གཡུང་དྲུང་བོན་གྱི་དྲྭ་རྒྱ།

ཁྱུང་པོ་རི་བོ་རྩེ་དྲུག་དགོན་གྱི་དམྱལ་འཆམ་ཆེན་མོའི་གནས་བསྡུས།

DPLX3944IMG_9488

༧ཞང་ཞུང་སྒོ་པའི་ལྟེ་གནས་ཁྱུང་པོ་༧རི་བོ་རྩེ་དྲུག་དགོན་སུམ་པ་གླང་གི་གྱིམ་ཤོད་ཤེལ་ལེ་རྒྱ་སྐར་གླིང་དུ་དམྱལ་འཆམ་ངན་འགྲོའི་སྒོ་གཅོད་དང་ཁྲོ་བོའི་སྨན་སྒྲུབ་ཆེན་མོ་ཞང་བོད་རིག་གཞུང་འཆད་རྩོད་ཆེན་མོ་བཅས་མཛད་སྒོ་ཆེན་མོ་ཁག་གསུམ་ཞག་ཉེར་གཉིས་ཀྱི་རིང་དུ་སྤེལ་བ་སྟེ།

IMG_9350IMG_9351

དེ་ཡང་སྒྲུབ་ཞག་ཉེར་གཅིག་གི་རིང་སྨིན་གྲོལ་ཚོགས་ཆེན་འདུ་ཁང་གི་ཡང་ཐོག་ཏུ་སྐྱབས་གནས་སེམས་དཔའ་དགེ་འདུན་པ་བརྒྱ་ལ་ཉེ་བས་ཁྲོ་བོའི་སྨན་སྒྲུབ་འོད་ཟེར་འཁྱིལ་བའི་གྱེར་འཕྲིན་སོགས་ལག་ལེན་ཚུལ་མཐུན་ཞུས་པ་དང་།  དུས་མཚུངས་སུ་ཕྱི་ལོ་༢༠༡༧ཟླ་༧པའི་ཚེས་༢ནས་༧བར་ཉིན་གྲངས་དྲུག་གི་རིང་རྒྱུན་ལྡན་ལྟར་དུས་མཆོད་རིག་འཛིན་འདུས་པའི་དབྱར་སྒྲུབ་ཆེན་མོ་ཟབ་རྒྱས་ཚོགས་ཤིང་།

IMG_3921༠༣

ཕྱི་ཚེས་༩ནས་༡༨བར་ཉིན་གྲངས་བཅུའི་རིང་དུ་སྨིན་གྲོལ་ཚོགས་ཆེན་འདུ་ཁང་ཆེན་མོའི་ནང་༼ཞང་བོད་རིག་གཞུང་འཆད་རྩོད་ཆེན་མོ་༽འཚོགས་ཏེ། ཉིན་དང་པོར་ཁྱུང་པོ་༧རྩེ་དྲུག་དགོན་དུ་བཤད་སྒྲུབ་འདུས་སྡེ་དབུ་བརྙེས་ནས་མི་ལོ་སུམ་ཅུ་འཁོར་བའི་དུས་དྲན་གྱི་མཛད་སྒོའི་ཐོག་རྩེ་དྲུག་བསྟན་པའི་བདག་ཉིད་༧བསྟན་འཛིན་འོད་ཟེར་རིན་པོ་ཆེ་ནས་འདུས་གྲྭ་ཡོངས་ལ་སྐབས་བབས་ཀྱི་འཆད་རྩོད་ཆེན་མོའི་ཁ་ཕྱོགས་དང་། འདུས་སྡེ་སྤྱི་ལ་མཐུན་འབྲེལ་དགོས་སྐོར་གྱི་བཀའ་སློབ་ལམ་སྟོན་གནང་ཞིང་།  ༧སློབ་དཔོན་ལུང་རྟོགས་བསྟན་པའི་རྒྱལ་མཚན་མཆོག་གིས་ཀྱང་བཤད་སྒྲུབ་འདུས་སྡེ་དབུ་བརྙེས་ནས་རིམ་བཞིན་འཕེལ་རྒྱས་སོང་ཚུལ་སོགས་ངོ་སྤྲོད་ཟབ་རྒྱས་གནང་།  ཉིན་དེ་ནས་བཟུང་མདོ་དབུས་ཁམས་གསུམ་ནས་ཕེབས་པའི་བཤད་གྲྭ་བ་རྣམས་ཕྱི་དྲོར་རེས་མོལ་གྱི་དམ་བཅའ་དང་།  དགོང་མོར་ཐུན་མོང་མཉམ་འཛོམས་ཀྱིས་རྩོད་དང་རྩོད་སྤོང་གིས་དགག་སྒྲུབ་ལེགས་པར་གནང་བ་དང་། ཕྱི་ཚེས་༡༨ཉིན་གྱི་ཕྱི་དྲོར་སྨིན་གྲོལ་ཚོགས་ཁང་ཆེན་མོའི་མདུན་ཐང་འཆམ་ར་ཆེན་མོའི་ནང་དུ་དགག་བཞག་སྤོང་གསུམ་གྱི་དམ་བཅའ་ཆེན་མོ་ཟབ་རྒྱས་ངང་ཚོགས་ཡོད། ད་ལན་གྱི་འཆད་རྩོད་བྱ་ཡུལ་གཙོ་བོའི་གཞུང་ནི་ཐེག་འགྲེལ་མེ་ལོང་དགུ་སྐོར་ལས་རྒྱུ་ཐེག་སྐོར་ཡིན་ལ། ཚོགས་ཞུགས་སུ་བན་བོན་རིས་སུ་མ་ཆད་པའི་བཤད་གྲྭའི་དགེ་སློབ་སྟོང་ཕྲག་ལས་བརྒལ་བར་མཉམ་ཞུགས་གནང་སྟེ།  ང་ཚོའི་ཁོར་ཡུག་གི་དབང་དུ་བྱས་ན་རིག་ལམ་འཕེལ་རྒྱས་ཀྱི་ཁ་ཕྱོགས་ཙམ་མ་ཡིན་པར་ཕན་ཚུན་རྒྱུས་མངའ་དང་འབྲེལ་འདྲིས་ཞི་མཐུན་མཉམ་འཛོམས་ཀྱི་ལེའུ་གསར་པ་ཞིག་ཏུ་ཆགས་ཡོད། ཞོར་དུ་༧སྐྱབས་རྗེ་མཁན་སློབ་གཤེན་གསུམ་གཙོས་བསྟན་འཛིན་སྐྱེས་ཆེན་ཡོངས་ཀྱི་མཛད་འཕྲིན་གེགས་མེད་ལྷུན་གྱིས་འགྲུབ་པ་དང་།  འགྲོ་ཁམས་བདེ་སྐྱིད་ཀྱི་དཔལ་ལ་ལོངས་སུ་སྤྱོད་སོགས་ཀྱི་ཆེད་དུ་དམིགས་ནས་སྲིད་རྒྱལ་དྲག་སྔགས་དབལ་མོའི་འབུམ་ཚོགས་རྒྱས་འབུལ་དང་།  བཤད་གྲྭའི་ཚོགས་ཁང་ཆེན་མོའི་ནང་གཤེན་རབ་རྣམ་པར་རྒྱལ་བའི་ཁྲི་མཆོད་དང་། སྒྲུབ་གྲྭའི་ཚོགས་ཁང་དུ་ཁྲོ་བོ་ངོ་མཚར་རྒྱས་པའི་སྲུང་ཟློག་དང་།  གྲཱ་ཚང་གི་ཚོགས་ཁང་ཁྲོ་སྐྱབས་ལྷ་ཁང་ནང་དུ་ཞི་ཁྲོ་དགོངས་པ་ཀུན་འདུས་ཀྱི་ཁྲི་མཆོད་སོགས་རྒྱས་འབུལ་མཛད་ཡོད།

6IMG_9516

ཕྱི་ཚེས་༡༧ཉིན་དམུ་རིགས་གཤེན་གྱི་གདུང་སྲས་གཡུང་དྲུང་རང་གྲོལ་ཉི་མ་རིན་པོ་ཆེ་མཆོག་དང་གཡུང་དྲུང་གླིང་གི་མཁན་རིན་པོ་ཆེ་དང་སྨན་རིའི་དཔོན་སློབ་ཟུར་པ་སྐལ་བཟང་ཉི་མ་རིན་པོ་ཆེ་མཆོག་རྣམ་པ་གསུམ་གཙོས་པའི་མདོ་དབུས་ཁམས་གསུམ་ནས་ཕེབས་པའི་བླ་སྤྲུལ་བཤེས་གཉེན་བཅུ་ཕྲག་གསུམ་ལས་བརྒལ་བར་ཅང་ཤེས་ཀྱི་རྟ་ཕོ་དང་མགྱོགས་པའི་འཕྲུལ་འཁོར་འདུས་མང་གི་སེར་ཕྲེང་སྙན་པའི་རོལ་མོ་སོགས་ཀྱིས་སྣ་དྲངས་ཏེ།   སྨིན་གྲོལ་ཚོགས་ཆེན་འདུ་ཁང་ནང་དུ་མི་འཇིགས་གདོང་ལྔས་བཏེགས་པའི་གསེར་གྱི་ཁྲི་འཕང་ལ་མངའ་གསོལ་ཞིང་།  གླིང་བཞི་མཁན་སློབ་རྣམ་པ་དབུས་པའི་མང་འདུས་སེམས་དཔའ་རྒྱ་མཚོས་མནྜལ་སྐུ་གསུང་ཐུགས་རྟེན་འདེགས་འབུལ་ཞུས་མཐར་མཇལ་ཁ་ཞུས། ཕྱི་ཚེས་༡༩ཉིན་ལོ་ལྟར་འཆར་ཅན་གྱི་སྔར་སྲོལ་རྒྱུན་འཆམ་བཅོ་ལྔ་ལྷག་དད་ལྡན་མང་ཚོགས་ལ་གཟིགས་མོར་ཕུལ་བ་དང་།

IMG_9513IMG_9470

ཕྱི་ཚེས་༢༠ཉིན་༼དམྱལ་འཆམ་ངན་འགྲོའི་སྒོ་གཅོད་༽དངོས་སུ་དབུ་བཙུགས་ཏེ་དཀར་ནག་ལས་ཀྱི་འཕེན་པ་བཟང་ངན་གཉིས་ལ་ལྟོས་ཏེ་ལས་ངན་པ་བསགས་པའི་ཚེ་འདས་རྣམས་ངན་འགྲོ་རུ་ལྟུང་བ་དང་། ལས་བཟང་པོ་བསགས་པའི་ཚེ་འདས་རྣམས་དག་པའི་བདེ་ཆེན་གྱི་ཞིང་དུ་སྐྱེ་བ་སོགས་ཀྱི་རྣམ་པ་མཚོན་པའི་གར་འཆམ་སྡེ་ཚན་མི་འདྲ་བ་བཅུ་སྟེ།  བླ་མ་ཆོས་ཡོད་ཆོས་མེད་གཉིས། གྲྭ་པ་ཆོས་ཡོད་ཆོས་མེད་གཉིས། དཔོན་པོ་ཆོས་ཡོད་ཆོས་མེད་གཉིས། སྐྱེས་པ་ཆོས་ཡོད་ཆོས་མེད་གཉིས། བུད་མེད་ཆོས་ཡོད་ཆོས་མེད་གཉིས་བཅས་ཁྱོན་ཚེ་འདས་མི་གྲངས་བཅུའི་འཁྲབ་ཚན་ལེགས་པར་གྲུབ་རྗེས།

IMG_3918a

ཕྱི་ཚེས་༢༡ཉིན་སྔར་གྱི་ཚུལ་སྟོན་པའི་བོན་མེད་ངན་འགྲོར་ལྟུང་བའི་སྡིག་ཅན་ལྔ་པོ་རྣམས་གཙོས་མ་དག་འཁོར་བར་འཁྱམས་པའི་སེམས་ཅན་ཐམས་ཅད་རྫོགས་བྱང་འཐོབ་པའི་ཕྱིར་དུ་༧དམུ་རིགས་གཤེན་གྱི་གདུང་སྲས་གཡུང་དྲུང་རང་གྲོལ་ཉི་མ་རིན་པོ་ཆེ་དབུ་བཞུགས་ཐོག་བླ་སྤྲུལ་བཅུ་ཕྲག་ལྷག་གིས་ཞི་ཁྲོའི་གནས་འདྲེན་བྱང་ཆོག་གི་གཞུང་བསྲང་ཞིང་བླ་གླུད་གཤེད་ཕྲལ་གྱི་གར་འཆམ་དང་སྦྲགས་བླ་མའི་ཐུགས་རྗེ་དང་། ཚེ་འདས་ཀྱི་དད་ཤུགས།  སངས་རྒྱས་ཀྱི་བཀའ་བདེན་པ་སོགས་ལ་བརྟེན་ནས་ཁམས་གསུམ་འཁོར་བའི་ས་ནས་གཡུང་དྲུང་ཐེག་པའི་ས་རུ་ས་བཅུ་གནམ་ཟམ་ཐོག་རིམ་པར་བགྲོད་ཚུལ་ཀྱི་མཐར་འཁོར་གསུམ་དམིགས་མེད་ཀྱི་ལ་བཟླ་སྤར་ཆོག་དང་བྱང་བཞུ་སོགས་མཛད་ཅིང་སྐུ་གསུམ་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་རྟེན་འབྲེལ་དང་རྣམ་པ་མཚོན་པའི་ཞི་ཁྲོའི་གནས་འདྲེན་རྒྱས་པར་མཛད་ཡོད།

IMG_9490IMG_9420

ཕྱི་ཚེས་༢༢ཉིན་དམུ་རིགས་གཤེན་གྱི་གདུང་སྲས་གཡུང་དྲུང་རང་གྲོལ་ཉི་མ་རིན་པོ་ཆེ་དབུ་བཞུགས་ཐོག་བླ་མ་དགེ་བཤེས་བརྒྱ་ཕྲག་ལས་བརྒལ་བས་དད་ལྡན་མཇལ་སྐོར་བ་འབུམ་ཕྲག་མ་ཟིན་ཙམ་ལ་བཀའ་དབང་ཟབ་མོ་བསྐུར་ཞིང་། ཁ་ལ་རག་ཆོག་གི་བདུད་རྩི་སྨན་གྱི་སྦྱིན་པ་རྒྱ་ཆེར་བཀྱེས། ཕྱི་ཚེས་༢༣ཉིན་གྱི་སྔ་དྲོར་སྨིན་གྲོལ་ཚོགས་ཆེན་འདུ་ཁང་ཆེན་མོའི་མདུན་དུ་བླ་སྤྲུལ་བཤེས་གཉེན་དགེ་འདུན་རྣམས་མཉམ་འཛོམས་ཀྱིས་ཁྲོ་བོའི་རྗེས་བྱ་བཀྲ་ཤིས་ཀྱི་མཛད་སྒོའི་ཞལ་ཕྱེས་ཏེ། གྲྭ་མང་དགེ་འདུན་སེམས་དཔའ་རྒྱ་མཚོ་རེ་རེའི་ཕྱག་ཏུ་སྒྲུབ་བའི་གཏང་རག་གི་ཚུལ་དུ་སྨན་དང་།  ཤོག་དངུལ།  བཀྲ་ཤིས་པའི་ཁ་བཏགས།  སྤོས་སོགས་ཕུལ་ཏེ། མདོར་ན་ད་ལན་མཛད་སྒོ་ཆེན་མོ་འདིའི་འགོ་མཇུག་བར་གསུམ་དུ་གོང་གི་རྒྱལ་ཁབ་ཀྱི་དབུ་ཁྲིད་རྣམས་དང་། རྩེ་དྲུག་དགོན་གྱི་བསྟན་བདག་བླ་མ་རྣམ་གཉིས་དེ་བཞིན་རྩེ་དྲུག་བསྟན་པའི་གསལ་བྱེད་མཁན་སློབ་རྣམ་བཞི།  སྟངས་འཛིན་གྱི་གཞུང་ལས་རྣམ་པ།  གནས་སྐབས་ཀྱི་ལས་སྣེ་རྣམ་པ།  སྟ་གོན་གྱི་གོ་སྒྲིག་ཚོགས་ཆུང་། དགེ་ཚོགས་སུ་གཏོང་ཕོད་ཆེ་བའི་སྦྱིན་བདག་རྣམ་པ་བཅས་ཀྱི་ཕྱར་གྲུ་མཉམ་འདེགས་ཀྱི་མཐུ་དཔུང་སྡོང་གྲོགས་གནང་བའི་བཀའ་དྲིན་ཉག་ཅིག་ལ་བརྟེན་ནས་ཁ་དགེ་བཀྲ་ཤིས་ཞི་བདེ་བག་དྲོའི་ངང་འགོ་མཇུག་ཡོངས་སུ་ཚང་བ་ལེགས་པར་གྲུབ་བ་ནི་ང་ཚོ་ཐུན་མོང་ནས་མི་ཚེ་གཅིག་ནང་བྱ་བ་བཟང་པོ་འདི་ལྟ་བུར་ཐེངས་གཅིག་བསགས་པའི་གོ་སྐབས་རག་སོང་སྙམ་པའི་དགའ་སྤྲོ་དང་བཅས་གང་ཞིག་མཆིས་པའི་དགེ་རྩ་རྣམས་འགྲོ་ཁམས་ཡོངས་ཀྱི་བདེ་བའི་གསོས་སུ་འགྱུར་བའི་སྨོན་ལམ་དང་བཅས།

༧དཔལ་གཤེན་བསྟན་ཁྱུང་པོ་རི་བོ་༧རྩེ་དྲུག་དགོན་གྱི་སྒྲུབ་ཆེན་གོ་སྒྲིག་ཚོགས་པ་ནས་༢༠༡༧།༠༧།༢༣ ཉིན་སྤེལ།

IMG_9401IMG_9389

རྩེ་དྲུག་“དམྱལ་འཆམ་ངན་འགྲོའི་སྒོ་གཅོད་དམ་”ཞི་ཁྲོའི་ཁྲིད་ཆེན་གྱི་གར་འཆམ་ནི།

IMG_9462IMG_9431

ཞང་ཞུང་སྒོ་པའི་ལྟེ་གནས་ཁྱུང་པོ་རྩེ་དྲུག་དགོན་སུམ་པ་གླང་གི་གྱིམ་ཤོད་ཤེལ་ལེ་རྒྱ་སྐར་གླིང་གི་ལོ་འཁོར་བཅུ་གཉིས་རེར་ཐེངས་རེ་འཚོགས་པའི་སྲོལ་རྒྱུན་གྱི་དུས་ཆེན་གལ་ཆེན་ཞིག་ཡིན་ལ། འདི་ནི་ལོ་རྒྱུས་ཀྱི་ཕུགས་ཐག་རིང་ཞིང་གནས་ལུགས་ཀྱི་གཏན་ཚིགས་ཟབ་པའི་ཞང་བོད་ཤེས་རིག་གི་ཉིང་བཅུད་དེ།  ཞི་ཁྲོ་དམ་པ་རིགས་བརྒྱའི་གཞུང་ལུགས་ལ་ཕུགས་བཅོལ་ཞིང་། ལས་འབྲས་ཀྱི་རྣམ་བཞག་འབུར་དུ་དོད་པར་བསྟན་པའི་ཆོས་ལུགས་ཀྱི་གར་འཆམ་ཆེ་ཤོས་ཤིག་ཡིན།  དེ་ཡང་ཁྲོ་བོ་གཙོ་མཆོག་མཁའ་འགྱིང་གི་སྤྲུལ་པ་གཤིན་རྗེ་ཆོས་ཀྱི་རྒྱལ་པོས་ཕྱག་ན་ཁྲམ་ཤིང་དང་མེ་ལོང་བསྣམས་ཏེ་དགེ་སྡིག་ལས་ཀྱི་ཤན་འབྱེད་དམ་ལས་དཔོན་བྱེད་པ་དང་། ཁྲོ་གསས་མཁའ་འགྱིང་གི་སྤྲུལ་པ་ལས་མཁན་སེང་གེའི་མགོ་ཅན་གྱིས་གསལ་བའི་མེ་ལོང་ལ་ལྟ་བ། གཏུམ་གསས་མཁའ་འགྱིང་སྤྲུལ་པ་ཨ་བ་གླང་མགོས་རྩིས་ཀྱི་ཡིག་གེ་ལ་གཟིགས་པ། དབལ་གསས་མཁའ་འགྱིང་སྤྲུལ་པ་ལས་མཁན་དར་མ་སྤྲེལ་མགོས་དགེ་སྡིག་ཡང་ལྕི་རྒྱ་མར་འདེགས་པ། རྔམ་གསས་མཁའ་འགྱིང་སྤྲུལ་པ་ལས་མཁན་རག་ཤ་ཕག་མགོས་དགེ་སྡིག་མང་ཉུང་སྡེའུ་བགྲང་བ་སོགས་གཙོ་བོ་གཙོ་མཆོག་མཁའ་འགྱིང་དང་འཁོར་གསས་ཆེན་རིགས་བཞིའི་སྤྲུལ་པ་སྟེ། ཆོས་རྒྱལ་སྡེ་ལྔ་དང་། བཟང་ངན་ལས་ཀྱི་རྗེས་སུ་འབྲེང་བའི་བུ་ཆུང་དཀར་ནག་གཉིས་ཏེ། དཀར་པོས་ལུས་ལ་གོས་དཀར་དང་ལག་ཏུ་ཕྲེང་བ་དང་ལག་སྐོར་བསྣམས་ནས་དགེ་བའི་ཁ་འཛིན་བྱེད་པ། ནག་པོས་ལུས་ལ་གོས་ནག་དང་ལག་ཏུ་སོལ་རྗེ་ནག་པོ་འཆང་ཞིང་སྡིག་པའི་ཁ་འཛིན་བྱེད་པ།དབལ་མོའི་མ་ཚོགས་ཀྱི་སྤྲུལ་པ་འཇིགས་ཤིང་རྔམ་པའི་མགོ་བརྙན་ཅན་ལས་མཁན་ཉེར་བརྒྱད་ཀྱིས་ཕྱགས་ན་མཚོན་ཆ་སྣ་ཚོགས་ཐོགས་ཏེ་སོད་ཅིག་རྒྱོབ་ཅིག་པའི་སྒྲ་དང་བཅས་ཚེ་འདས་རྣམས་རང་དབང་མེད་པར་ཆོས་ཀྱི་རྒྱལ་པོའི་མདུན་དུ་འཁྲིད་པ་སྟེ།

བླ་མ། གྲྭ་པ། དཔོན་པོ། སྐྱེས་པ། བུད་མེད་བཅས་བཟང་ངན་གཉིས་རེ་བཅས་ཁྱོན་ཚེ་འདས་མི་སྣ་བཅུ་ཡིས། འཇིག་རྟེན་ཐོག་མི་ཡི་རིགས་ཀྱི་བསམ་སྤྱོད་ལེགས་ཉེས་དང་།  བཟང་ངན་གཉིས་ཀྱི་ཚབ་བྱས་ཏེ་ལས་དགེ་སྡིག་དཀར་ནག་གི་ཤན་འབྱེད་བྱ་ཚུལ་བསྟན་པ་སྟེ།  བཟང་པོ་དག་ལ་བསྔགས་བརྗོད་དང་འབྲེལ་ལས་ཀྱི་བུ་ཆུང་དཀར་པོ་དང་།  ལྷ་དང་ལྷ་མོས་བསུ་བ་དང་བཅས་དག་ཞིང་དུ་འདྲེན་པའི་ཚུལ་བྱེད་པ་དང་།  ངན་པ་དག་ལ་སྐྱོན་བརྗོད་དང་བཅས་ལས་ཀྱི་བུ་ཆུང་ནག་པོ་དང་།  མགོ་བརྙན་སྣ་ཚོགས་པའི་ལས་མཁན་རྣམས་ཀྱིས་དམྱལ་ཁམས་སུ་དེད་པའི་ཚུལ་བྱེད་ཅིང་། སྐྱེ་བོ་འབུམ་ཕྲག་དུ་མས་མགྲིན་གཅིག་དབྱངས་གཅིག་གིས་རིགས་དྲུག་འདྲེན་པའི་འདུལ་བ་གཤེན་དྲུག་གི་སྙིང་པོ་སྟེ༼ཨཱོྃ་མ་ཏྲི་མུ་ཡེ་ས་ལེ་འདུ།༽དབྱངས་རྟ་ལ་དྲངས་ཏེ་ནུབ་ཕྱོགས་བདེ་བ་ཅན་གྱི་ཞིང་ཁམས་སུ་སྐྱེ་བའི་སྨོན་ལམ་འདེབས་བཞིན་ཡོད་ལ། ད་གཟོད་བླ་སྤྲུལ་བཤེས་གཉེན་རྣམ་པས་བྱང་ཆོག་གི་གཞུང་བསྲང་ཞིང་།

ལས་ཀྱིས་དམྱལ་བར་ལྟུང་བའི་ཚེ་འདས་ལྔ་པོ་དུས་ཚིགས་བདུན་གྱི་ལམ་ནས་གཡུང་དྲུང་ཐེག་པའི་ས་བཅུ་རིམ་པར་བཀོད་དེ་མཐར་སྐུ་གསུམ་སངས་རྒྱས་ཀྱི་ས་ལ་འཁོད་པའི་རྟེན་འབྲེལ་དུ་པར་ཆོག་སོགས་ཞི་ཁྲོའི་གཞུང་ལྟར་གསུང་སྟེ། དེ་ལྟར་ལས་བཟང་ངན་ལ་བརྟེན་ནས་འབྲས་བུ་བཟང་ངན་ཇི་ལྟར་འབྱུང་ཚུལ་སྐོར་ཐུན་མོང་མ་ཡིན་པའི་སྒྱུ་རྩལ་གྱི་ཉམས་དང་སྦྲག་སྟེ་མི་རྣམས་ལ་ཞིབ་ཅིང་ཕྲ་བར་གསལ་སྟོན་བྱེད་པ་དེས། ལས་ཀྱི་རྣམ་བཞག་ལ་བློ་མིག་ལྡོང་ཞིང་།བསམ་སྤྱོད་ངན་པ་ལ་ཇི་མི་སྙམ་པའི་སྙིགས་དུས་ཀྱི་སྐྱེ་བོ་སྐྱ་སེར་རིས་སུ་མ་ཆད་པ་ལ་ནད་ཐོག་ཏུ་སྨན་དང་། བརྣག་ཐོག་ཏུ་འབུག་ཞེས་པ་ལྟར་ལས་འབྲས་ལ་སྔར་ལས་ལྷག་པའི་ཡིད་ཆེས་དང་ངེས་པ་རྙེད་ཅིང་། མ་རབས་ཐ་ཤལ་གྱི་བྱ་སྤྱོད་རིང་དུ་དོར་ཏེ་རྣམ་དཀར་ལེགས་པའི་ལས་སྤྱོད་ལ་རབ་ཏུ་ཕྱོགས་པ་དང་། མི་རིགས་ཀྱི་འཆམ་མཐུན་དང་། མི་དང་ཁོར་ཡུག་བར་གྱི་གཅེས་སྐྱོང་།མི་རིགས་ཀྱི་སྤྱོད་བཟང་གོང་འཕེལ་བཅས་ཀྱི་ཐད་ཕན་འབྲས་ཟབ་མོ་ཐོན་བཞིན་ཡོད་ཅིང་།

མདོར་ན་གར་འཆམ་འདི་ནི་བར་དོའི་རང་སྣང་གསལ་བའི་ངོ་སྤྲོད་དང་།  གནས་ལུགས་རང་ཞལ་འཇལ་བའི་མེ་ལོང་། ཕྱི་མའི་ལམ་བཟང་སྟོན་པའི་སྒྲོན་མེ། ཐར་པའི་གནས་སུ་བགྲོད་པའི་ཐེམ་སྐས། དགེ་སྡིག་སྤང་བླང་གསལ་བའི་ཉི་གཞོན། བློ་སྣ་དགེ་ལ་འདྲེན་པའི་ལྕགས་ཀྱུ། ལས་འབྲས་རྣམ་བཞག་སྟོན་པའི་སྣང་བརྙན་དངོས་སམ། དཀར་ནག་ལས་ཀྱིས་འཕེན་པའི་བདེ་སྡུག་གི་འབྲས་བུ་དངོས་སུ་བསྟན་པའི་ཐུན་མིན་གྱི་གར་འཆམ་ཆེན་མོ་ཞིག་ཡིན་པས་གཞུང་བརྒྱ་གནད་གཅིག་དང་།ནད་བརྒྱ་སྨན་གཅིག་གི་དཔེ་ལྟར་ལུགས་གཉིས་གང་ལ་ཡང་སློབ་གསོའི་ནུས་པ་གནད་ལ་འཁེལ་ཞིང་གནས་ལུགས་ཀྱི་ཟབ་ཚད་རྗེན་ཅེར་དུ་སྟོན་པའི་ཕན་བདེའི་ལམ་སྟོན་བཟང་པོ་ཞིག་ཏུ་གྲུབ་པ་མ་ཟད། མཐོང་ན་མཐོང་གྲོལ་དང་།དྲན་ན་དྲན་གྲོལ།ཐོས་ན་ཐོས་གྲོལ་ཞེས་གྲོལ་བ་སུམ་ལྡན་གྱི་ཁྱད་ཆོས་མངའ་བའི་གར་འཆམ་ཆེན་མོ་ཞིག་ཡིན།  སྙིགས་དུས་བསྟན་པའི་སྒྲོན་མེ་མཆོག་སྤྲུལ་བློ་ལྡན་སྙིང་པོའི་ཟུར་བྱང་ལས། གྱིམ་ཤོད་ཤེལ་ལེ་རྒྱ་སྐར་དུ། ཞི་ཁྲོ་སྒྲུབ་ན་འདིར་སངས་རྒྱས།ཞེས་དང་། ཉག་གཏེར་གསང་སྔགས་གླིང་པ་མཆོག་གིས་ཀྱང་། འདི་ཉིད་ལན་གསུམ་མཇལ་ན་ངན་སོང་སྐྱེ་སྒོ་ཁེགས།

ཞེས་ཞལ་གྱིས་བཞེས་པས་ན། རྣམ་གྲོལ་དོན་དུ་གཉེར་བའི་མཆོག་དམན་བར་གསུམ་གྱི་སྐྱེ་བོ་སུ་ཞིག་ཡིན་རུང་འདི་ལྟའི་བསོད་ནམས་ཀྱི་བགོ་སྐལ་བཟང་པོ་ལ་ཅིས་ཀྱང་འཇུག་པར་རིགས་སོ། །