ཀུན་འདུས་རིན་ཆེན་རྩ་རྒྱུད་ཀྱི་གཞུང་བཞུགས།
༄༅། །སྟོན་པ་ཀུན་ཏུ་བཟང་པོ་ཡིས། །རྣམ་རྟོག་དྲྭ་བ་བཅོམ་མཛད་ཅིང༌། །ཟབ་ཅིང་རྒྱ་ཆེའི་སྐུ་མངའ་བ། །ཐམས་ཅད་མཁྱེན་ལ་ཕྱག་འཚལ་ལོ། །སྟོན་པའི་ཐུགས་ཀྱི་དཀྱིལ་འཁོར་ནས། །བྱིན་གྱི་རླབས་ཀྱིས་བཤད་པ་ཡི། །ཀུན་འདུས་རིན་ཆེན་རྩ་བའི་རྒྱུད། །འོག་མིན་དབྱིངས་ཀྱི་ཕོ་བྲང་དུ། །སྔོན་སྦྱངས་འཕྲོ་ལེན་འཁོར་རྣམས་ལ། །ངོ་བོ་ཉིད་ཀྱིས་བཀའ་བསྩལ་པ། །དད་པ་ཆེ་ལ་ཡིད་གཞུང་ཞིང༌། །སེར་སྣ་ཆུང་ལ་ཆགས་པ་མེད། །སྟོབས་ཆེ་བློ་དང་ལྡན་པ་ལ། །རྒྱུད་འགྲེལ་རྩ་བའི་མན་ངག་བསྟན། །