དེ་ཡང་གྲུབ་མཐའི་རྒྱལ་པོ་འཕྲུལ་ངག་གཡུང་དྲུང་བོན་གྱི་བསྟན་པའི་སྲོལ་འབྱེད་ས་གསུམ་ན་འགྲན་པའི་ཟླ་མ་མཆིས་པ་༧རྣམ་འདྲེན་རྒྱལ་བ་གཉིས་པ་མཉམ་མེད་ཤེས་རབ་རྒྱལ་མཚན་ཞེས་གྲགས་པའི་སྙན་པ་དཀར་པོ་སྲིད་གསུམ་ལས་བརྒལ་བ། མགོན་པོ་གང་གི་རིང་ལུགས་འཁྲུལ་བ་མེད་པ་གཞིར་བཟུང་ལོ་རེ་བཞིན་བོད་ཕྱི་ནང་གི་གཡུང་དྲུང་བོན་གྱི་དགོན་སྡེ་ཁག་གང་སར་ཁྲོ་ཕུར་དགུ་གཏོར་ཆེན་མོ་ཚོགས་སྲོལ་ཡོད་པ་ལྟར།
འདི་ལོ་ཡང་གཤེན་གྱི་འབྱུང་ལྡན་སུམ་བརྒྱ་དང་གཅིག་གི་བོད་ས་ཕག་ལོའི་ཟླ་བཅུ་གཉིས་པའི་ཚེས་༢༥ཉིན་རྒྱབ། འཆར་ཅན་ལྟར་ཁྲོ་ཕུར་གཉིས་ཀྱི་གདངས་ཡིག་འབྲུག་མོ་ལྡིར་བའི་སྒྲ་དབྱངས་ཀྱི་གྱེར་རྒྱུགས་དང་།
༢༦ཉིན་གྱི་ཞོགས་པའི་ཆུ་ཚོད་༩།༠༠ བར་ཡེ་ཤེས་དབལ་མོ་གཙོས། དུས་དྲུག་སྤྲུལ་པའི་དབལ་མོ་དྲུག གསས་མཁར་མ་རྒྱུད་ཀྱི་གར་འཆམ། དབལ་ཕུར་ནག་པོའི་བསྒྲལ་བསྟབ། གཤེན་རབ་དགུ་འཆམ། གཟེ་གྱད་སྤར་མའི་གར་འཆམ་སོགས་ཀྱི་རྒྱུགས་སྤྲོད་གྲུབ་རྗེས། ཕྱི་དྲོར་གཏོར་མ་བཅའ་བཟོ་སྒྲིག་བཀོད་ཀྱིས་བོད་ཚེས་༢༧ནས་ཉེར་དགུ་བར་སྟེ་ཉིན་གྲངས་གསུམ་གྱི་རིང་ལ་གཡུང་དྲུང་བོན་གྱི་གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་གི་ཚོགས་ཁང་ཆེན་མོར་ཡི་དམ་ཁྲོ་བོ་ངོ་མཚར་རྒྱས་པ་དང་། དབལ་ཕུར་དྲག་པོ་གཏིང་རྫོགས་སྤྱི་དོན་ཉི་ཤུ་རྩ་ལྔ་གཉིས་ཀྱི་གཞུང་བསྲང་ནས་ཁྲོ་ཕུར་གྱི་གདངས་དབྱངས་འབྲུག་མོ་ལྡིར་བའི་སྒྲ་དབྱངས་ལ་དྲངས་ཏེ་སྔོན་དངོས་རྗེས་གསུམ་གྱི་བྱ་བཞག་ཁག་དང་། ཕྱི་ནང་གསང་གསུམ་གྱི་མཚམས་བཅད་སྐབས་ཀྱི་སྟག་འགྲོས་སེང་སྟབས། གཡུང་དྲུང་ལུ་གུ་རྒྱུད་ཀྱི་འགྱིང་འགྲོས།
ཉིན་སོ་སོར་ཕུར་སྒྲིལ་སོགས་འཆམ་གནང་བ་དང། གཤེན་གྱི་གསང་སྔགས་སྒོམ་སྒྲུབ་གླིང་དུ་ཡི་དམ་གསས་མཁར་མཆོག་ལྔའི་ཚོགས་མཆོད་དང་སྲིད་པ་རྒྱལ་མོའི་ཚོགས་མཆོད་སོགས་གྲུབ་པར་མཛད་ཡོད་པ་དང་།
བོད་ཚེས་ཉེར་དགུ་ཉིན་རྒྱབ་ཡངས་པའི་རྒྱལ་ཁམས་ཀུན་ཏུ་གནས་པའི་སྐྱེ་འགྲོ་ཡོངས་ལ་འཚེ་བར་བྱེད་པ། ཕྱི་ལས་ལ་གྱུར་པའི་དགྲ། ནང་རྣམ་རྟོག་ལ་གྱུར་པའི་བགེགས། གསང་བ་མ་རིག་པ་ལ་གྱུར་པའི་བདུད་ཚོགས་རྣམས་བསྒྲལ་ནས་བླ་མ་ཡི་དམ་མཁའ་འགྲོ་བོན་སྐྱོང་དང་བཅས་པ་རྣམས་ཀྱི་ཐུགས་ཀློང་དུ་བསྟིམ་པའི་བརྡ་མཚོན་དབལ་ཕུར་བསྒྲལ་བསྟབ་ཀྱི་གར་འཆམ་དང། གཤེན་རབ་དགུ་འཆམ། གཏོར་རྒྱག་གི་འཆམ་སོགས་འཁྲབ་གནང་མཛད་པ་མ་ཟད།
༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༤པ་རིན་པོ་ཆེ་མཆོག་གིས་ཟློག་ཁྲུས་དང་གཏོར་རྒྱག་གི་དབུ་བཞུགས་གནང་བ་དང་། གཏོར་རྒྱག་གྲུབ་ནས་མེ་རིའི་གར་འཆམ་དང་གཡུང་དྲུང་དགའ་འཁྱིལ་བསྐོར་གྲུབ་མཚམས་ཀི་བསྭོ་ལྷ་རྒྱལ་འཐེན་གནང་མཛད། བོད་ཚེས་སུམ་ཅུའི་ཐོ་རེངས་གཤེན་གྱི་དགེ་སྤྱོད་འདུལ་བའི་གསོ་སྦྱོང་དང་རྣམ་འདྲེན་རྒྱལ་བ་གཉིས་པའི་བླ་སྒྲུབ་ཀྱི་ཚོགས་འཁོར་བསྐོར་གནང་རྒྱུ་ཡིན་པ་བཅས་ཀྱི་གནས་བསྡུས་སུ་བཀོད་པ་ཐ་ཚན་མུ་ཙུག་སྨར་རོ།།