༄༅། །སྣང་སྲིད་སྣོད་བཅུད་ཐམས་ཅད་ཀུན། །ཀུན་ཀྱང་རྒྱལ་བའི་དཀྱིལ་འཁོར་ལ། །དག་པར་མ་གྱུར་གང་ཡང་མེད། །དག་གྱུར་ལྷ་ལ་ཕྱག་འཚལ་ལོ། །འོན་ཀྱང་སེམས་ཅན་འཁྲུལ་དབང་གིས། །ལྷ་མིའི་སྤྱོད་ཚངས་མ་དག་ཅེས། །གཙང་མ་ཚན་གྱིས་དག་པར་བྱེད། །དེ་ཡང་དང་པོ་ཁྲུས་ཀྱིས་བཀྲུས་ལ་འདི་སྐད་དོ། །ཨཱོྃ་ཁྲོ་རྒྱལ་ཆེན་པོའི་སྐུ་མཆོག་གིས། །སྐྱོན་གྱི་གངས་རི་རྩེ་བཅོམས་ནས། །དག་ཅིང་གཙང་མར་བཤམས་པ་ཡི། །བག་ཆགས་སྒྲིབ་སེལ་ཚན་ཆབ་འདིས། །སྟེང་གི་ལྷ་ཡང་གཙང་བར་བྱ། །འོག་གི་ཀླུ་ཡང་གཙང་བར་བྱ། །བར་གྱི་གཉན་ཡང་གཙང་བར་བྱ། །གདན་ཁྲི་རྣམས་ཀྱང་གཙང་བར་བྱ། །ཆས་གོས་རྣམས་ཀྱང་གཙང་བར་བྱ། །ཡོ་བྱད་རྫས་རྣམས་ཀུན་ཀྱང་གཙང་གྱུར་ཅིག ། ཨཱོྃ་ཤུདྷོ་ཀུ་ཤུདྷོ་གཙང་ས་ལེ་སང་ངེ་ཡེ་སྭཧཱ། ཅེས་ཁྲུས་གསོལ། དེ་ནས་སྤོས་བསང་ནི། ཨཱོྃ་ཁྲོ་རྒྱལ་ཆེན་པོའི་སྐུ་མཆོག་གིས། །རི་རྒྱལ་རྩེ་ལ་ནགས་ཚལ་བཅུད། །དག་ཅིང་གཙང་མར་བཤམས་པ་ཡི། །དྲི་ཞིམ་ངད་ལྡན་ཡིད་འོང་སྤོས། །སྟེང་གི་ལྷ་ཡང་བསང་བར་བྱ། །འོག་གི་ཀླུ་ཡང་བསང་བར་བྱ། །བར་གྱི་གཉན་ཡང་བསང་བར་བྱ། །གདན་ཁྲི་རྣམས་ཀྱང་བསང་བར་བྱ། །ཆས་གོས་རྣམས་ཀྱང་བསང་བར་བྱ། །ཡོ་བྱད་རྫས་རྣམས་ཀུན་ཀྱང་བསང་གྱུར་ཅིག ། ཨཱོྃ་ཞིམ་ཞིམ་གྲམ་གྲམ་བུན་ནེ་ཐིམ་ཐིམ་ཡེ་སྭཧཱ། ཅེས་སྤོས་ཀྱིས་བསང་ངོ༌། །
དེ་ནས་མཚམས་བཅད་པ་ནི། ཨཱོྃ་བདག་གི་ཏིང་འཛིན་སྟོབས་དང་ནི། །དེ་བཞིན་ཉིད་ཀྱི་སྟོབས་མཆོག་གི། །ཉུངས་ཀར་རྒྱལ་པོ་འདི་དག་ཀྱང༌། །ཁྲོ་བོའི་མཆོག་སྟེ་བགེགས་ལ་དཔའ། །གསེར་གྱི་མདོག་སྟེ་སྔགས་ཀྱི་མདའ། །འདི་དག་སྔགས་ཏེ་བྲིམས་པ་ཡིས། །གལ་ཏེ་གནོད་པའི་བགེགས་ཡོད་ན། །བགེགས་རྣམས་ཀུན་ཀྱང་ཞི་ཞིང་བརླག་པར་བྱའོ། །བསྭོ་ཨཱོྃ་ཉེ་ལོ་ཡོ་རུ་རུ་སྤུ་རུ་སྤུ་རུ་ཛ་ལ་ཛ་ལ་ཏི་སྟ་ཡ་མན་ཐོར་ཙེ་པྲ་མོ་ཧ། བདག་གཞན་གྱི་དགེ་བ་བཅུ་ལ་བར་དུ་གཅོད་ཅིང་མི་དགེ་བ་བཅུ་ཡི་སྡོང་གྲོགས་བྱེད་པའི་ཞི་བ་བསང་མཆོད་མེ་ཐབ་ལ་བར་དུ་གཅོད་པའི་བགེགས་རིགས་ལོག་པ་ཅན་རྣམས་མཚམས་ཆོད་ཅིགཅེས་ཉུངས་ཀར་བྲིམ་མོ། །དེ་ནས་མཁྱེན་པ་གསོལ་ཏེ། ཨཱོྃ་གཤེན་རབ་བླ་མ་མ་རིག་མུན་སེལ་སྒྲོན། །ཐུགས་རྗེའི་མངའ་བདག་ཡེ་ཤེས་འདུ་འབྲལ་མེད། །དཔོན་གསས་བླ་མ་བདག་ལ་དགོངས་སུ་གསོལ། །ཨ་ཨཱོྃ་ཧཱུྃ། སེམས་བསྐྱེད་པ་ནི། བདག་ནི་སྟོང་ཁམས་སྲིད་གསུམ་འཇིག་རྟེན་གྱི། །སྙན་གྲགས་འདི་སྤྱོད་འདི་སྒྲུབ་མ་ལགས་ཏེ། །རིག་པ་རྟུལ་ཤུགས་ཐུགས་རྗེ་ཚད་མེད་ཀྱིས། །ཀུན་ཏུ་བཟང་པོ་བླ་ན་མེད་པ་ཡིས། །བྱང་ཆུབ་མཆོག་སེམས་བདག་གིས་བསྐྱེད་པར་བགྱིས། །འདི་ནས་གཡུང་དྲུང་སྙིང་པོར་མཆིས་ཀྱི་བར། །འགྲོ་བའི་དོན་དུ་སེམས་མཆོག་བསྐྱེད་པར་བགྱིའོ། ཨ་ཨཱོྃ་ཧཱུྃ། དེ་ནས་སྐྱབས་སུ་འགྲོ་བ་ནི། གཤེན་རབ་བླ་མ་སྐུ་གསུམ་འབྱུང་གནས་དཔལ། །དུས་གསུམ་བདེར་གཤེགས་འགྲོ་བ་ཡོངས་ཀྱི་མགོན། །སྐུ་གཟུགས་ཞལ་སྐྱིན་སྐུ་གདུང་གསུང་རབ་རྟེན། །ཕྱོགས་བཅུའི་གཤེན་རབ་ཐར་ལམ་སྟོན་པའི་སྒྲོན། །གནས་བཞིར་ཕྱག་འཚལ་འགྲོ་ཀུན་སྐྱབས་སུ་མཆིའོ། །ཨ་ཨཱོྃ་ཧཱུྃ། དེ་ནས་སྡིག་པ་བཤགས་པ་ནི། ན་མོ་སྲིད་པ་ཆགས་ནས་དུས་འདིའི་བར་དུ་ནི། །སྐུ་དང་ཡེ་ཤེས་དམ་དང་ཚིག་མནོས་ནས། །དེ་ལྟར་མ་རྟོགས་ཉམས་སྒྲིབ་སྐྱོན་གྱི་གོས། །ཞི་ཁྲོ་རྫུ་འཕྲུལ་ལྷ་ཡི་དཀྱིལ་འཁོར་དུ། །ཉམས་དྲན་གནོང་འགྱོད་སེམས་དང་གདུང་ཚིག་གིས། །དམ་ཉམས་ཀུན་དང་དུས་དང་གནས་གཅིག་ཅིང༌། །ཉམས་དང་ཚོགས་འདྲེས་ཉམས་པ་སྐོང་ལ་སོགས། །ཉམས་ཀྱི་ཟས་ཟོས་ཉམས་ཀྱི་ཆུ་འཐུང་པ། །སྒྱུ་འཕྲུལ་ཞི་ཁྲོའི་ལྷ་ལ་མཐོལ་ལོ་བཤགས། །མཐོལ་བཤགས་ཕུལ་ནས་ཚངས་པ་སྩལ་དུ་གསོལ། །ཨ་ཨཱོྃ་ཧཱུྃ། ཞེས་བརྗོད་ལ།
དེ་ནས་མེ་ལྷ་བསྐྱེད་པ་ནི། ཨ་ཨཱོྃ་ཧཱུྃ། ཨཱ་ཨ་དཀར་ས་ལེ་འོད་ཨ་ཡཾ་ཨཱོྃ་འདུ། ཅེས་པས། ཨ་བདག་ཉིད་སྐུ་གསུང་ཐུགས་ཀྱི་མེ་ལྷ་རུ་གསལ་བའི་ཐུགས་ཀ་ནས། ཨ་ཡཾ་རཾ་མཾ་ཁཾ་བྲུཾ་དེ་རྣམས་མེ་ཐབ་ཀྱི་ཞབས་སུ་འཕྲོས་ཏེ། འོད་དུ་ཞུ་བ་ལས་ཕོ་བྲང་འབར་བ་མེ་ཡི་གཞལ་ཡས་ཁང༌། ཕྱི་ལྟར་ན་གཡུང་དྲུང་བཀོད་ལེགས་མཆོད་རྟེན་གྱི་དབྱིབས། ནང་ལྟར་ན་འབར་བ་མེ་ཡི་ཕོ་བྲང༌། ཉམས་དགའ་བ་ཡིད་དུ་འོང་བ། རྒྱ་ཆེ་ལ་དཔང་མཐོ་བ། དེའི་དབུས་སུ་མེ་ལྷ་རྒྱུན་གྱི་ལྷ་ཚོགས། ཤར་དུ་ཞི་བའི་ལྷ་ཚོགས། བྱང་དུ་རྒྱས་པའི་ལྷ་ཚོགས། ནུབ་ཏུ་དབང་གི་ལྷ་ཚོགས། ལྷོ་རུ་དྲག་པོའི་ལྷ་ཚོགས། དེའི་ཕྱི་རིམ་དུ་བོན་སྐྱོང་དཔལ་མགོན་ནོར་ལྷ་སྡེ་བརྒྱད་རིགས་དྲུག་དང་བཅས་པ་རྣམས་གྱིས་བསྐོར་བ། དེ་དག་གི་ཐུགས་ལས་འོད་ཟེར་ཡར་འཕྲོས་དབྱིངས་ནས་ཡེ་ཤེས་སེམས་དཔའ་སྤྱན་དྲངས། བསྐྱེད་པའི་ལྷ་ཚོགས་རྣམས་ལ་ཐིམ་པས། གཉིས་མེད་ལས་ཀྱི་སེམས་དཔའ་རུ་གྱུར་ནས་འགྲོ་དོན་རྒྱ་ལག་ཕྱད་པར་གྱུར། ཡང་བདག་གི་ཐུགས་ལས་རཾ་ཡཾ་མཾ་གསུམ་འཕྲོས་ནས་མཆོད་རྫས་དང་སྲེག་རྫས་རྣམས་ལ་ཕོག་སྟེ་འོད་དུ་ཞུ་བ་ལས། །ཕྱི་ལྟར་ན་གཟུགས་སྒྲ་དྲི་རོ་རེག་རྒྱན་བོན་གཏེར། ནང་ལྟར་ན་མཆོད་འབུལ་གྱི་ལྷ་མོ། གསང་བ་ལྟར་ན་རྟོག་མེད་ཡེ་ཤེས་ཀྱི་མཆོད་པ་རྒྱ་ཆེན་པོ་རུ་གྱུར་ནས། བསྐྱེད་པའི་ལྷ་ཚོགས་རྣམས་ལ་ཕུལ་བས། སྐུ་གསུང་ཐུགས་མཉེས་རབ་ཀྱི་མཆོག་དགྱེས་རབ་ཀྱི་ཕུལ་དམ་པ་དང་ལྡན་པར་གྱུར་ཅིགཅེས་མེ་ལྷ་རྒྱུན་གྱི་མངོན་རྟོགས་ཉུང་འདུས་འདི་ནི་གཤེན་གྱི་དྲང་སྲོང་ཤེས་རབ་རྒྱལ་མཚན་གྱིས་བཀྲ་ཤིས་སྨན་རིའི་ཁྲོད་དུ་སྦྱར་བའོ། །
དེ་ནས་ཁ་སྐོང་ཏེ། ཨ་ཨཱོྃ་ཧཱུྃ། ལན་གསུམ་བརྗོད། རྨད་བྱུང་མཆོད་པའི་ལོངས་སྤྱོད། མི་ཟད་རྒྱུན་གྱི་བསང་མཆོད་འདི་འབུལ་བའི་གནས་སུ་གྱུར་པ་ནི། ཞིང་ཁམས་རྣམ་པར་དག་པའི་ཕོ་བྲང་ན། བོན་སྐུ་སྐྱེ་བ་མེད་པ། རྫོགས་སྐུ་མཚན་དང་ལྡན་པ། སྤྲུལ་སྐུ་འགྲོ་དོན་མཛད་པ། ཞི་བ་ལྷུན་གྱིས་གྲུབ་པ། རྒྱས་པ་མཐའ་རུ་ཕྱིན་པ། ཁྲོ་བོ་རྨད་དུ་བྱུང་བ། དྲག་པོ་དགྲ་བགེགས་སྒྲོལ་བ། ཕོ་ཉ་ལས་ལ་མྱུར་བ། མ་སྲིང་མཐུ་རྩལ་ཆེ་བ། སྐུ་གསུམ་རྫོགས་པའི་སངས་རྒྱས། དུས་གསུམ་གྱི་བདེ་བར་གཤེགས་པ། ས་བཅུའི་གཡུང་དྲུང་སེམས་དཔའ། བརྒྱུད་ལྡན་གྱི་བླ་མ་དམ་པ། གནས་གསུམ་མ་སྲིང་མཁའ་འགྲོ། རྟེན་གསུམ་མ་རིག་མུན་སེལ། སྲིད་གསུམ་ཕྱོགས་བཅུའི་གཤེན་རབ་འཁོར་དང་བཅས་པ་རྣམས་ལ་མི་ཟད་རྒྱུན་གྱི་བསང་མཆོད་འདི་ཕུལ་བས་ཐུགས་དམ་གཉན་པོ་རྒྱུད་ཡོངས་སུ་བསྐང་ངོ༌། །ཁྱད་པར་དུ་ཡུམ་ཆེན་མོ་ས་ཏྲིག་ཨེར་སངས་ལ་སོགས། རྣམ་དག་སྲས་ཡུམ་གྱི་ལྷ་ཚོགས། བདེར་གཤེགས་གཙོ་བཞི་ལ་སོགས། གཡུང་དྲུང་ཀློང་རྒྱས་ཀྱི་ལྷ་ཚོགས། སྐུ་གསུམ་མེ་ལྷ་ལ་སོགས། སྦྱིན་སྲེག་རྒྱུན་གྱི་ལྷ་ཚོགས། ཀུན་ཏུ་བཟང་པོ་ལ་སོགས། བདེར་གཤེགས་ཞི་བའི་ལྷ་ཚོགས། ཀུན་སྣང་ཁྱབ་པ་ལ་སོགས། ངོ་མཚར་རྒྱས་པའི་ལྷ་ཚོགས། གཙོ་མཆོག་མཁའ་འགྱིང་ལ་སོགས། བྱིན་རླབས་དབང་གི་ལྷ་ཚོགས། དབལ་གསས་རྔམ་པ་ལ་སོགས། མཐུ་སྟོབས་དྲག་པོའི་ལྷ་ཚོགས། འབྲུག་གསས་ཆེམ་པ་ལ་སོགས། སྒྲོལ་བྱེད་ཕུར་པའི་ལྷ་ཚོགས། མགོན་པོ་རྣམ་གསུམ་ལ་སོགས། གཙང་མ་ཞང་ཞུང་གི་ལྷ་ཚོགས། གསང་མཆོག་མཐར་ཐུག་ལ་སོགས། མ་རྒྱུད་མཁའ་འགྲོའི་ལྷ་ཚོགས། ཆེ་མཆོག་མཁའ་འགྱིང་ལ་སོགས། ཁྲག་འཐུང་རོལ་པའི་ལྷ་ཚོགས། གཡུང་འབྲང་ཕྱུག་མོ་ལ་སོགས། བདུད་རྩི་སྨན་གྱི་ལྷ་ཚོགས། རཀྵ་དབུ་འབུམ་ལ་སོགས། ཁྲོ་བོ་སྤྱི་འདུལ་གྱི་ལྷ་ཚོགས། སྟག་ལ་མེ་འབར་ལ་སོགས། སྤུ་གྲི་དམར་ནག་གི་ལྷ་ཚོགས། འཆི་མེད་གཙུག་ཕུད་ལ་སོགས། གཡུང་དྲུང་ཚེ་ཡི་ལྷ་ཚོགས། ཁོད་སྤུང་དྲན་པ་ལ་སོགས། དཔོན་གསས་རིག་འཛིན་གྱི་ལྷ་ཚོགས། སྐལ་པ་བཟང་མོ་ལ་སོགས། མ་སྲིང་མཁའ་འགྲོའི་ལྷ་ཚོགས། ཚེ་དབང་རིག་འཛིན་ལ་སོགས། དཔའ་བོ་ཕོ་རྒྱུད་ཀྱི་ལྷ་ཚོགས། ཐུགས་རྗེ་ཀུན་སྒྲོལ་ལ་སོགས། དཔའ་མོ་རྒོད་ལྕམ་གྱི་ལྷ་ཚོགས། སྲིད་པའི་རྒྱལ་མོ་ལ་སོགས། བཀའ་སྲུང་བོན་སྐྱོང་གི་ལྷ་ཚོགས། མཁྱེན་བརྩེ་སྟོབས་དང་ལྡན་པ། འགྲོ་འདུལ་ཐབས་ལ་མཁས་པ། གཙོ་འཁོར་སྤྲུལ་པ་ཡང་སྤྲུལ་དང་བཅས་པ་རྣམས་ལ་མི་ཟད་རྒྱུན་གྱི་བསང་མཆོད་འདི་ཕུལ་བས་ཐུགས་དམ་གཉན་པོ་རྒྱུད་ཡོངས་སུ་བསྐང་ངོ༌། །གཞན་ཡང་གཡུང་དྲུང་བོན་གྱི་བསྟན་པ་སྲུང་བར་ཞལ་གྱིས་བཞེས་པའི། མ་མཆོག་སྲིད་པའི་རྒྱལ་མོ། དམ་ཅན་གནམ་ཕྱི་མཆེད་གསུམ། སྲིད་པའི་རྒྱལ་མོ་སྡེ་དྲུགབཀའ་ཡི་བྱ་ར་མ་གསུམ། དྲེའུ་དམར་ནག་གི་ལྷ་ཚོགས། དམ་ཅན་ཡུམ་སྲས་སྡེ་ལྔ༌། མ་སྒྲ་བླའི་རྒྱལ་མོ་སྟག་རི་རོང༌། བྱང་སྨན་རྒྱལ་མོ་ཀུ་མ་ར། གསང་ཡུམ་ཀླུ་མོ་འོད་འབར་མ་ལ་སོགས་དམ་ཅན་མོ་རྒྱུད་སྲུང་མའི་སྡེ་ཚོགས་རྣམས་ལ་མི་ཟད་རྒྱུན་གྱི་བསང་མཆོད་འདི་ཕུལ་བས་ཐུགས་དམ་གཉན་པོ་རྒྱུད་ཡོངས་སུ་བསྐང་ངོ༌། །གཞན་ཡང་མི་བདུད་འབྱམས་པ་ཁྲག་མགོ། །བདུད་བཙན་དྲ་བ་དམར་ནག་གི་སྡེ་ཚོགས། བཙན་རྒོད་ཧུར་པ་གསོད་རྐྱེན། བྲག་བཙན་ཨ་བསེ་རྒྱལ་བ། བསྟན་སྲུང་རྨ་གཉན་པོམ་ར། དམག་དཔོན་རྒྱལ་པོ་ཡང་ནེ་ཝེར། གནོད་སྦྱིན་ནོར་བདག་ཀུ་བཱཻ་ར། རྒྱལ་པོ་ཆེན་པོ་ཉི་པང་སད། གྲོགས་མཆོག་ཆེན་པོ་རྒྱལ་བ་འབར། རྒྱལ་པོ་ཆེན་པོ་ཤེལ་ཁྲབ་ཅན། རྒྱལ་ཆེན་ནོར་ལྷ་གྲགས་སེང་ལ་སོགས་དམ་ཅན་ཕོ་རྒྱུད་སྲུང་མའི་སྡེ་ཚོགས་རྣམས་ལ་མི་ཟད་རྒྱུན་གྱི་བསང་མཆོད་འདི་ཕུལ་བས་ཐུགས་དམ་གཉན་པོ་རྒྱུད་ཡོངས་སུ་བསྐང་ངོ༌། །གཞན་ཡང་འཇིག་རྟེན་གྱི་དཔལ་མགོན་བདུན་ཅུ་རྩ་གཉིས། བཀའ་ཡི་ལྷ་མ་སྲིན་སྡེ་བརྒྱད། བོད་ཀྱི་མགུར་ལྷ་བཅུ་གསུམ། འཇིག་རྟེན་གྱི་བརྟན་མ་བཅུ་གཉིས། རྨ་རིགས་སུམ་བརྒྱ་དྲུག་ཅུ། སྨན་ཕྲན་དགུ་ཁྲི་དགུ་འབུམ། ཡུལ་རི་འདི་ཡི་གཞི་བདགདབེན་རི་འདི་ཡི་སྲུང་མ་རྣམས་ལ་མི་ཟད་རྒྱུན་གྱི་བསང་མཆོད་འདི་ཕུལ་བས་ཐུགས་དམ་གཉན་པོ་རྒྱུད་ཡོངས་སུ་བསྐངས་ནས་ལས་སྤྱོད་དཀར་པོ་དགེ་བའི་སྡོང་གྲོགས་རྒྱ་ཆེན་པོ་མཛད་དུ་གསོལ་ལོ། །གཞན་ཡང་ཁམས་གསུམ་གྱི་སྐྱེ་བ་གནས་བཞི། ལམ་རྒྱུད་ལྔ་འགྲོ་བ་རིགས་དྲུག་བརྟེན་མེད་ཡིད་འཕྱོ་བའི་གནས་སུ་བདུད་རྩི་ཆར་བཞིན་དུ་འབེབས་པར་གྱུར་ཅིགདེ་ལྟར་སྲི་ཞུའི་མགྲོན་དང༌། ཡོན་ཏན་གྱི་མགྲོན་དང༌། ལན་ཆགས་ཀྱི་མགྲོན་དང༌། སྙིང་རྗེའི་མགྲོན་རྣམས་ལ་བླ་མེད་མཆོད་སྤྲིན་རྒྱ་ཆེན་པོ་འདི་ཕུལ་བས། རྒྱལ་བ་རྣམས་མཆོད་པས་མཉེས་པར་གྱུར་ཅིགདམ་ཅན་ཐུགས་དམ་བསྐང་བར་གྱུར་ཅིགལྷ་སྲིན་གདུག་རྩུབ་ཞི་བར་གྱུར་ཅིགརིགས་དྲུག་སྦྱིན་པས་ཚིམས་པར་གྱུར་ཅིགདེ་ལྟར་གྱུར་ནས་ཀྱང༌། འཕྲིན་ལས་དམ་པ་གསོལ་བ་ནི། སྒྲུབ་གཤེན་བདག་ཅག་འཁོར་དང་བཅས་པ་རྣམས་ལ། འཕྲལ་རྐྱེན་བར་ཆད་ཞི་བ་དང༌། མཐུན་རྐྱེན་ཕུན་སུམ་འཚོགས་པ་དང༌། བསམ་དོན་སྨོན་ལམ་འགྲུབ་པ་དང༌། སྡང་དགྲ་གནོད་བགེགས་བརླག་པ་དང༌། སངས་རྒྱས་ཀྱི་བསྟན་པ་དར་བ་དང༌། སེམས་ཅན་ཐམས་ཅད་ལ་བདེ་སྐྱིད་ཕུན་སུམ་འཚོགས་པར་མཛད་དུ་གསོལ་ལོ། །གཞན་ཡང་ཡས་ཀྱི་བདུད་གཡོས་པ་དང༌། མས་ནས་སྲི་ལངས་བ་དང༌། བྱེ་བོ་བཙན་འགྲོལ་བ། ཐད་ནས་དམུ་གཡོས་པ་ལ་སོགས་མི་མཐུན་པའི་ཕྱོགས་རྣམས་ཐམས་ཅད་མཁའ་ལ་ཟློག་པར་མཛད་དུ་གསོལ། དབྱིངས་སུ་ཞི་བར་མཛད་དུ་གསོལ། ཀློང་དུ་མཉམ་པར་མཛད་དུ་གསོལ། གལ་ཏེ་ཞི་ཞིང་མཉམ་པར་མ་གྱུར་ན། རྟེན་ལ་འགུགས་པ་དང༌། ཤུགས་ཀྱིས་བསྒྲལ་བ་དང༌། སྟོབས་ཀྱིས་མནན་པ་དང༌། དབྱིངས་སུ་གཟིར་བར་མཛད་དུ་གསོལ་ལོ། །ཞེས་པ་འདི་ནི་དམ་ཉམས་ལོག་ལྟ་བསྒྲལ་བའི་ཕྱིར་དུ་གཤེན་གྱི་དྲང་སྲོང་ཤེས་རབ་རྒྱལ་མཚན་གྱིས་དཔལ་གཤེན་བསྟན་བཀྲ་ཤིས་སྨན་རིའི་ཁྲོད་དུ་སྦྱར་བའོ། །
