གཡུང་དྲུང་བོན་གྱི་དྲྭ་རྒྱ།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ལམ་གཡུང་དྲུང་བོན་གྱི་བསྟན་བདག་སྨན་རིའི་ཁྲི་འཛིན་སོ་གསུམ་པ་མཆོག་དགོངས་པ་བོན་དབྱིངས་སུ་ཐིམ་པར་ཐུགས་སྨོན་བཀའ་ཡིག་སྩལ་བ།

ཉེ་ལམ་ངོས་རང་ཡོ་རོབ་ཏུ་བསྐྱོད་སྐབས་གཡུང་དྲུང་བོན་གྱི་བསྟན་པའི་གཙུག་རྒྱན་སྨན་རི་ཁྲི་འཛིན་སོ་གསུམ་པ་ལུང་རྟོགས་བསྟན་པའི་ཉི་མ་རིན་པོ་ཆེ་དགོངས་པ་ཞི་དབྱིངས་སུ་ཐིམ་པར་ཐོས་ཤིང་། སྤྱིར་སྔོན་བྱོན་གྱི་དམ་པ་ཡོངས་ལ་མཚོན་ནའང་གཟུགས་སྐུ་རགས་པའི་ཆོས་ཉིད་ལས་མི་འདའ་བ་དེ་ལྟར་ཡིན་མོད།

བོད་བསྟན་སྲིད་ཀྱི་ངང་ཚུལ་ཆེས་ཆེར་ཉག་ཕྲ་བའི་སྐབས་འདིར་ངོས་དང་སྐྱིད་སྡུག་མཉམ་མྱོང་གིས་བཙན་བྱོལ་དུ་ཞལ་འཚོ་བཞུགས་རིང་བསྟན་སྲིད་སྤྱི་ལ་སྨན་པའི་མཛད་པ་སྤྱི་དང་ཉེ་བའི་ཟླ་ཤས་གོང་རྒྱལ་ས་ལྡི་ལིར་ངོ་མཇལ་གྱིས་སྤྱི་སྒེར་གྱི་དོན་གནད་དུ་མ་ནང་མོལ་དུ་བྱུང་བ་རྣམས་ཡིད་ལ་འཁོར་བཞིན་སྐྱོ་སྣང་བྱུང་རུང་།

གཙོ་བོར་དམ་པ་རྣམས་གཤེགས་བཞུགས་ཇི་ལྟར་ཡང་བསྟན་འགྲོའི་དོན་ལས་གཞན་དུ་མ་མཆིས་སྟབས་དམ་པ་དེ་ཉིད་ཀྱི་བསྟན་འགྲོར་སྨན་པའི་དགོངས་བཞེས་རྣམས་ལྷུན་གྱིས་འགྲུབ་པའི་མཆོག་གསུམ་ལ་གསོལ་འདེབས་དང་སྨོན་ལམ་གནད་སྨིན་དུ་བྱས། རྗེས་འཇུག་རྣམས་ནས་ཀྱང་ཞི་གཤེགས་དམ་པའི་ཐུགས་བཞེད་ལྷུན་གྱིས་འགྲུབ་པ་དང་རང་རེའི་བོད་ཀྱི་གདོད་མའི་ཆོས་བརྒྱུད་གཡུང་དྲུང་བོན་གྱི་བསྟན་པ་བཤད་སྒྲུབ་ཟུང་གིས་འཛིན་པ་སྔར་བཞིན་མི་ལྷོད་པ་གལ་འགངས་ཆེ་བ་དེ་དོན་ཐུགས་འཇགས་འཚལ།

 

ཤཱཀྱའི་དགེ་སྦྱོང་ཆོས་སྨྲ་བ་ཏཱ་ལའི་བླ་མས། རབ་བྱུང་བཅུ་བདུན་པའི་མེ་བྱ་ཟླ་ ༨ ཚེས་ ༢༩ ཉིན་ལ། །