གཡུང་དྲུང་བོན་གྱི་དྲྭ་རྒྱ།

༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༤པ་མཆོག་གི་བསྐལ་བཟང་དགྱེས་སྟོན་ཆེན་མོའི་མཛད་སྒོའི་ཉིན་དང་པོ།

 
དེ་ཡང་ཕྱི་ལོ་ ༢༠༡༨ ཟླ་ ༠༩ ཚེས་ ༠༦ ཉིན་གྱི་སྔ་དྲོའི་ཕྱག་ཚོད་༧།༣༠ ཐོག་སེར་སྐྱ་མི་མང་རྣམས་ལྷ་རྒྱལ་རི་རྩེར་ལྷན་འཛོམས་ཀྱིས་དཀར་ཕྱོགས་སྐྱོང་བའི་ལྷ་སྲུང་རྣམས་ལ་བསང་གསོལ་གྱི་བསང་དུད་གཡུ་འོད་ནམ་མཁའ་གང་བ་དང་དྲི་བདའ་སྨན་སྤོས་སོགས་ཀྱིས་བསུང་ཞིམ་ས་གཞིར་ཁྱབ་པ་དང་དགུང་སྔོན་དབྱིངས་སུ་རླུང་རྟའི་འོད་ཀྱིས་འཚེར་བར་གནང་ཞིང་དེ་བཞིན་རླུང་རྟ་སྒྲོན་འཛུགས་དང་ཀི་བསོ་ལྷ་རྒྱལ་སོགས་ཀྱི་ཚིག་བཤད་དབྱངས་སུ་གྱེར་ནས་བསང་གསོལ་གྲུབ་རྗེས།

གོང་ཚེས་ཀྱི་སྔ་དྲོའི་ཕྱག་ཚོད་༩ པའི་ཐོག ༧སྨན་རིའི་དཔོན་སློབ་རིན་པོ་ཆེ་དབུས་པའི་༧སྨན་རིའི་བཤད་སྒྲུབ་མཁན་སློབ་རྣམ་གཉིས་དང་བླ་སྤྲུལ་དགེ་བའི་བཤེས་གཉེན་སེམས་དཔའ་དགེ་འདུན་གྱི་སྡེ་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་མཁས་དབང་བློ་བཟང་སེང་གེ་དབུས་པའི་དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་དེ་བཞིན་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་དབུ་འཛིན་དང་སྐུ་མགྲོན་སྦྱིན་བདག་བཅས་འདུལ་ཁང་ཆེན་མོར་རྒྱས་འཛོམས་བྱུང་རྗེས་སུ།
༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༤ པ་རིན་པོ་ཆེ་མཆོག  སྨན་རིའི་བླ་བྲང་ནས་གདན་དྲངས་ཏེ་སྨན་རིའི་གཙུག་ལག་ཁང་ཆེན་མོའི་ནང་དུ་དྲི་བཟང་ངད་ལྡན་སྣ་ཚོགས་སྦྱར་བའི་སྤོས་འདྲེན་གྱིས་མདུན་བསུས་ཏེ་མི་འཇིགས་གདོང་ལྔའི་བཏེགས་པའི་གསེར་གྱི་ཁྲི་འཕང་མཐོན་པོའི་སྟེང་དུ་ཞབས་ཟུང་གསེར་གྱི་འཁོར་ལོ་བཞུགས་གསོལ་འཁོད་རྗེས། ཤེས་རབ་སྨྲ་བའི་སེང་གེའི་ཚེ་སྒྲུབ་ཀྱི་ཆོ་གའི་ཚོགས་འཁོར་འབུལ་བ་དང་སྦྲགས། མཆོད་པའི་མཚམས་སུ་སླེབས་རྗེས།
༧སྨན་རིའི་དཔོན་སློབ་རིན་པོ་ཆེ་མཆོག་ནས་མཎྜལ་གྱི་བཤད་པ་གྱེར་འབུལ་ཞུས་ཏེ་༧སྨན་རིའི་དཔོན་སློབ་རིན་པོ་ཆེ་མཆོག་དང་༧སྨན་རིའི་བཤད་སྒྲུབ་མཁན་སློབ་རྣམ་པ་གསུམ་གྱིས་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༤པ་མཆོག་ལ་མཎྜལ་འདེགས་འབུལ་དང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་མཁས་དབང་བློ་བཟང་སེང་གེ་དང་དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་དེ་བཞིན་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་དབུ་འཛིན་དང་སྐུ་ཚབ་དེ་མིན་ཕྱོགས་མཐའ་ཁག་ནས་ཆེད་ཕེབས་ཀྱི་བླ་གྲྭ་དང་།
སྐུ་མགྲོན་གལ་ཆེན་དག་གིས་གོང་འཁོད་ཆོ་གའི་གཞུང་གི་མཆོད་པའི་ཚིག་བཤད་དང་སྦྲགས་ལེན་བྱས་ནས་རྒྱལ་བའི་སྐུ་རྟེན་དུ་སྐུ་བརྙན་སྣ་ཚོགས་དང་གསུང་རྟེན་དུ་རྒྱལ་བའི་བཀའ་རིན་པོ་ཆེ་ཐུགས་རྟེན་དུ་རིན་ཆེན་ལས་གྲུབ་པའི་མཆོད་རྟེན་སྣ་ཚོགས་སོགས་རིམ་འབུལ་དང་དེ་བཞིན་མཆོད་པ་རྣམ་ལྔ་དང་གསེར་དངུལ་ལས་གྲུབ་པའི་བཀྲ་ཤིས་རྟགས་བརྒྱད་རིན་ཆེན་ནོར་བདུན་སོགས་འབུལ་ཚན་ཁག་བསྟར་འབུལ་གྱི་མཆོད་སྤྲིན་སྤུངས་པ་དང་།
ཚོགས་མཆོད་རྒྱས་པར་གྲུབ་ནས་༧སྐྱབས་རྗེ་༧རྒྱལ་བ་སྨན་རིའི་ཁྲི་འཛིན་༣༤པ་མཆོག་གི་གསོལ་འདེབས་༼གྱེར་བསྟན་རིན་ཆེན་༽སོགས་དབྱངས་སུ་གྱེར་ཞིང་སེར་སྐྱ་མི་མང་རྣམས་ཀྱིས་གཤར་དབང་ཞུས་ནས་དད་རྟེན་ཆེད་སྐུ་པར་བྱིན་ཅན་རེ་གནང་།  དེ་ནས་ཉིན་གུང་གི་ཕྱག་ཚོད་༡༢།༣༠ ཐོག  གཤེན་གྱི་གསང་སྔགས་སྒོམ་སྒྲུབ་གླིང་དུ་མི་མང་རྣམས་ལ་ཉིན་གུང་གི་གསོལ་ཚིགས་ཞལ་ལག་རྒྱས་འབུལ་གནང་བ་དང་།
ཕྱག་ཚོད་༢།༣༠ཐོག་༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༤ རིན་པོ་ཆེ་མཆོག་བླ་བྲང་ནས་འདུལ་ཁང་ཆེན་མོར་སྤོས་འདྲེན་གྱི་གདན་དྲངས་ཏེ་གནས་དེར་ཡོད་པའི་སེར་སྐྱ་མི་མང་ཡོངས་ལ་རིག་པའི་ལྷ་མཆོག་ཤེས་རབ་སྨྲ་བའི་སེང་གེའི་ཚེ་སྒྲུབ་ཀྱི་བཀའ་དབང་ཟབ་མོར་གནང་བ་དང་དལ་འབྱོར་བཅོ་བརྒྱད་ཚང་བའི་མི་ལུས་འདི་རྩ་ཆེན་པོ་ཡིན་ཚུལ་དང་ཐར་པ་དོན་གཉེར་དགོས་ཚུལ་སོགས་ཀྱིས་བཀའ་སློབ་ལམ་སྟོན་དང་དེ་བཞིན་ནང་པའི་དད་པ་དང་སྐྱབས་འགྲོ་སེམས་བསྐྱེད་སོགས་ཀྱི་འགྲེལ་བཤད་དང་དེ་རྣམས་བོན་སྒོར་ཞུགས་པའི་རྨང་གཞི་ཡིན་པར་སོགས་ཀྱི་བཀའ་སློབ་ཟབ་རྒྱས་གནང་སྟེ་དབང་གི་བརྒྱུད་རིམ་གསུང་ཞིང་དར་ཐག་འཐེན། དེ་ནས་དད་ལྡན་མང་ཚོགས་རྣམས་ཀྱིས་གཤར་དབང་ཞུས་ནས་ཚེ་རིལ་སོགས་བྱིན་རླབས་དང་བྱིན་མདུད་བཅས་དངོས་གྲུབ་ཐོབ།
 དེ་རྗེས་དགོང་དྲོའི་ཕྱག་ཚོད་༦པའི་ཐོག་བོན་ཕྲུག་བདེ་དོན་གྱི་རྩེད་ཐང་དུ་སེར་སྐྱ་མི་མང་རྣམས་རྒྱས་འཛོམས་ཐོག་བོན་གཞིས་ཉིན་སློབ་ཀྱི་ཟློས་གར་དང་ཕྱོགས་མཐའ་ཁག་ནས་ཕེབས་པའི་སྐད་ངག་ལ་རང་དབང་ཐོབ་པའི་གླུ་བ་གླུ་མ་སོགས་ཀྱིས་མི་རིགས་ཁག་གི་བྲོ་གཞས་སྣ་ཚོགས་འཁྲབ་སྟོན་གནང་བ་དང་མི་མང་རྣམས་ཀྱིས་སྤྲོ་སེམས་འཁོར་བའི་ངང་ནས་གཟིགས་མོ་གནང་བ་སོགས་གནས་བསྡུས་སོ།