མི་ལོ་༤༠༠༠ ཡར་སྔོན་ནས་བོད་ཡིག་ཡོད་པའི་བདེན་དཔང་གནའ་རྫས་རྟོག་ཞིབ་པས་གསར་རྙེད་བྱུང་འདུག ཉེ་ཆར་མཚོ་སྔོན་དང་ཀན་སུས་ཞེས་འབོད་པ་གཉིས་ཀྱི་ས་མཚམས་ནས་གདོད་མའི་བོད་ཀྱི་གནའ་རྫས་མང་པོ་ཐོན་ཡོད་པ་དང་། གནའ་རྫས་རྟོག་ཞིབ་བྱས་པས་ལོ་ངོ་བཞི་སྟོང་གྱི་སྔོན་དུ་བོད་ཡིག་ཡོད་པའི་བདེན་དཔང་རྙེད་ནས་གསལ་བསྒྲགས་བྱས་འདུག
དེ་ཡང་རྒྱ་ནག་གི་གནའ་རྫས་རྟོག་ཞིབ་མཁན་འབུམ་རམས་པ་ལིའུ་ཧན་ཀིན་སོགས་ཀྱིས་བརྟག་དཔྱད་བྱས་པ་ལྟར་ན། གནའ་རྫས་དེ་དག་ཕྱི་ལོ་སྔོན་གྱི་ལོ་༢༡༠༠ ནས་༡༧༠༠ ཡི་བར་དུ་བྱུང་ཞིང་། ད་ལྟའི་བར་མི་ལོ་༤༠༠༠ ལྷག་གི་ལོ་རྒྱུས་ཡོད་པར་འགྲེལ་བརྗོད་བྱས་པ་མ་ཟད། གནའ་རྫས་འདི་དག་གི་ཐོག་ཏུ་ཡོད་པའི་བོད་ཡིག་ནི་དེང་སྐབས་གསར་རྙེད་བྱུང་བའི་དུས་ཚོད་སྔ་ཤོས་ཀྱི་བོད་ཡིག་ཡིན་པ་ར་སྤྲོད་བྱུང་འདུག
དེ་ནི་བོད་ཀྱི་ལོ་རྒྱུས་ཀྱི་ཆུ་ཕུགས་བོད་རང་ལ་ཡོད་པའི་དཔང་རྟགས་རེད་ལ། ཡོད་ཚད་རྒྱ་དཀར་ནག་གཉིས་ཀྱི་བཀའ་དྲིན་ལ་བརྟེན་ནས་བྱུང་བར་སྨྲ་མཁན་དག་ལ་སྒྲ་མེད་པའི་འགྲམ་ལྕགས་ཆུང་ཆུང་ཞིག་གཞུས་པ་རེད་ཅེས་དཔྱད་བརྗོད་པ་ཁག་གཅིག་གིས་གསུངས་འདུག
གངས་སེང།