ཀྱི་ཁོངས་སུ་བཙུད་ཟིན་པའི་འོག་ཏུ་ཡུལ་དེར་སོག་དམག་བྱུང་བ་ཡིན་པ་ འདྲ། དྲང་དོན་མུན་སེལ་སྒྲོན་མ་བོད་རྒྱལ་ཁྲི་སྲོང་གི་དུས་སུ་བརྩམས་པ་ཡིན་པས། བོད་རྒྱལ་ཁྲི་སྲོང་གིས་ཞང་ཞུང་རྒྱལ་པོ་ལིག་མི་རྐྱ་ཆམ་ལ་ཕབ་པའི་ལོ་རྒྱུས་ ཁུངས་མ་ཡོད་ཀྱང༌། སྲོང་བཙན་གྱི་དུས་སུ་ཞང་ཞུང་བཏུལ་ཚུལ་ནི། དེབ་ཐེར་དཀར་པོ་༡༢༢ལས། ཞང་ཞུང་ལྟ་བུ་གཉེན་མཛད་ནས་ཀྱང་བཏུལ་ལོ། །ཐབས་ཀྱིས་ཀྱང་བརྒལ་ཏེ། ཞང་ཞུང་བདག་མཛད་དུ། རྒྱལ་པོའི་སྲིང་མོ་བཙན་མོ་སད་མ་ཀ་ར། ལིག་མི་རྐྱ་ལ་ཆབ་སྲིད་ལ་གཤེགས་སོ། །བཙན་མོ་ནི་ལིག་མི་རྐྱའི་སོ་ནམ་དང་བུ་སྲིད་མི་མཛད་ཅིང༌། ལོགས་ཤིག་ན་བཞུགས་པར། བཙན་པོ་དྲལ་གྱི་སྙན་དུ་གསན་ཏེ། བཙན་མོ་དེ་ལྟར་ལོག་པར་མཛད་ན། ཆབ་སྲིད་ཀྱི་བཀྲུག་མར་འགྱུར་བས། དེ་ལྟར་མ་མཛད་པར་ལིག་མི་རྐྱ་ཡི་སོ་ནམ་དང་བུ་སྲིད་ཟུངས་ཤིག་ཅེས། སྤུག་གྱིམ་བཙན་རྨང་ཆུང་ལ་བཀའ་བསྩལ་ཏེ། བཙན་མོ་མི་བཞུགས་ཏེ། ཆབ་ཉ་ལ་རོལ་ཞིང༌། མཚོ་མ་པང་དུ་གཤེགས་འདུག་ནས། རྨང་ཆུང་མ་པང་དུ་སོང་སྟེ་བཙན་མོའི་སྤྱན་སྔར་ཕྱག་བགྱིས་ཚེ། བཙན་མོའི་ཞལ་ནས་བཙན་པོ་དྲལ་གྱི་ཐུགས་བདེའམ་མི་བདེ། ཞེས་དྲི་བ་མཛད་པར། ཐུགས་བདེ་ཞེས་གསོལ་ཏོ། །རྨང་ཆུང་གློ་བ་བདེའམ་མི་བདེ། ཞེས་སྨྲས་ན། གློ་བ་བདེའོ་ཞེས་གསོལ་ཏོ། །དེར་བཙན་མོས་རྨང་ཆུང་ཁྱེད་ནི། བཙན་པོ་དྲལ་གྱི་ཞལ་སྔ་ནས་འདྲ་བས། མགྲོན་གྱི་ཕྱག་ལེན་ལོངས་ཤིག་ཅེས། ཕྱག་ལེན་རྩལ་ནས་བཙན་མོས་མགུར་བླངས་པ། ཡུལ་གྱི་ནི་སྐལ་ཕོག་པ། །ཁྱུང་ལུང་ནི་རྔུལ་མཁར་ཞིགབྱབྱ །སོགས་སོ། བྱབྱ།མགུར་བླངས་པའི་རྗེས་སུ། རྨང་ཆུང་མཆི་ཕྱག་བགྱིས་པ་ལས། བཙན་མོའི་ཞལ་ནས། བཙན་པོ་དྲལ་ལ། བཀའ་ལན་ཡི་གེར་གསོལ་བ་ཅང་མ་མཆིས་སོ། །བཙན་པོ་ཞལ་སྔ་ནས་ཐུགས་བདེ་ཞིང་བཞུགས་པ་ལ་གློ་བ་དགའ་འོ། །བཙན་པོས་བཀའ་བསྩལ་བ་ནི། རྔོ་ཅི་ཐོགས་ཀྱིས་འཚལ་ཞིང་མཆིས་སོ། །བཙན་པོའི་ཕྱག་ཏུ་འདི་ཕུལ་ཅིག་ཅེས་ཞུ་གཡག་གཅིག་ཕྱག་རྒྱས་བཏབ་ནས་བཀུར་རོ། །རྨང་ཆུང་སླར་བཙན་པོའི་སྤྱན་སྔར་མཆིས་ནས། བཙན་མོས་བཀའ་ལན་ཡི་གེར་གསོལ་བ་ནི་ཅང་མ་མཆིས། མགུར་བླངས་པའི་ཚིག་འདི་ཞེས་མཆིས་ཕྱག་རྒྱས་བཏབ་སྟེ་བཀུར་བ་ནི་འདི་ལགས་ཞེས་ གསོལ་བ་ལས། བཙན་པོས་རྒྱ་ཕྱེས་ནས་གཟིགས་ན། གཡུ་རྙིང་བཟང་པོ་སུམ་ཅུ་ཙམ་ཞིག་བྱུང་སྟེ། བཙན་པོས་དགོངས་ནས་ཡུ་བུས་ལིག་མི་རྐྱ་ལ་རྒོལ་ཕོད་ན་ནི་གཡུ་ཐོགས་ཤིག རྒོལ་མ་ཕོད་ན་ནི་བུ་མེད་དང་འདྲ་བས་ཞུ་གྱོན་ཟེར་བ་ལྟ་ཞེས་བཀའ་སྩལ་ནས། རྗེ་བློན་ཀུན་བློང་བློང་སྟེ། ལིག་མི་རྐྱའི་སྲིད་བརླག་གོ། །ཞེས་ལིག་མི་རྐྱ་ཡི་སྲིད་བརླག ཞང་ཞུང་ཐམས་ཅད་འབངས་སུ་བཀུག་གོ། །ཞེས་བཤད་པས་ཞང་ཞུང་རྒྱལ་པོ་ལིག་མི་རྐྱ་ཟེར་བ་འདིའི་མིང་ཞང་རྒྱལ་དུ་མའི་ མིང་ཟུར་དུ་ཡོད་སྟེ། དཔེར་ན་བོད་ཀྱི་རྒྱལ་པོའི་མིང་ཟུར་ལ་བཙན་པོ་ཡོད་པ་བཞིན་ནོ། །དེ་ཡང་ལིག་མི་སྲིད་པ་དང༌། རྐྱ་ནི་རྗེ་ལ་འཇུག་པས། སྲིད་པའི་རྗེ་ཞེས་ཞང་ཞུང་གི་རྒྱལ་པོ་མང་པོའི་མཚན་གྱི་ཟུར་དུ་ཡོད་པ་འདྲའོ། །
ཡང་ལྡེབ་༡༧༨ལས། བྱབྱཤིམས་ཀྱི་གུ་རན་དུ་ཞང་ཞུང་གིས་མཁོན་བགྱིས་ཏེ།བྱབྱ ཞེས་དང་ཡང་ལྡེབ་༡༧༩ལས། ཞང་ཞུང་ངོ་ལོག་ཅིང༌།བྱབྱ ཞེས་པས་རྒྱལ་པོ་དེའི་རྗེས་སུ་རིམ་བཞིན་ཞང་ཞུང་གིས་ངོ་ལོག་སྟེ། བོད་ལ་འཁྲུགས་པ་བྱས་ནས་མཐར་ཁྲི་སྲོང་གི་དུས་སུ་ཞང་ཞུང་གི་རྒྱལ་པོ་ལིག་མི་ རྐྱའི་ཆུན་མས་བསླུས་ནས་ཞང་རྒྱལ་བཀྲོངས་པའི་གནས་དྭང་ར་ཁྱུང་རྫོང་གི་ཉེ་སར་ ཡིན་ལ། སྔོན་མ་ཞང་རྒྱལ་བཏུལ་ས་ཁྱུང་ལུང་དུ་ཡིན་པར་མངོན་པས། དུས་དང་ལས་དོན་གཏན་ནས་མི་འདྲ་བས། འདིའི་ཚུལ་མགོ་མི་རྨོངས་པར་དགོས་སོ། །ཁྲི་སྲོང་གི་དུས་སུ་ཞང་རྒྱལ་བཅོམ་ཚུལ་ནི། བྱབྱཞང་ཞུང་གི་རྒྱལ་པོ་བོད་ཀྱི་རྒྱལ་པོས་མངོན་དུ་བཏུལ་བ་མི་ཐུབ་པས། བོད་ཀྱི་རྒྱལ་པོས་ངན་གཡོས་འདུལ་སྙམ་ནས། ཞང་ཞུང་རྒྱལ་པོ་ལ་བཙུན་མོ་གསུམ་ཡོད་པའི་ཆུང་ཤོས། གུ་རུབ་ཟ་སྣང་སྒྲོན་ལེགས་བྱ་བ། ལོ་བཅོ་བརྒྱད་ལོན་པ་ཞིག་ཡོད་པ་དེ་ལ་བོད་ཀྱི་རྒྱལ་པོའི་འཕྲིན་བློན་ཞེ་ངན་ལ་ ཁོང་གདུག་པ། སྣང་ནམ་ལེགས་གྲུབ་བྱ་བ་ཞིག་གིས། གསེར་ཕྱེ་འབྲོང་རུ་གང་ཁྱེར་ཏེ། སྣང་སྒྲོན་ལེགས་ལ་བྱིན་ནས་འདི་སྐད་སྨྲས་སོ། །སྣང་སྒྲོན་ལེགས་མ་ཁྱོད་ལྟ་བུ། ཞང་ཞུང་རྒྱལ་པོའི་ཁབ་ཀྱི་ཡང་ཆུན་བྱེད་པ། ཁྱོད་རང་ཨ་ཅང་ཆེས་ཏེ། བོད་ཀྱི་རྒྱལ་པོས་ཀྱང་མི་བཟོད་པར་འདུག་པས། འདི་སྨད་པའི་ཐབས་ཡོད་དམ། ཡོད་ན་ཁྱོད་རང་བོད་ཀྱི་རྒྱལ་པོའི་ཁབ་ཀྱི་ཡང་ཆེན་མ་བྱ། བོད་ཀྱི་མངའ་རིས་ཀྱི་སུམ་གཉིས་སྟེར་བར་འདུག་གོ། །

སྨྲས་པས།

སྒྲོན་ལེགས་མས་ན་རེ། ཞང་ཞུང་རྒྱལ་པོ་ལ་དམག་ས་ཁེབས་པར་ཡོད། བོད་ཀྱི་རྒྱལ་པོ་ལ་དམག་བ་བྲེ་མོའི་གཞུང་ཙམ་ལས་མེད་པས། མངོན་དུ་བཏུལ་དུ་མི་ཐུབ་པས། ངན་དང་ཐབས་ཀྱིས་འདུལ་ན། ཞང་ཞུང་རྒྱལ་པོ་ནི་ཟླ་བ་ཕྱི་ཏ་ལ། ཞང་ཞུང་ཡུལ་ནས། སུམ་པ་གླང་གི་གྱིམ་ཤོད་དུ། སྐུ་རྐྱེན་དང་ཆས་ནས་མདུན་མ་ལ་བཞུད་ཀྱི། དེར་སྒུགས་ལ་བཀྲོངས་མཛོད་ཅིག དེའི་བྱ་གཏོང་བདག་གིས་བྱ་ཟེར་ཏེ། བུད་མེད་ཀྱི་བློ་ལ་ལྟོས་པ་ཅི་ཡང་མེད་པས། དེ་སྐད་སྨྲས་སོ། །ཚེས་དུ་ལ་འོང་བའི་བརྡ་ལ་བཙས་ཀྱི་ཁར་འཇོག་པར་ཆད་དོ། །དེ་ནས་བོད་ཀྱི་རྒྱལ་བློན་དམག་མི་སྟོང་མང་པོ་དང་ཆས་འོང༌། སྣ་ནམ་ལེགས་གྲུབ་དང་རྒྱལ་པོ་སྔོན་ལ། ལ་བཙས་ཀྱི་ཁར་བྱོན་ནས་བལྟས་པས། ས་དེར་ཆུ་སླ་ང་གང་གི་ནང་ན། གསེར་ཆུང་གཅིག དུང་ཆུང་གཅིག དུག་མདེལ་གཅིག་དང་གསུམ་གདའ་འོ། །བོད་ཀྱི་རྒྱལ་པོའི་ཞལ་ནས། ཆུ་སླ་ང་གང་ནི་ཟླ་བ་ཕྱི་མའི་ཉ་ལ་འོང་བྱ་བ་ཡིན། གསེར་ཆུང་དང་དུང་ཆུང་ནི་དྭང་རའི་གསེར་ཕུག་དང་དུང་ཕུག་གསེར་ཕུག་དང༌། དུང་ཕུག་ཟེར་བའི་ལུང་པ་དེ་དེང་སྐབས་ནག་ཚང་སྒོ་ནག་གི་སར། དྭང་ར་ཁྱུང་རྫོང་གི་ཤར་ཕྱོགས་ཀྱི་ལ་བརྒལ་ནས་ཁ་བྱང་དུ་བལྟས་ནས་ཕྱིན་ན་འདུག་ ཅིང༌། དེང་སྐབས་ཀྱང་ས་མིང་དེ་ག་རང་འབོད་དོ།།གཉིས་སུ་དམག་ཆོས་ལ་སྒུགས་ཤིག་བྱ་བ་ ཡིན། དུག་མདེལ་ནི། བརྣག་པ་སྐྱེད་ལ་བསྒུགས་ལ་སོད་ཅིག་བྱ་བ་ཡིན་ཟེར་ཏེ་བསྒུགས་སོ། །དེར་རྒྱལ་པོ་གཉིས་མཇལ་ནས། བོད་ཀྱི་དམག་མིས་ཞང་ཞུང་གི་རྒྱལ་པོ་བཀྲོངས་སོ། །དེར་ཞང་ཞུང་འབུམ་སྡེ་ནི་ཕམ། བོད་ཀྱི་ཁྲི་སྡེ་ནི་རྒྱལ་ལོ།བྱབྱ །ཞེས་པས་དེ་ནས་བཟུང་ཞང་ཞུང་གིས་བོད་ལ་ངོ་ལོག་བྱེད་མ་ནུས་པར་བོད་ཀྱི་འོག་ཏུ་ བཙུད་དོ། །དུས་ཚིགས་ནི་རགས་ཙམ་བོད་རྒྱལ་ཁྲི་སྲོང་ལྡེ་བཙན་གྱི་སྐུ་དུས་ཡིན་པར་ཤེས་པ་ ལ་དཔག་ནས་ཤེས་སོ།། །།
མཛད་པ་པོ་སྨན་རིའི་ཡོངས་འཛིན་བསྟན་འཛིན་རྣམ་དག་རིན་པོ་ཆེ།

1,571 total views, 1 views today



མདོ་སྔགས་ཟུང་འབྲེལ་ཐེག་ཆེན་གཡུང་དྲུང་བོན།

མདོ་སྔགས་ཟུང་འབྲེལ་ཐེག་ཆེན་གཡུང་དྲུང་བོན་ཞེས་པའི་མཚོན་དོན་མདོར་བསྡུས། དེ་ཡང་གཡུང་དྲུང་གཉིས་ནི་འདུལ་བ་མདོ་ཡི་སྡེ་དང༌། གསང་བ་ཟབ་དཀར་སྔགས་ཀྱི་སྡེ་གཉིས་མཚོན་པར་བྱེད་པ་ད ང༌། བར་གྱི་ལྕུམ་བཞོགས་དེ་ནི་ཐེག་པའི་ཡོངས་རྩེ་རྫོགས་པ་ཆེན་པོ་སེམས་ཀྱི་སྡེ་བཅས་མདོར་ན་མི་ལོ་ཆིག་ཁྲི་བརྒྱད་སྟོང་གི་གོང་དུ་བྱོན་པའི་རྣམ་འདྲེན་ཚེ་ལོ་བརྒྱ་བའི་སྟོན་མཆོག་རྫོགས་པའི་སངས་རྒྱས་རྒྱལ་བ་གཤེན་རབ་མི་བོ་མཆོག་གིས་གཏན་ལ་ཕབས་པའི་བོན་སྒོ་བཞི་མཛོད་ལྔའམ་ཐེག་པ་རིམ་དགུ་མཚོན་པར་བྱེད་དོ།

གཡུང་དྲུང་བོན་གྱི་དྲྭ་རྒྱ་ངོ་སྤྲོད།

གཡུང་དྲུང་བོན་གྱི་དྲྭ་ཚིགས་ཆེན་མོ་འདི་ནི་༧སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཆོག་གི་བཀའ་འཁྲོལ་གཞིར་བཟུང་འོག་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་སྟངས་ འཛིན་འོག་ཆེད་དུ་གསར་སྒྲུབ་བྱས་པའི་བོད་གནའ་བོའི་རིག་གཞུང་སྣ་ཚོགས་དང་འབྲེལ་བའི་གཡུང་དྲུང་བོན་སྤྱི་བའི་དྲྭ་ཚིགས་ཤིག་ཡིན།