༧སྐྱབས་རྗེ་༧རྒྱལ་བ་སྨན་རིའི་ཁྲི་འཛིན་སོ་བཞི་པ་མཆོག་ལ་ཁྲི་བརྟན་ནོར་རྩེ་འདུས་སྤྱི་ནས་མན་གདལ་བརྟན་བཞུགས་ཕུལ་བ།

༧རྒྱལ་བ་གཤེན་གྱི་འབྱུང་ལྡན་ ༣༠༡ བོད་ས་ཁྱི་ལོའི་ཟླ་བ་ ༠༢ ཚེས་ ༠༧ ཉིན་ཏེ། ཕྱི་ལོ་ ༢༠༡༨ ཟླ་བ་ ༠༣ ཚེས་ ༢༤ ཉིན། བལ་ཡུལ་༧དཔལ་ཁྲི་བརྟན་ནོར་བུ་རྩེ་འདུས་སྤྱི་ཐུན་མོང་ནས། ༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་༧རྒྱལ་བ་སྨན་རིའི་ཁྲི་འཛིན་སོ་བཞི་པ་མཆོག་༧དཔལ་ཁྲི་བརྟན་ནོར་རྩེ་ལ་ཐེངས་དང་པོར་ཞབས་སོར་འཁོད་པ་དང་། ༧སྐྱབས་རྗེ་རྒྱལ་བ་སྨན་རི་བ་མཆོག་བསྟན་འགྲོའི་མགོན་དུ་ཞབས་པད་ཡུན་དུ་བརྟན་ཅིང་གསང་གསུམ་གྱི་འཕྲིན་ལས་ཡར་ཟླ་ལྟར་འཕེལ་བའི་སྨོན་འདུན་རྟེན་འབྲེལ་ཞུ་ཆེད་མན་གདལ་སྐུ་གསུང་ཐུགས་རྟེན་དང་ན་བཟའ་གོས་དྲུག་སོགས་འདེགས་འབུལ་ཞུས་པ།

སྔ་དྲོའི་ཆུ་ཚོད་བཅུ་པ་ཙམ་ལ་གཟིམ་ཁང་ནས་གདན་འདྲེན་ཞུས་ཏེ་༧དཔལ་ཁྲི་བརྟན་ནོར་རྩེའི་གཙུག་ལག་ཁང་དུ་སྤྱན་དྲངས་ཏེ་གཅན་ལྔ་རིན་ཆེན་ཁྲི་ལ་བཞུགས་གསོལ་མཛད་པ་དང་།

དགེ་བཤེས་བླ་སྤྲུལ་འདུས་མང་ནས་ཚེ་སྒྲུབ་བྱ་རི་མའི་གཞུང་བསྲང་བ་དང་། ༧མཁན་རིན་པོ་ཆེ་ལུང་རྟོགས་བསྟན་པ་གཡུང་དྲུང་མཆོག་ནས་མན་གདལ་བཤད་པ་ཕུལ་ཞིང་མན་གདལ་སྐུ་གསུང་ཐུགས་རྟེན་འདེགས་འབུལ་ཞུས།

དེ་ནས་དཔོན་སློབ་རིན་པོ་ཆེ་ཚངས་པ་བསྟན་འཛིན་མཆོག་དང་། སྒྲུབ་གྲྭ་མཁན་རིན་པོ་ཆེ་ཚུལ་ཁྲིམས་བསྟན་འཛིན་མཆོག་དང་།

བཤད་སྒྲུབ་མཁན་རིན་པོ་ཆེ་སྐལ་བཟང་སྨོན་ལམ་མཆོག་དང་གྲྭ་ཚང་ལས་སྣེ་སོགས་ཀྱིས་རིམ་བཞིན་དུ་བརྟན་བཞུགས་ཀྱི་མཆོད་རྫས་བཀྲ་ཤིས་རྟགས་བརྒྱད་དང་ན་བཟའ་གོས་དྲུག རྒྱལ་བའི་བཀའ་རིན་པོ་ཆེ་དང་། རྣམ་ལྔའི་མཆོད་པ་སོགས་རིམ་གྱིས་ཕུལ་བ་དང་།

མཇུག་མཐར་སེར་སྐྱ་མང་ཚོགས་ཡོངས་ཀྱིས་མཇལ་ཁ་ཞུས་ཡོད་པ་བཅས་ཀྱི་གནས་བསྡུས་ཙམ་དུ་བལ་ཡུལ་གྱི་རྒྱལ་ས་ནས་འཕྲལ་དུ་སྤེལ།

གྱེར་ནག་ཚང་གིས།

1,371 total views, 1 views today



མདོ་སྔགས་ཟུང་འབྲེལ་ཐེག་ཆེན་གཡུང་དྲུང་བོན།

མདོ་སྔགས་ཟུང་འབྲེལ་ཐེག་ཆེན་གཡུང་དྲུང་བོན་ཞེས་པའི་མཚོན་དོན་མདོར་བསྡུས། དེ་ཡང་གཡུང་དྲུང་གཉིས་ནི་འདུལ་བ་མདོ་ཡི་སྡེ་དང༌། གསང་བ་ཟབ་དཀར་སྔགས་ཀྱི་སྡེ་གཉིས་མཚོན་པར་བྱེད་པ་ད ང༌། བར་གྱི་ལྕུམ་བཞོགས་དེ་ནི་ཐེག་པའི་ཡོངས་རྩེ་རྫོགས་པ་ཆེན་པོ་སེམས་ཀྱི་སྡེ་བཅས་མདོར་ན་མི་ལོ་ཆིག་ཁྲི་བརྒྱད་སྟོང་གི་གོང་དུ་བྱོན་པའི་རྣམ་འདྲེན་ཚེ་ལོ་བརྒྱ་བའི་སྟོན་མཆོག་རྫོགས་པའི་སངས་རྒྱས་རྒྱལ་བ་གཤེན་རབ་མི་བོ་མཆོག་གིས་གཏན་ལ་ཕབས་པའི་བོན་སྒོ་བཞི་མཛོད་ལྔའམ་ཐེག་པ་རིམ་དགུ་མཚོན་པར་བྱེད་དོ།

གཡུང་དྲུང་བོན་གྱི་དྲྭ་རྒྱ་ངོ་སྤྲོད།

གཡུང་དྲུང་བོན་གྱི་དྲྭ་ཚིགས་ཆེན་མོ་འདི་ནི་༧སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཆོག་གི་བཀའ་འཁྲོལ་གཞིར་བཟུང་འོག་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་སྟངས་ འཛིན་འོག་ཆེད་དུ་གསར་སྒྲུབ་བྱས་པའི་བོད་གནའ་བོའི་རིག་གཞུང་སྣ་ཚོགས་དང་འབྲེལ་བའི་གཡུང་དྲུང་བོན་སྤྱི་བའི་དྲྭ་ཚིགས་ཤིག་ཡིན།