Author Archives: nyima geshe



༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༤པ་མཆོག་ལ་༧སྨན་རིའི་བཤད་སྒྲུབ་མཁན་པོ་ཉི་མ་དོན་གྲུབ་མཆོག་གིས་ཞབས་བརྟན་གསོལ་འདེབས་ཞིག་ཕུལ་བ།

བསྟན་པའི་ཟླ་བར་ཕུལ་བའི་ཤིས་བརྗོད་སྨྲ་སེང་དགྱེས་པའི་མཆོད་སྤྲིན།

ཤེས་རབ་ལྷ་མཆོག་སེང་ཆེན་རིགས་ལྔ་དང་།།
ཤེས་བྱའི་འབྱུང་གནས་ཕྱྭ་རྗེ་ཀེང་ཙེ་ཡི།།
ཐུགས་གསང་དྷི་དང་ཧྲི་ཡིག་ལས་བཞེངས་པའི།།
སངས་རྒྱས་མི་ཡི་རྣམ་རོལ་གང་དེར་འདུད།།

ངོ་བོ་སྟོང་པ་གསུམ་ལས་བོན་སྐུར་བཞེངས།།
རང་བཞིན་གསལ་བ་གསུམ་ལས་རྫོགས་སྐུར་བཞེངས།།
ཐུགས་རྗེ་རིག་པ་གསུམ་ལས་སྤྲུལ་སྐུར་བཞེངས།།
གྲོལ་ལམ་བོན་གྱི་སྐུ་གསུམ་ཁྱེད་ལ་འདུད།།

དེ་བཞིན་ཉིད་ལས་གསང་བ་བོན་སྐུར་གྲོལ།།
ཀུན་ཏུ་སྣང་ལས་གསང་ཆེན་རྫོགས་སྐུར་གྲོལ།།
སྤྲུལ་པ་རྒྱུ་ལས་གསང་མཆོག་སྤྲུལ་སྐུར་གྲོལ།།
བསྒྱུར་ལམ་སྔགས་ཀྱི་སྐུ་གསུམ་ཁྱེད་ལ་འདུད། རྩོམ་ཡིག་འདིའི་འཕྲོ་ཀློག » »

389 total views, no views today



༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་སྨན་རིའི་ཁྲི་འཛིན་༣༤པ་མཆོག་གི་བསྐལ་བཟང་དགྱེས་སྟོན་ཆེན་མོའི་མཛད་སྒོའི་ཉིན་ཐ་མ།

ཕྱི་ལོ་༢༠༡༨ཟླ་༩ཚེས༧ཉིན་གྱི་སྔ་དྲོའི་ཕྱག་ཚོད་༩།༣༠ཐོག ༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༤པ་རིན་པོ་ཆེ་མཆོག་དང་༧རྒྱལ་བ་སྨན་རིའི་དཔོན་སློབ་རིན་པོ་ཆེ་མཆོག་དང་༧སྨན་རིའི་བཤད་སྒྲུབ་མཁན་སློབ་རྣམ་གཉིས། སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཁས་དབང་བློ་བཟང་སེང་གེ་མཆོག  དམིགས་བསལ་སྐུ་མགྲོན་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག  བོད་མི་སྒྲིག་འཛུགས་ཀྱི་ཆོས་རིགས་དྲུང་ཆེ་དང་ཆོས་རྒྱུད་ཁག་གི་སྐུ་ཚབ་རྣམ་པ། རིས་སུ་མ་ཆད་པའི་དགོན་སྡེ་ཁག་གི་མཁན་པོ་དང་སྐུ་ཚབ་རྣམ་པ། གཡུང་དྲུང་བོན་གྱི་ཆོས་ཚོགས་ཁག་གི་འགན་འཛིན་དང་སྐུ་ཚབ་རྣམ་པ། བོད་ཀྱི་བོན་པོ་ཚོགས་པའི་ཚོགས་གཞོན།  གཡུང་དྲུང་བོན་གྱི་སྤྱི་འཐུས་རྣམ་གཉིས། ཆོལ་ཁའི་འཐུས་མི་རྣམ་པ། ས་འཐུས་ཚོགས་གཙོ། ས་གནས་འགོ་འཛིན། རང་བདེན་ཚོགས་ཆུང་གི་ཚོགས་གཙོ། བོན་གཞིས་ཌོ་ལན་ཇི་ཉིན་སློབ་ཀྱི་སློབ་སྤྱི་དང་།  གཞན་ཡང་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་སྐུ་ཚབ་དང་དབུ་འཛིན་སོགས་གཙོས་པའི་སེར་སྐྱ་མི་མང་ལྷན་རྒྱས་བསྐལ་བཟང་དགྱེས་སྟོན་གྱི་མཛད་སྒོ་ཆེན་མོའི་ཚོགས་རར་བཞུགས་གདན་འཁོད་མཚམས་སུ་མཛད་སྒོ་གཙོ་སྐྱོང་པ་ལྷ་ཐོག་དགེ་བཤེས་ཤེ་ཙུ་རྒྱ་མཚོ་དང་དགེ་བཤེས་ཚེ་དབང་དངོས་གྲུབ་རྣམ་གཉིས་ཀྱིས་བོད་སྐད་དང་དབྱིན་སྐད་ཟུང་ནས་མཛད་སྒོའི་དབུ་འཛུགས་ཀྱི་གཙོ་སྐྱོང་གནང་བ་དང་། རྩོམ་ཡིག་འདིའི་འཕྲོ་ཀློག » »

480 total views, no views today



མོན་ཡུལ་ནས་གསར་རྙེད་བྱུང་བའི་བོན་གྱི་དཔེ་རྙིང་བདམས་བསྒྲིགས་ཞིག་དཔེ་དེབ་དཔར་བསྐྲུན་གནང་བ།

དཔེ་སྐྲུན་གསལ་བཤད།

དེ་ཡང་ཉེ་ལམ་ཕྱི་ལོ་༢༠༡༨ ཟླ་ ༥ པའི་ནང་ཝཱ་ཎའི་སློབ་དཔོན་དགེ་བཤེས་རྣམ་དག་གཙུག་ཕུད་དང་ཕྲན་དགེ་བཤེས་ཤེ་ཙུ་རྒྱ་མཚོ་གཉིས་མོན་ཡུལ་དུ་སྤྲོ་འཆམ་ཆེད་ཕྱིན་པ་ཡིན། མོན་ཡུལ་དུ་སླེབས་སྐབས་སྣོད་བཅུད་ཁོར་ཡུག་དང་ཡུལ་སྲོལ་གོམས་གཤིས་ཀྱི་ཆ་ནས་བོད་རོང་ཕྱོགས་ཀྱི་ས་ཆ་ཞིག་ཏུ་སླེབས་པའི་ཚོར་སྣང་རང་བཞིན་གྱིས་སྟེར་བ་ཞིག་འདུག ཡུལ་དེའི་ཁོར་ཡུག་ནི་ནམ་ཟླ་དུས་བཞིའི་ཁྱད་མེད་པར་རྣམ་ཀུན་ལྗང་མདོག་ཏུ་གནས་པར་བཤད། ཡུལ་མིའི་འཚོ་ཐབས་ནི་ཞིང་འབྲོག་གཉིས་ཀའི་ཐོན་སྐྱེད་ཡོད་པ་ལས་གཙོ་བོར་སོ་ནམ་ཞིང་ལས་ལ་བརྟེན་པའི་ཡུལ་གྲུ་ཞིག་ཏུ་སྣང། དེང་སྐབས་ཀྱི་ན་གཞོན་ཕལ་ཆེ་བ་ལ་སློབ་གྲྭར་འགྲོ་རྒྱུའི་གོ་སྐབས་ཐོབ་འདུག་ལ། སློབ་མཐར་ཕྱིན་པའི་གཞོན་སྐྱེས་མང་པོ་ཞིག་གིས་གཞུང་སྒེར་ཅི་རིགས་སུ་དེང་རབས་སྤྱི་ཚོགས་ཀྱི་ལས་དོན་གཉེར་བཞིན་པ་ནི་ཅུང་དགའ་འོས་པའི་གནས་སུ་མཆིས། ཡུལ་འདི་སྔོན་དུས་སུ་བོད་ཀྱི་ཁྱབ་ཁོངས་ཡིན་པར་མ་ཟད་ཆོས་ལུགས་ཀྱང་གནའ་དུས་སུ་བོན་ལུགས་ཁོ་ན་ཡིན་པར་བཤད། རྗེས་སུ་ཆོས་བརྒྱུད་གཞན་ཁག་རིམ་པས་དར་ཁྱབ་བྱུང་ཡོད་འདུག། རྩོམ་ཡིག་འདིའི་འཕྲོ་ཀློག » »

3,322 total views, 5 views today



༧ཞྭ་དཀར་གཡུང་དྲུང་བོན་གྱི་དབུ་ཁྲིད་བླ་ཆེན་༧སྐྱབས་རྗེ་༧རྒྱལ་བ་སྨན་རི་བའི་ཁྲི་འཛིན་སོ་བཞི་པ་ལུང་རྟོགས་ཟླ་བ་དར་རྒྱས་དཔལ་བཟང་པོ་མཆོག་གི་མཛད་རྣམ་མདོར་ཙམ་བརྗོད་པ།

དེ་ཡང་འཛམ་གླིང་བོན་འབངས་ཡོངས་ཀྱི་དབུ་ཁྲིད་བླ་ཆེན་༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་༧རྒྱལ་བ་སྨན་རི་བའི་ཁྲི་འཛིན་༣༤་པ་ལུང་རྟོགས་ཟླ་བ་དར་རྒྱས་དཔལ་བཟང་པོ་མཆོག་ནི། བོད་གངས་ཅན་ལྗོངས་ཀྱི་མདོ་སྨད་ས་ཡི་ཆར་དུ་གཏོགས་པ། རྒྱ་བོན་ཟིང་པ་མཐུ་ཆེན་ལ་སོགས་སྔོན་བྱོན་ཞང་བོད་རིག་འཛིན་གོང་མ་རྣམས་ཀྱིས་བྱིན་གྱིས་རླབས་པའི་གནས་ཆེན་བྱང་བྱ་དུར་སྔོན་མོ་དང་ཤར་དུང་རི་དཀར་པོའི་ཉེ་འདབས་སུ་ཆགས་པའི་མཛེས་ཤིང་ལྟ་ན་སྡུག་པའི་ཡུལ་ལུང་ཟིང་ཆུ་རུ་འབོད་པའི་ས་གནས་དེར། བཤད་སྒྲུབ་བསྟན་པའི་བསྟི་གནས་༧དཔལ་གཤེན་བསྟན་དགའ་མལ་གཡུང་དྲུང་དར་རྒྱས་གླིང་གི་ལྷ་འབངས་སུ་གཏོགས་པ། མ་ཡོན་སྡེ་བའི་ཕྱུག་ཕྲུག་ཚང་ཞེས་པའི་རིགས་རུས་ཕུན་སུམ་ཚོགས་པའི་ཁྱིམ་གཞིས་དེར། རྩོམ་ཡིག་འདིའི་འཕྲོ་ཀློག » »

408 total views, 2 views today



༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༤པ་མཆོག་གི་བསྐལ་བཟང་དགྱེས་སྟོན་ཆེན་མོའི་མཛད་སྒོའི་ཉིན་དང་པོ།

 
དེ་ཡང་ཕྱི་ལོ་ ༢༠༡༨ ཟླ་ ༠༩ ཚེས་ ༠༦ ཉིན་གྱི་སྔ་དྲོའི་ཕྱག་ཚོད་༧།༣༠ ཐོག་སེར་སྐྱ་མི་མང་རྣམས་ལྷ་རྒྱལ་རི་རྩེར་ལྷན་འཛོམས་ཀྱིས་དཀར་ཕྱོགས་སྐྱོང་བའི་ལྷ་སྲུང་རྣམས་ལ་བསང་གསོལ་གྱི་བསང་དུད་གཡུ་འོད་ནམ་མཁའ་གང་བ་དང་དྲི་བདའ་སྨན་སྤོས་སོགས་ཀྱིས་བསུང་ཞིམ་ས་གཞིར་ཁྱབ་པ་དང་དགུང་སྔོན་དབྱིངས་སུ་རླུང་རྟའི་འོད་ཀྱིས་འཚེར་བར་གནང་ཞིང་དེ་བཞིན་རླུང་རྟ་སྒྲོན་འཛུགས་དང་ཀི་བསོ་ལྷ་རྒྱལ་སོགས་ཀྱི་ཚིག་བཤད་དབྱངས་སུ་གྱེར་ནས་བསང་གསོལ་གྲུབ་རྗེས། རྩོམ་ཡིག་འདིའི་འཕྲོ་ཀློག » »

406 total views, no views today



༧དཔལ་གཤེན་བསྟན་སྨན་རིའི་གླིང་གི་གཡུང་དྲུང་བོན་གྱི་བཤད་སྒྲུབ་འདུས་སྡེའི་སྐབས་སོ་བརྒྱད་པས་དཔེ་དེབ་ཁག་དཔར་བསྐྲུན་འགྲེམ་སྤེལ་གནང་བ།

   དཔེ་སྐྲུན་གསལ་བཤད།

༸ཞྭ་དཀར་གཡུང་དྲུང་བོན་གྱི་བསྟན་པ་རིན་པོ་ཆེ་ནི་བགྲང་བྱ་ཁྲི་ཕྲག་གི་ཡར་སྔོན་ནས་གཅེས་སུ་འོས་པའི་འཛམ་གླིང་ཡང་རྩེར་འཚོ་བའི་གངས་ལྗོངས་མི་རིགས་ཀྱི་བླ་སྲོག་དང་། ཞང་བོད་མཐོ་སྒང་གི་དབུ་རྩེ་ནས་མཆེད་པའི་ཐུན་མིན་རིག་པའི་གཞུང་ལུགས་ཀྱི་བོང་མཛོད་ཅིག་ཡིན་ལ། དེ་ཡང་བདག་ཅག་གི་སྟོན་པ་རྫོགས་པའི་སངས་རྒྱས་༧རྒྱལ་བ་གཤེན་རབ་མི་བོ་ཀུན་ལས་རྣམ་པར་རྒྱལ་བ་དེ་ཉིད་ཀྱིས་གསུངས་པའི་བཀའ་སྡེ་སྣོད་ཀྱི་བོན་སྒོ་བརྒྱད་ཁྲི་བཞི་སྟོང་ངམ་མདོ་འབུམ་རྒྱུད་མཛོད་བཞི་རུ་བཞུགས་པ་འདི་རྣམས་ནི།  བྱུང་རབས་ཀྱི་ཆ་ནས་མི་ལོ་ཁྲི་ཕྲག་ལས་བརྒལ་བའི་ལོ་རྒྱུས་ལྡན་ཡོད་ཅིང༌།  རིན་ཐང་ཡང་གཞལ་དུ་མེད་པའི་མཐོ་སྒང་གི་ཕ་ནོར་ཉག་གཅིག་སྟེ།  སེམས་ཅན་གྱི་བདེ་སྐྱིད་ཀུན་གྱི་འབྱུང་གནས་མདོ་སྔགས་སེམས་གསུམ་གྱི་མ་ལག་ཡོངས་སུ་ཚང་བ་ཞིག་ཡིན།  འོན་ཀྱང་སྙིགས་མའི་དུས་འདིར་སེམས་ཅན་གྱི་ལས་བསོད་བྲི་ཞིང་དམན་པའི་དབང་གིས་ཉམས་ཉེས་ཤུགས་ཆེར་བྱུང་ཡོད་ནའང༌།  དུས་རབས་ཉི་ཤུ་པའི་དུས་དཀྱིལ་དུ་ྋསྐྱབས་རྗེ་སྨན་རིའི་མཁན་སློབ་རྣམ་གཉིས་གཙོས་བོད་ཕྱི་ནང་དུ་བཞུགས་པའི་བླ་སྤྲུལ་སྐྱེས་ཆེན་བཤེས་གཉེན་དམ་པ་རྣམས་ཀྱིས།  འགྱེལ་ས་ནས་སློང༌།  ཉམས་ས་ནས་གསོ་བའི་ཐུགས་ཁུར་ཕྲག་ཏུ་བཞེས་ཏེ།  བཅུ་ཕྲག་རིག་པ་བརྡོལ་བའི་གཏེར་གནས།  དགོན་སྡེ་དང།  བཤད་གྲྭ།  སྒྲུབ་གྲྭ།  སློབ་གྲྭ་རྣམས་སླར་གསོ་དང་གསར་འཛུགས་ཀྱི་ལམ་ནས་བོད་ཀྱི་ཆོས་དང་རིག་གཞུང་ལ་སྨན་པའི་རླབས་ཆེན་གྱི་བྱ་བཞག་མཛད་དེ། བོད་ཕྱི་ནང་གཉིས་སུ་བསྟན་པའི་མེ་རོ་སླར་གསོའི་མཛད་འཕྲིན་བླ་ན་མེད་པ་བསྐྱང་ཡོད།  ལྷག་པར་དུ་ཞིང་གཤེགས་དམ་པ་ྋཞྭ་དཀར་བསྟན་པའི་གཙུག་རྒྱན་རྒྱལ་བ་སྨན་རི་བའི་ཁྲི་འཛིན་སོ་གསུམ་པ་༧སྐྱབས་རྗེ་ལུང་རྟོགས་བསྟན་པའི་ཉི་མ་རིན་པོ་ཆེ་མཆོག་གིས།  བཤད་སྒྲུབ་སློབ་གཉེར་བ་རྣམས་ལ་དཔེ་རྙིང་གི་རིགས་རྣམས་དོ་སྣང་ཆེན་པོས་གཟིགས་དགོས་པར་མ་ཟད།  དཔེ་རྙིང་དང་དཔེ་དཀོན་གྱི་རིགས་རྣམས་པར་སྐྲུན་གནང་ཐུབ་ན་དགེ་མཚན་ཆེ་བའི་བཀའ་སློབ་ཡང་ཡང་ཕེབས་པར་བརྟེན། རྩོམ་ཡིག་འདིའི་འཕྲོ་ཀློག » »

740 total views, no views today



༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༣པ་ཞིང་གཤེགས་མཆོག་དགོངས་པ་བོན་དབྱིངས་སུ་བསྡུས་ནས་མི་ལོ་ཧྲིལ་པོ་གཅིག་འཁོར་བའི་འདས་མཆོད་ཆེན་མོ་མཛད་སྒོའི་ཉིན་གཉིས་པ།


ཕྱི་ལོ་༢༠༡༨ཟླ་༩པའི་ཚེས་༤ཉིན་སྔ་དྲོའི་ཕྱག་ཚོད་༨པའི་ཐོག་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༤པ་རིན་པོ་ཆེ་མཆོག་དང་༧རྒྱལ་བ་སྨན་རིའི་དཔོན་སློབ་རིན་པོ་ཆེ་རྣམ་པ་གཉིས་དབུས་པའི་བཤད་སྒྲུབ་མཁན་སློབ་རྣམ་གཉིས་དང་བླ་སྤྲུལ་དགེ་བའི་བཤེས་གཉེན་འདུས་མང་རྣམས་འདུལ་ཁང་དང་སྐུ་གདུང་སོགས་ལ་སེར་འཕྲེང་བསྐོར་ནས་ཚོགས་ཁང་ཆེན་མོའི་མདུན་ཐང་དུ་ཚོགས་གྲལ་འཁོད་པ་དང་ཆབས་ཅིག རྩོམ་ཡིག་འདིའི་འཕྲོ་ཀློག » »

466 total views, 1 views today



༧སྐྱབས་རྗེ་དཔོན་གསས་བླ་མ་༧རྒྱལ་བ་སྨན་རིའི་ཁྲི་འཛིན་༣༣པ་མཆོག་གི་༼མཛད་བརྙན་མཐོང་གྲོལ་ཀུན་འདུས་༽དབུ་འབྱེད་གནང་བ།

微信图片_20180904153220.jpg

ཕྱི་ལོ་༢༠༡༨ཟླ་༩ཚེས་༤སྟེ་བོད་ས་ཁྱི་ལོའི་ཟླ་བ་བདུན་པའི་ཚེས་ཉི་ཤུ་བཞིའི་ཉིན་༧རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཆོག་བདེ་བར་གཤེགས་ནས་མི་ལོ་ཧྲིལ་པོ་གཅིག་འཁོར་བའི་དགོངས་རྫོགས་མཆོད་སྤྲིན་ཆེན་མོའི་དངོས་གཞིའི་ཉིན་༧ཞྭ་དཀར་བསྟན་པའི་གཙུག་རྒྱན་སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་༣༤་པ་མཆོག་གིས་༧སྐྱབས་རྗེ་བདེ་བར་གཤེགས་པའི་(མཛད་བརྙན་མཐོང་གྲོལ་ཀུན་འདུས་)དབུ་འབྱེད་གནང་བ།  

དཔར་སྐྲུན་གསལ་བཤད།

<<མཛད་བརྙན་མཐོང་གྲོལ་ཀུན་འདུས་>>འདི་ནི། ༸སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཆོག་དགོངས་པ་བོན་དབྱིངས་སུ་ཐིམ་ནས་མི་ལོ་ཧྲིལ་པོ་གཅིག་འཁོར་བའི་དགོངས་རྫོགས་མཆོད་སྤྲིན་ཆེན་མོའི་མཛད་སྒོར་ཆེད་དུ་དམིགས་ནས་༧སྐྱབས་རྗེ་དམ་པ་མཆོག་གི་བཀའ་དྲིན་རྗེས་དྲན་མཚོན་སླད་དུ་བསྒྲིགས་པའི་མཐོང་གྲོལ་སྐུ་དཔར་གྱི་ལམ་ནས་“མཛད་”རྣམ་གསལ་བར་བྱེད་པའི་“བརྙན་”དེབ་ཅིག་ལགས།

འདིར་༧སྐྱབས་རྗེ་མཆོག་གི་རྣམ་ཐར་རྒྱས་བསྡུས་སོགས་དེ་སྔོན་དཔར་སྐྲུན་ཞུས་པ་ཁག་ལ་ཞིབ་བསྡུར་དང་༸སྐྱབས་རྗེ་མཆོག་གིས་གཙོས་པའི་འབྲེལ་ཡོད་མི་སྣ་རེ་འགའི་ཉིན་ཐོ་སོགས་ལ་གཞི་བཅོལ་ནས་དོགས་གནད་ཅན་གྱི་ལོ་ཚིགས་མང་པོར་གསལ་ཁ་གཏོད་ཁུལ་བགྱིས་ཏེ་<<མཛད་བསྡུས་གཡུང་དྲུང་སྲིད་པའི་དར་ཆེན་>>ཞེས་པ་ཞིག་ཀྱང་ཆེད་བསྒྲིགས་ཞུས་ཡོད།

ནམ་རྒྱུན་༧སྐྱབས་རྗེ་མཆོག་གིས་དུས་ཆེན་དང་མཛད་སྒོ། ཚོགས་འདུ་དང་བགྲོ་གླེང་སོགས་སུ་བསྩལ་བའི་བཀའ་སློབ་རྣམས་ཞང་བོད་རིག་གཞུང་འཚོ་སྐྱོང་ཁང་སོགས་ཀྱིས་ལོ་རབས་མང་པོའི་རིང་ལ་སྒྲ་འཇུག་ཞུས་ཡོད་སྟབས། དེ་དག་ལས་ཞལ་གདམས་ཐུང་ངུ་འགའ་ཞིག་བཏུས་ཏེ་ད་ལམ་མཛད་བརྙན་གྱི་བར་མཚམས་རྣམས་སུ་བཀོད་ཡོད་པ་ནི། འབྱུང་འགྱུར་གྱི་དུས་སུ་སྒྲ་འཇུག་དེ་དག་ཡི་གེར་ཕབ་སྟེ་ཞལ་གདམས་བསླབ་བྱ་ཕྱོགས་བསྒྲིགས་ཤིག་ཀྱང་དཔར་སྐྲུན་ཞུ་བར་རྟིང་སྐུལ་ཙམ་ཡིན།

微信图片_20180904153201.jpg

གཞན་ཡང་མཛད་བརྙན་འདི་ལ་ཆེད་མངགས་ཀྱིས་བཞེངས་བྲིས་མཛད་པའི་རྒྱལ་བ་སྨན་རི་བའི་ཁྲི་འཛིན་རིམ་བྱོན་གྱི་“མཁན་རབས་ཞལ་ཐང་ཆེན་མོ་”དེ་ཉིད་ཀྱང་འདིར་འགོད་སྐལ་ཤར།

ལར་བོད་ཀྱི་བླ་སྤྲུལ་ཁག་གི་རྣམ་ཐར་ནང་མཛད་འཕྲིན་དང་འབྲེལ་བའི་སྐུ་དཔར་འབོར་ཆེན་བསྟར་བསྒྲིགས་ཞུ་སྲོལ་ཆེས་དཀོན་སྟབས། འདིར་དམིགས་སུ་བཀར་ནས་དངོས་ཡོད་ལོ་རྒྱུས་རྣམས་ལྷ་སྒྲུང་དུ་མི་འགྱུར་བའི་དགེ་མཚན་དུ་དམིགས་ཏེ་དེང་རབས་ཀྱི་ཐབས་ལམ་བཀོལ་ནས་ད་ལམ་སྐུ་དཔར་མཐོང་གྲོལ་རྣམས་གཙོར་བསྒྲིགས་ཞུས་པ་ལགས་ཀྱང་། སྐུ་དཔར་མང་པོ་ཞིག་ལ་ཁ་བྱང་སོགས་མེད་པ་ནི་དུས་ཚོད་ཀྱིས་མ་འདང་བ་དངོས་ཡོད་ཡིན་སྟབས་ཡིག་ཚོགས་ལ་འཇིགས་ནས་བསྐྱུངས་པ་སོགས་ལ་ཁག་འགེལ་བྱ་བར་མི་འདོད། འོན་ཀྱང་སྐུ་དཔར་རེ་འགའ་ནི་ཁ་བྱང་དང་འགྲེལ་བཤད་མི་དགོས་པར་རང་འགྲེལ་རང་གྲག་ལྟ་བུར་སྣང་བས་དེས་ཀྱང་འཐུས་པར་ཞུས་ལ། སྐུ་དཔར་རྙིང་པ་དེ་དག་འདིར་བཀོད་པ་ཙམ་གྱིས་གཅེས་སྲུང་གི་ལས་རིམ་དུའང་འགྲོ་བར་མཐོང་།

མདོར་ན་དུས་ཐེབས་སྲོ་མའི་རྒྱུ་མར་ཅོ་འདྲི་བ་ལྟ་བུའི་ནང་ང་ཚོས་གཞུང་སྒེར་ཅི་རིགས་ནས་གཡར་བའི་བརྙན་དཔར་སྟོང་ཕྲག་ལྔ་ལས་བརྒལ་བ་དག་ནས་བདམས་གསེས་བགྱིས་མཐར་མཛད་བརྙན་འདིར་སྐུ་དཔར་གྱི་གྲངས་འབོར་ཆིག་སྟོང་བཞི་བརྒྱ་ཙམ་དངོས་སུ་བཀོད་ཅིང་བསྒྲིགས་ཡོད།

དེ་ཡང་སྨན་རིའི་བླ་བྲང་གི་ཕྱག་སྦུག་ཏུ་དོ་གཉེར་མཛད་པའི་མི་ལོ་བདུན་ཅུ་ལ་ཉེ་བའི་སྔོན་གྱི་སྐུ་དཔར་བྱིན་ཅན་ཁག་གཅིག་ལག་ཏུ་སོན་པས་མ་ཚད། དེ་མཚུངས་སུ་མི་ལོ་ལྔ་བཅུའི་རིང་དཔར་བདག་རང་ཉིད་ལས་སུས་ཀྱང་མཇལ་མྱོང་མེད་པའི་ལོ་རྒྱུས་ཀྱི་རང་བཞིན་ལྡན་པའི་སྐུ་དཔར་དཔེར་ན་ཁྲི་འཛིན་སོ་གསུམ་པའི་རྟགས་སྒྲིལ་གྱི་བྱེད་སྒོ་དང་འབྲེལ་བའི་སྐུ་དཔར་ཁག་ཀྱང་ང་ཚོའི་ལག་ཏུ་ཐེབས་ཡོད། ད་དུང་ལོ་རྒྱུས་ལ་མཁོ་གནད་ཅན་གྱི་སྐུ་དཔར་དེ་སྔོན་ཡོངས་གྲགས་ཀྱི་མཇལ་ཡུལ་དུ་མ་གྱུར་པ་དུ་མ་ཞིག་ཀྱང་ད་ཐེངས་འདི་ནས་ཕྱི་རུ་མངོན་ཡོད་པས། མཛད་བརྙན་འདི་ནི་རིན་བྲལ་གྱི་དཔར་མཛོད་ཅིག་ཏུའང་གྲུབ།

微信图片_20180904153214.jpg

དེ་ལྟར་ནའང་དངོས་ཡོད་ལོ་རྒྱུས་དང་འབྲེལ་ཞིང་མཛད་རྗེས་ཀྱིས་ཕྱུག་པའི་སྐུ་དཔར་སྡེ་ཚན་ཁག་གཅིག་ནི་དགོས་པ་དང་རྒྱུ་མཚན་གཞན་དབང་གིས་འདིར་མ་བཙུད་པའང་གསལ་བཤད་བྱ་དགོས་པའི་གནས་སུ་མཐོང་།

དེ་མིན་མཛད་བརྙན་འདི་ཉིད་ཀྱི་ལྡེབས་གྲངས་ལའང་ཚད་བཀག་ཡོད་སྟབས་ད་དུང་༸སྐྱབས་རྗེ་མཆོག་གི་སྐུ་དཔར་བྱིན་ཅན་རྙིང་པ་མང་པོ་ཞིག་ཟུར་འཇོག་མི་བྱ་ཀ་མེད་དུ་གྱུར་པས་མ་ཚད། མང་པོ་ཞིག་ནི་གཅིག་ལས་གཅིག་ལྷག་ལོ་རྒྱུས་ཀྱི་དཔང་པོར་གནས་འདུག་པས་ཡོད་ཚད་བཙུད་ཐབས་བྲལ་ནས་གནད་འགག་ཅན་གྱི་སྐུ་དཔར་མང་པོ་ཞིག་གི་གཏོས་ཚད་ཀྱང་ཆུང་ངུར་གཏང་དགོས་ཆགས། འགའ་ཞིག་གི་རྒྱུ་སྤུས་དངོས་ལེགས་རྣམས་ང་ཚོར་མ་འབྱོར་ཡང་གནས་སྐབས་སྤུས་ཚད་ཐེབས་ཆག་གིས་གོ་འཕེར་ཆོད་པར་བྱ་དགོས་པ་ནི། རིང་པོར་མ་སོང་བར་དཔར་རྙིང་དེ་དག་སུས་ཀྱང་ངོ་མི་ཤེས་པར་འགྱུར་ཉེན་ཆེ་བས་ཡིན།

འདིར་འཕྲད་པའི་དཀའ་ཁག་ཆེ་ཤོས་ནི། ༸སྐྱབས་རྗེ་མཆོག་༡༩༩༤ནས་སྔ་ཕྱིར་ལན་གྲངས་གསུམ་བོད་གངས་ཅན་ལྗོངས་ཀྱི་མདོ་དབུས་ཁམས་གསུམ་དུ་ཞབས་ཀྱིས་བཅགས་པའི་དུས་གནད་ཡོད་བླ་སྤྲུལ་དང་གལ་ཆེའི་མི་དཔོན་སོགས་དང་མཇལ་འཕྲད་སྐབས་བསྒྲོན་པའི་སྐུ་དཔར་རྣམས་དང་། དགོན་ཁག་རྣམས་སུ་བསྐྱངས་པའི་བོན་འཆད་ཀྱི་མཛད་འཕྲིན་དང་འབྲེལ་བའི་སྐུ་དཔར་དག་ནི་དོ་བདག་ལས་གང་འབྱོར་བ་རྣམས་རྩོམ་སྒྲིག་ཚོགས་མི་རྣམས་གྲོས་མོལ་བྱས་ཏེ་བདམས་པ་ལས་ཐབས་གཞན་གྱིས་དབུལ།

ཐོག་མའི་ཆར་ཚོགས་མི་རྣམས་མཉམ་འཛོམས་ཀྱིས་༸སྐྱབས་རྗེ་མཆོག་ཕེབས་ཡུལ་གྱི་དགོན་ཁག་རེ་རེའི་བླ་སྤྲུལ་དང་གྲྭ་མང་མཉམ་དུ་བསྐྱོན་པའི་སྐུ་དཔར་རེ་རེ་རྟེན་འབྲེལ་གྱི་དོད་དུ་འཇོག་ཐབས་བརྩོན་ཡང་མ་འདང་བའི་ཆ་དེས་ཀྱང་མང་བས་དོན་འབྲས་མ་སྨིན། དེ་བཞིན་འབྲེལ་ཡོད་མི་སྣ་དག་ལས་གཙོ་གནད་ཆེ་བ་རེ་འགའ་མ་གཏོགས་གཞན་རྣམས་ཀྱི་མཚན་ནི་གཅིག་བྲིས་གཉིས་བྲིས་ཀྱིས་མཐའ་ཡང་འཇོག་ཐབས་བཀའ་བས་ཚད་འཛིན་མི་ཞུ་ཐབས་མེད་གྱུར།

དེས་ན་འདིར་ཆེད་དུ་ཞུ་འདོད་པ་ནི། ༸སྐྱབས་རྗེ་མཆོག་གངས་ལྗོངས་སུ་ཕེབས་རིམ་ཁག་དང་འབྲེལ་བའི་སྐུ་དཔར་ནི་གྲངས་འབོར་ཤིན་ཏུ་མང་ལ། གལ་གནད་ཀྱང་དེ་བས་ཆེ་སྟབས། ཚད་བཀག་ཅན་གྱི་ས་དམིགས་འདིར་ཤོང་ཐབས་བྲལ་ཞིང་ཡུན་ཚད་ཐུང་བའི་དུས་ཚོད་ནང་སྒྲིག་ཐབས་ཀྱང་དཀའ་བར་བརྟེན། མ་འོངས་འབྱུང་འགྱུར་ནང་དོ་བདག་རྣམས་ཀྱིས་༸སྐྱབས་རྗེ་མཆོག་བོད་ཡུལ་དུ་ཕེབས་ཕྱོགས་ཀྱི་སྐུ་དཔར་གཅིག་པུའི་དེབ་ཆེན་ཞིག་ཀྱང་བསྐྲུན་རྒྱུ་འདུག་སྙམ་པའང་བྱུང་།

སྐུ་དཔར་རྣམས་ཀྱི་སྒྲིག་རིམ་ཡང་གཙོ་བོ་ལོ་རྒྱུས་ཀྱི་འབྱུང་རིམ་བཞིན་རྙིང་པ་རྣམས་སྔོན་དང་གསར་པ་རྣམས་དེ་མཚམས་སུ་སྒྲིབ་ཐབས་སུ་འབད་པས་བརྩོན།

འདིར་བཀོད་པའི་བརྟེན་པ་པེའུ་ཙེ་རྣམ་གསུམ་གྱི་སྐུ་དཔར་ཕལ་ཆེ་བ་ནི་༸སྐྱབས་རྗེ་མཆོག་གིས་གསར་དུ་བཞེངས་པ་ཁག་གཅིག་ཡིན་པ་ལས་དཔལ་ལྡན་སྨན་རིའི་རྩ་ཆེའི་སྐུ་གསུང་ཐུགས་རྟེན་རྙིང་པ་དག་འདིར་མ་འཁོད་མེད་པ་ནི་བརྗོད་དགོས་དབེན།

མདོར་ན་མཛད་བརྙན་འདི་ཉིད་༸སྐྱབས་རྗེ་མཆོག་གི་མཛད་རྣམ་རྒྱས་པ་རྩོམ་སྒྲིག་བྱ་བའི་སྔོན་འགྲོའི་ཆ་རྐྱེན་ནམ་དེར་ཉེ་བར་མཁོ་བའི་རྒྱུ་ཆ་འཚོལ་སྡུད་ཀྱི་ལས་རིམ་ཞིག་ཏུའང་རང་བཞིན་གྱིས་གྲུབ་ཡོད།

微信图片_20180904153224.jpg

དེ་ཡང་ ༢༠༡༧ ལོར་དཔལ་གཤེན་བསྟན་སྨན་རིའི་གླིང་དུ་༸སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་དབུ་བཞུགས་ཐོག་སྨན་རིའི་གླིང་གི་བླ་སྤྱི་དང་། དབུས་གཡུང་དྲུང་བོན་འཛིན་སྐྱོང་ལྷན་ཚོགས། སྨན་རི་ཚང་གི་ལས་གཉེར། གྲྭ་ཚང་གི་རྒྱུན་ལས། གཡུང་དྲུང་བོན་གྱི་བཤད་སྒྲུབ་འདུས་སྡེའི་རྒྱུན་ལས། དཔལ་གཤེན་བསྟན་སྨན་རིའི་གླིང་གི་དགེ་བཤེས་རྣམ་པ་བཅས་ཚང་འཛོམས་ཐོག་༸སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་སོ་གསུམ་པ་མཆོག་གི་མཛད་རྣམ་རྩོམ་སྒྲིག་ཚོགས་མི་འདེམ་སྒྲུག་མཛད་དེ་རྣམ་ཐར་རྒྱས་པ་རྩོམ་སྒྲིག་དགོས་པར་བཀའ་མངགས་བྱུང་ན་ཡང་། བདག་ཅག་བསོད་ནམས་ཀྱིས་མ་ཁྱོག་ནས་༸སྐྱབས་རྗེ་མཆོག་དགོངས་པ་བོན་དབྱིངས་སུ་ཐིམ་པས་གནས་སྐབས་རིང་མཛད་རྣམ་རྒྱས་པ་རྩོམ་སྒྲིག་གི་ལས་གཞི་ཕྱིར་འགྱངས་ཀྱིས་གོང་ནས་ཆེད་མངགས་མཛད་པ་ལྟར་ལོ་འཁོར་དགོངས་རྫོགས་མཆོད་སྤྲིན་ཆེན་མོར་ཆེད་དུ་དམིགས་ནས་དུས་ཐེབས་ཤིན་ཏུ་ཐུང་བའི་ནང་མཛད་བརྙན་འདི་བཞིན་བསྒྲིགས་པ་ལགས།

རྩོམ་སྒྲིག་གི་ལས་རིམ་འདི་ཉིད་ནང་ཚོགས་མི་ཀུན་གྱིས་ཕྱར་གྲུ་མཉམ་འདེགས་གནང་བར་ཐུགས་རྗེ་ཆེ་ཞུ་བར་མ་ཟད། འདི་གའི་ཚོགས་མི་དཔོན་རྒོད་དགེ་བཤེས་གཡུང་དྲུང་སྐལ་བཟང་ལགས་ཀྱིས་ན་གཞོན་ཉམས་ཞིབ་ཚོགས་འདུའི་སྟེང་དུ་རང་གི་གཏམ་བཤད་ལས་རིམ་ཡང་ཕྱིར་འཐེན་མཛད་དེ་དཔར་ཁང་ནང་ཟླ་བ་གཅིག་གི་རིང་ལ་གང་ཅིའི་ཐད་ནས་འགན་ལེན་མཉམ་ཁུར་གནང་སོང་བར་དམིགས་བསལ་བཀའ་དྲིན་ཆེ་ཞུ།

གང་ལྟར་མཛད་བརྙན་འདི་ནི། ཆེས་ཐོག་མར་བསྐྲུན་པའི་རྐང་ལམ་ལྟ་བུ་ཡིན་པས། རིམ་གྱིས་འདི་དག་ལ་འགྲེལ་བཤད་རྒྱས་འབྲི་དང་ཁ་གསབ་ལེགས་སྣོན་གྱིས་རྒྱ་ལམ་ལྟ་བུར་བཟོ་ཐུབ་པའི་རེ་བས་མ་རྩའི་རྨང་གཞི་བཙུགས་པའང་ཡིན།

དེས་ན་གལ་ཏེ་འདིར་མ་ཚུད་པའི་སྐུ་དཔར་བྱིན་ཅན་དང་གལ་ཆེན་ཇི་སྙེད་ཅིག་སུ་ལའང་མཆིས་ཚེ་རྣམ་ཐར་རྒྱས་པའི་ནང་དུ་དགོད་ཐབས་སུ་མཛད་རྣམ་རྩོམ་སྒྲིག་ཚོགས་པར་འབྲེལ་བ་གནང་རོགས་ཞུ།

མཐར་མཛད་བརྙན་འདིར་ནོར་འཛོལ་ཆད་ལྷག་གི་སྐྱོན་ཆ་མཆིས་པ་རྣམས་མཁྱེན་ལྡན་རྣམས་ལ་དགོངས་སེལ་དང་འདི་བགྱིས་ལེགས་པའི་ཆ་ཕྲ་མོ་ཙམ་མཆིས་ཚེ་བཀའ་དྲིན་སུམ་ལྡན་རྩ་བའི་བླ་མའི་དྲིན་ལན་གཟོ་བར་སྨོན་པས་བརྒྱན་པའོ།། །།

འབུམ་རམས་པ་དགེ་བཤེས་ཆོས་འཁོར་ཚང་གིས།

༢༠༡༨ ལོའི་ཟླ་བ་ ༨ པའི་ ༢༥ ཉིན།

微信图片_20180904153227.jpg

དཀར་ཆག

མཛད་བསྡུས་གཡུང་དྲུང་སྲིད་པའི་དར་ཆེན།

༡ བལྟམས་པ་གཞིས་ཀྱི་གཟིགས་ཚད།

༢ བསྟན་དོན་སྒྲུབ་པའི་དབུ་ཁྱུད།

༣ རྒྱལ་ཁམས་འགྲིམ་པའི་གོམ་ཕུད།

༤ ཤར་ནུབ་ལེགས་ཆ་བསོར་ལེན།

༥ རང་རིགས་སློབ་ཚོགས་སྐྱེད་སྲིང།

༦ ཞིབ་འཇུག་རིག་པའི་བགྲོ་གླེང་།

༧ བོན་སྐྱོང་ལྷ་ལུང་རྟགས་བབས།

༨ མཉམ་མེད་བསྟན་པ་སླར་གསོ།

༩ དེང་རབས་ཤེས་བྱའི་རྩ་འཛུགས།

༡༠ བྱམས་དང་སྙིང་རྗེའི་ཕྱག་ལེན།

༡༡ ཉེར་མཁོ་འཚོ་བའི་མཐུན་སྦྱོར།

༡༢ བཤད་སྒྲུབ་བསྟན་པའི་འཕྲོ་མཐུད།

༡༣ མཐུན་འབྲེལ་གསེར་གྱི་ཟམ་ཆེན།

༡༤ འོད་ཟེར་འཁྱིལ་པའི་སྒྲུབ་ཆེན།

༡༥ ཤེས་རིག་འཚོ་སྐྱོང་བསྟི་གནས།

༡༦ གྱེར་བསྟན་འཛམ་གླིང་གསར་སྤེལ།

༡༧ བོན་ཕྲུག་ཕོ་མོ་སྙོད་སྐྱོང་།

༡༨ མཉམ་མེད་གསེར་ཁྲིར་མངའ་གསོལ།

༡༩ གཡས་རུའི་འཆད་རྩོད་བསྐྱར་གསོ།

༢༠ གངས་ལྗོངས་ཐུགས་རྗེས་བརྩེ་གཟིགས།

༢༡ བོན་མོ་རིན་ཆེན་སྨན་སྒར།

༢༢ བཀའ་སྒྲོམ་གསུང་རབ་ཡངས་མཛོད།

༢༣ བཟོ་རྒྱལ་ལག་ཤེས་ལས་གྲྭ།

༢༤ སྣ་ཚོགས་རྒྱུན་ཤེས་ཟབ་སྦྱོང་།

༢༥ དཔྱད་བུ་གཞོན་ནུའི་སློབ་གླིང་།

༢༦ ལུང་རྟོགས་བོན་གྱི་འཁོར་ལོ།

༢༧ ཕྱོགས་མཐའི་གཤེན་སྡེར་གཟིགས་སྐྱོང།

༢༨ ཚོགས་སྡེའི་འཛིན་སྐྱོང་ལམ་ལུགས།

༢༩ རྟེན་གནས་དྲུང་མུའི་གསས་མཁར།

༣༠ བརྟེན་པ་པེའུ་ཙེ་རྣམ་གསུམ།

༣༡ ཐུགས་དམ་རྟགས་མཚན་རྗེས་བཞག

༣༢ ཞུགས་འབུལ་འཕེལ་གདུང་རང་བྱོན།

༣༣ རྒྱལ་ཐེབས་རྟགས་སྒྲིལ་ཁྲི་བཞེངས།

མཇུག་བྱང་ཐུགས་རྗེ་ཆེ་ཞུ།

 

རྩོམ་ཡིག་འདིའི་འཕྲོ་ཀློག » »

420 total views, 1 views today



༧སྨན་རིའི་བཤད་སྒྲུབ་མཁན་པོ་དགེ་བཤེས་ཉི་མ་དོན་གྲུབ་མཆོག་གི་གསུང་རྩོམ་དབུ་འབྱེད་གནང་བ།

ཕྲན་རང་ཉིད་ཀྱི་རྩོམ་དེབ་དང་པོ་༼རིགས་སྨྲ་དགྱེས་པའི་མཆོད་སྤྲིན་༽ཞེས་པ་དེ་རྒྱ་ཆེའི་གཟིགས་མོ་བ་རྣམས་ཀྱི་སྤྱན་ལམ་དུ་ཕུལ་ཟིན་པ་ཡིན་ཞིང་།། ད་ལན་རང་རྩོམ་དེབ་ཕྲེང་གསུམ་སྟེ། ༼མན་ངག་ལུང་གི་ཡང་ཞུན་༽སྟོད་ཆ་སྨད་ཆ་དཔེ་དེབ་གཉིས་དང་༼གཡུང་དྲུང་གི་མཚོན་དོན་༽ཞེས་པའི་དཔེ་དེབ་གཅིག་བཅས་ཁྱོན་གླེགས་བམ་གསུམ་གྱི་བདག་ཉིད་ཅན་དེ་༧སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་༣༣པ་མཆོག་གི་འདས་མཆོད་ཆེན་མོའི་ཉིན།། རྒྱ་ཆེའི་མང་ཚོགས་རྣམས་ཀྱི་སྤྱན་ལམ་དུ་འབུལ་ལམ་ཞུས་པ་འདི་ནི།། ༧ཞིང་གཤེགས་མཆོག་གི་ཐུགས་རྗེའི་གྲིབ་བསིལ་འོག་འཚོ་བའི་བཤེས་གཉེན་ཞིག་གིས།། རང་གི་ལས་ཀྱིས་འབྲེལ་བའི་ཡབ་ཆེན་མཆོག་ལ་བཀའ་དྲིན་རྗེས་དྲན་མཚོན་པའི་ཆེད་དུ་ཡིན།  ༧སྨན་རིའི་བཤད་སྒྲུབ་མཁན་པོ་དགེ་བཤེས་ཉི་མ་དོན་གྲུབ་ནས།

དཔེ་སྐྲུན་གསལ་བཤད།

ད་ལན་འདི་ག་སྨན་རིའི་གླིང་གི་དཔེ་མཛོད་ཁང་ནས་དཔར་སྐྲུན་ཞུས་པའི་༼སྨན་རིའི་བཤད་སྒྲུབ་མཁན་པོ་དགེ་བཤེས་ཉི་མ་དོན་གྲུབ་ཀྱི་གསུང་རྩོམ་ཕྱོགས་བསྒྲིགས་༽ཅེས་པ་གླེགས་བམ་གསུམ་གྱི་བདག་ཉིད་ཅན་འདི་ནི། མདོ་སྔགས་སེམས་གསུམ་ལ་ནང་བྱན་ཆུབ་པའི་སྨན་རིའི་བཤད་སྒྲུབ་མཁན་པོ་ཁོང་གིས་ལོ་མང་རིང་གཡུང་དྲུང་བོན་གྱི་གཞུང་ལུགས་ཁག་ལ་འཆད་རྩོད་རྩོམ་གསུམ་གནང་བའི་འབྲས་རྟགས་སུ་མཛད་གནང་བའི་མན་ངག་ལུང་གི་ཡང་ཞུན་དང་རིག་པའི་གཏེར་མཛོད་ལྟ་བུ་ཞིག་རེད། ནང་དོན་གྱི་ཐད་ནས་རྒྱ་ཆེའི་གཡུང་དྲུང་བོན་གྱི་གནའ་བོའི་གཞུང་ལུགས་ཟབ་མོ་ཁག་ལས་གནད་དོན་རྣམས་ཟུར་འདོན་གནང་བ་དང་།  དཀའ་གནད་རྣམས་ཚད་མ་གསུམ་གྱི་སྒོ་ནས་དོགས་གཅོད་ཀྱི་འགྲེལ་བཤད་ཞལ་གསལ་གོ་བདེ་མཛད་ཡོད་པ་མ་ཟད་མཁས་གྲུབ་གཉིས་ལྡན་གྱི་རྒྱལ་དང་རྒྱལ་སྲས་མཁས་པའི་ཚོགས་ཀྱི་དགོངས་དོན་སྙིང་པོ་རྣམས་ཕྱོགས་གཅིག་ཏུ་བསྡུས་པའི་མདོ་སྔགས་སེམས་གསུམ་གྱི་གཞུང་ཆེན་རྣམས་ཀྱི་སྤྱི་དོན་མར་ཁུ་ལྟ་བུ་ཞིག་ཀྱང་རེད། རྗོད་བྱེད་ཀྱི་ཐད་ནས་ཀྱང་ཚིག་ཉུང་ལ་དོན་འདུས་པ་གོ་རིམ་ལྟར་བསྐྱར་འབྲི་དང་ལད་ཟློས་ཙམ་མ་ཡིན་པར་རྩེ་བའི་དོན་གནད་ཁག་ལ་གསལ་ཁ་དོད་ཅིང་། གཞུང་ཆེན་དོན་གཉེར་ཅན་རྣམས་ལ་ཕན་སེམས་ཀྱི་ཀུན་ནས་བསླང་སྟེ་གསུང་རབ་རྒྱ་མཚོའི་འཇིངས་ལྟ་བུ་ལ་བཞུགས་ནས་ལྷག་བསམ་རྣམ་པར་དག་པས་སྐུ་ངལ་ཚད་མེད་བསྐྱོན་ཏེ་རང་རེའི་བཤད་སྒྲུབ་སློབ་གཉེར་བ་རྣམས་ལ་མཐུན་རྐྱེན་བླ་ན་མེད་པ་ཞིག་བསྐྲུན་འདུག་པར་སེམས།  མདོར་ན་ཁོང་གི་གསུང་རྩོམ་ཁག་འདི་ནི་བོད་རང་གི་གནའ་བོའི་གཞུང་ལུགས་དང་དེའི་ལྟ་སྒོམ་སྤྱོད་གསུམ་ཁྱད་པར་དུ་གཡུང་དྲུང་བོན་དང་ཞང་ཞུང་གི་རིག་པར་སློབ་གཉེར་དང་ཐུགས་སྣང་གནང་མཁན་རྒྱལ་ཕྱི་ནང་ཀུན་ཏུ་བཞུགས་པའི་གཞོན་སྐྱེས་སློབ་གཉེར་པ་རྣམས་ལ་སློབ་གཉེར་གྱི་ས་བོན་གལ་ཆེན་ཞིག་ཏུ་དམིགས་ཏེ་འདི་ག་དཔེ་མཛོད་ཁང་གིས་དཔར་སྐྲུན་བྱས་པ་ཡིན་པས་དེ་ལུགས་རྒྱ་ཆེའི་ཀློག་པ་པོ་རྣམས་ཀྱི་ཐུགས་དགྱེས་པའི་མཆོད་སྤྲིན་དུ་འགྱུར་བའི་སྨོན་འདུན་བཅས། ༧སྨན་རིའི་གཡུང་དྲུང་བོན་གྱི་དཔེ་མཛོད་ཁང་གི་འགན་འཛིན་པ་མར་ནང་དགེ་བཤེས་ཁྲི་གཡུང་དྲུང་དུ་འབོད་པས། ༢༠༡༨།༠༧།༢༥

༧སྨན་རིའི་བཤད་སྒྲུབ་མཁན་པོ་ག་གཟི་དགེ་བཤེས་ཉི་མ་དོན་གྲུབ་མཆོག  ཕྱི་ལོ་༡༩༧༨ལོར་རྒྱ་གར་གྱི་རྒྱལ་ས་ལྡི་ལིར་སྐུ་འཁྲུངས་ཤིང་དགུང་གྲངས་བརྒྱད་ནས་བོན་གཞིས་ས་གནས་ཉིན་སློབ་ཏུ་བསྐྱོད་ཅིང་ལོ་རིམ་བརྒྱད་པ་སློབ་མཐར་ཕྱིན། ༡༩༩༢ལོར་༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་༧རྒྱལ་བ་སྨན་རི་བའི་ཁྲི་འཛིན་སོ་གསུམ་པ་ལུང་རྟོགས་བསྟན་པའི་ཉི་མ་རིན་པོ་ཆེ་མཆོག་དང་། ༧རྒྱལ་བ་སྨན་རི་བའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ་རྣམ་གཉིས་ཀྱི་དྲུང་ནས་གཙང་གཙུག་གི་སྡོམ་པ་བཞེས་ཤིང་མཚན་ལ་ཉི་མ་དོན་གྲུབ་ཅེས་གསོལ། དེ་ནས་༧དཔལ་གཤེན་བསྟན་སྨན་རིའི་གཡུང་དྲུང་བོན་གྱི་བཤད་སྒྲུབ་འདུས་སྡེའི་སྒྲིག་ཁོངས་སུ་ཞུགས་གནང་།  ཕྱི་ལོ་༡༩༩༦ལོའི་བོད་ཟླ་བ་དང་པོའི་ཚེས་ལྔ་ཉིན་༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་༧རྒྱལ་བ་སྨན་རི་བའི་ཁྲི་འཛིན་སོ་གསུམ་པ་ལུང་རྟོགས་བསྟན་པའི་ཉི་མ་རིན་པོ་ཆེ་མཆོག་དང་། གསང་གསུམ་བོན་གྱི་མཛོད་འཛིན་༧སྐྱབས་རྗེ་སྨན་རིའི་ཡོངས་འཛིན་སྨྲ་བའི་དབང་པོ་སློབ་དཔོན་བསྟན་འཛིན་རྣམ་དག་རིན་པོ་ཆེ་རྣམ་པ་གཉིས་ཀྱི་དྲུང་ནས་དག་པ་དྲང་སྲོང་གི་སྡོམ་པ་བཞེས།  ཕྱི་ལོ་༢༠༠༦ལོའི་ཟླ་བ་༣པའི་ཚེས་༡༥ཉིན་གཡུང་དྲུང་བོན་གྱི་གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་༧སྐྱབས་རྗེ་རྒྱལ་བ་སྨན་རི་བའི་མཁན་སློབ་ཉི་ཟླ་ཟུང་འབྲེལ་གྱི་མདུན་ནས་མདོ་སྔགས་སེམས་གསུམ་རིག་གནས་དང་བཅས་པ་སྦྱངས་པ་མཐར་སོན་གྱི་རབ་འབྱམས་དགེ་བའི་བཤེས་གཉེན་ཆེན་མོའི་མཚན་བཏགས་བཞེས་གནང་མཛད།  ཕྱི་ལོ་༢༠༠༨ལོར་གདན་ས་ཆེན་མོ་སྨན་རི་བའི་བཤད་སྒྲུབ་སློབ་དཔོན་གྱི་ཁྲི་ལ་མངའ་གསོལ་མཛད་ཅིང་ཕྱི་ལོ་༢༠༡༢ལོར་སྨན་རིའི་བཤད་སྒྲུབ་མཁན་པོའི་ཁྲི་ལ་མངའ་གསོལ་མཛད། དེ་ནས་བཟུང་གཡུང་དྲུང་བོན་གྱི་བཤད་སྒྲུབ་འདུས་སྡེའི་སློབ་གཉེར་བ་རྣམས་ལ་ཉིན་ལྟར་མདོ་སྔགས་སེམས་གསུམ་རིག་གནས་དང་བཅས་པ་སློབ་ཁྲིད་གནང་མུས་སུ་བཞུགས།  སྔ་ཕྱིར་གྲྭ་ཚང་གི་དུང་པ་དང་རྒྱ་གླིང་པ།  དུང་ཆེན་པ། འཆམ་དཔོན་དང་འཆམ་འཇུག་བཅས་དང་། དེ་བཞིན་སྨན་རིའི་གཡུང་དྲུང་བོན་གྱི་བཤད་སྒྲུབ་འདུས་སྡེའི་རྩིས་པ་དང་དགེ་བསྐོས། སྨན་རིའི་བླ་སྤྱིའི་དྲུང་ཆེ་དང་། གཡུང་དྲུང་བོན་གྱི་དྲ་རྒྱའི་སློབ་སྟོན་པ་བཅས་ཀྱི་ཕྱག་ལས་ཀྱང་མཛད།  གསུང་རྩོམ་གྱི་སྐོར་ལ་<<རིགས་སྨྲ་དགྱེས་པའི་མཆོད་སྤྲིན་>>དང་། <<མན་ངག་ལུང་གི་ཡང་ཞུན།>> གླེགས་བམ་སྟོད་སྨད་གཉིས། <<གཡུང་དྲུང་གི་མཚོན་དོན་>>ཞེས་པའི་དཔྱད་རྩོམ་ཕྱོགས་བསྒྲིགས་དེབ་གཅིག་བཅས་ཁྱོན་བསྡོམས་གསུང་རྩོམ་པོད་བཞི་བརྩམས་གནང་མཛད་ཡོད་པ་བཅས་ཀྱི་མཛད་རྣམ་སྙིང་བསྡུས་ཙམ་དུ།  མར་ནང་དགེ་བཤེས་ཁྲི་གཡུང་དྲུང་ནས་བསྡུས་པ་དགེ་གྱུར་ཅིག །

1,204 total views, no views today



༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༣པ་ཞིང་གཤེགས་མཆོག་དགོངས་པ་བོན་དབྱིངས་སུ་བསྡུས་ནས་མི་ལོ་ཧྲིལ་པོ་གཅིག་འཁོར་བའི་འདས་མཆོད་ཆེན་མོའི་མཛད་སྒོའི་ཉིན་དང་པོ།

དེ་ཡང་ཕྱི་ལོ་༢༠༡༨ཟླ་༩པའི་ཚེས་༢ཉིན་སེམས་དཔའ་འདུས་སྡེ་རྒྱ་མཚོས་འདུལ་ཁང་ཆེན་མོའི་ནང་དུ་རབ་གནས་ཀྱི་ཆོ་ག་རྒྱས་པ་དབུ་འཛུགས་གནང་ཞིང་ཚེས་༣ཉིན་གྱི་ཞོགས་པའི་ཕྱག་ཚོད་༥པའི་ཐོག ༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༣པ་མཆོག་དགོངས་པ་བོན་དབྱིངས་སུ་བསྡུས་ནས་མི་ལོ་ཧྲིལ་པོ་གཅིག་འཁོར་བའི་འདས་མཆོད་ཆེན་མོའི་དབུ་འཛུགས་དང་འབྲེལ།  སེམས་དཔའ་འདུས་སྡེ་རྒྱ་མཚོས་ཟང་གཏེར་རིག་འཛིན་འདུས་པའི་ཚོགས་མཆོད་རྒྱས་འབུལ་གྲུབ་རྗེས།

ཕྱག་ཚོད་༩པའི་ཐོག་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༤པ་རིན་པོ་ཆེ་མཆོག་དང་༧རྒྱལ་བ་སྨན་རིའི་དཔོན་སློབ་རིན་པོ་ཆེ་རྣམ་པ་གཉིས་དབུ་བཞུགས་ཐོག་སེར་སྐྱ་མི་མང་རྣམས་ཁྲི་འཛིན་༣༣པ་ཞིང་གཤེགས་མཆོག་གི་སྐུ་གདུང་མཆོད་རྟེན་རྣམ་དག་དཀར་པོའི་དྲུང་དུ་འཛོམས་ནས་སེམས་དཔའ་འདུས་སྡེ་རྒྱ་མཚོས་རབ་གནས་ཀྱི་ཆོ་གའི་རིམ་པ་ལས་ཞལ་དབྱེ་བ་དང་ཁྲུས་གསོལ་བ་དང་མངའ་གསོལ་བ་དང་བྱིན་དབབ་པ་སོགས་རིམ་པར་གསུང་བར་སྦྲགས།

༧རྒྱལ་བ་སྨན་རིའི་ཁྲི་འཛིན་༣༤པ་རིན་པོ་ཆེ་མཆོག་གིས་༧སྐྱབས་རྗེ་ཞིང་ཁམས་པ་མཆོག་གི་སྐུ་གདུང་མཆོད་རྟེན་རྣམ་དག་དཀར་པོ་དང་༧སྐྱབས་རྗེ་ཞིང་གཤེགས་པའི་གཟིམས་ཤག་ནང་དུ་བཞེངས་པའི་སྐུ་གདུང་སོགས་ཀྱི་ཞལ་དབྱེ་བ་དང་ཁྲུས་གསོལ་བ་དང་མངའ་གསོལ་བ་དང་རབ་གནས་སོགས་སྤེལ་མ་གནང་རྗེས་སླར་སྐུ་གདུང་རིན་པོ་ཆེ་མཆོད་རྟེན་རྣམ་དག་དཀར་པོའི་དྲུང་དུ་ཕེབས་ནས་གཞི་བརྟན་བཀྲ་ཤིས་སྨོན་ལམ་དང་གཤེན་རབ་མཆོད་རྔ་བརྒྱ་རྩ་སོགས་ཀྱི་མཐར་བརྒྱན་ནས་སྔ་དྲོའི་མཛད་རིམ་རྣམས་ལེགས་པར་གྲུབ་བོ།

ཕྱི་དྲོའི་ཕྱག་ཚོད་༣པའི་ཐོག་༧དཔལ་གཤེན་བསྟན་སྨན་རིའི་གླིང་གི་ལྷོ་ངོས་སུ་རྟེན་གཞིར་ཆགས་པའི་༧བཙུན་དགོན་རདྣ་སྨན་གླིང་གིས་བཞེངས་པའི་༧སྐྱབས་རྗེ་དཔོན་གསས་བླ་མ་ཞིང་གཤེགས་པ་མཆོག་གི་སྐུ་གདུང་རིན་པོ་ཆེ་བཙུན་དགོན་དུ་གདན་ཞུས་ཐོག་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༤ པ་རིན་པོ་ཆེ་མཆོག་དང་༧རྒྱལ་བ་སྨན་རིའི་དཔོན་སློབ་རིན་པོ་ཆེ་རྣམ་པ་གཉིས་དབུས་པའི་སེར་སྐྱ་མི་མང་རྣམས་བཙུན་དགོན་དུ་ཕེབས་ནས་སྐུ་གདུང་རིན་པོ་ཆེ་དང་རྟེན་གཙོ་རྣམས་ལ་མངའ་དབུལ་རབ་གནས་གནང་ཞིང་སྐུ་པར་མཐོང་གྲོལ་རིན་པོ་ཆེའི་མདུན་དུ་མཚན་ལྡན་བླ་མ་མཆོད་ཐབས་ཀྱི་སྒོ་ནས་མཎྜལ་སྐུ་གསུང་ཐུགས་རྟེན་དང་མཆོད་པ་རྣམ་ལྔ་སོགས་རྒྱས་འབུལ་གྲུབ་རྗེས་སྒྲུབ་ཁང་ནང་གི་རྟེན་གཙོ་རྣམས་ལ་རབ་གནས་དང་བཀྲ་ཤིས་སྨོན་ལམ་སོགས་མཛད།

དགོང་མོའི་ཕྱག་ཚོད་༦ པའི་ཐོག་༧སྐྱབས་རྗེ་རྒྱལ་བ་སྨན་རིའི་མཁན་སློབ་རྣམ་གཉིས་དབུས་པའི་སེར་སྐྱ་མི་མང་རྣམས་༧དཔལ་གཤེན་བསྟན་སྨན་རིའི་ཚོགས་ཁང་ཆེན་མོའི་མདུན་ཐང་དུ་བཞེངས་ནས་ཡོ་བྱད་རྫས་ཀྱི་མཆོད་པ་རྣམ་ལྔ་དང་མཎྜལ་སོགས་ཇི་སྙེད་ཅིག་བཤམས་ཤིང་མར་མེ་རྒྱལ་མཚན་གྱི་ཚིག་བཤད་དབྱངས་སུ་གྱེར་ནས་སྣང་གསལ་སྒྲོན་མེའི་མཆོད་སྤྲིན་ཕུལ་བ་དང་། མཚན་ལྡན་བླ་མ་མཆོད་ཐབས་ཀྱི་ཚིག་བཤད་དང་སྦྲགས་མཆོད་པ་རྣམ་ལྔ་མཎྜལ་སོགས་རིམ་པར་ཕུལ་ཞིང་༧སྐྱབས་རྗེ་དཔོན་གསས་བླ་མ་ཞིང་ཁམས་པའི་གསོལ་འདེབས་དབྱངས་སུ་གྱེར་ནས་འདུལ་ཁང་སྐུ་གདུང་སོགས་ལ་ཞབས་སྐོར་ཕེབས་པ་སོགས་ཀྱི་གནས་བསྡུས་སུ།

630 total views, no views today