༧སྐྱབས་རྗེ་༧རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་དཔལ་ཁྲི་བརྟན་ནོར་རྩེ་ལ་ཆིབས་བསྒྱུར་གནང་བ།

༧རྒྱལ་བ་གཤེན་གྱི་འབྱུང་ལྡན་སུམ་བརྒྱ་དང་གཅིག་བོད་ས་ཁྱི་ལོའི་ཟླ་བ་གཉིས་པའི་ཚེས་པ་བཞི་ཉིན་ཏེ། ཕྱི་ལོ་ ༢༠༡༨ལོའི་ཟླ་བ་གསུམ་པའི་ཚེས་ཉེར་གཅིག་ཉིན་ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་༧རྒྱལ་བ་སྨན་རིའི་ཁྲི་འཛིན་སོ་བཞི་པ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་དང་༧སྨན་རིའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ་མཆོག་རྣམ་གཉིས་སྟོན་འཁོར་དང་བཅས་པ་༧དཔལ་ཁྲི་བརྟན་ནོར་བུ་རྩེའི་དགོན་པར་ཞབས་སོར་འཁོད་གནང་།

དེ་ཡང་ཕྱི་ཟླ་གསུམ་པའི་ཚེས་༡༩ཉིན་བོན་གཞིས་ཐོབ་རྒྱལ་གསར་པ་༧གཡུང་དྲུང་བོན་གྱི་གདན་ས་དཔལ་གཤེན་བསྟན་སྨན་རིའི་གླིང་ནས་༧སྐྱབས་རྗེ་རྒྱལ་བ་སྨན་རིའི་མཁན་སློབ་རྣམ་གཉིས་སྟོན་འཁོར་དང་བཅས་པ་རྒྱལ་ས་ལྡི་ལི་བརྒྱུད་དེ་ཕྱི་ཚེས་༢༡ཉིན་བལ་ཡུལ་རྒྱལ་ས་ལ་ཆིབས་ཕེབས་གནང་ཡོད་པ་དང་། བལ་པོའི་རྒྱལ་སྤྱིའི་གནམ་ཐང་ལ་༧དཔལ་ཁྲི་བརྟན་ནོར་བུའི་རྩེའི་མཁན་རིན་པོ་ཆེ་ལུང་རྟོགས་བསྟན་པ་གཡུང་དྲུང་མཆོག་དང་གྲྭ་ཚང་ལས་སྣེ་ལྷན་རྒྱས་ནས་ཕེབས་བསུ་ཞུས་ཤིང་།

དེ་ནས་༧དཔལ་ཁྲི་བརྟན་ནོར་བུའི་རྩེ་སྒོ་ཆེན་འགྲམ་དུ་ཁྲི་བརྟན་ནོར་བུ་རྩེའི་དཔོན་སློབ་རིན་པོ་ཆེ་དང་སྒྲུབ་གྲྭ་མཁན་རིན་པོ་ཆེ་མཆོག དེ་བཞིན་བཤད་སྒྲུབ་མཁན་རིན་པོ་ཆེ་དང་གྲྭ་ཚང་འདུས་མང་དང་། ས་གནས་སེར་སྐྱ་མང་ཚོགས་ཀྱིས་ཕེབས་བསུ་དང་སེར་འཕྲེང་བསྒྲིགས།

༧དཔལ་ཁྲི་བརྟན་ནོར་བུ་རྩེའི་ཚོགས་ཁང་ཆེན་མོའི་སྒོ་འཁྱམས་སུ་གཤེན་རབ་མཆོད་རྔ་བརྡུང་ནས་ཚོགས་ཁང་ལ་གདན་འདྲེན་ཞུས་ཤིང་། ༧སྐྱབས་རྗེ་༧རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་གིས་རྣམ་མཁྱེན་སྟོན་པ་གཤེན་རབ་ཀྱི་རྟེན་གཙོ་ལ་མཇལ་ཕྱག་ཞུས་རྗེས་གཅན་ལྔ་རིན་ཆེན་ཁྲི་ལ་བཞུགས་གསོལ་མཛད།

དེ་ནས་༧མཁན་རིན་པོ་ཆེ་བསྟན་པ་གཡུང་དྲུང་མཆོག་ནས་༧སྐྱབས་རྗེ་༧རྒྱལ་བ་སྨན་རི་བ་མཆོག་ལ་མན་གདལ་ཕུལ་ཞིང་རྣམ་ལྔའི་མཆོད་པ་སོགས་འདེགས་འབུལ་ཞུས་ཤིང་།

དེ་བཞིན་༧དཔོན་སློབ་རིན་པོ་ཆེ་ཚངས་པ་བསྟན་འཛིན་མཆོག་ནས་སྨན་རིའི་དཔོན་སློབ་མཆོག་ལ་མན་གདལ་སོགས་འདེགས་འབུལ་ཞུས།

དེ་མུར་བླ་གྲྭ་དགེ་བཤེས་དང་སེར་སྐྱ་མང་ཚོགས་ཡོངས་ནས་༧སྐྱབས་རྗེ་༧རྒྱལ་བ་སྨན་རིའི་མཁན་སློབ་རྣམ་གཉིས་ལ་མཇལ་བཅར་ཞུས་ཡོད་པ་བཅས་ཀྱི་གནས་བསྡུས་ཙམ་དུ་དགེ་བཤེས་གྱེར་ནག་ཚང་དུ་འབོད་པས་བལ་ཡུལ་རྒྱལ་ས་ཡུམ་བུ་ནས་འཕྲལ་དུ་སྤེལ་བ་དགེ་གྱུར་ཅིག།

2,143 total views, 1 views today



མདོ་སྔགས་ཟུང་འབྲེལ་ཐེག་ཆེན་གཡུང་དྲུང་བོན།

མདོ་སྔགས་ཟུང་འབྲེལ་ཐེག་ཆེན་གཡུང་དྲུང་བོན་ཞེས་པའི་མཚོན་དོན་མདོར་བསྡུས། དེ་ཡང་གཡུང་དྲུང་གཉིས་ནི་འདུལ་བ་མདོ་ཡི་སྡེ་དང༌། གསང་བ་ཟབ་དཀར་སྔགས་ཀྱི་སྡེ་གཉིས་མཚོན་པར་བྱེད་པ་ད ང༌། བར་གྱི་ལྕུམ་བཞོགས་དེ་ནི་ཐེག་པའི་ཡོངས་རྩེ་རྫོགས་པ་ཆེན་པོ་སེམས་ཀྱི་སྡེ་བཅས་མདོར་ན་མི་ལོ་ཆིག་ཁྲི་བརྒྱད་སྟོང་གི་གོང་དུ་བྱོན་པའི་རྣམ་འདྲེན་ཚེ་ལོ་བརྒྱ་བའི་སྟོན་མཆོག་རྫོགས་པའི་སངས་རྒྱས་རྒྱལ་བ་གཤེན་རབ་མི་བོ་མཆོག་གིས་གཏན་ལ་ཕབས་པའི་བོན་སྒོ་བཞི་མཛོད་ལྔའམ་ཐེག་པ་རིམ་དགུ་མཚོན་པར་བྱེད་དོ།

གཡུང་དྲུང་བོན་གྱི་དྲྭ་རྒྱ་ངོ་སྤྲོད།

གཡུང་དྲུང་བོན་གྱི་དྲྭ་ཚིགས་ཆེན་མོ་འདི་ནི་༧སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཆོག་གི་བཀའ་འཁྲོལ་གཞིར་བཟུང་འོག་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་སྟངས་ འཛིན་འོག་ཆེད་དུ་གསར་སྒྲུབ་བྱས་པའི་བོད་གནའ་བོའི་རིག་གཞུང་སྣ་ཚོགས་དང་འབྲེལ་བའི་གཡུང་དྲུང་བོན་སྤྱི་བའི་དྲྭ་ཚིགས་ཤིག་ཡིན།