སྤྱི་ཟླ་ ༠༦ ཚེས་ ༢༤ ཉིན་ཁོ་བོའི་ངོ་ཤེས་ཤིག་ནས་གློག་འཕྲིན་བརྒྱུད་མི་མགོ་བརྗེ་སྤོར་གྱི་བཤགས་ བཅོས་ནང་དོན་དུ་བྱས་པའི་རྩོམ་ཡིག་བཀོད་པའི་དྲ་བའི་འབྲེལ་ཐག་ཅིག་བསྐུར་འདུག་ ཅིང་། རྩོམ་ཡིག་དེ་བཀླགས་ནས་བསམ་ཚུལ་ཇི་བྱུང་གསལ་སྟོན་དགོས་པའི་རེ་འདུན་བཏོན་འདུག རྩོམ་ཡིག་དེ་འབྲི་མཁན་ནི་ཝར་ཝིཀ་གཙུག་ལག་སློབ་གྲྭ་ཆེན་མོའི་[University of Warwick]ལྟ་གྲུབ་རིག་པའི་མཁས་དབང་ཁེ་སམ་[Quassim Cassam] ཟེར་བ་ཞིག་ཡིན་པ་དང་། རྩོམ་ཡིག་དེ་སྤྱི་ཚེས་ ༢༣ ཉིན་ CNN དང་ The Conversation ཞེས་པའི་དྲ་རྒྱའི་ནང་བཏོན་འདུག

ཨི་ཊ་ལིའི་དབང་རྩ་བཤགས་བཅོས་རིག་པ་ཁ་ན་ཝེ་རོ་[Sergio Canavero]ནི་མི་མགོ་བརྗེ་སྤོར་གྱི་བཤགས་བཅོས་ལག་བསྟར་བྱེད་པར་ཡིད་ཆེས་དང་ གདེངས་སྤོབས་ཆེན་པོ་ཡོད་མཁན་ཞིག་ཡིན་མོད། ད་ལྟའི་ཆར་ལས་ཚེགས་དང་འགྲོ་གྲོན། རྒྱབ་སྐྱོར། སྤྱི་ཚོགས་ཀྱི་གདེང་འཇོག་སོགས་ཕྱོགས་གང་ཐད་ནས་ལས་དོན་ལག་བསྟར་བྱེད་པར་དཀའ་ ཚེགས་ཆེན་པོ་འཕྲད་བཞིན་ཡོད་ལ། དབང་རྩའི་ནད་བཅོས་རིག་པ་མང་པོས་ཀྱང་ལས་དོན་འདིར་ལམ་ལྷོང་རྩ་བ་ནས་ཡོང་ཐབས་ མེད་པའི་དགག་བྱ་ཆེན་པོ་བྱེད་ཀྱིན་ཡོད། འོན་ཀྱང་ཁ་ན་ཝེ་རོས་ཁོང་ལ་བཤགས་བཅོས་འདི་ཉིད་ལག་བསྟར་ལ་སྤྱི་ཚོགས་ཀྱིས་དང་ ལེན་བྱེད་པ་བྱུང་ཚེ་འབྱུང་འགྱུར་ལོ་ངོ་གཉིས་ཀྱི་རྗེས་ནས་བཤགས་བཅོས་དོན་ འཁྱོལ་ཐུབ་པའི་ཡིད་ཆེས་དང་འཆར་གཞི་ཡོད་པར་གསུངས། བཤགས་བཅོས་བྱ་ས་ནི་རང་ལོ་སུམ་ཅུར་སོན་པའི་ར་ཤི་ཡ་ནས་ཡིན་པ་དབང་རྩའི་ནད་མནར་ བ་སི་པི་རི་ཌི་ནོབ་[Valery Spiridonov]ཟེར་བ་ཁོང་ཡིན་པ་དང་། ཉེ་ཆར་སྤྱི་ཟླ་དྲུག་པའི་ནང་སྨན་པ་དང་ནད་མནར་བ་གཉིས་ཨ་རིར་ཐུག་འཕྲད་བྱུང་ ཡོད།

མི་མགོ་བརྗེ་བའི་བཤགས་བཅོས་འདི་ལྟ་གྲུབ་དང་ཀུན་སྤྱོད། ཡུལ་ཁྲིམས་སོགས་ཁྱབ་ཁོངས་མང་པོའི་ནང་ནས་དམིགས་བསལ་ལྟ་སྟངས་ཡོད་པའི་རྙོག་དྲ་ ཆེ་བའི་ལས་གཞི་ཞིག་ཡིན་སྟབས། རྒྱལ་ཁབ་གང་དང་སྨན་བཅོས་ཀྱི་ཚོགས་པ་གང་འདྲ་ཞིག་གིས་བཤགས་བཅོས་ལག་བསྟར་གྱི་ སྡིངས་ཆ་བསྐྲུན་མིན་ལ་ད་ལྟ་གཏན་འཁེལ་མེད་ཅིང་། ཁ་ན་ཝེ་རོའི་རེ་འདུན་ལྟར་ན་ཨ་མི་རི་ཁའི་ནང་ལས་དོན་ལག་བསྟར་གྱི་རེ་འདུན་ བྱེད་བཞིན་ཡོད་ལ། ཉེ་ཆར་སྤྱི་ཟླ་དྲུག་པའི་ནང་ཨ་རིའི་ཤ་གནད་དང་དབང་རྩའི་བཤགས་བཅོས་མཐུན་ ཚོགས་[American Academy of Neurological and Orthopedic Surgeons]ཀྱི་ཚོགས་འདུའི་སྟེང་བཤགས་བཅོས་ཀྱི་ལས་གཞིའི་སྐོར་དམིགས་བསལ་གཏམ་ བཤད་བྱས་འདུག མཐུན་ཚོགས་འདིའི་འགན་འཛིན་ནིཀ་རེ་བེལ་[Nick Rebel]གྱིས། “ང་ཚོའི་ཚོགས་པས་ཁ་ན་ཝེ་རོའི་བཤགས་བཅོས་ལག་བསྟར་ལ་གཞུང་འབྲེལ་གྱི་རྒྱབ་ སྐྱོར་བྱེད་པ་མིན་པར། ཁོང་ལ་གང་ཞིག་བཤད་རྒྱུ་ཡོད་པ་ཤེས་རྟོགས་ཀྱི་ཆེད་གཏམ་བཤད་ཀྱི་སྡིངས་ཆ་ཞིག་ བསྐྲུན་པ་ཙམ་ཡིན།” ཞེས་བཤད་འདུག ཁ་ན་ཝེ་རོས་གལ་ཏེ་ཨ་རིའི་ནང་བཤགས་བཅོས་ལག་བསྟར་གྱི་གོ་སྐབས་མ་བྱུང་ཚེ་རྒྱ་ ནག་ཏུ་བྱ་སྲིད་པའི་སྐོར་བཤད་ཡོད།

ནིའུ་ཡོཀ་གཙུག་ལག་སློབ་གྲྭ་ཆེན་པོའི་འབུམ་རམས་པ་ཀེབ་ལེན་[Arthur Caplan]གྱིས། “མགོ་བོ་བརྗེ་བའི་བཤགས་བཅོས་འདི་མིའི་སྟེང་ལག་བསྟར་མ་བྱས་སྔོན་དུ་དུད་ འགྲོའི་སྟེང་ལག་བསྟར་ངེས་པར་དུ་ཐུབ་པ་ཞིག་དགོས་ཤིང། གལ་ཏེ་ཁ་ན་ཝེ་རོས་བཤགས་བཅོས་ལག་བསྟར་ཐུབ་པའི་དབང་དུ་བཏང་ཡང་། མགོ་བོ་ཡོངས་རྫོགས་མ་བརྗེས་པའི་སྔོན་དུ་རྩ་དཀར་གྱི་ནད་གཞིས་མནར་བའི་མི་ རྣམས་ཀྱི་རྒྱུངས་པར་ནད་བཅོས་ཚད་ལྡན་ཐུབ་པ་ཞིག་དགོས།” ཞེས་བཤད།

རྒྱ་རིགས་བཤགས་བཅོས་སྨན་པ་རེན་[Xiaoping Ren]ལྟ་བུ་ཁ་ན་ཝེ་རོའི་ལས་དོན་ལ་མཐུན་ཕྱོགས་ཀྱི་ལྟ་ཚུལ་བཟུང་མཁན་ཡང་ཡོད་ ཅིང་། དུས་ཚོད་ཀྱི་གནད་དོན་ཙམ་མ་གཏོགས་བཤགས་བཅོས་ཀྱི་ལས་དོན་འདི་རིགས་ངེས་པར་དོན་ འཁྱོལ་ཐུབ་ངེས་ཀྱི་ལྟ་ཚུལ་འཛིན་པའི་ཚན་རིག་པ་དང་སྨན་པ་ཡང་ཡོད་འདུག

ཁ་ན་ཝེ་རོར་ད་ལྟའི་བར་སེམས་ཅན་གྱི་སྟེང་དུ་བཤགས་བཅོས་འདི་ཉིད་ལག་བསྟར་གྱིས་ ལམ་ལྷོང་བྱུང་བའི་ཉམས་མྱོང་མེད་ཀྱང་། སྤྱི་ལོ་ ༡༩༧༠ ལོར་དབང་རྩ་བཤགས་བཅོས་པ་རོ་བར་ཌེ་ཝའེཌ་[Robert White]ཡིས་སྤྲེལ་མགོ་བཤགས་བཅོས་ཀྱི་སྐབས་འཕྲད་པའི་དཀའ་ངལ་ཁག་ལ་ད་ལྟའི་ཐོན་ གསར་འཕྲུལ་རིག་དང་སྨན་བཅོས་ཀྱི་ཤེས་རྟོགས་གསར་པས་ངེས་པར་དུ་གདོང་ལེན་བྱེད་ ཐུབ་པར་ཡིད་ཆེས་བྱེད་ཀྱིན་ཡོད་པ་རེད། སྨན་པ་ཝའེཌ་ཡིས་སྤྲེལ་མགོ་བརྗེ་སྤོར་གྱི་བཤགས་བཅོས་བྱེད་པའི་སྐབས་ཀྱི་ལམ་ ལྷོང་མ་བྱུང་བའི་འགལ་རྐྱེན་གཙོ་བོ་དེ་སྤྲེལ་མགོའི་ཀླད་པ་དང་སྤྲེལ་མགོ་བསྒར་ སའི་ལུས་ཕུང་གི་རྒྱུངས་པ་[Spinal Cord]གཉིས་ལ་མཐུད་ཀ་ཚད་ལྡན་ཞིག་མ་བྱུང་བ་དང་། རྗེས་སུ་ལུས་ཕུང་གི་ནད་འགོག་མ་ལག་[Immune System]གིས་སྤྲེལ་མགོ་གསར་པ་དེ་དང་ལེན་མ་བྱས་པའི་ཐོག་ནས་མཐར་ཉིན་གྲངས་ བརྒྱད་དགུའི་རྗེས་སྤྲེའུ་དེ་ཤི་ཡོད། ཁ་ན་ཝེ་རོས་ད་ལྟའི་ཆར་ཀླད་པ་དང་རྒྱུངས་པའི་དབར་མཐུད་ཀ་རྒྱག་པའི་ཤེས་ཚད་ཧ་ ཅང་མཐོན་པོར་བསླེབས་ཡོད་པ་དང་། བསྒར་བྱ་ལུས་ཕུང་དང་སྒར་བྱེད་མགོ་བོ་གཉིས་ཀྱི་ཕན་ཚུན་འདྲིས་ཆ་མེད་པའི་གནས་ བབ་ལས་གཅིག་གིས་གཅིག་ལ་དང་ལེན་མི་བྱེད་པའི་རྫས་ཀྱི་རྣམ་འགྱུར་ཁག་ལ་ཡང་གདོང་ ལེན་བྱེད་ཐུབ་པའི་སྐོར་བཤད་ཡོད།

འོན་ཀྱང་ཁེ་ལི་ཕོར་ནི་ཡའི་ཌེ་ཝ་སི་[UC Davis]གཙུག་ལག་སློབ་གྲྭ་ཆེན་མོའི་དབང་རྩའི་བཤགས་བཅོས་པ་གྷོལཌ་སིམི་ ཏི་[Harry Goldsmith]ཡིས་རྒྱུངས་པ་མཐུད་ཀ་རྒྱག་པའི་བཤགས་བཅོས་སྐབས་ནད་པ་དེ་བདུན་ཕྲག་ བཞི་ཙམ་རིང་དྲན་མེད་དུ་སྡོད་དགོས་པའི་གནས་བབ་ནི་ཡོང་ཐབས་དཀའ་བ་ཞིག་དང་། འཚོ་རླུང་གི་མཐུན་རྐྱེན་མེད་པའི་ཐོག་ནས་རྒྱུན་རིང་པོར་ཀླད་པ་ཉར་ཚགས་བྱ་ རྒྱུ་ཧ་ཅང་ཁག་པོ་ཡིན་སྟབས་ནད་པ་དེ་འཆི་བའི་ཉེན་ཁ་ཡང་ཡོད་པར་བཤད། བཤགས་བཅོས་འདི་ལག་བསྟར་དོན་འཁྱོལ་ཐུབ་པའི་དབང་དུ་བཏང་ཡང་བཤགས་བཅོས་ལས་ལངས་ པའི་མི་དེས་གོམ་པ་སྤོ་བ་སོགས་རྒྱུན་ལྡན་གྱི་ལས་ལ་འཇུག་རྒྱུར་ལོ་ངོ་གཅིག་ཙམ་ འགོར་སྲིད་པའི་ཚོད་དཔག་བྱེད་བཞིན་ཡོད།

བཤགས་བཅོས་ལས་ལངས་པའི་མི་དེ་སུ་ཡིན་ནམ།
མི་མགོ་བརྗེ་སྤོར་གྱི་གནས་ཚུལ་འདི་བྱུང་བའི་རྗེས་ནས་ནུབ་ཕྱོགས་ཀྱི་ལྟ་ གྲུབ་སྨྲ་བ་དང་སྨན་པ་སོགས་ཀྱི་ཁྲོད་མི་མགོ་བརྗེས་པའི་རྗེས་ཀྱི་མི་དེ་སུ་ ཡིན་ངོས་འཛིན་ཐད་གླེང་སློང་མང་དག་ཅིག་འབྱུང་གི་ཡོད་ཚོད། ཁེ་སམ་གྱི་རྩོམ་ཡིག་དེའི་ནང་དོན་དག་འདིའི་སྐོར་ཉུང་བསྡུས་ཤིག་གླེང་འདུག
དུས་རབས་བཅུ་བདུན་པའི་ནང་བྱོན་པའི་དབྱིན་ཡུལ་གྱི་ལྟ་གྲུབ་སྨྲ་བ་ ལོཀ་[John Locke]གིས་དཔེ་མཚོན་ཤིག་བཀོད་ཡོད་པ་ནི། “རྒྱལ་སྲས་ཤིག་གི་ཚེ་སྔ་མའི་རྣམ་ཤེས་ཀྱི་རྟེན་གཞིའི་བླ་སྲོག་[Soul]ལྷམ་བཟོ་ བ་ཞིག་གི་ལུས་ལ་ཞུགས་པ་ཡིན་ན། ལྷམ་བཟོ་བའི་ལུས་ཕུང་ལ་རྒྱལ་སྲས་ཀྱི་རྣམ་ཤེས་ཞུགས་པ་ཡིན་པས་ལུས་ཕུང་གི་ཆ་ ནས་ལྷམ་བཟོ་བའི་ལུས་ཕུང་ཡིན་ཡང་དོན་དུ་གང་ཟག་དེ་རྒྱལ་སྲས་ཡིན་པ་ལས་ལྷམ་བཟོ་ བ་མིན་དགོས་ཏེ། གང་ཟག་རྒྱུད་གཅིག་ཡིན་མིན་གྱི་གཞི་རྩའི་ངོས་འཛིན་ཤེས་པའི་རྒྱུན་གྱི་སྟེང་ ནས་འཇོག་དགོས་པའི་ཕྱིར།” ཞེས་གང་ཟག་ཅིག་སུ་ཡིན་མིན་གྱི་ངོ་རྟགས་ངོས་འཛིན་ཤེས་རྒྱུད་ཀྱི་སྟེང་ནས་ འཇོག་དགོས་པའི་ལྟ་ཚུལ་བཏོན་ཏེ། སྐྱེ་བོ་དེར་ཉེས་པ་གཅོད་པའི་སྐབས་སུ་ཡང་རྒྱལ་སྲས་ཀྱི་སྔར་བྱས་ཉེས་པར་བརྟེན་ ནས་ཆད་པ་གཅོད་པ་ལས་ལྷམ་བཟོ་བའི་སྔར་བྱས་ཉེས་པ་རྒྱུ་མཚན་དུ་བྱས་ནས་སྐྱེ་བོ་ དེར་ཆད་པ་གཅོད་མི་རུང་བར་བཤད། འདིར་ལོཀ་གིས་བཤད་པའི་ཤེས་པ་ཟེར་བ་ནང་པའི་གཞུང་ལུགས་ནས་བཤད་པའི་ཤེས་པ་ལྟ་ བུ་ཞིག་ཏུ་ངོས་འཛིན་མི་རུང་།

དཔེ་མཚོན་འདི་རང་རེའི་གནས་ཆུང་ཆོས་སྐྱོང་ཁོག་ཞུགས་དང་འབྲེལ་ནས་བཤད་ན། གནས་ཆུང་སྐུ་རྟེན་གྱི་ལུས་ལ་ཆོས་སྐྱོང་གི་རྣམ་ཤེས་ཞུགས་པའི་སྐབས་གར་འཁྲབ་པ་ དང་ལུང་བསྐྱོན་པ་སོགས་བྱེད་པའི་གང་ཟག་དེ་ཆོས་སྐྱོང་རྡོ་རྗེ་གྲགས་ལྡན་རང་དུ་ ངོས་འཛིན་བྱེད་པ་ལས་སྐུ་རྟེན་ཐུབ་བསྟན་དངོས་གྲུབ་ཡིན་པར་ངོས་འཛིན་མི་བྱེད་ པ་དང་གཅིག་གྱུར་ལྟ་བུ་ཞིག་ཡིན། འོན་ཀྱང་གསལ་ཁ་མེད་པ་ནི་རྣམ་ཤེས་ཀྱི་རྟེན་གཞི་བླ་སྲོག་ཅེས་པ་དེ་མགོ་བོའི་ ནང་དུ་ཡོད་པའམ་ལུས་ཕུང་གི་ནང་དུ་ཡོད་པའི་གསལ་ཁའི་བཤད་པ་བཀོད་མེད།
ལོཀ་གི་ལྟ་ཚུལ་དེ་ད་ལྟའི་དུས་སུ་ཡང་ཤུགས་རྐྱེན་ཆེན་པོ་ཡིན་མོད། འོན་ཀྱང་རྣམ་ཤེས་ཀྱི་རྟེན་གཞི་བླ་སྲོག་ཡིན་ཟེར་བ་དེང་རབས་པས་མི་འདོད་ཅིང་། དེང་རབས་པ་རྣམས་ལྟར་ན་རྣམ་ཤེས་ཀྱི་རྟེན་གཞི་ཀླད་པར་འདོད་པ་ཕལ་ཆེ་བར་བཤད། ལྟ་ཚུལ་འདི་དང་འབྲེལ་ཏེ་ཨ་རིའི་ལྟ་གྲུབ་སྨྲ་བ་ཤུའུ་མེ་ཀར་[Sydney Shoemaker]གྱིས། བསྟན་འཛིན་གྱི་ཀླད་པ་དོན་གྲུབ་ཀྱི་མགོ་ཐོད་ནང་བཤགས་བཅོས་ཀྱིས་སྤོས་པ་ཡིན་ན་ གང་ཟག་དེ་བསྟན་འཛིན་དོན་འགྲུབ་ཡིན་དགོས་པར་འདོད། དེ་ཡང་སྣང་ཚུལ་ལ་དོན་འགྲུབ་ཏུ་སྣང་ཡང་དོན་དུ་སྐྱེ་བོ་དེས་སྔོན་གྱི་བསྟན་ འཛིན་གྱི་མྱོང་བ་རྣམས་རང་གི་མྱོང་བ་ཡིན་པ་ལྟ་བུའི་དྲན་པ་སྐྱེ་སྲིད་པའི་ ཕྱིར་ཞེས་འགྲེལ་བཤད་བྱེད་ཀྱིན་ཡོད།

དེས་ན་དབང་རྩའི་ནད་པ་སི་པི་རི་ཌི་ནོབ་ཀྱི་མགོ་བོ་ནི་ཁོང་གི་ཀླད་པ་གང་དུ་ ཡོད་ས་དེ་ཡིན་ཅིང་། ཁོང་གི་ཀླད་པ་ནི་ཁོང་གི་ཤེས་པའི་གཞི་རྟེན་ཡིན་སྟབས། སྐྱེ་བོ་གཞན་གྱི་ལུས་ཕུང་ལ་སི་པི་རི་ཌི་ནོབ་ཀྱི་མགོ་བོ་བསྒར་རྗེས་ཀྱི་མི་ དེ་སི་པི་རི་ཌི་ནོབ་རང་ཡིན་དགོས་པར་མང་དག་གིས་འདོད་ཀྱི་ཡོད། འོན་ཀྱང་སི་པི་རི་ཌི་ནོབ་ཀྱི་མྱོང་ཚོར་དང་འབྲེལ་བའི་ཤེས་པའི་རྟེན་གཞི་ཀླད་ པ་ཡིན་པ་དང་། ཁོའི་ཀླད་པ་གང་དུ་ཡོད་ས་དེར་ཁོའི་རྣམ་ཤེས་དང་ཁོའི་སྤྱོད་ཚུལ་རྣམས་ཀྱང་ཡོད་ དགོས་པའི་བདེན་དཔང་ཁུངས་འཕེར་ཞིག་ད་ལྟའི་བར་ཚན་རིག་པས་སྟོན་ཐུབ་མེད།

ཡང་དུད་འགྲོ་སྨྲ་བའི་[Animalist]ལྟ་གྲུབ་རིག་པ་བ་ཚོས་སི་པི་རི་ཌི་ནོབ་ནི་ མི་ཡིན་པའི་སྲོག་ཆགས་[Human Animal]ཤིག་ཡིན་སྟབས། བཤགས་བཅོས་ལས་ལངས་པའི་རྗེས་སུ་ཡང་མགོ་དང་ཀླད་པ་ལྟ་བུ་བྱེད་ནུས་མ་ཉམས་པར་ ཡོད་ཚེ་གང་ཟག་དེ་སི་པི་རི་ཌི་ནོབ་རང་ཡིན་པ་ལས་གཟུགས་ཕུང་གི་གནས་སྟངས་དང་མ་ འབྲེལ་བར་ཤེས་པའི་སྟེང་ནས་གང་ཟག་དེ་སུ་ཡིན་མིན་གྱི་དབྱེ་ཁྱད་འབྱེད་དུ་མེད་ པར་འདོད། ལྟ་ཚུལ་འདི་ལྟར་ན་ཤེས་པ་དང་བླ་སྲོག་ལྟ་བུའི་གནད་དོན་དེ་དག་མི་དེ་སུ་ཡིན་ མིན་ངོས་འཛིན་བྱེད་པའི་མཚོན་རྟགས་སུ་མི་འདོད་སྟབས་སི་པི་རི་ཌི་ནོབ་ཀྱི་ངོ་ རྟགས་ནི་གཟུགས་ཕུང་གི་སྟེང་ནས་འཇོག་དགོས་པ་དང་དེ་ཡང་གཙོ་བོ་མགོའི་སྟེང་ནས་ འཇོག་དགོས་པས་སི་པི་རི་ཌི་ནོབ་ཀྱི་མགོ་གང་དུ་ཡོད་ས་དེར་ཁོ་ཡོད་པར་འདོད་ དགོས་ཕྱིར། སྔར་གྱི་མྱོང་བ་དྲན་མི་དྲན་སོགས་ཀྱི་རྙོག་དྲ་དང་འབྲེལ་ནས་གང་ཟག་ངོས་འཛིན་ བྱེད་པའི་དཀའ་ངལ་དེ་མེད།

གོང་དུ་བཤད་པ་ལྟར་ཀླད་པ་རྣམ་ཤེས་ཀྱི་རྟེན་གཞི་ཡིན་པའི་ལྟ་ཚུལ་དར་ཁྱབ་ཆེ་ བའི་ཤུགས་རྐྱེན་ལས་སི་པི་རི་ཌི་ནོབ་ཀྱིས་ཀྱང་རང་ཉིད་མུ་མཐུད་འཚོ་གནས་ཀྱི་ དོན་དུ་རང་གི་མགོ་བོ་བསྒར་སའི་ལུས་ཕུང་ཞིག་འཚོལ་འདོད་ཀྱི་འདུན་པ་ཤུགས་དྲག་ དེ་ཡོང་གི་ཡོད་ཅིང་། གལ་ཏེ་སྐྱེ་བོ་གཞན་གྱི་ལུས་ཕུང་གི་ཐོག་ཏུ་རང་གི་མགོ་བོ་བསྒར་རྗེས་སུ་རང་ ཉིད་སི་པི་རི་ཌོ་ནོབ་ཡིན་པའི་རྒྱུན་དེ་ཆད་འགྲོ་བའི་ལྟ་ཚུལ་ཡོད་ན་སི་པི་རི་ ཌི་ནོབ་ནི་མགོ་བོ་སྦྱིན་པ་གཏོང་མཁན་ཙམ་ཞིག་ཡིན་པ་ལས། རང་ཉིད་འཚོ་གནས་ཀྱི་ཆེད་བདེ་ཐང་གི་ལུས་ཕུང་འཚོལ་མཁན་ཞིག་ཏུ་འགྱུར་མི་ཐུབ།
ཁེ་སམ་གྱིས་དྭོགས་གཞི་ཞིག་བཀོད་ཡོད་པ་ནི་བཤགས་བཅོས་ལས་ལངས་པའི་མི་དེ་སྔོན་ གྱི་མགོ་བོ་གང་དུ་ལྡན་སའི་མི་དེ་མིན་པར་རྣམ་པ་ཀུན་ནས་ཐ་དད་ཡིན་པའི་མི་གསར་ པ་ཞིག་ཀྱང་ཡོང་མི་སྲིད་པ་མིན་པ་དེ་རེད། འདི་དང་འབྲེལ་བའི་ཚོད་དཔག་འགའ་ཞིག་མཇུག་སྡོམ་གྱི་ཚུལ་དུ་འགོད་རྒྱུ་ཡིན།

ནང་པའི་ལྟ་སྟངས།
ངོ་མཚར་སྐྱེ་དགོས་པའི་ཚན་རིག་གི་གསར་གཏོད་རིགས་ཤིག་གིས་སྔོན་གྱི་ཆོས་ ལུགས་ལྟ་གྲུབ་དང་འབྲེལ་ནས་མིའི་བསམ་བློའི་གཏིང་ཟབ་སར་ཐིམས་ཤིང་ལྷིང་འཇགས་ སུ་གྱུར་ཟིན་པའི་སེམས་ཁམས་འཁྱེར་སོར་འགུལ་འཁྱོམ་གྱི་འཁྲུགས་རླབས་ཆེན་ཐེབས་ པའི་གོ་སྐབས་ཡོང་གི་ཡོད་པ་ལྟར། ད་ལྟའི་མི་མགོ་བརྗེ་སྤོར་གྱི་བཤགས་བཅོས་དང་འབྲེལ་བའི་གནས་ཚུལ་འདིས་ཀྱང་ལྟ་ གྲུབ་དང་ཀུན་སྤྱོད། ཡུལ་ཁྲིམས་སོགས་ཀྱི་སྒྲོམ་གཞི་མང་པོའི་ནང་ཡོ་འཁྱོམ་མི་ཆུང་བ་ཐེབས་རྒྱུའི་ རྟགས་མཚན་གསལ་བཞིན་ཡོད་ལ། རང་ཅག་སངས་རྒྱས་པའི་ལྟ་གྲུབ་སྨྲ་བ་རྣམས་ལ་ཡང་འགྱུར་ལྡོག་གསར་པ་འདིས་སངས་ རྒྱས་པའི་ཆོས་ལུགས་ནས་འབྱུང་བའི་གཞི་ལམ་འབྲས་བུའི་རྣམ་གཞག་ཡོད་ཚད་ཀྱི་རྟེན་ གཞི་གཅིག་པུ་རྣམ་ཤེས་ཞེས་པའི་དངོས་པོ་དེའི་གཞི་རྟེན་གང་ཡིན་སོགས་ཀྱི་གནད་ དོན་སྐོར་དྭོགས་འཆར་དང་བསྐྱར་ཞིབ་ཀྱི་གླེང་སློང་བསྐྱར་དུ་བྱེད་དགོས་པའི་ སྐུལ་རྐྱེན་བྱེད་སྲིད།

ཁོ་བོའི་ངོ་ཤེས་ཁོང་ལ་མི་མགོ་བརྗེ་བའི་བཤགས་བཅོས་འདིས་ཚོར་སྣང་གསར་པ་ཞིག་ སྦྱིན་ཡོད་པ་འདྲ་ཞིང་། དེ་དང་འབྲེལ་ནས་ཁོ་བོར་བསམ་ཚུལ་འདོན་དགོས་པའི་རེ་སྐུལ་བྱས་པ་རེད། རང་རེའི་ ཆོས་གཞུང་ནས་འབྱུང་བའི་རྒྱུ་འབྲས་རྟེན་འབྱུང་གི་རྣམ་གཞག་ཁྲོད་ཀྱི་དཀའ་གནད་ དུ་གྱུར་པ་ཤེས་པའི་རང་བཞིན་དང་སྐྱེ་བ་སྔ་ཕྱིའི་རྣམ་གཞག སྣོད་བཅུད་ཀྱི་འབྱུང་རྐྱེན་སོགས་ཀྱི་ལྟ་ཚུལ་འདི་དག་ལ་རྣམ་དག་འཁྲུལ་བྲལ་གྱི་ རིགས་པས་ངེས་པ་རྙེད་པའི་སྐྱེ་བོ་རྣམས་དང་། དད་མོས་ཡིད་ཆེས་ཀྱི་ལམ་ནས་ཡོད་མེད་ཡིན་མིན་གྱི་རྣམ་གཞག་གཏན་འབེབ་ལ་འཇུག་ པའི་སྐྱེ་བོ་རྣམས་ལ། ཚན་རིག་གི་གསར་གཏོད་དང་འབྲེལ་བའི་འགྱུར་ལྡོག་འདི་རིགས་ཀྱིས་མཚར་འཛིན་དང་ དྭོགས་འཆར་གྱི་སེམས་ཚོར་གསར་པ་བསྐྲུན་པའི་གནས་སྐབས་ཅི་ལ་སྲིད་ཀྱང་། ཡིད་བློ་རྟོག་པའི་འཆར་སྣང་དང་འབྲེལ་ནས་གཏན་འབེབ་བྱས་པའི་མིག་མཐོང་ལག་ཟིན་ མིན་པའི་ཤེས་བྱ་ལྐོག་གྱུར་གྱི་རྣམ་གཞག་ལ་གང་ཡང་འབྱུང་སྲིད་པའི་བསམ་ཚུལ་ ཤུགས་དྲག་ཡོད་པའི་ཁོ་བོ་ལྟ་བུར་མཚོན་ན། གནའ་བོའི་ལྟ་གྲུབ་སྨྲ་བ་དང་ཚན་རིག་པ་སོགས་ཀྱིས་ཤེས་བྱའི་རྣམ་གཞག་ཡོད་ཚད་ གཏན་འཁེལ་དང་ཐག་གཅོད་བྱས་ཟིན་པའི་ངེས་ཤེས་དང་རྨོངས་དད་གཉིས་ཀ་མེད་ཕྱིར། སྙིང་བརྗེ་བའི་གཤགས་བཅོས་དང་མི་མགོ་བརྗེ་བའི་བཤགས་བཅོས་སོགས་ཀྱི་འགྱུར་ ལྡོག་འདི་རིགས་ཀྱིས་སེམས་ལ་ཡོ་འཁྱོམ་གྱི་འཁྲུགས་ཆེན་པོ་ཐེབས་པའི་གོ་སྐབས་ ཡོང་གི་འདུག

འདས་པའི་བྱུང་རབས་ནང་མི་མགོ་བརྗེ་བའི་བཤགས་བཅོས་བྱས་པའི་ཚན་རིག་དང་མཐུན་ པའི་ཁུངས་ལྡན་ལོ་རྒྱུས་གང་ཡང་མེད་ཀྱང་། སྤྱིར་མི་མགོ་བརྗེ་སྤོར་གྱི་སྐད་ཆ་འདི་ཧིན་དྷུ་དང་ནང་པའི་སྤྱི་ཚོགས་ནང་ལོ་ ངོ་སྟོང་ཕྲག་གི་སྔོན་ནས་ཡོད་པའི་སྐད་ཆ་རྙིང་པ་ཞིག་རེད། ལྷ་ཆེན་དབང་ཕྱུག་གིས་རང་གི་བུ་ཚོགས་བདག་གི་མགོ་བོ་ལྷ་མིན་གྱི་དབང་པོས་བཅད་ པའི་ཤུལ་དུ་གླང་ཆེན་གྱི་མགོ་བོ་བསྒར་བའི་བྱུང་རབས་ཧིན་དྷུ་དང་ནང་པའི་སྤྱི་ ཚོགས་གཉིས་ཀར་གྲགས་ཤིང་། འཇིགས་བྱེད་ཀྱི་རྣལ་འབྱོར་པ་གྲུབ་ཐོབ་དཔལ་འཛིན་གྱིས་རང་གི་མགོ་བོ་བཅད་དེ་ བྲམ་ཟེའི་རྒྱལ་པོ་ཧ་ས་དེ་བར་སྦྱིན་ཤུལ་དུ་མ་ཧེའི་མགོ་བོ་བསྒར་བའི་བྱུང་རབས་ སྔགས་ཀྱི་ཆོས་འབྱུང་ཁག་གི་ནང་ཡོངས་གྲགས་སུ་ཡོད་པ་རེད།

འོན་ཀྱང་སྐབས་དེའི་སྤྱི་ཚོགས་ནང་ཀླད་པའི་གལ་གནད་གལ་ཆེན་ཡིན་པའི་ལྟ་ཚུལ་མེད་ སྟབས། ཚོགས་བདག་གི་མགོ་བོར་གླང་མགོ་བསྒར་རྗེས་སུ་ཡང་གླང་མགོ་ཅན་གྱི་ཚོགས་བདག་དེ་ ལྷ་ཆེན་དབང་ཕྱུག་གི་བུ་རྒན་པ་དང་གདོང་དྲུག་གི་གཅེན་པོ་རང་ཡིན་པ་ལས། གླང་ཕྲུག་ཅིག་ཏུ་གྱུར་པའི་ལོ་རྒྱུས་མེད་ཅིང་། མ་ཧེའི་མགོ་ཅན་གྱི་གྲུབ་ཐོབ་དཔལ་འཛིན་ཡང་མཐུ་དང་རྫུ་འཕྲུལ་དཔག་མེད་ལ་མངའ་ བརྙེས་པའི་གྲུབ་ཐོབ་དཔལ་འཛིན་རང་གི་གནས་བབ་ཐོག་བསྡད་ཡོད་པ་ལས་མ་ཧེ་ཞིག་གམ་ མ་ཧེའི་སྤྱོད་ཚུལ་ཅན་དུ་གྱུར་པའི་སྐད་ཆ་མེད།

གོང་གསལ་ལོ་རྒྱུས་འདི་གཉིས་དངོས་བྱུང་ཡིན་མིན་གང་ལྟར་ཡང་ལོ་རྒྱུས་དེ་གཉིས་ ཀྱིས་གནད་དོན་ཞིག་བསྟན་ཡོད་པ་ནི་ནང་པ་དང་ཧིན་དྷུའི་སྤྱི་ཚོགས་གཉིས་ཀས་མིའམ་ སེམས་ཅན་དེའི་ངོ་རྟགས་འཛིན་པའི་ཁྱད་ཆོས་གཙོ་བོ་དེ་མགོ་བོའི་ཕྱི་ནང་དུ་མེད་ པ་དེ་རེད། སེམས་ཅན་དེ་དང་དེ་སུ་ཡིན་མིན་གྱི་ཁྱད་པར་ངོ་མ་ནི་སངས་རྒྱས་པའི་ལུགས་དང་ འབྲེལ་ནས་བཤད་ན་རྣམ་ཤེས་ཀྱི་སྟེང་ནས་འཇོག་དགོས་ཤིང་། དེ་ཡང་གཙོ་བོ་ཚེ་སྔ་ཕྱིིའི་རྒྱུན་སྦྲེལ་བའི་དྲུག་པ་ཡིད་ཤེས་ཀྱི་སྟེང་ནས་ ངོས་འཛིན་དགོས་པ་རེད། གོང་གསལ་ལོ་རྒྱུས་དེས་དེ་འདྲའི་ཤེས་པ་དེ་མགོ་བོའི་ནང་མེད་པ་གསལ་པོ་བསྟན་ འདུག
དེ་བཞིན་སངས་རྒྱས་པའི་ཆོས་ལུགས་ནང་འབྱུང་བའི་མགོ་བོ་སྦྱིན་གཏོང་གི་ལོ་ རྒྱུས་དེས་ཀྱང་མགོ་བོ་སྦྱིན་པའི་རྗེས་སྦྱིན་པ་གཏོང་ཡུལ་དོན་འགྲུབ་ཀྱིས་ སྦྱིན་པ་གཏོང་མཁན་བསྟན་འཛིན་གྱི་མགོ་བོ་དེ་རང་གི་འཚོ་གནས་ཀྱི་དགོས་མཁོར་ བླངས་ཤིང་བསྟན་འཛིན་གྱིས་ཀྱང་རང་ཉིད་བློས་གཏོང་གིས་རང་གི་མགོ་བོ་དོན་འགྲུབ་ ཀྱི་འཚོ་གནས་ཆེད་སྦྱིན་པར་བསྟན་སྟབས། མགོ་ལུས་སྦྱར་བའི་རྗེས་ཀྱི་མི་དེ་མགོ་བོ་སྦྱིན་ཡུལ་དོན་འགྲུབ་ཀྱི་རྒྱུན་ ཡིན་དགོས་པར་ཤུགས་ལ་བསྟན་པ་འདིས་ཀྱང་ཚེ་སྔ་ཕྱིའི་རྒྱུན་སྦྲེལ་བའི་རྣམ་ཤེས་ སམ་གང་ཟག་དེ་སུ་ཡིན་མིན་གྱི་ཁྱད་པར་འབྱེད་ཆོས་གཙོ་བོ་དེ་མགོ་བོའི་ནང་མེད་པ་ གསལ་པོ་བསྟན་པ་ཡིན།

འོན་ཀྱང་ཀླད་པ་མྱོང་ཚོར་ཐམས་ཅད་ཀྱི་འབྱུང་ཁུངས་སུ་བལྟ་བའི་ད་ལྟའི་དུས་རབས་ འདིར་མགོ་བོ་བདེ་ཐང་ཡིན་ཅིང་ལུས་པོ་གཞན་འཕྲོ་བརླགས་སུ་ཕྱིན་པའི་མི་དེས་རང་ ཉིད་ཀྱི་རྒྱུན་འཚོ་གནས་ཀྱི་ཆེད་རང་གི་མགོ་བོ་བསྒར་སའི་བདེ་ཐང་གི་ལུས་ཕུང་ ཞིག་འཚོལ་གྱིན་ཡོད་པ་རེད། ལྟ་ཚུལ་འདི་ལྟར་ན་བསྟན་འཛིན་གྱི་མགོ་བོ་དོན་གྲུབ་ཀྱི་ཕུང་པོར་བསྒར་བའི་ རྗེས་ཀྱི་གང་ཟག་དེ་བསྟན་འཛིན་གྱི་རྒྱུན་ཡིན་པ་ལས་དོན་འགྲུབ་ཀྱི་རྒྱུན་མིན་ པར་འདོད་པ་རེད། འདིས་བསྟན་འཛིན་གྱི་རྒྱུན་འཛིན་པའི་ཁྱད་ཆོས་ཐུན་མོང་མིན་པ་དེ་མགོ་བོའི་ནང་ ཡོད་པར་བསྟན་གྱི་ཡོད།

ཀླད་པ་སེམས་ཀྱི་རྟེན་གཞིར་མི་འདོད་པའི་ནང་པའི་ལུགས།
གསང་སྔགས་གསར་མའི་གཞུང་ལུགས་རྣམས་སུ་ཀླད་པའི་སྐོར་འགྲེལ་བཤད་ཞིབ་ཕྲ་མཛད་ པ་མ་མཇལ་མོད། རྙིང་མའི་བཀའ་བརྒྱད་ཀྱི་གཞུང་ནས་ཀླད་པ་སེམས་ཀྱི་བཅུད་དུ་གསུངས་པ་སོགས་ཀླད་ པ་དང་སེམས་ཀྱི་འབྲེལ་བའི་སྐོར་རགསབཤད་མཛད་པའི་གཞུང་ཚིག་ཁ་གསལ་ཡོད། སྤྱིར་སྟངས་བཅུད་ཟེར་བ་སྙིང་པོའི་དོན་ཡིན་སྟབས་ཀླད་པ་སེམས་ཀྱི་བཅུད་དུ་ གསུངས་པ་འདིས་ཀླད་སེམས་དབར་འབྲེལ་བ་ཐུན་མིན་ཅིག་ཡོད་པ་གསལ་པོ་བསྟན་ཡོད། འོན་ཀྱང་བཅུད་ཀྱི་གོ་དོན་ལེན་ལུགས་ལས་ཀླད་པ་ཚེ་སྔ་ཕྱིའི་རྒྱུན་སྦྲེལ་བའི་ སེམས་ཀྱི་རྟེན་གཞིར་ངོས་འཛིན་བྱེད་པ་ཅུང་ཟད་དཀའ་བ་སྙམ། རང་རེའི་སྨན་གྱི་གཞུང་ལུགས་ཁག་ནས་ཀླད་པའི་རྣམ་གཞག་གསུངས་པ་ཡོད་ཀྱང་སེམས་ ཀྱི་རྟེན་གཞི་ཡིན་མིན་གྱི་འགྲེལ་བཤད་ཞིབ་ཕྲ་མེད་ལ། མདོ་ཕྱོགས་ཀྱི་གཞུང་ལས་ཀླད་པའི་རྣམ་གཞག་གསུངས་པ་ཞིག་ནི་རྩ་བ་ནས་མེད་ཅེས་ ཞུས་ཆོག

རང་རེའི་བློ་རིག་གི་གཞུང་ལུགས་ནང་མིག་ཤེས་སོགས་ཡུལ་ལ་འཇུག་ལྡང་སྐབས་ངེས་པར་ མཁོ་བའི་རྐྱེན་གསུམ་གྱི་རྣམ་གཞག་གསུངས་པའི་ཚེ་གཟུགས་སྒྲ་སོགས་མཐོང་ཐོས་ལ་ མེད་ན་མི་འབྱུང་གི་འབྲེལ་བ་གཙོ་བོ་གྲུབ་པའི་ཀླད་པ་དང་དབང་རྩ་འཕྲིན་པ། བརྡ་ལེན་རྩ་ཕྲན་སོགས་ཀྱི་རྣམ་གཞག་ལ་འགྲེལ་བཤད་ཚིག་འབྲུ་གཅིག་ཀྱང་མ་བྱུང་བ་ ནི་དགོས་སར་ཆད་པའི་སྟོང་ཆ་ཧ་ཅང་ཆེན་པོ་ཞིག་ཡིན་པ་ང་ཚོས་ངེས་པར་ཁས་ལེན་དགོས་ ལ། ཤེས་བྱའི་རང་བཞིན་ཕྱིན་ཅི་མ་ལོག་པར་གཏན་ལ་འབེབ་པའི་ཆེད་དང་། གདུལ་བྱ་རྗེས་འཛིན་གྱིས་གཞན་དོན་བསྒྲུབ་པའི་དགོས་དོན་སོགས་ཕྱོགས་གང་ནས་ བསམས་ཀྱང་ཤེས་པ་ཡུལ་ལ་འཇུག་ལྡང་གི་འགྲེལ་པ་བྱེད་པའི་སྐབས་མིག་གིས་མཐོང་དུ་ མེད་པའི་བདག་རྐྱེན་དབང་པོའི་སྐོར་གྱི་འགྲེལ་བཤད་རྙོག་དྲ་ཚ་པོ་དེ་ལས་མིག་ གིས་མཐོང་དུ་རུང་བའི་ཀླད་པའི་བྱེད་ལས་དང་འབྲེལ་བའི་འགྲེལ་བཤད་དེ་ནད་ཐོག་ལ་ འཁེལ་བའི་བཙག་ལྟ་བུ་ཞིག་ཡོད་ཀྱང་། ཤེས་པའི་རྣམ་གཞག་ཞིབ་ཕྲ་གསུང་བའི་ཚད་མ་དང་མངོན་པ། སྔགས་ཕྱོགས་ཀྱི་གཞུང་གང་དུ་ཡང་ཀླད་པའི་བྱེད་ནུས་སྐོར་ཞིབ་ཕྲའི་འགྲེལ་བཤད་ མཛད་པ་གཅིག་ཀྱང་མེད་པ་འདི་རྣམ་པ་གཅིག་ཏུ་ན་དཔལ་ལེཎྜའི་པཎ་གྲུབ་ཚོས་ང་ཚོ་ ཕྱི་རབས་པའི་ལས་སྐལ་དུ་བཞག་པའི་འགན་འཁྲི་ཞིག་ཏན་ཏན་ཡིན་སྲིད་སྟབས། དེང་རབས་ཀླད་ཁམས་དང་དབང་རྩ་རིག་པའི་ཤེས་ཡོན་ལ་གོ་རྟོགས་ལྡན་པའི་གཞོན་སྐྱེས་ རིགས་པ་སྨྲ་བ་སྤྱི་དང་ལྷག་དོན་ཚན་རིག་གི་ཤེས་ཡོན་གང་ལེགས་ལྡན་པའི་དགེ་འདུན་ པ་རྣམ་པས་ཕྱོགས་འདིར་ཐུགས་སྣང་ངེས་པར་གནང་དགོས་ཀྱི་གཞེན་སྐུལ་ཞིག་ཞོར་ འཕྲོས་སུ་ཞུ་འདོད་བྱུང་།

རྣམ་ཤེས་ཡུལ་ལ་འཇུག་ལྡང་སྐབས་རམ་འདེགས་ཀྱི་བྱེད་ནུས་གཙོ་ཆེ་སྒྲུབ་པའི་ཆ་ནས་ ཀླད་པ་དང་སེམས་ཀྱི་འབྲེལ་བ་ཐུན་མོང་མིན་པ་ཞིག་ཡིན་མོད། ཀླད་པ་ཚེ་སྔ་ཕྱིའི་རྒྱུན་སྦྲེལ་བའི་རྣམ་ཤེས་ཀྱི་རྟེན་དུ་མི་རུང་བ་ལོ་རྒྱུས་ ཐོག་གི་དཔེ་མཚོན་འགའ་ཞིག་གིས་བདེན་དཔང་བྱས་ཡོད། དེ་ཡང་༸རྒྱལ་མཆོག་ཚངས་དབྱངས་རྒྱ་མཚོ་ལི་ཐང་གཡས་གཡོན་གྱི་མི་ཚང་ཞིག་ཏུ་ཕེབས་ སྐབས་ཁྱིམ་ཚང་ཞིག་ནས་མགོ་མེད་པར་ལོ་གསུམ་ཙམ་ཕྱིན་པའི་མི་གསོན་པོ་ཞིག་གཟིགས་ ཡོད་ཅིང་། མི་དེས་གྲོད་པ་ལྟོག་པའི་བརྡར་བྲང་ཁ་བརྡུང་བཞིན་ཡོད་སྐོར་གསུངས་ཡོད། འོན་ཀྱང་༸རྒྱལ་མཆོག་ཚངས་དབྱངས་པའི་གསང་རྣམ་ནང་མི་དེའི་གཤིས་སྤྱོད་རང་བཞིན་ སོགས་ལ་འགྲེལ་བཤད་ཞིབ་ཕྲ་མ་མཛད་པར་སྣང་ཚུལ་དེ་ནི་ལས་ཚུལ་བསམ་མི་ཁྱབ་པའི་ རྣམ་འགྱུར་གྱི་ཆ་ཤས་ཤིག་ཡིན་པ་ཙམ་གསུངས་ཡོད། མི་དེ་གསོན་པོར་འཚོ་ཞིང་གནས་པ་ཙམ་ལས་ཁོ་པ་མགོ་བོ་མ་ཆད་པའི་སྔོན་གྱི་གང་ཟག་ དེའི་ཤེས་རྒྱུད་འཛིན་པའི་རྒྱུད་གཅིག་པའི་སྐྱེ་བོ་ཞིག་ཡིན་པའམ། ཡང་ན་རྒྱུད་ཐ་དད་པའི་གང་ཟག་གསར་པ་ཞིག་ཡིན་པའི་སྐོར་ནི་ཤེས་རྟོགས་ཤིན་ཏུ་ དཀའ་བ་ཡིན། རྒྱུ་མཚན་ནི་ཁོ་པར་སྨྲ་བརྗོད་གི་སྒོ་མོ་གང་དུ་ལྡན་སའི་མགོ་བོ་མེད་སྟབས་ཁོང་ གི་མྱོང་ཚོར་དང་དྲན་པ་སོགས་ཇི་ལྟར་འཇུག་བཞིན་ཡོད་མེད་ང་ཚོས་ཤེས་ཐབས་མེད་པ་ རེད།

༸རྒྱལ་མཆོག་ཚངས་དབྱངས་པའི་སྐུ་ཚེའི་ལོ་རྒྱུས་སྐོར་ཤོད་སྟངས་འདྲ་མིན་ཡོད་ ཀྱང་ཁོང་གི་གསང་རྣམ་དུ་གྲགས་པའི་ལོ་རྒྱུས་དེས་བསྟན་པའི་བྱུང་བ་འདི་ལྟ་བུ་ ཡོང་སྲིད་པའི་ཡིད་ཆེས་བྱེད་ཆོག་པ་ཡིན། འཛམ་གླིང་ཐོག་ད་སྔ་ཕན་རང་རེས་དངོས་སུ་མཐོང་ཐོས་བྱུང་བའམ་ཡང་ན་ཚན་རིག་གིས་ བདེན་དཔང་ཚད་ལྡན་བྱས་པའི་མགོ་བོ་མེད་པའི་མི་གསོན་པོའི་བྱུང་རབས་གསལ་པོ་མེད་ ཀྱང་། མགོ་བོ་མེད་པར་ཟླ་ཤས་དང་ཉིན་ཤས་རིང་འཚོ་གནས་ཐུབ་པའི་བྱ་དེ་སོགས་སེམས་ཅན་ གྱི་རིགས་འགའ་ཞིག་བྱུང་བ་དངོས་ཡོད་བདེན་དཔང་དང་བཅས་ཏེ་སྟོན་དུ་ཡོད་པ་རེད།

སྤྱི་ལོ་ ༡༩༤༧ ལོའི་སྤྱི་ལོའི་ལོ་གསར་གྱི་སྔ་ནུབ་དེར་ཨཱཤ་ཏ་བུ་ལའི་[Ashtabula]གྲོང་མི་ ཇོན་[John]ཡིས་དགོང་ཟས་ཀྱི་ཆེད་སྐེ་བཏུབས་པའི་བྱ་དེ་ཞིག་མ་འཆི་གསོན་པོར་ ཉིན་གྲངས་སུམ་ཅུ་སོ་བརྒྱད་འཚོ་ཐུབ་པ་བྱུང་ཞིང་། ཇོན་ཡིས་མགོ་བོ་ཆད་ཤུལ་གྱི་མགྲིན་པའི་བུ་ག་བརྒྱུད་ནས་ཁ་ཟས་སྟེར་བའི་བྱ་ཐབས་ བརྒྱུད་བྱ་དེ་དེས་མགོ་བོ་མེད་ཀྱང་རྒྱུན་ལྡན་ལྟར་གོམས་པ་སྤོ་བ་སོགས་ཀྱི་ སྤྱོད་ཚུལ་ཡོངས་རྫོགས་བསྟེན་ཐུབ་ཀྱི་ཡོད། འོན་ཀྱང་ཉིན་ཅིག་ཇོན་ཡིས་ལྟོ་སྟེར་བའི་སྐབས་ཤིག་མགོ་བོ་ཆད་ཤུལ་གྱི་རྨ་ཁ་ ཞིག་ཏུ་ཕོག་ཐུག་ཤོར་སྟབས་ཐབས་ལམ་གང་དྲག་བསྟེན་པས་མ་ཕན་པར་མཐར་སྤྱི་ལོ་ ༡༩༤༧ ལོའི་སྤྱི་ཟླ་ ༢ ཚེས་ ༧ ཉིན་བྱ་དེ་དེ་འདས་གྲོངས་སུ་གྱུར་ཡོད།

ཡང་ཁ་ལ་ར་ཌོ་[Colorado]མངའ་སྡེའི་ཞིང་པ་ཨོལ་སེན་[Lloyd Olsen]ཟེར་བ་ཞིག་ལ་ངོ་མཚར་ཆེ་བའི་བྱ་དེ་མའེཀ་[Miracle Mike]ཟེར་བ་ཞིག་ཡོད་ཅིང་། བྱ་དེ་དེ་མགོ་མེད་པར་ཟླ་བ་བཅོ་བརྒྱད་རིང་འཚོ་གནས་བྱུང་བའི་དངོས་བྱུང་ལོ་ རྒྱུས་ཀྱང་ཡོད། གོང་གསལ་ལོ་རྒྱུས་འདི་དག་གིས་ཀླད་པ་ཚེ་སྔ་ཕྱིའི་རྒྱུན་སྦྲེལ་བའི་རྣམ་ཤེས་ ཀྱི་རྟེན་གཞི་མིན་པར་བསྟན་ཡོད། བྱུང་རབས་འདི་དག་ལ་དབང་རྩའི་ཚན་རིག་པས་འགྲེལ་བཤད་ངེས་པར་དུ་དགོས་པ་ཡིན།

འདིར་དྭོགས་གཞི་གཞན་ཞིག་བཀོད་ན། མགོ་བོ་མེད་པར་ལུས་ཕུང་རྐྱང་པ་འཚོ་གནས་ཐུབ་པའི་ལོ་རྒྱུས་འདི་དག་གིས་ཚེ་སྔ་ ཕྱིའི་རྒྱུན་སྦྲེལ་བའི་རྣམ་ཤེས་མུ་མཐུད་ལུས་ལ་གནས་ཡོད་པར་སྒྲུབ་ཐུབ་བམ། གསོན་པོར་གནས་པའི་ལུས་ཕུང་དེར་རང་གི་ཚད་མཐོན་པོའི་མྱོང་ཚོར་གསལ་བརྗོད་བྱེད་ པའི་བརྒྱུད་ལམ་མེད་སྟབས་འདི་ཡང་དཔྱད་གཞི་གལ་ཆེན་ཞིག་རེད། དེང་རབས་རྩི་ཤིང་རིག་པ་སྨྲ་བ་འགའ་ཞིག་གིས་རྩི་ཤིང་གི་རིགས་འགའ་ཞིག་ལ་དྲན་པ་ ཡོད་པ་སོགས་ཚད་མཐོའི་སྤྱོད་ཚུལ་འཛིན་པའི་གནས་བབ་ཡོད་པའི་འགྲེལ་བཤད་བྱེད་ བཞིན་ཡོད་སྟབས། མགོ་མེད་པའི་ལུས་ཕུང་གསོན་པོ་དེར་ཚེ་སྔ་ཕྱིའི་རྒྱུན་སྦྲེལ་བའི་རྣམ་ཤེས་མེད་ ཀྱང་གསོན་པོར་གནས་པའི་ལུས་ཕུང་གི་ཚད་མཐོ་ཞིང་རྙོག་འཛིངས་ཆེ་བའི་དབང་པོ་དང་ ཡན་ལག་སོགས་ཀྱི་གཟུགས་ཕུང་གི་སྒྲོམ་གཞིའི་བཀོད་པ་རྐྱང་པས་རྣམ་ཤེས་ལ་ལྟོས་ མི་དགོས་པར་བཟའ་བཏུང་གི་སྤྱོད་ཚུལ་བསྟེན་པ་སོགས་ཡོང་སྲིད་པའི་གོ་སྐབས་མེད་ ཅེས་སུ་ཞིག་གིས་སྨྲ་བར་ནུས། འདི་དག་ནི་ཤེས་པའི་རང་བཞིན་མྱོང་ཐོག་ནས་ར་མ་འཕྲོད་བར་དོགས་གཞི་ཁོ་ནའི་ངོ་ བོར་ལྷག་ངེས་པའི་དངོས་པོའི་སྣང་ཚུལ་རྟོགས་དཀའ་བའི་རིགས་དག་ཡིན།

རྣམ་ཤེས་ཀྱི་རྟེན་གཞི་སྙིང་།
ནང་པའི་མདོ་སྔགས་གཉིས་ཀས་གཅིག་གྱུར་དུ་ངོས་འཛིན་བྱུང་བའི་གནད་དོན་ཅིག་ ནི་ཚེ་སྔ་ཕྱིའི་རྒྱུན་སྦྲེལ་བའི་རྣམ་ཤེས་སམ་ཡང་ན་གཉུག་མའི་ཤེས་པའི་རྟེན་ གཞི་གཙོ་བོ་སྙིང་ཁ་ཡིན་པ་འདི་ཡིན། དེ་ཡང་རྒྱུད་རྒྱལ་དཔལ་མཆོག་དང་། བཤད་རྒྱུད་རྡོར་ཕྲེང་། ལྷ་མོ་བཞིས་ཞུས། རྡོ་རྗེ་དཀྱིལ་འཁོར་རྒྱན་གྱི་རྒྱུད་སོགས་སུ་ཞལ་གསལ་པོས་ཡང་དང་ཡང་དུ་རྣམ་ ཤེས་ཀྱི་རྟེན་གཞི་སྙིང་ཁར་གསུངས་ཡོད། འོ་ན་སྐབས་འདིའི་སྙིང་ཁའི་ངོས་འཛིན་གང་དུ་བྱེད་དགོས་པ་ཡིན་ནམ། ད་ལྟ་མིའི་བྲང་ཁོག་གི་ཅུང་ཟད་གཡོན་གྱི་ཆར་ཆགས་པའི་ཁྲག་ཀློད་གཏོང་གི་བྱ་བ་ སྒྲུབ་པའི་སྙིང་རིལ་པོ་འདི་ཡིན་ནམ་ཡང་ན་གཞན་ཞིག་ཡིན་ནམ། སྙིང་རིལ་པོ་འདིར་ངོས་འཛིན་རྒྱུ་ཡིན་ན། དངོས་བྱུང་ལོ་རྒྱུས་དང་འབྲེལ་ནས་དཀའ་རྙོག་ཆེན་པོ་ཡོད་དེ།
སྤྱི་ལོ་ ༢༠༡༡ ལོའི་སྤྱི་ཟླ་ ༣ ནང་ཨ་རིའི་མངའ་སྡེ་ཊེག་སཱས་[Taxas]རུ་སྙིང་རིལ་བུ་ཕྱིར་འདོན་གྱིས་བཅོས་མའི་ སྙིང་རྫུན་བསྒར་བའི་སྐྱེས་པ་ལི་ཝི་སི་[Craig Lewis]ཡིས་ཁྱོན་ཆུ་ཚོད་ཞེ་བརྒྱད་ཙམ་འགོར་བའི་བཤགས་བཅོས་ཀྱི་ལས་རིམ་ཟིན་པ་ ལས་ལངས་པའི་རྗེས། སྐད་ཆ་བཤད་ཐུབ་ཅིང་རྒྱུན་ལྡན་གྱི་སྤྱོད་ཚུལ་བསྟེན་པའི་གོ་སྐབས་བྱུང་ཡོད། འཕར་སྒྲ་མེད་པའི་བཅོས་མའི་སྙིང་རྫུན་གྱིས་ལས་དོན་ཚད་ལྡན་སྒྲུབ་བཞིན་པའི་ སྐབས་ཤིག སྟབས་མ་ལེགས་པར་མཆིན་པ་དང་ཁལ་མའི་བྱེད་ལས་ཉམས་པའི་གནས་སྟངས་ཤིག་གིས་བདུན་ ཕྲག་ལྔའི་རྗེས་ཁོ་པ་འདས་གྲོངས་སུ་གྱུར་ཡོད། འཕྲུལ་ཆས་ཀྱི་སྙིང་རྫུན་མ་དེའི་ནང་དུ་རྣམ་ཤེས་གནས་པའི་འགྲེལ་པ་བྱེད་རྒྱུ་ ཤིན་ཏུ་ཁག་པོ་མིན་ནམ།

ནང་པའི་གསང་སྔགས་ཀྱི་གཞུང་ལུགས་ནས་ངོས་འཛིན་བྱེད་སྟངས་གཞན་ཞིག་ཡོད་པ་ནི། སེམས་ཀྱི་རྟེན་གཞིའི་སྙིང་དེ་ད་ལྟ་མིག་གིས་མཐོང་དུ་ཡོད་པའི་སྙིང་རིལ་པོ་ འདི་མིན་པར་མི་ལྟ་བུར་མཚོན་ན་བྲང་ཁའི་ནུ་མ་གཉིས་ཀྱི་བར་ཐད་སྒལ་པ་དང་ཉེ་བའི་ གནས་ཀྱི་རྩ་དབུ་མར་རོ་རྐྱང་གི་མདུད་པ་སྟེང་འོག་གཉིས་ཡོད་པའི་དབུས་སུ་ཆགས་ པའི་མི་ཤིགས་པའི་ཐིག་ལེ་དེ་ཡིན་ཞེས་འདོད་པ་ཡོད། འདི་ལྟ་ན་རྩ་དབུ་མ་རོ་རྐྱང་གི་བཤད་པ་མདོ་ཕྱོགས་ཀྱི་གཞུང་དུ་མི་འབྱུང་བས་ ཐོགས་མེད་ཀྱི་ཀུན་བཏུས་ནས་བཤད་པའི་རྣམ་ཤེས་ཀྱི་རྟེན་གཞིའི་སྙིང་དེ་སྔགས་ གཞུང་ནས་བཤད་པའི་སྙིང་ཁ་འདིར་ངོས་འཛིན་བྱེད་སྟངས་མེད་ཕྱིར། དེ་འདྲའི་སྙིང་ཁ་དེ་གང་དུ་ངོས་འཛིན་མིན་ལ་དཔྱད་བྱ་ཡོད། ཅི་སྟེ་མདོ་ཕྱོགས་ནས་གསུངས་པའི་སེམས་ཀྱི་རྟེན་གཞིའི་སྙིང་ཁ་ཟེར་བ་ད་ལྟའི་ སྙིང་རིལ་པོ་འདིར་ངོས་འཛིན་བྱེད་རྒྱུ་ཡིན་ན། གོང་དུ་བཤད་པའི་སྙིང་རིལ་པོ་བརྗེ་སྤོར་གྱིས་བཅོས་མའི་སྙིང་ལ་བརྟེན་པའི་ བྱུང་བ་དེར་འགྲེལ་བཤད་གསལ་པོ་ཞིག་བྱེད་དགོས་པ་ཡིན།

རྩ་དབུ་མར་ཆགས་པའི་སེམས་ཀྱི་རྟེན་གཞིའི་མི་ཤིགས་པའི་ཐིག་ལེའི་གནས་གཞི་གཙོ་ བོ་སྙིང་ཁར་གསུངས་ཀྱང་གསང་འདུས་ཀྱི་ལུགས་ལ་སེམས་ཀྱི་རྟེན་གཞིའི་ཐིག་ལེ་དེ་ ཉིད་སད་དུས་དང་གཉིད་དུས། རྨི་ལམ་གྱི་དུས། ཕོ་མོ་མཉམ་སྦྱོར་གྱི་དུས་སུ་རིམ་བཞིན་ལྟེ་བ་དང་སྙིང་ཁ། མགྲིན་པ། སྤྱི་བོ་བཅས་སུ་གནས་ནས་སེམས་འཛིན་པར་བཞེད་སྐོར་ལྷོ་བྲག་མར་པའི་དགོངས་པར་ རྗེའི་དཔྱིད་ཐིག་གི་ཟིན་བྲིས་སུ་གསུངས་ཤིང་། དེ་ཉིད་རྗེ་རང་ལུགས་ལའང་འཐད་པ་ལྟར་དུ་རིམ་ལྔ་གདན་རྫོགས་ཀྱི་དམར་ཁྲིད་དུ་ གསུངས། དུས་འཁོར་ནས་ཀྱང་དེ་དང་ཕྱོགས་མཐུན་གསུངས་པར་བཞེད། ཚུལ་འདི་ལྟ་ན་དྲུག་པ་ཡིད་ཤེས་སམ་གཉུག་མའི་སེམས་དེ་སྐབས་རེ་སྤྱི་བོའི་ནང་དུ་ ཡང་ཡོད་པ་ལྟ་བུ་ཞིག་སྣང་མོད། དེའི་རྟེན་གཞི་ནི་མི་ཤིགས་པའི་ཐིག་ལེར་འདོད་པ་ལས་ཀླད་པར་གསུངས་པ་མེད།

རྟོག་ཚོགས་རགས་པའི་རིགས་ཀུན་ལ་ལྷན་ཅིག་སྐྱེས་པའི་སེམས་སམ་འོད་གསལ་གྱི་རིག་ ཆ་ཏིལ་འབྲུ་སྣུམ་ཁྱབ་ཀྱི་ཚུལ་དུ་བཞེད་པའི་ལུགས་ལྟར་ན་རྟོག་ཚོགས་རགས་པ་གང་ དུ་རྟེན་སར་གཉུག་མའི་ཤེས་པ་ཡང་ཡོད་དགོས་པས་གཉུག་མའི་ཤེས་པའི་རྟེན་གཞི་མི་ ཤིགས་པའི་ཐིག་ལེ་ཁོ་ནར་འདོད་པ་ཡང་དཔྱད་བྱ་ཡིན་ལ། གཉུག་མའི་ཤེས་པ་མི་ཤིགས་པའི་ཐིག་ལེ་ཁོ་ནར་བརྟེན་པར་འདོད་པའི་ལུགས་ལྟར་ན་ རྣམ་རྟོག་ཆོས་སྐུར་ཤར་ཟེར་བའི་ཆོས་སྐད་གྲགས་པོ་ཆེ་འདིར་འགྲེལ་བཤད་ཤིན་ཏུ་ དཀའ་བར་སྙམ་པ་ནི་རང་གི་རྣམ་པར་རྟོག་པའོ། །

མཐའ་སྡོམ།
གོང་གསལ་ལྟ་ཚུལ་དེ་དག་བཤད་པའི་རྗེས་ནས་མི་མགོ་བརྗེ་སྤོར་གྱི་བཤགས་བཅོས་ འདི་ལམ་ལྷོང་བྱུང་པ་ཡིན་ན། བཤགས་བཅོས་ལས་ལངས་པའི་མི་དེས་སྤྱོད་ཚུལ་ཇི་ལྟར་འཛིན་མིན་ཚོད་དཔག་གི་ཕྱོགས་ བཞི་ཙམ་ཞིག་ཡོང་སྲིད་པ་གཤམ་གསལ།
དང་པོ།༽ བཤགས་བཅོས་ལས་ལངས་པའི་མི་དེས་སྔོན་གྱི་མགོ་བོ་གང་དུ་ཡོད་སའི་མི་ དེའི་མྱོང་ཚོར་ཡོངས་རྫོགས་ཇི་བཞིན་དུ་དྲན་པ་བྱུང་ཚེ་མི་དེ་མགོ་བོ་གང་ལས་ ལེན་སའི་མི་དེ་དང་རྒྱུད་གཅིག་དུ་འདོད་དགོས་པས། གང་ཟག་དེའི་རིགས་འདྲའི་རྒྱུན་ནམ། ཡང་ན་ངོ་རྟགས་གཅིག་པའི་རྒྱུན་འཛིན་པའི་ཁྱད་ཆོས་གཙོ་བོ་དེ་ཀླད་པའི་ནང་ཡོད་ དགོས་པར་འགྱུར་ཞིང་། འདི་ལྟ་ན་སངས་རྒྱས་པའི་གཞུང་དང་འབྲེལ་ནས་བཤད་ན་ཚེ་སྔ་ཕྱིའི་རྒྱུན་སྦྲེལ་ བའི་རྣམ་ཤེས་སམ་ཡང་ན་སྔགས་གཞུང་ནས་འབྱུང་བའི་གཉུག་མའི་ཤེས་པ་དེ་ཀླད་པའི་ནང་ ཡོད་ཅེས་སྨྲ་དགོས།
གཉིས་པ།༽ བཤགས་བཅོས་ལས་ལངས་པའི་མི་དེས་སྔོན་གྱི་ལུས་ཕུང་གང་དུ་ཡོད་སའི་ མི་དེའི་མྱོང་ཚོར་ཡོངས་རྫོགས་ཇི་བཞིན་དུ་དྲན་པ་བྱུང་ཚེ་མི་དེ་ལུས་ཕུང་གང་ ལས་ལེན་སའི་གང་ཟག་དེའི་རྒྱུན་དུ་འདོད་དགོས་པས། གང་ཟག་དེའི་རིགས་འདྲའི་རྒྱུན་ནམ། ཡང་ན་ངོ་རྟགས་གཅིག་པའི་རྒྱུན་འཛིན་པའི་ཁྱད་ཆོས་གཙོ་བོ་དེ་ལུས་ཕུང་ནང་ཡོད་ དགོས་པར་འགྱུར་ཞིང་། འདི་ལྟ་ན་དེང་རབས་ཀླད་ཁམས་སྨྲ་བའི་འདོད་ཚུལ་དང་འབྲེལ་ནས་བཤད་ན་མྱོང་ཚོར་དང་ དྲན་པའི་རྟེན་གཞི་གཙོ་བོ་ཀླད་པ་ཡིན་ཟེར་བའི་ལྟ་ཚུལ་ལ་བསམ་གཞིགས་བསྐྱར་མ་ བྱེད་པའི་གོ་སྐབས་ཕྱེ་ངེས།
གསུམ་པ།༽ བཤགས་བཅོས་ལས་ལངས་པའི་མི་དེས་སྔོན་གྱི་མགོ་བོ་གང་དུ་ཡོད་སའི་ མི་དེ་དང་ལུས་ཕུང་གང་ནས་ལེན་སའི་མི་དེ་གཉིས་ཀའི་མྱོང་ཚོར་དྲན་པའི་གོ་སྐབས་ བྱུང་ཚེ་ཀླད་ཁམས་ཚན་རིག་དང་ནང་པའི་ལྟ་གྲུབ་གཉིས་ཀར་དྲི་གཞི་གལ་ཆེན་ཞིག་ཏུ་ འགྱུར་རྒྱུ་ཡིན་ཞིང་། ལྷག་དོན་བྱམས་པའི་མྱོང་བ་ཉེར་སྦས་ཀྱིས་མི་དྲན་པ་དང་ཉེར་སྦས་ཀྱི་མྱོང་བ་ བྱམས་པས་དྲན་མི་སྲིད་པའི་ལྟ་ཚུལ་ཤུགས་ཆེ་འདོན་པའི་ནང་པའི་ལྟ་སྟངས་ཀྱི་ངོས་ ནས་བཤད་ན། ཅི་སྟེ་སྟེས་དབང་ལྟ་བུས་སྣང་ཚུལ་འདི་འདྲ་ཞིག་བྱུང་པ་ཡིན་ན་དེ་ནི་ཀླན་ཀ་ཆེ་ བའི་འགྱུར་ལྡོག་ཅིག་གི་རྒྱུ་རྐྱེན་དུ་འགྱུར་སྲིད་པ་ཡིན། ཁོ་བོ་སྒེར་གྱི་དྭོགས་པ་སྐྱེ་སྟངས་ལས་སྣང་ཚུལ་འདི་འདྲ་ཞིག་ངེས་པར་ཡོང་སྲིད་ པའི་གོ་སྐབས་ཡོད་པར་མཐོང་བཞིན་འདུག
བཞི་པ།༽ ཁེ་སམ་གྱིས་བཤད་པ་ལྟར་བཤགས་བཅོས་ལས་ལངས་པའི་མི་དེ་གཅིག་བྱས་ན་ སྔོན་གྱི་མགོ་བོ་གང་ལས་ལེན་སའི་མི་དེ་དང་ལུས་ཕུང་གང་ལས་ལེན་སའི་མི་དེ་གཉིས་ ཀའི་མྱོང་ཚོར་གཏན་བརྗེད་དུ་སོང་ཤིང་གཤིས་སྤྱོད་ཡོངས་རྫོགས་རྣམ་པ་ཀུན་ནས་ཐ་ དད་དུ་སྟོན་པའི་མི་གསར་པ་ཞིག་ཏུ་འགྱུར་སྲིད་པ་ཡིན་ཅིང་། ད་དུང་འདིར་གོ་སྐབས་གཉིས་ཡོང་ཆོག་པ་ཡིན་ཏེ། མི་དེས་སྔོན་གྱི་མི་གཉིས་པོའི་མྱོང་ཚོར་ཡོངས་རྫོགས་མི་དྲན་ཞིང་གཤིས་སྤྱོད་ ཐ་དད་དུ་སྟོན་པའི་སྟེང་། སྐད་ཡིག་སོགས་གང་ཡང་མི་ཤེས་ཤིང་སྤྱོད་ལམ་ཚུལ་བཞིན་བསྟེན་མི་ཐུབ་པའི་བྱིས་པ་ ཆུང་ཆུང་ལྟ་བུ་ཞིག་གི་སྤྱོད་ཚུལ་སྟོན་པའི་སྐབས་སྲིད་པ་དང་། ཡང་། སྐད་ཡིག་སོགས་ཤེས་ཤིང་སྤྱོད་ལམ་སྟོན་ཐུབ་པའི་མི་གསར་པ་ཞིག་ཀྱང་ཡོང་ཆོག་པ་ ཡིན། གལ་ཏེ་སྐད་ཡིག་སོགས་ཤེས་པའི་གནས་སྐབས་བྱུང་ཚེ་དེ་འདྲའི་སྐད་ཡིག་དེ་སྔར་གྱི་ མི་གཉིས་པོས་སྤྱད་པའི་སྐད་ཡིག་ཡིན་པ་ཡོང་ཆོག་ཅིང་། ཡང་ན་ཁོང་གཉིས་དང་འབྲེལ་བ་མེད་པའི་སྐད་ཡིག་ཤེས་པའི་མི་ཞིག་ཏུ་ཡང་འགྱུར་ སྲིད་པ་ཡིན། སྔར་གྱི་མི་གཉིས་ཀྱི་མྱོང་ཚོར་ཡོངས་རྫོགས་མི་དྲན་པར་སྐད་ཡིག་ཤེས་པའི་གནས་ སྐབས་བྱུང་ཚེ་དེའི་རྒྱུ་རྐྱེན་ཅིར་གྱུར་སོགས་དཔྱད་གཞི་ཆེ་ཞིང་། སྣང་ཚུལ་འདི་འདྲ་ཞིག་བྱུང་པ་ཡིན་ན་ཀླད་ཁམས་ཚན་རིག་དང་ནང་པའི་ལྟ་གྲུབ་གཉིས་ ཆར་ནས་ཞིབ་ཚགས་ཀྱི་ལན་འདེབས་དང་ལྟ་ཚུལ་འདོན་དགོས་པའི་གནས་སྐབས་འབྱུང་ངེས།

ཁ་ས་སྤྱི་ལོ་ ༢༠༡༥ ལོའི་སྤྱི་ཟླ་ ༧ ཚེས་ ༥ དགོང་མོ་རིགས་ལམ་སློབ་གཉེར་ཁང་དུ་མཁས་པ་ཚེ་རིང་ཤཱཀྱ་མཆོག་ཕེབས་ཏེ་གཏམ་བཤད་ ཡིད་དབང་འཕྲོག་ནུས་ཤིག་གནང་བའི་སྐབས་ད་ལྟའི་ནང་ཆོས་སློབ་གཉེར་བ་རྣམ་པས་ འཇིག་རྟེན་ཐོག་རང་བྱུང་དང་རང་བྱུང་མིན་པའི་འགྱུར་ལྡོག་གསར་པའི་རིགས་ཐོན་ པའི་གནས་སྐབས་སུ་ནང་པའི་ལྟ་སྟངས་དང་འབྲེལ་ནས་འགྲེལ་བཤད་དང་བསམ་ཚུལ་ངེས་པར་ འདོན་ཐུབ་པ་དགོས་པའི་བཀའ་སློབ་ནན་ཏན་ཕེབས་པ་དེས། དོན་དངོས་སུ་ལག་བསྟར་ཐུབ་མིན་ཇི་ལྟར་ཡང་མི་མགོ་བརྗེ་བའི་གསར་བརྗེའི་འགྱུར་ ལྡོག་ཅིག་ཡོང་སྲིད་པའི་གླེང་གཞི་ཤུགས་ཆེ་ཁྱབ་པའི་སྐབས་འདིར། རང་ཅག་ནང་པའི་ངོས་ནས་ཀྱང་ལྟ་སྟངས་ཀྱི་རིགས་ཤིག་ངེས་པར་འདོན་དགོས་པ་གལ་ཆེར་ བསམས་ཏེ་ཉིན་ཤས་གོང་རྩོམ་ཡིག་ཅིག་འབྲི་འགོ་བཙུགས་པའི་འཕྲོ་མཐུད་རྒྱུར་ དམིགས་བསལ་སྐུལ་མ་ཐེབས་ཤིང་། ཁོ་བོ་སྒེར་གྱི་འཆར་སྣང་ལྟར་ན་ད་ལྟའི་ཚན་རིག་པའི་ཤེས་བྱའི་གཏིང་རིམ་བསྔོགས་ པའི་རྔམས་སེམས་ཆེ་བའི་ཧུར་བརྩོན་དང་ཕྲ་ཞིབ་རྣམ་དཔྱོད་སོགས་ལ་དཔག་ན་མི་མགོ་ བརྗེ་བའི་བཤགས་བཅོས་འདི་དུས་ཚོད་ཀྱི་གནད་དོན་ཙམ་ལས་ཉིན་གཅིག་ཏན་ཏན་དོན་ འཁྱོལ་ཡོང་ཐུབ་རྒྱུར་ཡིད་ཆེས་བྱེད་ཀྱིན་ཡོད་པ་བཅས།
བོད་རྒྱལ་ལོ་ ༢༡༤༢ བོད་ཟླ་ ༥ ཚེས་ ༢༠། སྤྱི་ལོ་ ༢༠༡༥ སྤྱི་ཟླ་ ༧ ཚེས་ ༦ ཉིན་སྟེ། མངོན་མཐོ་ངེས་ལེགས་ཀྱི་དཔལ་ཡོན་མཆིས་སོ་ཅོག་གི་རྩ་བའི་རྟེན་གཞི་དགེ་ཚུལ་ སློང་གི་བསླབ་པ་འབོག་ཆོག་ནས་བརྩམས་ཏེ་རྒྱུད་རྒྱལ་གསང་བ་འདུས་པའི་ཟུང་འཇུག་ གི་ཟབ་གནས་བར་གྱི་ཐུབ་པའི་གསུང་གི་གསང་བ་ཟབ་མོའི་དེ་ཉིད་ཕྱིན་ཅི་མ་ལོག་པར་ འདོམས་པའི་བདག་གི་མཁན་ཆེན་རྡོ་རྗེ་འཆང་༸གོང་ས་སྐྱབས་མགོན་ཆེན་པོའི་འཁྲུངས་ ཚེས་ཀྱི་དུས་སྟོན་དགེ་བའི་ཉིན། འཇིགས་མེད་བློ་གྲོས་སུ་འབོད་པས་བཞུགས་སྒར་རིགས་ལམ་སློབ་གཉེར་ཁང་ནས་བྲིས་པ་༧རྒྱལ་བ་དགྱེས་པའི་རྒྱུར་གྱུར་ཅིག །
རྩོམ་པ་པོ་འཇིགས་མེད་བློ་གྲོས། རིགས་སློབ།
ཁ་བརྡ་དྲ་བ་ལས་དྲངས།