བླ་མ་གཤེན་ཀླུ་དགའི་མཚན་ཙམ་ཐོས་པ་ལ་བརྟེན་ནས་གཏེར་བོན་དག་དང་མ་དག་གི་ཐ་སྙད་འདོགས་པ་མང་དུ་འདུག་པས་འདིའི་རྣམ་ཐར་ཉུང་འདུས་ཤིག་བཤད་ན། གདུང་བརྒྱུད་སྒ་ཚ་དམུ་ཡི་རིགས། མེས་བཀྲ་གསལ་རྒྱལ་པོ་དང་། ཕྱི་མོ་ལྷ་རྒྱན་བཙུན་མོ་གཉིས་ཁམས་ཀྱི་ཙོང་ཁ་ནས། ཙོ་རོ་འབྲིང་འཚམས་སུ་ཆད། ཡོན་ཏན་གྱི་རིགས་ནི་བན་སྔགས་པ་ཞིག་ཡིན་སྐད། དེའི་སྲས་མི་གཡོ་མགོན་པོ། དབང་ཕྱུག་མགོན་པོ། རྡོ་རྗེ་མགོན་པོ་དང་གསུམ། མི་གཡོ་མགོན་གྱིས་བོན་པོའི་བུ་སྲིང་ཞིག་བླངས་པས། དེ་ལ་སྲས་དཔལ་མགོན་གསས། འབྲུག་གསས། རྒོད་གསས་དང་གསུམ། དཔལ་མགོན་གྱིས་ཞང་པོ་རབས་ཆད་པའི་ལེའུ་བསྐྱངས་པས། བོན་རྒྱུད་དུ་སོང་། དེའི་སྲས་ཀླུ་དགའ། ཀླུ་རྩེགས། གེ་ཁོད་དང་གསུམ་མོ། གཏེར་ཐོན་པའི་ལོ་རྒྱུས་ནི། གཤེན་ཉིད་ཀྱི་ཞལ་ནས། བདག་ལོ་བཅུ་གསུམ་ལོན་པ་ན། ཕ་ཇོ་ན་རེ། ཁྱོད་དང་གེ་ཁོད་གཉིས་རྒྱུགས་ལ་སྤང་རྒྱན་དཀར་པོ་དང་། སྤྲ་བ་ཐུས་ལ་ཤོག་ཟེར་ནས་ཕྱིན་པས། གེ་ཁོད་སྤང་རྒྱན་འཐུ་རུ་བཅུག་སྟེ། བདག་གིས་མཐའ་ལུང་ན་སྤྲ་བ་ཚོལ་དུ་ཕྱིན་ཙ་ན། ནམ་མཁའ་ལས་གཟུགས་མེད་པའི་སྐད་ཅིག་གིས། གཤེན་ཀླུ་དགའ། བོན་གྱི་དངོས་གྲུབ་བྱིན་ནམ་ཟེར་བ་བྱུང་སྟེ། བཞག་གཡོས་པ་དང་། ཕ་ཝོང་གི་སྐྱུ་མར་ཁུས་བཀང་འདུག་གོ། དེ་དངོས་གྲུབ་ཏུ་བསམ་ནས། ཕ་མ་ཡང་གསང་ངོ་། དེ་ནས་བྲག་ཀ་རུ་འདི་ན་བསྡད་བསམས་ནས། ལོ་གཅིག་གཉིས་ལ་མ་ཐོན། དེ་དུས་དབུས་གཙང་དང་ཞུ་ཡས་གཉིས་འཐབ་པས། དེའི་བར་ཕྱིན་པས། མདའ་ཡོ་བ་ཕོག་ནས་གེ་ཁོད་བཀྲོངས། སྟོང་དུ་སྤུ་ར་སྤུ་ལུག་མགོ་གཡག་བསྡུས་པ་ལ། ལོ་གཅིག་འགྱངས་སོ། ། སྤུར་བ་གྱད་པས། མགོ་གཡག་སྟེར་དུ་མ་འདོད་པས། ཁོ་རྟ་ཐོག་ནས་བརྡབས་ནས། ས་ལིངས་བྱས་ཏེ་འཁྱུས་པས། ཕོ་ཤེད་ཅན་དུ་གྲགས་སོ། །
དེའི་གཡེང་བར་བདག་གིས་ཆུ་སེར་མོར་སུམ་ཐོག་ཅིག་བརྩེགས་པས། སྣེ་ནག་ཡེ་མཁྱེན་ན་རེ། ཇོ་བོ་ཤེད་མོ་ཆེ་ཟེར་བ་འུ་རང་འགྲན་ནམ་ཟེར། པའུ་བརྒྱད་ཁུལ་ཐལ། དེར་བདག་གིས་དགུ་ཁུར་ནས། སྐས་ལྡང་བཅུ་གཅིག་ཁར་ཟེད་ཀྱིས་ཐོན་པ་དང་། པའུ་དང་དུས་གཅིག་འགྱེལ་ཐལ། སྐེད་པའི་ཚིགས་བཅོས་ཀྱང་མ་ཕན་པར་ལོ་བཅོ་བརྒྱད་ནས་སྒུར་པོར་སོང་། དང་པོ་དམུ་ཡད་བྱུང་ཙམ་ན། བསྡད་མནོ་བས་མ་གྲུབ། དེའི་ཉམས་ཆགས་ཡིན་ནམ་མནོས་ཏེ། བཅུ་པ་ལ། དཔོན་ར་ཞགས་ལས། གཡུང་དྲུང་ཁྲོ་རྒྱས་དང་། ཨ་ནུ་མའི་ཆབ་གཏོར་ཤོག་གཅིག་མ་སོགས་སྒོམ་ཁྲིད་མང་བར་ཞུས། བྲག་ཀ་རུ་ལ་སྟག་ལོར་བསྒྲུབས། བསྒྲུབ་པའི་ལོ་རང་ནས་མཚན་མ་དང་དམུ་ཡད་གོང་བཞིན་བྱུང་སྟེ། ལྷ་དང་ཞལ་མཇལ་ནས་བདུད་རྩིའི་ཆུ་བོ་བསྟིམས་པ་རྨིས། དེའི་ལོར་ཕ་རྒན་གྲོངས་ནས། མཚམས་ཐོན་ཏེ་ཕྱིན། དགེ་རྩ་ཟིན་ཟིན་བསྡད། དེས་གནམ་ལོ་འབྲུག་ལ་ཐུག་བར་འགྱངས། འབྲུག་ལོར་མཚན་རྟགས་གོང་བཞིན་བྱུང་བ་ལ། དེ་ལོ་ན་ག་ཟ་དཔལ་སྒྲོན་བླངས་ཏེ། དེས་ཉེས་དེ་ལོ་འགྱངས། ཕྱི་ལོ་སྦྲུལ་གྱི་ལོ་ལ་རྟགས་གོང་བཞིན་བྱུང་། སྲོད་ལ་བུད་མེད་ནག་མོ་རལ་པ་འཕྲག་པར་ནོན་པ་ཞིག་མཆེ་བ་གཉེར་ཞིང་ཟ་ཚུལ་སྟོན་དུ་བྱུང་། དེ་ལ་བདག་གིས་འཇིགས་སྐྲག་མ་བགྱིས་པར་དགོངས་པར་བསྡད་པས། དེ་ནུབ་རྫ་སྐྱ་སེང་གི་ཐོད་ལ་བསྐྱལ་གདའ། ནང་པར་དགོན་པར་ཡོང་སྟེ། བྲག་དཀར་གྱི་མདོར་སླེབས་ཙམ་ན། ཁྱེའུ་གཡུའི་ཟུར་ཕུད་ཅན་དང་བུ་མོ་དར་གྱི་ལའུ་ཅན་མང་པོས་བསུས་ནས། ཕྱག་དང་མཆོད་པར་བྱེད་ཅིང་མེ་ཏོག་འཐོར་བ་བྱུང་། དེ་ལ་སྤྲོ་དགའ་མེད་པར་བསྡད་པས། གར་སོང་ཆ་མེད་དུ་ཐལ། ཡང་སྲོད་ལ་རྒྱ་འབག་ཆེན་པོ་ཞིག་བྱུང་ནས་ཁྱོད་ཟ་ཟེར་རོ། ། དེ་ལ་ཡང་འཇིགས་སྐྲགས་མེད་པར་དགོངས་པ་ལ་གནས་སོ།། དེ་ནུབ་མདུན་གྱི་སྤང་རི་ཆེན་པོའི་རྩེ་ལ་བསྐྱལ། ནང་པར་གནས་སུ་ཡོང་ཙམ་ན། བོན་པོ་སྟག་སླག་ཅན་རྔ་བརྡུང་གཤང་འཁྲོལ་མང་པོས་བསུས་ཏེ་གར་སོང་ཆ་མེད་དུ་ཐལ་ལོ།། སྲོད་ལ་སྦལ་བ་ཆེན་པོ་ཞིག་སྤྲུལ་པ་སྣ་ཚོགས་སྟོན་ཞིང་བྱུང་། ནུབ་མོ་གནས་ཀྱི་བྱང་རྒྱབ་ཏུ་བསྐྱལ། ནང་པར་ཚུར་ཡོང་ཙམ་ན། བྲག་མི་ངོ་འདྲ་བ་ནས་ཆུ་དཀར་པོ་ལ། སེར་པོའི་ཟར་བུ་བྱས་པ་ཞིག་འཐིག་གདའ། ཟངས་གཞོང་བཟེད་པས་ནར་ནར་བྱུང་བས་ཁེངས་སོ།། སྲིན་ལག་གིས་བླངས་ཏེ། ལྕེ་ལ་བཞག་པས། རོ་མཆོག་ལྡན་ཏེ། བདུད་རྩིར་བསམ་ནས་ཐིབས་ཀྱིས་གསོལ། ཡང་ཉི་ར་ན་ཆུ་གཏོར་གཏོང་གིན་ཡོད་པས། ཟངས་གཞོང་ནམ་མཁར་འཕུར་ཚར་རྩ་ནས་བབས་བྱུང་། དེ་ཁར་ཐང་ཅིག་གཉིད་དུ་ཐལ་ཙ་ན། ག་ཤེད་ནས་སོར་རྡོ་རྡེག་པ་ཞིག་བྱུང་སྟེ། ཀླུ་རྩེགས་ཡིན་བསམ་ནས་ཙོག་གེར་བསྡད། མགོ་དང་མིག་བཅར་བྱས་པས། སུ་ཡང་མི་གདའོ།། བར་སྣང་ན་ཚུར་ཤེལ་འོད་མང་པོ་ཡོང་གིན་གདའ། བྲག་ཁར་ཕྱིན་ནས་བལྟས་པས་སུ་ཡང་མི་གདའ། འོད་ཟེར་རྣམ་ལྔ་འཕྲོ་བ་ཡིན་བདག་ལ་འདུ་བ་བྱུང་། དེ་ནས་སྒྲ་ཆེན་པོ་གསུམ་བྱུང་། དེའི་རྟིང་ནམ་མཁའ་ནས་བུད་མེད་དཀར་མོ་བཟང་སྡུག་དར་དཀར་གྱི་ལའུ་གོན་པ་བཞི། འབྲུག་ཁྱུང་སེང་གེ་སྟག་བཞི་ལ་ཞོན་པ་བབས་ནས། གཤེན་སྒུར་ཀླུ་དགའ། བོན་གྱི་དངོས་གྲུབ་བྱིན་ནམ། བསླབ་ན་སྒྲོག་ཤེས་སམ། བསྟན་ན་བསྒོམ་ནུས་སམ་ཟེར་ནས་བྱུང་། བདག་གིས་བསླབ་ན་སྒྲོག་ཤེས་སོ།། བསྟན་ན་བསྒོམ་ནུས་སོ།། བོན་གྱི་དངོས་གྲུབ་སྩོལ་ཅིག་བྱས་ཏེ་ཕུགས་ནས་ཞོ་ཕུད་བླངས་ཏེ་མཆོད་པས། ཁྱེད་སྤྲུལ་པའི་སྐུ་ཡིན་པས། ཤེལ་གྱི་ཕུར་བ་སོར་བརྒྱད་པ་འདི་ཁྱེར་ལ། ལོ་སྐོར་གཅིག་ཏུ་གསོངས་ཤིག་གསུངས་ནས། ནམ་མཁའ་ལ་གཤེགས་ཐལ། བལྟས་པས་ཕུར་པ་ལ་བོན་ཐེག་པ་རིམ་པ་དགུ་བྱ་བ། བོན་སྒོ་དྲུག་ཡོད་ཤེལ་གྱི་སྐྲས་རྡང་དགུ་བབས་པ་ན། སྡོང་པོ་ལ་ཆུན་གཅུས་པ་འདྲ་བ་ཞིག་ཡོད་པ། དེའི་འོག་ཕ་ཝོང་གྲུ་བཞི། གཉའ་ན་མཚལ་གྱི་གཡུང་དྲུང་ཞིག་ཡོད་པ། གཤམ་ན་ཤེལ་གྱི་གཡུང་དྲུང་ལམ་མེར་ཡོད་བྱ་བ་གདའ། དེར་བལྟས་པས་དེ་ཀ་བཞིན་གདའ་སྟེ། ཕ་ཝོང་རློག་ཏུ་གཏུབ་བམ་མ་བལྟས་པར། བཏུབ་པར་འདུག་མནོས་ནས། དཔལ་སྒྲོན་བཏང་ནས་ཀླུ་རྩེགས་ལ་ཏོག་ཙེ་ཁྱེར་ལ་ཤོག་བྱས་པས། ཡང་དེ་ནུབ་ཕ་བོང་རློག་ཏུ་མ་བཏུབ། ཁ་བ་དང་རླུང་དམར་བྱུང་ནས་བཤོལ་ལོ།། དེ་ནུབ་རྨི་ལམ་དུ་ཀླུ་རྩེགས་ནི་གཟའ་མིག་དམར་གྱི་སྤྲུལ་བ་ཡིན་པས། བསྟན་པ་བཞག་པའི་གནས་མེད་དེ་མ་འཁྲིད་པར་ཤོག་ཟེར་བའི་སྒྲ་བྱུང་། ནང་པར་ཁོ་ལ་ངས་ཁྱོད་ལ་ཀུ་རེ་བྱས་པ་ཡིན། ང་ཀ་འདྲ་བས་བྲག་ལས་གཏེར་འོང་བ་ཅི་ཡོད། ཏོག་ཙེ་འདི་ཉི་ར་འཆོས་སུ་དགོས་པས་ཞོགས་བྱས་པས། ཀླུ་རྩེགས་ན་རེ། ཁྱོད་ལ་བོན་གཏེར་བས་ནས་གཏེར་ཞིག་དགོས་པ་འདུག་ཟེར་ནས་སོང་ངོ་།།
དེ་ནས་དགུན་ཟླ་འབྲིང་པོའི་ཚེས་ཉེར་བཞི། སྐར་མ་ཁྲའི་ཉིན་མོ། ཕ་བོང་གྲུ་བཞི་སློག་པའི་འོག་ནས། ཁམས་སྔོན་པོ་ཞིག་བྱུང་། དེའི་རྟིང་ནས་ཡང་ཕ་བོང་གྲུ་བཞི་ལ་མཚལ་དང་ཤེལ་གྱི་གཡུང་དྲུང་གཉིས་བྲིས་པ་ཞིག་གདའ་འོ།། དེ་བཏོན་པས། དེ་ན་སྒམ་ཆུང་གཉིས་གདའ། ཆེ་ཤོས་ན་རྒྱུ་འབྲས་གཉིས་ཀའི་བོན་མང་གདའ། ཞེས་དང་། ཡང་ལུང་དེ་ལས། བོན་ཞུ་བ་ལ་སྔ་བ་མེ་ཉག་ན་གུས་རྒོད་མ་གཅིག་དང་། སྤྱང་ཐུལ་གཅིག་ཕུལ་ནས། གཏོར་མ་དམར་པོའི་བོན་ཞིག་དགོས་ཟེར་ནས། ཁྲོ་བོ་དབང་ཆེན་ཞུས། དེ་ནས་ཞུ་གཡས་ལེགས་པོས། སྒོ་ཉལ་བཅུག་ནས་མང་བར་ཞུས་སོ།། དེ་ནས་ཅོག་ལྷ་གཡུ་སྐྱིད་བྱུང་ནས། གཏེར་ཐོན་ཟེར་བ་བདག་ལ་བསྟན་འཚལ་ཟེར། བསྟན་པས་སྔགས་མདོག་ཁམས་ཆེན་འདི་བྲི་བར་ཞུ་ཟེར་རོ།། དེ་ང་རང་གིས་མ་བཞེངས་པར་བཏང་ན་མི་ཡོང་བྱས་པས། སློབ་དཔོན་ལ་བདག་གིས་བཞེངས་ལ་འབུལ། དེ་ནས་བདག་རང་འབྲི་ལགས་ཟེར། དེ་ཙམ་འགྲུབ་བམ་བྱས་པས། ཚེགས་མེད་ཟེར་ནས། བླ་འབུམ་བསེ་གླེག་ཅན་བཞེངས་ནས་བདག་ལ་ཕུལ། དེ་ནས་འབུམ་དམར་བྲིས་སོ།། ཞེས་པ་རྣམས་གཤེན་སྒུར་ཉིད་ཀྱིས་གསུངས་པས་ཐེ་ཚོམ་མི་ཟའོ།། ཞེས་དར་རྒྱས་གསལ་སྒྲོན་ལས་སོ།།
ཡང་སྤ་གྲོ་ནས་ཁུ་ཚ་ཟླ་འོད་ཀྱིས་གཏེར་བཞེས་པའི་བོན་སྡེ་དང་། དྭང་རའི་རྨ་སྟོན་སྲོལ་འཛིན་དང་གྱེར་མི་ཉི་འོད། ཟང་ཟང་ལྷ་བྲག་ནས་དབྱིལ་སྟོན་ཁྱུང་རྒོད་རྩལ། ཟར་གྱི་སྟག་སྣ་ནས་སྤྲུལ་སྐུ་ཁྲོ་ཚང་འབྲུག་ལྷ་དང་། ལྷོ་བྲག་ནས་གཞོད་སྟོན། བསམ་ཡས་ནས་ཨ་ཙ་ར་མི་གསུམ་སོགས་ཀྱི་ལོ་རྒྱུས་ཞིབ་པར་མངའ་འོ།། འདི་རྣམས་ཀྱང་ཁུངས་ལྡན་དྲི་མ་མེད་པའི་རྣམ་ཐར་འདི་བཞིན་འཆད་རྒྱུ་ཡོད་པ་ཡིན་ནོ།།
མཛད་པ་པོ་ཡོངས་འཛིན་དཔོན་སློབ་བསྟན་འཛིན་རྣམ་དག