༄༅། །དཔལ་གཤེན་བསྟན་སྨན་རིའི་མཁན་པོ་སྒོ་སྟོན་ཉི་མ་བསྟན་འཛིན་དབང་གི་རྒྱལ་པོའི་རྣམ་ཐར་ལེགས་བཤད་ཉི་མ་འབུམ་གྱི་འོད་ཅན་འགྲོ་ཀུན་བློ་མུན་སེལ་བའི་སྒྲོན་མེ་ཞེས་བྱ་བ་སྨན་རིའི་གླིང་གི་སྐབས་༣༧གཡུང་དྲུང་བོན་གྱི་བཤད་སྒྲུབ་འདུས་སྡེའི་རྒྱུན་ལས་ནས་དཔར་བསྐྲུན་འགྲེམས་སྤེལ་གནང་།
པར་སྐྲུན་གསལ་བཤད།
ད་ལོ་ཡང་ངེད་གཡུང་དྲུང་བོན་གྱི་བཤད་སྒྲུབ་འདུས་སྡེའི་རྒྱུན་ལས་སྐབས་སོ་བདུན་པ་ཐུན་མོང་ནས་དེབ་ཕྲེང་(༦༦)པ་«དཔལ་གཤེན་བསྟན་སྨན་རིའི་མཁན་པོ་སྒོ་སྟོན་ཉི་མ་བསྟན་འཛིན་དབང་གི་རྒྱལ་པོའི་རྣམ་ཐར་ལེགས་བཤད་ཉི་མ་འབུམ་གྱི་འོད་ཅན་འགྲོ་ཀུན་བློ་མུན་སེལ་བའི་སྒྲོན་མེ་»དང་། དེབ་ཕྲེང་(༦༧)པ་«ཨ་ཁྲིད་ཐུན་མཚམས་བཅོ་ལྔ་བ་མ་བུ་དང་བཅས་པ་»ཞེས་པའི་དེབ་ཕྲེང་གཉིས་དཔར་སྐྲུན་ཞུས་པ་དེ་ལྟར་ལགས།
དེ་བཞིན་༸སྐྱབས་རྗེ་སྨན་རིའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ་མཆོག་ནས་«ཀུན་མཁྱེན་ཉི་མའི་རང་རྣམ་»གྱི་དཔེ་དེབ་འདིའི་གླེང་བརྗོད་བྲིས་གནང་ཞིང་། མ་ཟད་བཀའ་སློབ་ལམ་སྟོན་སོགས་གནད་སྨིན་ཞིག་སྩལ་གནང་བར། ངེད་རྒྱུན་ལས་ཐུན་མོང་ནས་གུས་བཀུར་བླ་མེད་ཞུ་ཞིང་བཀའ་དྲིན་ཆེ་ཞུ། ད་དུང་ཞུ་དགོས་པ་ཞིག་ལ་ཞུ་དག་ལས་རོགས་གནང་མཁན་གྱི་གྲོགས་པོ་རྣམ་པ་དང་། དེབ་གཟུགས་ཇུས་འགོད་པ་བཀའ་རམས་པ་ཁྲི་གཡུང་དྲུང་ལགས་བཅས། མདོར་ན་ལས་རིགས་འདི་ལ་སྔ་ཕྱི་བར་གསུམ་དུ་རྒྱབ་སྐྱོར་དང་རམ་འདེགས་གནང་མཁན་ཡོངས་ལ་སྙིང་ཐག་པ་ནས་བཀའ་དྲིན་ཆེ་ཞུ།
གླེང་བརྗོད།
མཁས་པའི་མཆོག་ཏུ་གྱུར་པ་ཀུན་མཁྱེན་ཉི་མ་བསྟན་འཛིན་ནི། ཡབ་གཡུང་དྲུང་བཀྲ་ཤིས་དང། ཡུམ་རག་ཟ་བསོད་དགའ་གཉིས་ཀྱི་སྲས་སུ་རབ་བྱུང་བཅུ་བཞི་པའི་ཆུ་བྱའི་ལོ་སྟེ་ཕྱི་ལོ་(༡༨༡༣)ལོར་སྡེ་དགེ་ལྷ་ཐོག་པའི་ཡུལ་ཞེས་བྱ་བར་ཀཾ་ཚང་གི་གདུང་དུ་སྐུ་འཁྲུངས། འདས་པའི་ལོ་ཚིགས་ལ་དེ་སྔར་འདི་ཞེས་ཐག་ཆོད་པའི་གསལ་ཁ་བཏོད་པ་མ་མཐོང་། འོན་ཀྱང་ཁུངས་དང་གསལ་ཁ་ཆེ་ཤོས་ནི་ཁོང་གི་སློབ་མ་འགྲོ་མགོན་ཤེས་རབ་གཡུང་དྲུང་གི་རྣམ་ཐར་ལས་གསུངས་པ་ལྟར་ན་ཕལ་ཆེར་ཕྱི་ལོ་(༡༨༧༠)སྟེ་རབ་བྱུང་བཅོ་ལྔ་པ་ལྕགས་རྟའི་ཟླ་བ་གསུམ་པའི་ཚེས་ཉེར་དྲུག་གི་ཉིན་དགོངས་པ་གཞན་དོན་དུ་ཕེབས་ཚུལ་གསལ།
དེ་ཡང་མཁས་མཆོག་འདི་ཉིད་ནི་སྐར་ཚོགས་བྱེ་བའི་དབུས་ན་མངོན་པར་འཕགས་ཤིང་འོད་སྟོང་འཕྲོ་བའི་རྒྱུ་སྐར་བདག་པོ་ལྟར་མཁས་གྲུབ་གཉིས་ལྡན་གྱི་སྐྱེས་མཆོག་བསམ་གྱིས་མི་ཁྱབ་པའི་སྐྱེས་བུ་ཁྱད་པར་ཅན་ཞིག་ཏུ་ངོས་འཛིན་བྱས་ཀྱང་འུད་བརྗོད་ཀྱི་གཏམ་དུ་ཐལ་བའི་སྐྱོན་ག་ལ་མཆིས། རྒྱུ་མཚན་ནི། ཁོང་ནི་ཐུན་མོང་བཅུ་ཕྲག་རིག་པའི་གནས་ཐམས་ཅད་ལ་མ་རྨོངས་ཤིང་བྱང་ཆུབ་པ་ཙམ་དུ་མིན་པར། སྨན་དཔྱད་དང་རྩིས་རིག་བརྡ་སྤྲོད་སོགས་རིག་པའི་གནས་ཕལ་ཆེ་བ་ལ་འགྲེལ་མ་མཛད་པ་མེད། ཁྱད་པར་དུ་གཡུང་དྲུང་བོན་ལུགས་ལྟ་བུར་བསམ་ན། བཀའ་བརྟེན་འགྱུར་གྱི་དཀར་ཆག་དང་བསྟན་པ་དར་ནུབ་སོགས་བསྟན་འབྱུང་དང་བསྟན་རྩིས། ཆོ་ག་ཕྱག་ལེན་གྱི་ཕྱག་བཞེས་དང་ཟིན་རིས་སོགས་ཕལ་ཆེ་བ་ཁོང་གིས་མཛད་པ་ཤ་སྟག་ཏུ་སྣང་བར་མ་ཟད། ཐུན་མོང་སྡུད་གྲྭ་ནས་བཟུང་སྟེ་ཁམས་བརྒྱད་ལས་སོགས་རྒྱ་ཆེ་བའི་གཞུང་དོན་རྣམས་ལ་འགྲེལ་བ་བསམ་གྱིས་མི་ཁྱབ་པར་མཛད་པ་དག ད་སྐབས་གཡུང་དྲུང་བོན་གྱི་གདན་ས་ཁག་གི་བཤད་སྒྲུབ་སློབ་གཉེར་བ་རྣམས་ཀྱིས་སྦྱོང་བྱའི་ཡིག་ཆ་གཙོ་བོའི་ནང་ཚན་ཞིག་ཏུ་གྱུར་ཡོད། ཁོང་གིས་མཛད་པའི་བསྟན་འབྱུང་ལོ་རྒྱུས་དག་ཀྱང་ཕྱིས་བྱུང་བོན་ལ་ཞིབ་འཇུག་བྱེད་མི་དག་གིས་ཁུངས་བཙུན་ལ་ལོ་རྒྱུས་ཀྱི་ཚད་འཛིན་པར་འོས་པ་ཞིག་ཏུ་ངོས་འཛིན་ཞུ་བཞིན་པ་ཡིན། དེས་ན་རྣམ་ཐར་འདི་བཞིན་པར་བསྐྲུན་བྱེད་དགོས་པའི་རྒྱུ་མཚན་གཙོ་བོ་ནི། མ་དཔེ་གཅིག་ལས་མེད་པའི་དཔེ་དཀོན་གྱི་རྣམ་ཐར་གལ་ཆེ་བ་ཞིག་ཡིན་པས་དང་། གཞན་ཡང་ཁྱད་པར་དུ་འཕགས་པའི་སྐྱེས་ཆེན་དམ་པ་རྣམས་ཀྱི་རྣམ་པར་ཐར་པ་དག་ཡི་གེ་རིས་སུ་བཀོད་པའི་དགོས་པ་ནི། ཕྱི་རབས་རྗེས་འཇུག་པ་རྣམས་ཐར་པ་བྱང་ཆུབ་བསྒྲུབ་པ་ལ་དཀའ་སྤྱད་འབད་བརྩོན་ཇི་ལྟར་བྱ་དགོས་མིན་གྱི་མིག་དཔེ་ཡར་འདྲེན་བྱེད་པའི་དཔེ་སྟོན་བླ་ན་མེད་པ་ཞིག་ཡིན་པར་གསུངས་པས་ནའོ། དེ་ཡང་རྣམ་ཐར་ཞེས་པ་ནི་གང་ཟག་གང་དང་གང་ཞིག་གི་ངོ་མཚར་ཆེ་བའི་མཛད་བྱས་རྣམས་རྩལ་དུ་བཏོན་ནས་བྲིས་པ་ཞིག་དང་། བྱེ་བྲག་ཏུ་སྐྱེས་ཆེན་དམ་པ་རྣམས་ཀྱི་རྣམ་ཐར་ནི་གང་གི་ཕྱི་ནང་གསང་གསུམ་གྱི་མཛད་པ་རླབས་ཆེ་བ་རྣམས་ཚིག་སྦྱོར་སྡེབ་ལེགས་ཀྱི་སྒོ་ནས་ཕྱིས་རབས་རྗེས་འཇུག་རྣམས་ཀྱི་དད་པའི་ངེས་ཤེས་སྐྱེད་ཅིང་དྭངས་བ་འདྲེན་པར་ནུས་པའི་རྣམ་ཐར་རམ་ལོ་རྒྱུས་ཤིག་ཡིན། དེ་ཡང་ཀུན་མཁྱེན་ཤར་རྫ་བས། ལར་ནི་རྣམ་པར་ཐར་པ་ཞེས། རབ་ཀྱིས་སྟོང་ཉིད་སྙིང་རྗེའི་སྒོས། སྲིད་དང་ཞི་བར་མི་གནས་པས། མཐའ་གཉིས་ལས་ནི་རྣམ་པར་གྲོལ། འབྲིང་གིས་ངེས་པར་འབྱུང་བའི་བློས། འཁོར་བའི་གྲོང་ལས་རྣམ་པར་ཐར། དེ་ཡི་ལོ་རྒྱུས་བཤད་པ་དང། ཐ་མས་དད་པ་རྣམ་དག་གིས། ངན་འགྲོའི་གནས་ལས་ཐར་པའི་ཚུལ། དེ་དག་དེ་ཡི་བཤད་བྱ་ཡིན། ཞེས་གསུངས་པ་ལྟར་རོ། །རྣམ་ཐར་ལའང་རང་གི་ལོ་རྒྱུས་རང་ཉིད་ཀྱིས་བྲིས་པའི་རང་རྣམ་ཞེས་པ་དང། རྗེས་འཇུག་གང་ཟག་གཞན་གྱིས་བྲིས་པའི་རྣམ་ཐར་ཞེས་གཉིས་སུ་ཡོད། འོན་ཀྱང་རྗེས་འཇུག་གིས་བླ་མའི་རྣམ་ཐར་བྲིས་པ་ཕལ་ཆེ་བ་ངོ་མཚར་ཕུལ་བྱུང་དང་རབ་བཏགས་ཀྱི་བསྟོད་པས་བརྒྱན་ཏེ་ལོ་རྒྱུས་དངོས་ཇི་ལྟར་ཡིན་མིན་ལ་མི་རྣམས་ཡིད་ཆེས་དཀའ་བའི་གནས་སུ་གྱུར་པའང་མང་དུ་ཡོད། དཔེར་ན་བོད་ཀྱི་བཙན་པོ་དང་སྔར་བྱོན་གྱི་མཁས་གྲུབ་དག་གི་ལོ་རྒྱུས་ཕལ་ཆེ་བ་རྣམས་དངོས་གཙོ་སྨྲ་བའི་མཁས་པ་དག་གིས་ཡིད་ཆེས་ཚད་འཛིན་འཕེར་བའི་ལོ་རྒྱུས་དངོས་སུ་ཁས་ལེན་མི་བྱེད་པའི་གནད་དོན་ཀྱང་དེ་ལྟ་བུར་ཐུག་ཡོད།
དེས་ན་རྣམ་ཐར་དང་ལོ་རྒྱུས་གང་ཞིག་ཡིན་རུང་ཚིག་གི་སྡེབ་སྦྱོར་གཙིགས་མི་ཆེ་བར་དོན་དམ་དངོས་ཡོད་ཀྱི་ལོ་རྒྱུས་བཟང་ངན་ཅི་བྱུང་ཇི་མ་ཇི་བཞིན་དུ་བརྗོད་པ་ཡིན་ན། དེས་ཕྱི་རབས་རྗེས་འཇུག་པ་རྣམས་ལ་ལོ་རྒྱུས་དངོས་གང་ཡིན་ཤེས་རྒྱུར་ཕན་ཐོགས་ཆེ་བར་མ་ཟད། དངོས་གཙོ་སྨྲ་བའི་ཚན་རིག་པས་ཀྱང་དཔྱད་གཞིར་རུང་བའི་ལོ་རྒྱུས་ཡང་དག་ཅིག་ཏུ་ངོས་འཛིན་བྱེད་ངེས། དེ་མིན་བོད་ཀྱི་ལོ་རྒྱུས་དང་རྣམ་ཐར་སོགས་ཕལ་ཆེ་བ་བཅོས་སྒྲུང་ལྟ་བུ་ཞིག་ལས་ལོ་རྒྱུས་དངོས་མཚོན་པར་བྱེད་པའི་རྣམ་ཐར་ཞིག་ཆེས་དཀོན་པའི་གནས་སུ་གྱུར་ཡོད། དེས་ན་ཀུན་མཁྱེན་ཉི་མའི་རྣམ་ཐར་འདི་བཞིན་མཁས་པའི་ཁྱུ་མཆོག་ཁུ་བོ་ཀཾ་བླ་མ་གཡུང་དྲུང་ཉི་རྒྱལ་མཆོག་ནས་ཁྱེད་ཀྱི་རྣམ་ཐར་བྲིས་ཞེས་རྣམ་ཐར་གྱི་ཁོག་དབུབ་བྲིས་པ་ཞིག་ཕུལ་བ་སོགས་བསྐུལ་མ་ནན་ཏན་གནང་བ་ལ་བརྟེན་ནས་བྲིས་པར་གསུངས་པ་ལྟར། རང་གི་ལོ་རྒྱུས་རང་ཉིད་ཀྱིས་བྲིས་ཤིང་དེ་ཡང་ཕུལ་བྱུང་དང་རབ་བཏགས་ཀྱིས་ཀླུབས་པ་མིན་པར་རང་གི་ལོ་རྒྱུས་དངོས་ཇི་བཞིན་པར་བྲིས་པའི་རང་རྣམ་ཙམ་དུ་མ་ཟད། ཆེས་རྙེད་པར་དཀའ་བའི་བོད་དང་བོན་གྱི་ལོ་རྒྱུས་གལ་ཆེ་བ་མང་པོ་ཞིག་རྣམ་ཐར་དེ་ལས་ཤེས་རྟོགས་འབྱུང་གི་ཡོད། དཔེར་ན་བེ་རི་རྒྱལ་པོའི་སྐོར་དང་དེ་བཞིན་རྒྱལ་བ་བྲུ་ཚང་གི་ཁྱིམ་གཞིས་སུ་པཎ་ཆེན་གྱི་ཡང་སྲིད་འཁྲུངས་ཚུལ་གྱི་སྐོར་དང་། བོན་གྱི་དགོན་པ་ཁག་ཅིག་ལ་པཎ་ཆེན་མཆོག་ནས་ཆོས་ལུགས་གཞན་དུ་བསྒྱུར་མི་ཆོག་པའི་བཀའ་ཡིག་ཤེ་བམ་གནང་ཚུལ།
དེ་བཞིན་བོན་བསྟན་དར་ནུབ་གྱི་ལོ་རྒྱུས། ཁྱད་པར་དུ་བོན་གྱི་གདན་ས་ཁག་གི་བླ་རྒྱུད་དང་མཁས་པ་ཇི་ལྟར་བྱུང་ཚུལ། སྟོན་པ་སངས་རྒྱས་གཤེན་རབ་མི་བོ་མཆོག་གི་མཛད་པ་རྒྱས་འབྲིང་བསྡུས་གསུམ་གྱི་རྣམ་གྲངས་ཁག་རེ་རེ་བཞིན་དུ་གསལ་བར་ངོས་འཛིན་དང་། བསྐལ་སྲིད་འབྱུང་གསུམ་གྱི་ཆོ་རབས། གཞན་ཡང་ཀུན་མཁྱེན་ཉི་མ་ཉིད་གདུལ་བྱའི་དོན་དུ་ཕྱོགས་གང་དུ་ཕེབས་པའི་དད་ལྡན་མང་ཚོགས་ནས་འབུལ་རྫོང་གང་བྱུང་བའི་དངོས་པོ་རྣམས་རེ་རེ་ནས་ཟིན་ཐོ་གསལ་ཞིང་རྒྱས་པར་བཀོད་དེ་དགོན་གྱི་གཉེར་པ་སོགས་ལ་རྩིས་སྤྲོད་ཀྱིས་དད་ལྡན་མང་ཚོགས་ཀྱིས་འབུལ་བ་དག་ཆུད་ཟོས་སུ་མ་སོང་བར་ཡིད་ཆེས་པའི་གནས་སུ་མཛད། དེས་ན་རང་རྣམ་འདི་ཉིད་ལ་རྣམ་ཐར་ཞེས་མཚན་བཏགས་པ་ཙམ་མ་གཏོགས་དོན་དངོས་སུ་བསྟན་འབྱུང་ལོ་རྒྱུས་ཀྱི་བྱུང་བ་བརྗོད་པའི་ལོ་རྒྱུས་ཀྱི་དཔེ་དེབ་ཆེས་གལ་ཆེ་བ་ཞིག་ཡིན་འདུག་པས། རྣམ་ཐར་འདི་ཡི་བརྒྱུད་ནས་བོད་དང་བོན་གྱི་ལོ་རྒྱུས་ལ་མཁྱེན་འདོད་ཐུགས་སྣང་ཡོད་པའི་ཤེས་ལྡན་མི་སྣ་དག་ལ་ཕན་པ་བརླབས་ཆེན་སྟེར་ངེས་བརྟེན། ད་ལམ་གཡུང་དྲུང་བོན་གྱི་བཤད་སྒྲུབ་འདུས་སྡེའི་སྐབས་སུམ་ཅུ་སོ་བདུན་པའི་རྒྱུན་ལས་ནས་ཐུགས་ཁུར་ཆེར་བཞེས་ཀྱིས་དཔེ་དཀོན་དུ་གྱུར་པའི་ཀུན་མཁྱེན་ཉི་མའི་རང་རྣམ་འདི་བཞིན་འཕྲུལ་པར་དུ་བསྐྲུན་པར་རྗེས་སུ་ཡི་རངས་དང་ཐུགས་རྗེ་ཆེ་ཞུ་བ་དང་ཆབས་ཅིག པར་བསྐྲུན་གྱི་བྱ་བར་དངོས་ཤུགས་རྒྱུད་གསུམ་ནས་མཐུན་རྐྱེན་སྦྱོར་བ་སོགས་ཞབས་ཞུ་བྱེད་པོ་ཡོངས་ལ་ཐུགས་རྗེ་ཆེ་ཞེས་ཞུ།
ཕྱི་ལོའི་༢༠༡༧ཟླ་༠༥ཚེས་༡༣བཟང་པོར།
དཀར་ཆག
གླེང་བརྗོད། ༧སྨན་རིའི་དཔོན་སློབ་རིན་པོ་ཆེ།
མཆོད་བརྗོད་དང་གླེང་གཞི། (༡)
སྤྱིར་སངས་རྒྱས་བསྟན་པ་བྱུང་ཚུལ་བསྟན་པ། (༣)
བརྒྱུད་གསུམ་བླ་མའི་ཡིན་ཚུལ་བསྟན་པ། (༦༢)
བྱེ་བྲག་དུ་མཉམ་མེད་ཆེན་པོའི་རྣམ་ཐར་བསྟན་པ། (༩༤)
ཁྱད་པར་དུ་མཁན་རབས་རིམ་བྱོན་གྱི་ལོ་རྒྱུས་བསྟན་པ། (༡༠༣)
མཁན་པོ་ཉི་དབང་རང་གི་རྣམ་ཐར་བཤད་པ། (༡༠༨)
རྒྱུད་པ་རུས་ཀྱི་ཆེ་བ་བརྗོད་པ། (༡༠༩)
བོད་ལ་བཀའ་དྲིན་ཆེ་བའི་མི་བཞི། (༡༡༠)
སྐམ་ཚང་ཞེས་པའི་མཚན་གསོལ་ཚུལ། (༡༣༥)
ལུས་བསྐྱེད་ཡབ་ཡུམ་ཀྱིས་བསྐུལ་ཚུལ། (༡༣༦)
བཤེས་གཉེན་མཆོག་དང་མཇལ་ཏེ་ངེས་པའི་ལུང་གི་ཟིན་ཚུལ། (༡༣༧)
བསྟན་སྒོར་ཞུགས་ཤིང་གྲྭ་ས་འགྲིམ་ཚུལ། (༡༥༡)
རབ་འབྱམས་མིང་བཏགས་བླངས་ཚུལ། (༡༥༨)
བསྟན་པའི་ཁུར་ཆེན་བཞེས་ཚུལ། (༡༦༣)
གནས་ལུགས་དོན་ལ་བཞག་ཚུལ། (༡༦༧)
བདེ་གཤེགས་སྐུ་གདུང་གསེར་གྱིས་བཞེངས་ནས་མངའ་དབུས་རབ་གནས་བྱས་ཚུལ། (༡༧༨)
རྟེན་གང་བཞེངས་པ། (༡༨༩)
བཞེངས་པ་དེ་གང་ལ་དམིགས་པ། (༡༩༠)
བྱེད་པ་པོ་གང་གིས་བཞེངས་པ། (༡༩༡)
དོན་དང་ཡོན་ཏན་ཇི་ལྟར་མངའ་ཚུལ། (༡༩༢)
བཞེངས་པའི་རྒྱུ་དངོས་ཇི་ལྟར་སོང་བ། (༡༩༩)
འབྲས་བུ་ཇི་ལྟར་མངའ་བའི་ཚུལ། (༢༠༢)
བཞེངས་པའི་དགེ་བ་གྲུབ་ནས་བསྔོ་སྨོན་དང་ཤིས་པར་བརྗོད་པ། (༢༠༣)
གསང་སྔགས་བསྒྲུབས་ཆེན་བཙུགས་ནས་སྨིན་གྲོལ་ལམ་ལ་བཀོད་ཚུལ། (༢༠༦)
སྨན་རིའི་སྒྲུབ་ཆེན། (༢༢༡)
དང་པོ་གང་གི་དགོངས་པ། (༢༢༡)
བར་དུ་སུ་ཡིས་སྒྲུབ་པ། (༢༢༦)
རྗེས་སུ་ཇི་ལྟར་འཛིན་ཚུལ། (༢༢༧)
གསུང་རབ་རྩོལ་བས་བསྒྲུབས་ཤིང་བཀའ་འགྱུར་ལྷ་ཁང་བཞེངས་ཚུལ། (༢༣༠)
སྐྱེས་རབས་བཀོད་པར་བྱས་ནས་བསྐོར་ཆོག་འཁོར་ལོ་བཞེངས་ཚུལ། (༢༦༤)
དགེ་སྦྱོར་རྒྱ་ཆེན་བྱས་ཚུལ། (༢༨༢)
རྒྱལ་བའི་སྐུ་བརྙན་བཞེངས་ནས་སྟོང་མཆོད་རྒྱུན་འཛུགས་བྱས་ཚུལ། (༣༡༣)
རྒྱལ་ཚབ་མཁན་མཆོག་བསྐོས་ནས་དབེན་པའི་གནས་སུ་བསྒོམ་ཚུལ། (༣༣༥)
རྣམ་ཐར་ཡི་གེར་བཀོད་ཚུལ། (༣༧༢)
མཇུག་དོན། (༣༧༤)