གཤེན་གྱི་འབྱུང་ལྡན་ཟླ་ཐིག་རྩེ་མོའི་བོད་རྒྱལ་ལོ་ ༣༡༥༤ བོད་མེ་བྱ་ལོའི་ཧོར་ཟླ་དང་པོའི་ཚེས་བདུན་ཉིན་སྟེ། ཕྱི་ལོ་ ༢༠༡༧ ཟླ་ ༠༣ ཚེས་ ༠༥ རེས་གཟའ་ཉི་མའི་ཉིན་གྱི་ཞོགས་པའི་ཆུ་ཚོད་བརྒྱད་དང་ཕྱེད་ཀའི་ཐོག་ནས་༧ཞྭ་དཀར་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་གཤེན་གྱི་གར་འཆམ་ཆེན་མོའི་མཛད་སྒོ་དབུ་འཛུགས་གནང་།
དེ་ཡང་གཡུང་དྲུང་བོན་ལུགས་ཀྱི་གསང་སྔགས་ཀྱི་གཞུང་བཤད་དང་མཐུན་པར་རྒྱལ་བ་གཤེན་གྱི་གར་འཆམ་གྱི་ངོ་བོ་ནི། དམིགས་པའི་གནད་ལ་བདག་ཉིད་ཡི་དམ་གྱི་ལྷ་དང་བོན་སྐྱོང་སོགས་ཀྱི་ང་རྒྱལ་དང་མ་བྲལ་ཞིང་གསལ་སྣང་གི་རེག་པའི་ཚད་དུ་སླེབས་པ་དག་པ་དྲན་པའི་སྟོབས་ཀྱིས་ཐ་མལ་གྱི་སྣང་བ་གཞིལ་བ། རྫོགས་རིམ་གྱི་དབང་དུ་བྱས་ན། རྩ་རླུང་ཐིག་གསུམ་ལ་རང་དབང་འབྱོར་ཞིང་ཟུང་འཇུག་གྱི་ཕྱག་རྒྱ་མངོན་དུ་བརྙེས་ པ། རྣམ་པའི་གནད་ལ་གང་གི་ངོ་བོར་བཞེངས་པའི་ཡི་དམ་དང་བོན་སྐྱོང་གི་ཆ་ལུགས་དང་ཡ་མ་བྲལ་བ་སྟེ། ཕྱི་ནང་གསང་བའི་བདུད་ཚོགས་རྣམས་ཟིལ་གྱིས་གནོན་པ་དང༌། ཁྱད་པར་དུ་རྟོགས་པས་བདག་བསྒྲལ་བ་དང་གྲུབ་པས་གཞན་བསྒྲལ་བའི་ལས་ལ་ཞུགས་པའི་ཞི་དྲག་ཅི་རིགས་ཀྱི་བསྡུས་པའི་ལུས་ཀྱི་སྟངས་སྟབས་ཞིག་ལ་འདོད་ཀྱི་ཡོད་པ་སོགས་ཀྱི་འགྲེལ་བཤད་ཁ་གསལ་གཤམ་དུ་གསལ།
གཤེན་འཆམ་གྱི་མཛད་རིམ་རྣམ་གྲངས།
༡༽སྲིད་རྒྱལ་དུས་དྲུག
༢༽རྣམ་བརྒྱད།
༣༽ཤ་འཆམ།
༤༽ཉུང་ཇ།
༥༽ཀེང་འཆམ།
༦༽ མ་རྒྱུད།
༧༽ གུང་ཚིགས་བཞེས་ལག
༨༽ གཤེན་རབ་དགུ་འཆམ།
༩༽ རྒྱལ་པོ་ཤེལ་ཁྲབ་ཅན།
༡༠༽ རྒྱ་ནག་ཧ་ཤང་།
༡༡༽ ཨ་ཙ་ར།
༡༢༽ མངར་ཇ།
༡༣༽ གཟེ་གྱད་སྤར་གསུམ།
༡༤༽ གཡག་འཆམ།
༡༥༽ སེང་འཆམ།
༡༦༽ སྟག་འཆམ།
༡༧༽ཁྱུང་རྩེད།
༡༨༽ ཞང་ཞུང་གི་ཤོན་རྩེད་བཅས་སོ།།
རྒྱལ་བ་གཤེན་གྱི་གར་འཆམ་ཞེས་པའི་ངོ་སྤྲོད་གནད་བསྡུས།
གསང་སྔགས་ཀྱི་གཞུང་བཤད་དང་མཐུན་པར་རྒྱལ་བ་གཤེན་གྱི་གར་འཆམ་གྱི་ངོ་བོ་ནི། དམིགས་པའི་གནད་ལ་བདག་ཉིད་ཡི་དམ་གྱི་ལྷ་དང་བོན་སྐྱོང་སོགས་ཀྱི་ང་རྒྱལ་དང་མ་ བྲལ་ཞིང་གསལ་སྣང་གི་རེག་པའི་ཚད་དུ་སླེབས་པ་དག་པ་དྲན་པའི་སྟོབས་ཀྱིས་ཐ་མལ་གྱི་སྣང་བ་གཞིལ་བ། རྫོགས་རིམ་གྱི་དབང་དུ་བྱས་ན། རྩ་རླུང་ཐིག་གསུམ་ལ་རང་དབང་འབྱོར་ཞིང་ཟུང་འཇུག་གྱི་ཕྱག་རྒྱ་མངོན་དུ་བརྙེས་པ།
རྣམ་པའི་གནད་ལ་གང་གི་ངོ་བོར་བཞེངས་པའི་ཡི་དམ་དང་བོན་སྐྱོང་གི་ཆ་ལུགས་དང་ཡ་ མ་བྲལ་བ་སྟེ། ཕྱི་ནང་གསང་བའི་བདུད་ཚོགས་རྣམས་ཟིལ་གྱིས་གནོན་པ་དང༌། ཁྱད་པར་དུ་རྟོགས་པས་བདག་བསྒྲལ་བ་དང་གྲུབ་པས་གཞན་བསྒྲལ་བའི་ལས་ལ་ཞུགས་པའི་ ཞི་དྲག་ཅི་རིགས་ཀྱི་བསྡུས་པའི་ལུས་ཀྱི་སྟངས་སྟབས་ཞིག་ལ་འདོད་དེ། རྩ་རྒྱུད་གསང་བ་བསེན་ཐུབ་ལས། རང་བཞིན་ཆ་ལུགས་ལྔ་རུ་བཞུགས་ནས་ནི། ཕྱག་རྒྱ་སྐུ་རྣམས་ཡེ་ཤེས་ལྷ་རུ་སྒོམ། བདག་ཉིད་ཡི་དམ་ལྷ་ཡི་ང་རྒྱལ་ལས། ཕུང་པོ་རྩ་དང་ཡན་ལག་བཅའ་བ་རྣམས། སྒྱུ་འཕྲུལ་བྱེ་བ་ས་ཡ་ལུས་ལ་བཀོད།
རྟགས་གསུམ་ཚང་ནས་དམིགས་པ་དབྱིངས་སུ་བསྟིམ། སེམས་བསྐྱེད་ཡིད་བཟུང་ལྷ་ཡི་ཏིང་འཛིན་ནི། ཆས་བཞག་རྟེན་གནས་ལྷའི་གཞི་མ་སྟེ། གནས་པ་མཚོན་ཕྱིར་དམིགས་པའི་ཕོ་བྲང་བཀོད། ཡིག་འབྲུ་བསྐྱེད་པ་ལྷའི་ས་བོན་ཏེ། ཡིག་འབྲུ་བརྒྱ་རྩ་སྐར་ཆེན་བཞིན་དུ་བཀྲམས། ཏིང་འཛིན་རྣམས་ནི་ལྷ་ཡི་ཞགས་པ་སྟེ། དམིགས་པ་མི་གཏོང་སོ་སོའི་གནས་སུ་བཟུང༌། སྙིང་པོ་རྣམས་ནི་ལྷ་ཡི་ཕེའུ་སྟེ། དབྱིངས་ནས་འགུགས་ཤིང་མཁའ་ལ་གསལ་ཀྱང་བཏབ། ཅེས་གསུངས་པ་ལྟར་རོ། ཡང་འགའ་ཞིག་ནས། གཞུང་བཤད་དང་མཐུན་པར་གར་ནི་ལག་པས་བསྒྱུར་བ་དང༌། བྲོ་ནི་རྐང་པས་བརྡུང་བ། ཞེས་ཀྱང་གསུངས། འཆམ་ཞེས་པ་ཡང༌། བོད་རྒྱ་ཚིག་མཛོད་ལས། དཔེར་ན་ཁ་འཆམ་པ་དང༌། གྲོས་འཆམ་པ་སྟེ། ཁ་མཐུན་པའམ་མཚུངས་པར་བསྒྱུར་བ་ལ་གོ་བས། ཞབས་ཕྱག་གི་སྟབས་རྣམས་མཚུངས་པར་བསྒྱུར་བ་ལ་འཆམ་ཞེས་གསུངས་པ་ཡང་ཕྱི་ལྟར་དེ་ ལྟར་ཡིན་དུ་ཆོག་ཀྱང༌།
ནང་ལྟར་ན་བསྐྱེད་རྫོགས་ཟུང་འཇུག་དང་ཡ་མ་བྲལ་བར་ཞབས་ཕྱག་གི་སྟངས་སྟབས་ མཚུངས་པར་བསྒྱུར་བ་ལ་གོ་དགོས་སམ་སྙམ་མོ། དགོན་སྡེ་སོ་སོར་འཆམ་སྣ་མི་འདྲ་བ་དང་འཆམ་གྱི་སྲོལ་འབྱེད་མི་འདྲ་བས་གསར་ གཏོད་ལས་གྲུབ་པའི་འཆམ་སྲོལ་མི་འདྲ་བ་བརྗོད་ཀྱི་མི་ལང་བ་ཞིག་ཡོད་མོད་ཀྱང༌། བོན་གྱི་གདན་ས་ཆེན་པོ་དཔལ་གཤེན་བསྟན་སྨན་རིའི་གླིང་འདིར། འཆམ་ཆེན་གྱི་གཙོ་བོ། ཡེ་ཤེས་ཀྱི་དབལ་མོ་དང༌། དུས་དྲུག་སྤྲུལ་པའི་དབལ་མོ་དྲུག གསས་མཁར་མ་རྒྱུད་ཀྱི་གར་འཆམ། དབལ་ཕུར་ནག་པོའི་བསྒྲལ་བསྟབ། གཤེན་རབ་དགུ་འཆམ། གཟེ་གྱད་སྤར་མའི་གར་འཆམ་བཅས་འཆམ་སྲོལ་ཡོད་པའོ། །
པར་པ། གྱེར་ནག་ཚང་།
