དེ་རིང་སྟེ་བོད་ས་ཕག་ལོའི་བོད་ཟླ་༡༠ཚེས་༣༠དང་ཕྱི་༢༠༡༩ལོའི་ཟླ་༡༢ཚེས་༢༦ཉིན་བོད་གངས་ཅན་པའི་ཤེས་རིག་གི་དེད་དཔོན་༧རྒྱལ་བ་གཤེན་རབ་མི་བོ་ཆེ་སྐུ་མི་རྟག་མྱ་ངན་འདས་ཚུལ་བསྟན་ནས་མི་ལོ་༩༨༣༦འཁོར་བའི་དུས་ཆེན་ཁྱད་པར་ཅན་ལ། འདི་ག་༧དཔལ་གཤེན་བསྟན་སྨན་གླིང་དུ་ཞོགས་པ་ཆུ་ཚོད་ལྔ་པ་བཟུང་༧སྐྱབས་རྗེ་མཁན་སློབ་རྣམ་གཉིས་དབུས་འདུས་མང་ཡོངས་ནས་སྔར་སྲོལ་བཞིན་དཔལ་གཤེན་བསྟན་སྨན་རིའི་ལུགས་ཀྱི་འདུལ་བའི་གསོ་སྦྱོང་གི་ཆོག་གཞུང་གྲུབ་རྗེས། དུས་ཆེན་ཁྱད་པར་ཅན་རྗེས་དྲན་སླད་དགེ་སྤྱོད་རྣམ་པར་དག་པའི་གཞུང་བསྲངས་ནས་དུས་ཆེན་བསྲུང་བརྩི་ཞུས་ཡོད་པ་དང་།
སྔ་དྲོའི་ཆུ་ཚོད་༡༠བའི་སྟེང་དེ་རིང་གི་དུས་ཁྱད་པར་ཅན་དང་སྟབས་བསྟུན་གྱིས་གསོ་རིག་འབུམ་བཞིའི་འཛིན་གྲྭ་ཁག་གི་སྦྱོང་ཚན་སློབ་དེབ་ལྔ་དབུ་འབྱེད་མཛད་སྒོའི་འཚོགས་ཡོད་པ་དང་། དེ་ཡང་ཚོགས་མགོན་དུ་འཛམ་གླིང་བོན་འབངས་ཡོངས་ཀྱི་དེད་དཔོན་ཆེན་མོ་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་སོ་བཞི་པ་ཆེན་མོ་ལུང་རྟོགས་ཟླ་བ་དར་རྒྱས་རིན་པོ་ཆེ་དང་། གཞུང་ལུགས་རྒྱ་མཚོའི་བདག་ཉིད་ཆེན་མོ་༧སྐྱབས་རྗེ་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ་རྣམ་གཉིས་གདན་ཞུས་ཀྱིས་འདི་གའི་མཐོ་སློབ་ཀྱི་དགེ་སློབ་ཚང་འཛོམས་ཐོག་མཛད་སྒོ་དབུ་འཛུགས་གནང་ཡོད་པ་དང་།
དེ་ཡང་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་ནས་སྣང་གསལ་སྒྲོན་མེ་ཞལ་ཕྱེས་ཀྱིས་གསོལ་ཇ་དང་འབྲས་སིལ་འདེགས་འབུལ་དང་སྦྲགས།
སྨན་སློབ་དགེ་བཤེས་བྱ་འཕུར་ཚེ་དབང་རིག་འཛིན་མཆོག་ནས་མདོ་འཛིན་འོག་གསོ་རིག་འབུམ་བཞིའི་མཐོ་སློབ་སྨན་རིའི་གླིང་གི་དབུ་འཛིན་དགེ་བཤེས་གཡུང་དྲུང་བཀྲ་ཤིས་མཆོག་ནས། དཔེ་སྐྲུན་དང་འབྲེལ་བའི་དཔེ་བསྡུར་གྱི་གོ་རིམ། ལེའུ་གོ་རིམ་འཛོལ་བ་སོགས་བབ་སྒྲིག་གིས་མཆན་དང་བཅས་བཀོད་པ་སོགས་སློབ་ཕྲུག་དག་གིས་གཟིགས་བདེ་གང་ཐུབ་གནང་ཡོད་སྐོར་གསུང་བཤད་གནང་ཡོད་པ་རེད།
དེ་ཡང་འབུམ་བཞིའི་མཐོ་སློབ་ཀྱི་འཛིན་རིམ་དང་པོའི་སྦྱོང་ཚན་དུ་གསོ་བྱེད་ཐུགས་འབུམ་མཁའ་སྔོན་དང་། སྡུག་བསྔལ་ཞི་བྱེད་གསོ་བྱེད་དཔྱད་འབུམ་ཁྲ་བོའི་ལེའུ་དང་པོ་ནས་ལེའུ་བཅུ་གཉིས་བར་དང་།
འཛིན་རིམ་གཉིས་པར་གསོ་བྱེད་དཔྱད་འབུམ་ཁྲ་བོའི་ལེའུ་བཅུ་གསུམ་ནས་ལེའུ་སོ་གཅིག་བར་དང་ནད་འབུམ་ནག་པོ་ལེའུ་དང་པོ་ནས་ལེའུ་བཅུ་གཅིག་བར།
འཛིན་རིམ་གསུམ་པར་ནད་འབུམ་ནག་པོའི་ལེའུ་བཅུ་གཉིས་པ་ནས་ལེའུ་དོན་དྲུག་བར།
འཛིན་རིམ་བཞི་པར་ནད་འབུམ་ནག་པོ་ལེའུ་དོན་བདུན་ནས་ལེའུ་གོ་བཞི་བར་ཆ་ཚང་དང་སྡུག་བསྔལ་གསོ་བྱེད་སྨན་འབུམ་དཀར་པོ་ལེའུ་དང་པོ་ནས་ལེའུ་བཅུ་གསུམ་བར།
འཛིན་རིམ་ལྔ་པར་སྡུག་བསྔལ་གསོ་བྱེད་སྨན་འབུམ་དཀར་པོའི་ལེའུ་བཅུ་བཞི་པ་ནས་ལེའུ་སོ་གཉིས་བར་ཆ་ཚང་བཅས་ལོ་ལྔའི་སྦྱོང་ཚན་དུ་ཚན་བསྒོས་བྱས་ཡོད་པ་རེད།དཔེ་སྐྲུན་དང་འབྲེལ་བའི་གསུང་གླེང་གྲུབ་རྗེས།
༧སྐྱབས་རྗེ་མཁན་སློབ་རྣམ་གཉིས་ནས་དཔེ་དེབ་དབུ་འབྱེད་དང་འབྲེལ་དེབ་སྐྱེལ་ཚད་ལྡན་ཡོད་པའི་འབུམ་བཞི་མཐོ་སློབ་འདི་ཉིད་ཀྱི་གལ་ཆེན་རང་བཞིན་དང་། སློབ་ཕྲུག་དག་གིས་སྐབས་བབ་ཀྱི་སྦྱང་བྱ་དག་ལ་འབད་བརྩོན་གྱིས་མ་འོངས་པར་སྤྱི་ཚོགས་གང་དུ་སོང་ཡང་། སྦྱངས་ཟིན་པ་དག་ལག་ལེན་དངོས་བསྟར་གྱི་འཇོན་ནུས་ཅན་གྱི་མི་བུ་ཞིག་བྱེད་དགོས་སྐོར་གྱི་གསུང་བཤད་གནང་ནས་མཛད་སྒོ་མཇུག་ལེགས་པར་གྲུབ་ཡོད་རེད།
༄༅། །སྐྱབས་མགོན་ཟླ་བ་རྒྱལ་མཚན་གྱི་རྣམ་པར་ཐར་པ་ཁག་གཉིས་དང་གསོལ་འདེབས་ཀྱི་འགྲེལ་བ་བཅས།
