སྨོན་རྒྱལ་ཀུན་གྲོལ་ལྷ་སྲས་མི་ཕམ་རྣམ་རྒྱལ་ཚོགས་གཉིས་རྒྱ་མཚོ།

1932480_10152834430782836_6898672947382595566_nསྨོན་རྒྱལ་ཀུན་གྲོལ་ལྷ་སྲས་མི་ཕམ་རྣམ་རྒྱལ་ཚོགས་གཉིས་རྒྱ་མཚོ་དཔལ་བཟང་པོ་ཕྱོགས་ལས་རྣམ་པར་རྒྱལ་བའི་སྡེ་ནི། ཡབ་མཆོག་དྲན་པའི་རྣམ་རོལ་ཧཱུྃཿཆེན་བླ་མ་དང་ཡུམ་མཆོག་ཟླ་འོད་རྣམ་སྤྲུལ་བདེ་ཆེན་མཚོ་མོ་གཉིས་ཀྱི་སྲས་སུ་རབ་བྱུང་ ༡༦ པའི་འབྲུ་མང་པོ་ཞེས་པ་ས་སྟག་ལོའི་ཟླ་ ༡ ཚེས་ ༣ གྱི་ཉི་ཤར་དུས་མཉམ་དུ་མདོ་ཁམས་རྔུལ་རྫ་ཟབ་མོ་སྒང་གི་ཉེ་འགྲམ་ཨ་ཁོད་སྨོན་རྒྱལ་བླ་བྲང་བསམ་འགྲུབ་ཕོ་བྲང་གཡུང་དྲུང་ནམ་མཁའ་རྫོང་དུ་སྐུ་འཁྲུངས།
དེ་ནས་དགུང་ལོ་བདུན་ཏེ་སྤྱི་ལོ་ ༡༩༤༤ ནས་ལོ་བཅོ་ལྔའི་རིང་ཀློག་གི་སློབ་དཔོན་མཐུ་སྟོབས་རྣམ་རྒྱལ་སོགས་དང་ཤར་རྫའི་རྒྱལ་ཚབ་བློ་གྲོས་རྒྱ་མཚོའི་དྲུང་ནས་སྔོན་དངོས་སོགས་བོན་ཕྱི་ནང་གསང་གསུམ་གྱི་དབང་ལུང་ཁྲིད་རྒྱུན་གང་མང་དང་ཚུལ་ཁྲིམས་དབང་རྒྱལ་གྱི་དྲུང་ནས་བཀའ་འགྱུར་ལྗགས་ལུང་དང་ཀུན་གྲོལ་རིམ་བྱོན་གྱི་བཀའ་གཏེར་ཅི་རིགས་གཙོས་སྐྱེས་ཆེན་མང་པོའི་བཀའ་འབུམ་དབང་ལུང་ཁྲིད་བཅས་ཞུས། གཞན་ཡང་བླ་ཁྲི་རྒྱལ་བ་གཡུང་དྲུང་། སྟག་ཞིག་སེང་གེ་ཉི་མ། དབྲ་སྤྲུལ་དྲི་མེད་འོད་ཟེར། ཁྲོ་དབོན་ཡིད་རྒྱལ། ལྕང་སྤྲུལ་དམ་པ།  ཞེ་ཆེན་ཀོང་སྤྲུལ། ཞེ་ཆེན་རབ་འབྱམས། མཁན་གང་ཤར་བློ་གྲོས་རབ་གསལ། བོད་སྤྲུལ་སོགས་བོན་བན་རིས་མེད་ཀྱི་སྐྱེས་ཆེན་དུ་མའི་དྲུང་ནས་བཀའ་ལུང་དབང་སོགས་མཉེས་པ་གསུམ་གྱི་སྒོ་ནས་བསྟེན་སྟེ་ཞུས།

ཁྱད་པར་དུ་བཀའ་དྲིན་སུམ་ལྡན་ཧཱུྃཿཆེན་བླ་མའི་དྲུང་ནས་མཁའ་འགྲོ་དགོངས་འདུས་ཀྱི་སྒོ་ནས་གསང་སྔགས་དབང་བཞི་ཞུས་ཤིང་གསང་སྔགས་ཀྱི་མངའ་གསོལ་གཟེངས་བསྟོད་མཚན་ལ་ཚོགས་གཉིས་རྒྱ་མཚོ་གསོལ་བས་མ་རིག་སྒོང་རྒྱ་རལ་ནས་འཁོར་འདས་ཐམས་ཅད་ས་ལེར་མཁྱེན་པ་བྱུང་།  གཏེར་ཆེན་མཆོག་གི་བཀའ་གཏེར་ལས་བྱུང་བའི་རབ་འབྱམས་བོན་གྱི་གཏེར་མཛོད་ཀྱི་དབང་ལུང་དང་བཀའ་གཏད་རྗེས་གནང་མཛད་ཅིང་ཡི་དམ་སྒོ་རུ་བཅུག་པ་དང་ཆེ་མཆོག་གསང་བདག་ཁྲོས་པའི་རྒྱུད་ལས་ཟབ་ཅིང་སྦས་པའི་གདམ་དགུ་ཡང་གནང་ཞིང་ལྷ་སྲས་མ་ཧཱ་ཧཱུྃཿཀ་མཚན་དུ་གསོལ་བས་སྟོང་ཉིད་གདེང་ལྡན་གྱི་རྣལ་འབྱོར་ཆེན་པོར་གྱུར།

དེ་ནས་དགུང་ལོ་ཉེར་གཉིས་ཏེ་ས་ཕག་སྤྱི་ལོ་༡༩༥༩ལོའི་ཟླ་༧ནས་༡༩༧༨བར་མི་ལོ་༢༠ཙམ་ལ་མི་ཉག་ར་རྔའི་བཙོན་ཁང་དུ་དུས་དབང་གིས་བཞུགས་དགོས་བྱུང་ན་ཡང་།  དེའི་སྐབས་དམ་པ་ཁོང་གིས་བདེ་སྡུག་གཏོང་ལེན་ངོས་ཉམས་ལེན་རྒྱུན་སྐྱོང་དང་བསྙུང་གནས་ཆ་ ༨༠ ཙམ་བཞུགས་པ་དང་། ཕྲེང་ཚབ་མདུད་པས་བྱས་ཏེ་སྙིང་པོ་གྲངས་མང་ཐོན་པ་ཞལ་ལས་ཐོས་མྱོང་ཡང་གྲངས་ངེས་པར་མ་ཤེས་པས་འབྲི་བའི་སྤོབས་པ་མ་ལྡན། གཟའ་ཉི་མའི་ངལ་གསོའི་སྐབས་ཤིག་ཏུ་བཙོན་ཁང་རྒྱ་རའི་འགྲམ་དུ་སྡོད་སྐབས་བྱ་རོག་ཅིག་གིས་སྒྲ་དང་བཅས་པགས་ཐུམ་ཁ་མེད་གཅིག་ཁྱེར་ནས་པང་སྟེང་དུ་བཞག་པས་ཁ་ཕྱེས་ཏེ་གཟིགས་སྐབས་སྨན་མཆོག་དྲི་ལྡན་གྱི་དཀྱིལ་དུ་གུ་རུ་བདེ་བ་ཆེན་པོའི་སྐུ་ཞིག་འདུག་གསུངས། བཙོན་རོགས་མི་ཉུང་བ་ཞིག་ལ་སྨན་དེ་བཀྱེས་ཏེ་སིདྡྷི་འབུམ་རེ་འདོན་དུ་བཅོལ་བས་ཁ་ལ་རག་ཚད་མུ་གེའི་བསྐལ་བ་ལས་ཐར་སོང་།  རྗེས་སུ་བཙོན་ཁང་ཕྱི་རོལ་ངལ་ལས་ཞོར་རྡོ་ལ་སྙིང་པོ་གྲངས་མང་བརྐོས་པ་དང་བཙོན་རོགས་རྣམས་ལ་དགེ་བསྐུལ་རྒྱ་ཆེར་ཐེབས་ཡོད་ཅེས་གསུངས།  བཙོན་ལས་གྲོལ་རྗེས་ཉག་རྫོང་དུ་ཌཱཀི་མཁའ་སྤྱོད་དབང་མོས་གདན་འདྲེན་ཞུས་པ་དང་རྫོང་ཆབ་གྲོས་ཀྲུའུ་ཞི་གཞོན་པ་སོགས་ལས་ཁུངས་འགའི་འགན་བཞེས་པ་མ་ཟད། ཉག་དགོན་ཁག་དྲུག་ཅུའི་ཆོས་སྒོ་ཕྱེས། ༡༩༧༩ སྟེ་དགུང་ལོ་ ༤༢ ཐོག་རང་དགོན་སྨོན་རྒྱལ་ཞིང་དུ་ཆིབས་བསྒྱུར་ཐོག་མར་གནང་བས་ཡབ་ཀྱི་མགུར་ཕུར་སོགས་རྟེན་མཆོག་ཁ་ཤས་ཕྱག་ཏུ་འབྱོར།

༡༩༨༣ ལོར་ཨ་ཁོད་ཡུལ་དགོན་ནས་བུ་རབས་རེ་འགའི་ཚེ་སྲོག་དང་བརྗེ་ལེན་བྱས་ནས་རིག་གསར་སྐབས་གནའ་རྫས་རྙིང་པའི་སྐོར་གྲངས་མང་ཉར་ཚགས་ཐུབ་པ་རྣམས་བསྡུ་རུབ་མཛད་དེ་མིང་ཐོར་བརྒྱབ་ནས་བདག་གཉེར་སོགས་བཀོད་འདོམས་གནང་། ༡༩༨༤ ལོར་ཧཱུྃཿཆེན་སྤྲུལ་པའི་ལྷ་ཁང་ཀ་གདུང་ཡོ་བསྲང་ཆེད་དུ་སྨོན་དགོན་དུ་བཞུགས་ཡོད་པའི་ཉིན་ཞིག་ཐོ་རངས་ཡར་བཞེངས་སྐབས་ཨོ་རྒྱན་རིན་པོ་ཆེས་བཀྲ་ལམ་མེར་ཞལ་བསྟན་པས་བདེ་སྟོང་ཟག་མེད་ཀྱི་ཉམས་ཁྱད་པར་ཅན་ཞིག་འཆར།
༡༩༨༥ ལོའི་ཟླ་ ༨ པའི་ནང་སྨོན་དགོན་གཙུག་ལག་ཁང་དུ་ལྷ་ཆེན་ ༣ དང་བླ་སྐུ་ ༣ མཆོད་རྟེན་ ༢ གཙོས་སངས་རྒྱས་སྟོང་སྐུ་སོགས་སྨན་འདམ་ལས་གྲུབ་པ་གཟུངས་ལྡན་བྱིན་ཅན་བཞེངས་སུ་གྲུབ།    དེ་ནས་དགུང་ལོ་ ༥༠ ཐོག་ཀོང་ཡུལ་དང་དབུས་གཙང་སོགས་གནས་མཇལ་ཕེབས་པས་དངོས་གྲུབ་ཀྱི་སྐལ་བ་འགའ་ཤས་ཀྱང་ཐོབ།  དེ་ནས་འཕགས་ཡུལ་དུ་ཕེབས་ཏེ་རིས་མེད་ཀྱི་བླ་ཆེན་ཁག་དང་མཇལ་འཕྲད་མཛད་ཅིང་དངོས་འབྱོར་གྱི་ཚོགས་བསགས་རྒྱ་ཆེར་མཛད།

ལྷག་པར་དུ་༧སྐྱབས་རྗེ་༧རྒྱལ་བ་སྨན་རི་བའི་ཁྲི་འཛིན་ ༣༣ སྟེ་ལུང་རྟོགས་བསྟན་པའི་ཉི་མ་རིན་པོ་ཆེ་མཆོག་དང་རྒྱལ་བའི་བཀའ་རིན་པོ་ཆེ་དཔར་སྐྲུན་གྱི་ཐད་ནས་བཀའ་འདྲི་དང་གྲོས་གླེང་སོགས་ཕུལ་སྐབས་སུའང་༧རྒྱལ་བ་སྨན་རི་བ་མཆོག་ཐུགས་ཉིད་དགྱེས་པའི་ངང་ནས་བསྟོད་བསྔགས་ཡང་ཡང་གནང་ཞིང་ཐུགས་ཀྱིས་གཙིགས་སུ་བཟུང་།
རྒྱ་གར་རྡེ་ར་དྷུན་བཞུགས་སྐབས་བོད་ཟླ་༢པའི་ཚེས༢༥ཉིན་མཁའ་སྤྱོད་དབང་མོ་ཞིང་དུ་ཕེབས་སོང་བ་ཐོས་འཕྲལ་བཟོད་མེད་ཀྱི་སེམས་ཕམ་ཆེན་པོ་བྱུང་གསུངས། ཉིན་གསུམ་རིང་འདས་མཆོད་ཞུས་ཏེ་མཁའ་ལམ་ནས་ཉག་ཡུལ་དུ་ཞབས་སོར་འཁོད།  ཁྱད་པར་དུ་དམ་པ་ཁོང་གིས་སངས་རྒྱས་གཡུང་དྲུང་བོན་གྱི་བསྟན་པའི་མེ་རོ་བསླང་རྒྱུའི་ཐུགས་འདུན་དང་སྐལ་བ་ལྡན་པས་ཕྱི་ལོ ༡༩༨༣ ནས་དབུ་བརྩམས་ཏེ་རྒྱལ་བའི་བཀའ་རིན་པོ་ཆེ་དཔར་སྐྲུན་ཐད་རྫོང་རིམ་པ་ནས་ཞིང་ཆེན་བར་ཆོག་མཆན་ཞུས་ནས་འོ་བརྒྱལ་ཆེན་པོ་མཛད་ཀྱང་རྐྱེན་འདྲ་མིན་གྱིས་ལེགས་གྲུབ་མ་བྱུང་རུང་།

སླར་༡༩༩༢ ནས ༡༩༩༨ བར་ངལ་བ་བརྒྱ་ཕྲག་ཁྱད་དུ་བསད་ནས་སྨོན་སྲས་ནམ་མཁའ་དབང་ལྡན་དང་སྨོན་རྒྱལ་དགོན་དང་དབལ་ཁྱུང་དགོན་སོགས་ཀྱི་བླ་གྲྭ་དུ་མས་ཞུས་དོན་རྒྱ་ཆེན་འོག་རྒྱལ་བའི་བཀའ་རིན་པོ་ཆེ་སྔོན་གྱི་མ་ཕྱི་གཅིག་པུར་བཞུགས་པ་ནང་བཞིན་བྱིན་སྤུས་ལྡན་པ་ཚར་ ༡༠༥༠ དཔར་ཐེངས་དང་པོ་ལེགས་གྲུབ་བྱུང་བ་མ་ཟད་འཛམ་གླིང་ཞིང་ཀུན་གཡུང་དྲུང་བོན་གྱི་བསྟན་པའི་སོན་རྩར་དམིགས་ཏེ་ཁྱབ་པར་མཛད་པས་ཐུགས་བློ་བདེ་བ་བྱུང་ཡོད་པ་རེད།

ཕྱི་ལོ་ ༢༠༠༡ སྟེ་དགུང་ལོ་རེ་བཞིའི་ཐོག་ཟླ་ ༣ པའི་ཚེས་ ༡༥ ཉིན་རྒྱལ་དབང་ཀུན་གྲོལ་རིན་པོ་ཆེའི་གདན་ས་རྫ་སྨོན་རྒྱལ་དགོན་དུ་རྒྱལ་བའི་བཀའ་རིན་པོ་ཆེ་ལྗགས་ལུང་སྤེལ་བའི་དབུ་བརྩམས་ཏེ་བྱ་བཏང་ཚེ་དབང་འགྱུར་མེད་ཀྱི་སློབ་མ་ཆེན་མོ་ཞྭ་དཀར་ ༡༣ གྱི་ཡ་གྱལ་ཚེ་དབང་གཡུང་དྲུང་མཆོག་ལ་གསུང་དུ་བཅོལ་ནས་ཁོང་ལ་ལུང་མེད་པའི་རིགས་དང་གཤེན་གཏེར་འབུམ་དུམ་དྲུག་བཅས་རྒྱལ་ཚབ་མཐུ་སྟོབས་རྣམ་རྒྱལ་གྱིས་དགོན་ཁག་ཉེར་གཉིས་ཙམ་གྱི་བླ་སྤྲུལ་དགེ་བཤེས་གྲྭ་ཚང་ཉིས་བརྒྱ་ལྷག་ལ་ཧཱུྃཿཆེན་བླ་མའི་ཟབ་གཏེར་དང་སྙན་བརྒྱུད་ལས་པོད་བརྒྱད་ཙམ་སོགས་དབང་ལུང་སྤེལ་བ་དང་དུས་རབས་ཉེེར་གཅིག་ནང་བཀའ་འགྱུར་དཔར་སྐྲུན་ལན་གཉིས་བཅས་བསྟན་པའི་རྗེས་བཞག་ཕྱག་རྗེས་གནང་བ་དམ་པ་ཁོང་ཉིད་ཐོག་མའོ།   །
ཧཱུྃཿཆེན་པའི་ལུང་ལས། རྨ་སྟོད་ཀྱི་ས་ཆར་བུད་མེད་གཉིས་ཀྱི་བཞད་བྲོ་ལ།། དཀར་ཕྱོགས་དགའ་བའི་རྒྱལ་མཚན།། འཛམ་གླིང་རྒྱན་ལ་ཚུགས་བྱུང་།། སོགས་མང་ཡང་ཡིག་ཚོགས་འཇིགས་ཕྱིར་མ་བྲིས། བྱ་བཏང་ཚེ་དབང་འགྱུར་མེད་ཞལ་ལུང་ལས། ཚེ་དབང་བྱིན་རླབས་སྟོང་རྒྱུང་སྤྲུལ་པ་དངོས།། སྙིགས་དུས་བསྐལ་ཁུགས་གསོ་བའི་དཔའ་བོ་ཆེ་སོགས་ལུང་དུ་མས་བསྔགས་པའི་སྐྱེས་བུ་འགྲན་ཟླ་དང་བྲལ་བའོ།  །

ཕྱི་ལོ་ ༡༩༩༥ ལོར་ཧོར་སྤྱི་ཁྱབ་རྒྱལ་སྲས་གཡུང་དྲུང་རྒྱལ་བ་གཙོའི་ཀླུ་ཕུག་ཡུལ་དགོན་ནས་གདན་འདྲེན་བཞིན་རྒྱ་ནག་ནས་མཁའ་ལམ་བརྒྱུད་དེ་སྦྲ་ཆེན་དམར་རུར་སྟོན་འཁོར་མང་བཅས་ཆིབས་བསྒྱུར་གནང་ནས་རབ་འབྱམས་བོན་གྱི་གཏེར་མཛོད་ཀྱི་དཀྱིལ་འཁོར་ཞལ་ཕྱེས་ཏེ་སྒྲུབ་པ་རྟགས་ཐོན་ངོས་ནས་ས་གནད་ཁག་གཉིས་ལ་གཡུང་དྲུང་བཀོད་ལེགས་ཀྱི་མཆོད་རྟེན་རེ་བརྒྱབ་པས་ས་ཕྱོགས་སུ་བྱིན་ཆེ་ཡུལ་ཕྱོགས་སུ་བཀྲ་ཤིས་པའི་དགེ་རྟགས་མང་དུ་ཤར་རོ། དེ་ལྟར་གྲུབ་རྗེས་ལྷ་ལྡན་དུ་སྟོན་འཁོར་བཅས་ཕེབས་ནས་ཇོ་བོར་གསེར་ཞལ་དང་ཚོགས་འཁོར་ཉིན་ཤས་ཕུལ་བ་མ་ཟད་ཚོགས་བསགས་མཆོད་འབུལ་རྒྱ་ཆེན་མཛད། དེའི་སྐབས་ཟླ་༨ པའི་ཚེས་༡༣ཉིན་མ་གཅིག་དཔལ་ལྡན་ལྷ་མོས་ཞལ་མངོན་སུམ་བསྟན་པས་ལྷ་མོའི་ཞལ་གཟིགས་<ཨཿརང་བྱུང་>ཞེས་པ་ལྡེབ་གཅིག་དགོངས་གཏེར་ཕབ་ནས་ཕྲིན་གསོལ་མཛད་པ་དང་གཡུང་དྲུང་བོན་བསྟན་རྒྱས་པའི་རྟགས་མཚན་ཡང་མང་དུ་བྱུང་གསུངས།
དེ་ནས་དགུང་ལོ་ ༦༥ ཆུ་རྟའི་ཟླ་ ༡༠ བའི་ཚེས་ ༡༤ ལ་ཀོང་ཡུལ་བོན་རིར་སྟོན་པ་ཐུགས་རྗེ་ཅན་གྱི་ཞལ་སྐྱིན་འཆི་མེད་གཙུག་ཕུད་ཀྱི་སྐུ་མཐོང་བ་རང་གྲོལ་ཞེས་པ་བསྟན་འགྲོའི་དོན་དུ་བཞེངས་སུ་གསོལ་བར་རྟེན་བཞུགས་མཛད་ནས་སྲིད་རྒྱལ་དགོན་དུ་ཞག་ཤས་བཅད་རྒྱར་བཞུགས། གཏེར་བདག་གི་ལུང་བཞིན་ཁྲོ་བོ་རྣམ་འཇོམས་ཀྱི་སྐུ་ཞིག་དངོས་གྲུབ་ཀྱི་སྐལ་བ་ཐོབ། གཏེར་བདག་གི་ལུང་བྱང་ཡོད་ཀྱང་འདིར་མ་བཀོད།

དེ་ནས་རྒྱལ་དབང་ཀུན་གྲོལ་བཀའ་གཏེར་ཆེན་མོ་བསྡུ་བསྒྲིག་དང་དཔར་སྐྲུན་ ༢༠༡༠ ལོར་མཐར་ཕྱིན་གྲུབ་པར་མཛད་ནས་རྒྱ་ནག་ཁྲིན་ཏུའུ་ནུབ་རྒྱུད་ལེ་དབར་བརྒྱད་ཅུའི་མཚམས་ནན་ཇིང་ཞེས་པའི་རིའི་རྐེད་པར་སྨོན་རྒྱལ་གཡུང་དྲུང་ལྷ་རྩེ་ཞེས་པའི་དབེན་དགོན་ཞིག་གསར་དུ་བསྐྲུན། དགོན་འདི་བཏབ་ལོ་ཏན་ཏན་མ་ཤེས་པས་རྗེས་སུ་བཀོད་པ་ཞུ། །
མདོར་ན་རྣམ་མཁྱེན་ཀུན་གྲོལ་གྲགས་པ་ནས། །ཡང་སྲིད་དྲུག་པ་ཧཱུྃཿཆེན་བླ་མ་དང་།། གཏེར་སྲས་དམ་པ་ཚོགས་གཉིས་རྒྱ་མཚོ་ཡན།། རིག་འཛིན་རྣམ་སྤྲུལ་སྐྱེས་མཆོག་རིམ་བྱོན་བཅས། །མཛད་པ་འཕྲིན་ལས་རྣམ་ཐར་བརྗོད་ལས་འདས།། བསིལ་ལྗོངས་སྟོད་སྨད་བར་དང་རྒྱ་ནག་ཡན།། སྒྲུབ་བརྒྱུད་འཛིན་པའི་དབེན་དགོན་དུ་མ་བཏབ།། གསེར་འཕྲུ་ཅན་གྱི་ལྷ་ཁང་མང་པོ་བསྐྲུན།། བྱིན་ལྡན་སྐུ་གསུང་ཐུགས་རྟེན་ཇི་སྙེད་བཞེངས།། ཟབ་མོའི་གཏེར་ཁ་མང་པོའི་ཞལ་ཡང་ཕྱེས།། བསྟན་འགྲོའི་དོན་ནུས་སློབ་ཚོགས་གྲངས་འདས་སྤེལ།། དབང་ལུང་མན་ངག་གདམས་པའི་ཆར་ཆེན་ཕབ།། འབྲེལ་ཐོབ་སེམས་ཅན་ཐར་བའི་ལམ་ལ་བཀོད།། ལེགས་བཤད་ལ་སོགས་སྲོལ་བཟང་འབྱེད་པ་མང་།། ལྷ་འདྲེ་དམ་བཞག་སྡེ་བརྒྱད་བྲན་དུ་བཀོལ།། འགྲོ་ཀུན་སྨིན་གྲོལ་ལམ་ལ་བཀོད་པར་མཛད།། བསྟན་དང་འགྲོ་དོན་བསམ་མཐའ་ཡས་པའོ།།

དེ་ལྟར་བསྟན་འགྲོའི་དོན་ཟིན་ནས་རབ་བྱུང་ ༡༧ བའི་རྒྱལ་བ་ཞེས་པ་ཤིང་ཕོ་རྟ་སྟེ་ཕྱི་ལོ་ ༡༠༡༤ ཟླ་ ༩ པའི་ཚེས་ ༡༣ ཆད་པས་ཚེས་ ༡༦ གཟའ་པ་སངས་ཉིན་རྒྱ་ནག་སྨོན་དགོན་གཡུང་དྲུང་ལྷ་རྩེར་དགོངས་པ་བོན་ཉིད་དབྱིངས་སུ་བསྡུས་སོ། ཞེས་དམ་པའི་རྟོགས་བརྗོད་རང་ཅག་ལྟ་བུས་འབྲི་བར་མི་འོས་ཀྱང་། ཉུང་ངུ་ཟིན་ཐོ་ཙམ་འདི་ད་ལན་རྗེས་བཟུང་སློབ་ཚོགས་ཡོངས་ཀྱིས་རྗེས་དྲན་གྱི་དེབ་ཆུང་ཞིག་ཕུད་རྒྱུའི་འཆར་གཞི་ལ་བརྟེན་ནས་གཡུང་དྲུང་བོན་གྱི་གདན་ས་ཆེན་མོ་རྒྱ་གར་སྨན་རི་དགོན་པར་གྲྭ་སར་ཡོད་པའི་གྲྭ་གཡུང་དྲུང་བོན་རྒྱལ་དང་གཞན་བརྩོན་འགྲུས་བཟང་པོ་དང་རིན་ཆེན་དོན་འགྲུབ་བཅས་ཀྱིས་སྐད་འཕྲིན་ལམ་ནས་ནན་བསྐུལ་གནང་བཞིན་དམ་པ་ཁོང་གི་ཞབས་རྡུལ་སྤྱི་བོར་ལེན་པའི་གྲྭ་ཆུང་ཚེ་དབང་དངོས་གྲུབ་ཀྱིས་གདན་ས་ཆེན་མོ་གོ་ལམ་བཤད་སྒྲུབ་གཡུང་དྲུང་གླིང་ནས་རབ་བྱུང་ ༡༧ རྒྱལ་བ་ཤིང་རྟའི་ཟླ་ ༡༠ བའི་ཚེས་༢༦ ཉིན་བྲིས་པ་རེ་ཞིག་རྫོགས་སོ་འགལ་འཁྲུལ་ཡོད་རིགས་རྒྱལ་བའི་སྤྱན་སྔར་མཐོལ་བཤགས་བཟོད་གསོལ་ཞུ། །བཀྲ་ཤིས། །

1,658 total views, 1 views today



མདོ་སྔགས་ཟུང་འབྲེལ་ཐེག་ཆེན་གཡུང་དྲུང་བོན།

མདོ་སྔགས་ཟུང་འབྲེལ་ཐེག་ཆེན་གཡུང་དྲུང་བོན་ཞེས་པའི་མཚོན་དོན་མདོར་བསྡུས། དེ་ཡང་གཡུང་དྲུང་གཉིས་ནི་འདུལ་བ་མདོ་ཡི་སྡེ་དང༌། གསང་བ་ཟབ་དཀར་སྔགས་ཀྱི་སྡེ་གཉིས་མཚོན་པར་བྱེད་པ་ད ང༌། བར་གྱི་ལྕུམ་བཞོགས་དེ་ནི་ཐེག་པའི་ཡོངས་རྩེ་རྫོགས་པ་ཆེན་པོ་སེམས་ཀྱི་སྡེ་བཅས་མདོར་ན་མི་ལོ་ཆིག་ཁྲི་བརྒྱད་སྟོང་གི་གོང་དུ་བྱོན་པའི་རྣམ་འདྲེན་ཚེ་ལོ་བརྒྱ་བའི་སྟོན་མཆོག་རྫོགས་པའི་སངས་རྒྱས་རྒྱལ་བ་གཤེན་རབ་མི་བོ་མཆོག་གིས་གཏན་ལ་ཕབས་པའི་བོན་སྒོ་བཞི་མཛོད་ལྔའམ་ཐེག་པ་རིམ་དགུ་མཚོན་པར་བྱེད་དོ།

གཡུང་དྲུང་བོན་གྱི་དྲྭ་རྒྱ་ངོ་སྤྲོད།

གཡུང་དྲུང་བོན་གྱི་དྲྭ་ཚིགས་ཆེན་མོ་འདི་ནི་༧སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཆོག་གི་བཀའ་འཁྲོལ་གཞིར་བཟུང་འོག་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་སྟངས་ འཛིན་འོག་ཆེད་དུ་གསར་སྒྲུབ་བྱས་པའི་བོད་གནའ་བོའི་རིག་གཞུང་སྣ་ཚོགས་དང་འབྲེལ་བའི་གཡུང་དྲུང་བོན་སྤྱི་བའི་དྲྭ་ཚིགས་ཤིག་ཡིན།