གཡུང་དྲུང་བསྟན་པ་རྒྱས་པའི་ས་གནས། མདོ་སྔགས་ཉི་མ་ཤར་བའི་གླིང་ཆེན། རིག་གནས་ཆུ་བོ་འདུས་པའི་རྫིང་བུ། ལེགས་བཤད་ལུང་རིག་སྒྲོགས་པའི་སྐྱེད་ཚལ། མང་ཐོས་མཁས་མང་འདུས་པའི་སྡེ་གནས། གྲུབ་པའི་སར་བཞུགས་རྣམས་ཀྱི་མཁའ་སྤྱོད། གཡུང་དྲུང་བོན་གྱི་གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་སྔར་གྱི་ཕྱག་རྒྱུན་དང་བོན་གྱི་གྲྭ་ས་གོང་མ་སངས་རྒྱས་རྒྱལ་བ་སྨན་རི་བའི་ལུགས་ལྟར། གཤེན་གྱི་འབྱུང་ལྡན་སུམ་བརྒྱ་དང་གཅིག བོད་མེ་བྱ་ལོའི་ཧོར་ཟླ་དང་པོའི་ཚེས་བཅུ་བཞི་དང་བཅོ་ལྔ་སྟེ་ཉིན་གཉིས་(༢༠༡༧།༣།༡༡ནས་༡༢)ཀྱི་རིང་། བདག་ཅག་གི་༧སྟོན་པ་རྣམ་འདྲེན་བརྒྱད་པ་རྒྱལ་བ་གཤེན་རབ་མི་བོ་ཀུན་ལས་རྣམ་པར་རྒྱལ་བ་མཆོག་གི་སྐུ་ཡི་མཚན་དཔེ་མི་མཇེད་པའི་འཇིག་རྟེན་གྱི་ཞིང་ཁམས་འདིར་བཞད་ནས་མི་ལོ་(༡༨༠༣༤)ཧྲིལ་པོར་འཁོར་བའི་དུས་ཆེན་སྲུང་བརྩི་ཞུས་པ།
དེ་ཡང་ཉིན་དང་པོར་ཞོགས་པའི་ཆུ་ཚོད་ལྔ་པ་ཙམ་ནས་སྨན་རིའི་གྲྭ་ཚང་གི་རྣམ་དག་འདུལ་བའི་གཙུག་ལག་ཁང་ཆེན་དུ་གཤེན་གྱི་དགེ་སྤྱོད་ཀྱི་ཆོ་གའི་ཞལ་ཕྱེས་ནས་དབུ་འཛུགས་གནང་ཡོད་པ་དང་།
ཧོར་ཟླ་དང་པོའི་ཚེས་བཅོ་ལྔ་ཉིན་མཛད་མདོ་རྒྱས་པ་<<དྲི་མ་མེད་པ་གཟི་བརྗིད་རབ་ཏུ་འབར་བའི་མདོ་ལས་>>ལས། ‘‘དེ་ནས་དཔྱིད་ཟླ་ར་བའི་ཚེས་བཅོ་ལྔ་ལ་སྟོན་པ་སྐུ་འཁྲུངས་ཏེ།’’།ཞེས་དང་། དེ་བཞིན་<<མདོ་གཟེར་མིག་>>ལས། ‘‘ལོའི་འགོ་བོ་བྱི་བ་ལ་དགོངས་ནས་གཤེགས་པ་ནི། འཇིག་རྟེན་གྱི་ཁམས་སུ་མཛད་པ་བཅུ་གཉིས་ཀྱི་དོན་མཐར་ཕྱིན་པས། ནན་ཏན་གྱིས་སེམས་ཅན་འདུལ་ཞིང༌། ཞིབ་ཏིག་གིས་བསྟན་པ་སྤེལ་བ་ལགས་སོ། །ཟླ་བའི་མགོ་བོ་དཔྱིད་ཟླ་ར་བ་ལ་དགོངས་ནས་གཤེགས་པ་ནི། ཟླ་བ་བཅུ་གཉིས་ཀྱི་འགོ་དཔྱིད་ཟླ་ར་བ་ལ་དགོངས་ནས་བྱོན་པ་ལགས་སོ། །ཞག་གི་སྙིང་པོ་ཚེས་བཅོ་ལྔ་ལ་གཤེགས་པ་ནི། སྔོན་གྱི་སྟོན་པ་རྣམས་གཤེགས་པའི་དུས་ཁྱད་པར་ཅན་གྱི་རྗེས་དང༌། ཟླ་གསང་ཐིག་ལེའི་དངོས་གྲུབ་ནོད་པས་གཤེགས་པའོ། །སྐར་མའི་དམ་པ་རྒྱལ་གྱི་རུ་གོང་དུ་གཤེགས་པ་ནི། བདུད་ལྔ་དབང་དུ་བསྡུས་ཏེ་རྒྱལ་བ་དང༌། འཇིག་རྟེན་ཟིལ་གྱིས་གནོན་ཏེ་རྒྱལ་བའི་ཕྱིར་རོ། །དུས་ཚོད་ཀྱི་དང་པོ་ནམ་ལངས་པ་ལ་དགོངས་ནས་གཤེགས་པ་ནི། ནམ་ལངས་པའི་རྟིང་ལ་ཉི་ཤར་འོང་བ་དང་འདྲ་སྟེ། བདག་གཤེགས་པའི་རྟིང་ལ། སྐུ་ལས་སྤྲུལ་སྐུ་འབུམ་ཕྲག་མང་པོ་ཕྱུང་ནས། འགྲོ་བ་སེམས་ཅན་གྱི་དོན་བྱེད་པའི་ཕྱིར་རོ།’’།ཞེས་གསུངས་པ་ལྟར།
བདག་ཅག་གི་སྟོན་པ་ཐུགས་རྗེ་ཅན་སྐུ་འཁྲུངས་པའི་དུས་ཆེན་ཁྱད་པར་ཅན་གྱི་ཞོགས་པར་གདན་ས་ཆེན་མོ་སྨན་རིའི་གླིང་དུ་རྣམ་དག་འདུལ་བའི་གསོ་སྦྱོང་འཚོགས་གནང་ཞིང་། དེ་ནས་གཤེན་གྱི་དགེ་སྤྱོད་རྣམ་པར་དག་པའི་མདོ་ཆོག་གསུངས།
ཆུ་ཚོད་བཅུ་པ་ཙམ་ནས་ཕྱག་སྲོལ་ལྟར་སྨན་རིའི་གླིང་གི་སྐབས་བཅུ་དགུ་པའི་བཀའ་རམས་པ་རྣམས་ནས་༧སྨན་རིའི་བླ་བྲང་དང་སྨན་རིའི་དཔོན་སློབ་རིན་པོ་ཆེ་བཅས་ལ་རྟེན་འབྲེལ་གྱི་གསོལ་ཇ་འདེགས་འབུལ་ཞུས་ནས་དྲན་རྟེན་སྐུ་པར་སོགས་བསྒྲོན་གནང་། ཕྱི་དྲོར་ཆུ་ཚོད་བཞི་པ་ཙམ་ནས་བླ་སྤྲུལ་དགེ་འདུན་རྣམས་དང་བོན་གཞིས་ཐོབ་རྒྱལ་གསར་པའི་མང་ཚོགས་དང་སློབ་ཕྲུག་ཡོངས་ནས་ཕྱི་སྐོར་ལ་ཕེབས་གནང་།
དགོང་དྲོར་༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་དང་བཤད་སྒྲུབ་སློབ་དཔོན་རིན་པོ་ཆེ་བཅས་བོན་གཞིས་སེར་སྐྱ་མང་ཚོགས་ཡོངས་ནས་སྟོན་པའི་སྐུ་བརྙན་མཐོང་བ་རང་གྲོལ་ལ་མཆོད་མཇལ་དང་མར་མེའི་གླིང་སྐོར་སོགས་ཞུས་ནས་མཐར་གཡུང་དྲུང་བསྟན་པ་རྒྱས་པའི་སྨོན་ལམ་གསུངས་ནས་དུས་ཆེན་མཇུག་གྲུབ་པར་མཛད་ཡོད་པ་བཅས་སོ།།
པར་པ། ངག་དབང་ཤེས་རབ་དང་གྱེར་ནག་ཚང་།
