གལ་ཆེན་གསལ་བསྒྲགས།

2༄༅།།རྒྱ་ཆེའི་དད་ལྡན་ཀུན་གྱི་དྲུང་དུ་གསལ་བསྒྲགས་ཞུ་རྒྱུར།
མཁྱེན་གསལ་ལྟར་ཁ་སྔོན་ཕྱི་ལོ་༢༠༡༦ ཟླ་གཉིས་པའི་ནང་༧སྐྱབས་རྗེ་༧རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་སྐུ་ཁམས་འཕྲོད་བསྟེན་ཆེད་འདི་ག་ཨ་རིའི་ནིའུ་ཡོག་ཏུ་༧ཞྭ་དཀར་གཡུང་དྲུང་བོན་སྲི་ཞུ་ཚོགས་པ་སྟེ་བོན་གཤེན་གླིང་ནས་སྨན་སྦྱོར་འཕྲོད་བསྟེན་ཆེད་གདན་འདྲེན་ཞུས་དོན་ལྟར་སྐབས་དེར་ཕེབས་པ་ནས་བཟུང་སྐུ་ཁམས་གསལ་དྭངས་ཀྱི་གནས་ཚུལ་རྣམས་དུས་ནས་དུས་སུ་ཞུས་པ་ལྟར་ལགས་ཤིང་རྣམ་པ་ཚང་མའི་ཐུགས་ཁུར་ཟབ་རྒྱས་གནང་བ་མ་ཟད་གང་ན་སུ་བཞུགས་ཀྱི་སྐྱེས་ཆེན་གཤེན་རབས་གཡུང་དྲུང་སེམས་དཔའི་སྡེ་དང་ལས་སྨོན་གྱི་འབྲེལ་བའི་ལྷ་སྡེ་མི་སྡེ་ཡོངས་ནས་མཆོག་གསུམ་དམ་ཅན་རྒྱ་མཚོ་ལ་གསོལ་འདེབས་འཕྲིན་བཅོལ་དང་།

ཡི་དམ་སྣ་ཚོགས་ཀྱི་་བསྙེན་སྒྲུབ། གལ་ཆེའི་སྲུང་མའི་འབུམ་ཚོགས། སྐུ་ཕྱྭའི་གེག་སེལ་ཞབས་རིམ་ཚཱ་ཚཱ་ཉེའུ་གདོན་ལ་སོགས། ཞབས་རིམ་རྒྱ་ཆེར་བགྱིས་པའི་ནུས་མཐུ་དང་ལས་སྨོན་དམ་ཚིག་བཟང་པོའི་རྐྱེན་གྱིས་འདི་ག་ཡང་དུས་ཐོག་ཏུ་ཕུལ་བྱུང་སྨན་པས་སྨན་བཅོས་ཀྱི་འགན་ཆ་ཚང་བཞེས་པ་དང་སྐུ་གཟུགས་གསལ་བསྐྱེད་ལ་འཕྲོད་པའི་སྨན་རིགས་བཟང་ཤོས་གང་མང་མང་གི་མཐུན་རྐྱེན་སྦྱར་བ་སོགས་བློ་ཡུལ་ལས་འདས་པའི་གྲུབ་འབྲས་ཐོན་ཡོད་པ་མ་ཟད་ཟླ་བ་དྲུག་གི་རིང་ལ་སྨན་བཅོས་ལེགས་གྲུབ་བྱུང་བར་རྣམ་པ་ཚང་མ་ལ་རྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་།

ད་ལྟའི་ཆར་སྐུ་ཡི་སྨན་པ་མཆོག་ནས་ཀྱང་༧ཁྲི་འཛིན་རིན་པོ་ཆེའི་སྐུ་གཟུགས་གསལ་ཐང་ཡིན་པས་ཐུགས་ལྷོད་ལྷོད་བཞུགས་ཆོག་པའི་གནས་ཚུལ་བཟང་པོ་བྱུང་དོན་ལྟར། ད་ལམ་ཕྱི་ལོ་༢༠༡༦ཟླ་ བརྒྱད་པའི་ཡར་ཚེས་ལ་ཨ་རིའི་བོན་གཤེན་གླིང་ནས་རྒྱ་གར་༧དཔལ་གཤེན་བསྟན་སྨན་རིའི་གླིང་དུ་ཕེབས་འཆར་ལགས་ན་དེ་དོན་བཞིན་ཚང་མར་ཞུ་ཧམ་དུ་མ་དགོངས་པར་ཐུགས་སྨོན་དང་གསོལ་འདེབས་ཐུགས་རྗེའི་ཀློང་ནས་མི་འདོར་བ་མཁྱཻན་ཞུ།།
ཨ་རིའི་བོན་གཤེན་གླིང་ནས་སྐྱོང་སྤྲུལ་མིང་བས།

1,994 total views, 1 views today



མདོ་སྔགས་ཟུང་འབྲེལ་ཐེག་ཆེན་གཡུང་དྲུང་བོན།

མདོ་སྔགས་ཟུང་འབྲེལ་ཐེག་ཆེན་གཡུང་དྲུང་བོན་ཞེས་པའི་མཚོན་དོན་མདོར་བསྡུས། དེ་ཡང་གཡུང་དྲུང་གཉིས་ནི་འདུལ་བ་མདོ་ཡི་སྡེ་དང༌། གསང་བ་ཟབ་དཀར་སྔགས་ཀྱི་སྡེ་གཉིས་མཚོན་པར་བྱེད་པ་ད ང༌། བར་གྱི་ལྕུམ་བཞོགས་དེ་ནི་ཐེག་པའི་ཡོངས་རྩེ་རྫོགས་པ་ཆེན་པོ་སེམས་ཀྱི་སྡེ་བཅས་མདོར་ན་མི་ལོ་ཆིག་ཁྲི་བརྒྱད་སྟོང་གི་གོང་དུ་བྱོན་པའི་རྣམ་འདྲེན་ཚེ་ལོ་བརྒྱ་བའི་སྟོན་མཆོག་རྫོགས་པའི་སངས་རྒྱས་རྒྱལ་བ་གཤེན་རབ་མི་བོ་མཆོག་གིས་གཏན་ལ་ཕབས་པའི་བོན་སྒོ་བཞི་མཛོད་ལྔའམ་ཐེག་པ་རིམ་དགུ་མཚོན་པར་བྱེད་དོ།

གཡུང་དྲུང་བོན་གྱི་དྲྭ་རྒྱ་ངོ་སྤྲོད།

གཡུང་དྲུང་བོན་གྱི་དྲྭ་ཚིགས་ཆེན་མོ་འདི་ནི་༧སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཆོག་གི་བཀའ་འཁྲོལ་གཞིར་བཟུང་འོག་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་སྟངས་ འཛིན་འོག་ཆེད་དུ་གསར་སྒྲུབ་བྱས་པའི་བོད་གནའ་བོའི་རིག་གཞུང་སྣ་ཚོགས་དང་འབྲེལ་བའི་གཡུང་དྲུང་བོན་སྤྱི་བའི་དྲྭ་ཚིགས་ཤིག་ཡིན།