དེ་རིང་༧དཔལ་གཤེན་བསྟན་སྨན་རིའི་གླིང་དུ་བཤད་སྒྲུབ་རྒན་ལགས་དང་དཔེ་མཛོད་ལས་བྱེད་ལ་སོགས་ལས་སྣེ་ཁག་ཅིག་བསྐོ་བཞག་བྱས་པའི་གནས་བསྡུས།

བོད་ཟླ་གསུམ་པའི་ཚེས་ལྔ་སྟེ་ཕྱི་ལོ་༢༠༡༨ལོའི་ཟླ་༤པའི་ཚེས་༢༠ཉིན་གྱི་སྔ་དྲོའི་ཕྱག་ཚོད་བཅུ་པའི་སྟེང་། ༧དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་གྲོས་ཚོགས་ཚོམས་ཆེན་དུ་༧སྐྱབས་རྗེ་རྒྱལ་བ་སྨན་རིའི་མཁན་སློབ་རྣམ་པ་གཙོས་ཚོགས་སྡེ་ཁག་གི་ལས་ཀྱི་སྣེ་མོ་བ་སུམ་ཅུ་ལྷག་ཅིག་ཚང་འཛོམས་ཐོག་བཤད་སྡེའི་རྒན་ལགས་དང་དཔེ་མཛོད་ལས་བྱེད་སོགས་ལས་སྣེ་ཁག་ཅིག་གསར་དུ་བསྐོ་བཞག་བྱས་ཡོད་པ་དང་། དེ་ཡང་༧སྐྱབས་རྗེ་ཁྲི་འཛིན་རིན་པོ་ཆེས་གསུངས་དོན། གདན་ས་འདི་ནི་གཡུང་དྲུང་བོན་གྱི་གདན་སའི་བསྟི་གནས་ཡིན་པའི་ཆ་ནས་གདན་ས་འདིའི་བསླབ་པ་སློབ་གཉེར་གྱི་འཕེལ་རྒྱས་དང་ཉམས་རྒུད་ཀྱིས་གཡུང་དྲུང་བོན་གྱི་བསྟན་པ་སྤྱིའི་འཕེལ་འགྲིབ་མཚོན་གྱི་ཡོད་པའི་ཆ་ནས།

ང་ཚོ་ལས་ཀྱི་སྣེ་མོ་བ་དག་གིས་འཕྱར་གྲུ་མཉམ་འདེགས་ཀྱིས་བསྟན་པ་འདི་ལ་ཞབས་ཞུ་གང་ནུས་གནང་དགོས་པའི་བཀའ་སློབ་གནད་སྨིན་བསྩལ་ཡོད་པ་དང་།

དེ་བཞིན་དུ་༧སྨན་རིའི་དཔོན་སློབ་རིན་པོ་ཆེ་དང་བཤད་སྒྲུབ་མཁན་སློབ་རྣམ་པས་རིམ་པ་བཞིན་བཤད་སྡེའི་རྒན་ལགས་དང་བསྟན་པ་འདིའི་ལས་དོན་གང་ལ་ཞབས་ཞུ་ཕུལ་བཞིན་པའི་ལས་ཀྱི་སྣེ་མོ་བ་དག་གིས་རང་ནུས་གང་འཇོན་གྱིས་ཞབས་ཞུ་ཕུལ་དགོས་པའི་བཀའ་སློབ་གནང་ཡོད་པ་རེད།

མཇུག་མཐར་༧སྐྱབས་རྗེ་ཁྲི་འཛིན་རིན་པོ་ཆེ་མཆོག་ནས་ལོ་ངོ་གང་མང་རིང་ལ་བསྟན་པ་སྤྱི་དང་དགོན་འདིར་ཞབས་ཞུ་ལོ་མང་ཞུས་པའི་ལས་སྣེ་རྙིང་པ་རྣམས་ལ་ཐུགས་རྗེ་ལེགས་གསོལ་གྱི་ཕྱག་འཁྱེར་བསྩལ་གནང་བ་བཅས་ཀྱིས་ཚོགས་འདུ་མཇུག་གྲུབ་པར་བྱས་ཡོད་པའི་གནས་བསྡུས་ཙམ་དུ།

710 total views, 1 views today



མདོ་སྔགས་ཟུང་འབྲེལ་ཐེག་ཆེན་གཡུང་དྲུང་བོན།

མདོ་སྔགས་ཟུང་འབྲེལ་ཐེག་ཆེན་གཡུང་དྲུང་བོན་ཞེས་པའི་མཚོན་དོན་མདོར་བསྡུས། དེ་ཡང་གཡུང་དྲུང་གཉིས་ནི་འདུལ་བ་མདོ་ཡི་སྡེ་དང༌། གསང་བ་ཟབ་དཀར་སྔགས་ཀྱི་སྡེ་གཉིས་མཚོན་པར་བྱེད་པ་ད ང༌། བར་གྱི་ལྕུམ་བཞོགས་དེ་ནི་ཐེག་པའི་ཡོངས་རྩེ་རྫོགས་པ་ཆེན་པོ་སེམས་ཀྱི་སྡེ་བཅས་མདོར་ན་མི་ལོ་ཆིག་ཁྲི་བརྒྱད་སྟོང་གི་གོང་དུ་བྱོན་པའི་རྣམ་འདྲེན་ཚེ་ལོ་བརྒྱ་བའི་སྟོན་མཆོག་རྫོགས་པའི་སངས་རྒྱས་རྒྱལ་བ་གཤེན་རབ་མི་བོ་མཆོག་གིས་གཏན་ལ་ཕབས་པའི་བོན་སྒོ་བཞི་མཛོད་ལྔའམ་ཐེག་པ་རིམ་དགུ་མཚོན་པར་བྱེད་དོ།

གཡུང་དྲུང་བོན་གྱི་དྲྭ་རྒྱ་ངོ་སྤྲོད།

གཡུང་དྲུང་བོན་གྱི་དྲྭ་ཚིགས་ཆེན་མོ་འདི་ནི་༧སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཆོག་གི་བཀའ་འཁྲོལ་གཞིར་བཟུང་འོག་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་སྟངས་ འཛིན་འོག་ཆེད་དུ་གསར་སྒྲུབ་བྱས་པའི་བོད་གནའ་བོའི་རིག་གཞུང་སྣ་ཚོགས་དང་འབྲེལ་བའི་གཡུང་དྲུང་བོན་སྤྱི་བའི་དྲྭ་ཚིགས་ཤིག་ཡིན།