རྗེ་འགྲོ་བའི་མགོན་པོ་མཉམ་མེད་ཆེན་པོ་ཤེས་རབ་རྒྱལ་མཚན་གྱི་སྐུ་བསྟོད་བཞུགས།

DSC00074PICT0384 (1)

སྐྱབས་མཆོག་དམ་པ་མཉམ་མེད་འགྲོ་བའི་མགོན། །མཁས་གྲུབ་དུ་མའི་གཙུག་རྒྱན་རིན་པོ་ཆེ། །

ཐོས་བསམ་བསྒོམ་བསྒྲུབས་ཉན་བཤད་སྲོལ་ཆེན་བཙུགས། །བསྟན་པའི་མངའ་བདག་མཁས་གྲུབ་སྤྱན་གཅིག་པ། །

རྗེ་བཙུན་བླ་མའི་ཞབས་ལ་གསོལ་བ་འདེབས། །ཤེས་བྱ་ཀུན་གསལ་མཁས་མཆོག་ཕུལ་དུ་ཕྱིན། །

རབ་འབྱམས་གནས་ལྔ་རིག་པའི་པཎྚི་ཏ། །རྒྱལ་བའི་རྒྱལ་ཚབ་མཁས་གྲུབ་རིན་པོ་ཆེ། །

མཚན་ལྡན་འགྲོ་བའི་མགོན་པོ་སྤྱན་གཅིག་པ། །རྗེ་བཙུན་བླ་མའི་ཞབས་ལ་གསོལ་བ་འདེབས། །

ཡོངས་འཛིན་མཁས་མང་རྒྱ་མཚོའི་ཐུགས་བཅུད་བླངས། །འཆད་རྩོད་རྩོམ་གསུམ་རིག་པའི་ཚ་ཟེར་གྱིས། །

སྡེ་སྣོད་གསུམ་ལ་བློ་གྲོས་སྤོབས་པ་ཐོབ། །ལུང་རིགས་དབང་ཕྱུག་མཁས་གྲུབ་སྤྱན་གཅིག་པ། །

རྗེ་བཙུན་བླ་མའི་ཞབསལ་གསོལ་འདེབས། །འདུལ་ཁྲིམས་བསླབ་བྱའི་མངའ་བདག་དྲང་སྲོང་རྒྱལ། །

ཟབ་ལམ་སྔགས་ཀྱི་བདག་ཉིད་གསང་འདུས་གཤེན། །གནས་ལུགས་རྫོགས་ཆེན་དོན་རྟོགས་ཀུན་ཏུ་བཟང་། །

རྒྱུད་གསུམ་མངའ་བདག་མཁས་གྲུབ་སྤྱན་གཅིག་པ། །རྗེ་བཙུན་བླ་མའི་ཞབས་ལ་གསོལ་བ་འདེབས། །

འདྲེན་པ་ཆེན་པོ་མཚུངས་མེད་བཀའ་དྲིན་ཅན། །རབ་འབྱམས་མཆོད་སྤྲིན་ནམ་མཁའ་གང་བས་མཆོད། །

དུག་ལྔའི་དབང་གྱུར་མི་དགེའི་ལས་རྣམས་བཤགས། །བདག་སོགས་འགྲོ་ཀུན་ཐུགས་རྗེས་རྒྱུན་བཟུང་ནས། །

བསླབ་གསུམ་བསྟན་པའི་སྲོག་ཤིང་འཛུག་པར་ཤོག །

ཅེས་ལྔ་བརྒྱའི་འདྲེན་མཆོག་མཉམ་མེད་སེམས་དཔའ་ཆེན་པོས་ས་གསུམ་འགྲན་ཟླ་དང་བྲལ་བའི་རྗེ་བཙུན་སྨན་རི་བ་ལ་མཆོད་པར་བརྗོད་པའི་ཚུལ་འདི་ནི། ཉིད་ཀྱི་བཀའ་དྲིན་རྗེས་སུ་དྲན་པ་ལ་བརྟེན་ནས། སློབ་འབངས་མངའ་རིས་བསོད་ནམས་རྒྱལ་མཚན་གྱིས་ཕུལ་བ་དགེ་ལེགས་འཕེལ། དགེའོ། །

490 total views, 2 views today



མདོ་སྔགས་ཟུང་འབྲེལ་ཐེག་ཆེན་གཡུང་དྲུང་བོན།

མདོ་སྔགས་ཟུང་འབྲེལ་ཐེག་ཆེན་གཡུང་དྲུང་བོན་ཞེས་པའི་མཚོན་དོན་མདོར་བསྡུས། དེ་ཡང་གཡུང་དྲུང་གཉིས་ནི་འདུལ་བ་མདོ་ཡི་སྡེ་དང༌། གསང་བ་ཟབ་དཀར་སྔགས་ཀྱི་སྡེ་གཉིས་མཚོན་པར་བྱེད་པ་ད ང༌། བར་གྱི་ལྕུམ་བཞོགས་དེ་ནི་ཐེག་པའི་ཡོངས་རྩེ་རྫོགས་པ་ཆེན་པོ་སེམས་ཀྱི་སྡེ་བཅས་མདོར་ན་མི་ལོ་ཆིག་ཁྲི་བརྒྱད་སྟོང་གི་གོང་དུ་བྱོན་པའི་རྣམ་འདྲེན་ཚེ་ལོ་བརྒྱ་བའི་སྟོན་མཆོག་རྫོགས་པའི་སངས་རྒྱས་རྒྱལ་བ་གཤེན་རབ་མི་བོ་མཆོག་གིས་གཏན་ལ་ཕབས་པའི་བོན་སྒོ་བཞི་མཛོད་ལྔའམ་ཐེག་པ་རིམ་དགུ་མཚོན་པར་བྱེད་དོ།

གཡུང་དྲུང་བོན་གྱི་དྲྭ་རྒྱ་ངོ་སྤྲོད།

གཡུང་དྲུང་བོན་གྱི་དྲྭ་ཚིགས་ཆེན་མོ་འདི་ནི་༧སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཆོག་གི་བཀའ་འཁྲོལ་གཞིར་བཟུང་འོག་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་སྟངས་ འཛིན་འོག་ཆེད་དུ་གསར་སྒྲུབ་བྱས་པའི་བོད་གནའ་བོའི་རིག་གཞུང་སྣ་ཚོགས་དང་འབྲེལ་བའི་གཡུང་དྲུང་བོན་སྤྱི་བའི་དྲྭ་ཚིགས་ཤིག་ཡིན།