དེ་རིང་སྟེ་ཕྱི་ལོ་༢༠༢༢ལོའི་ཕྱི་ཟླ་༢པའི་ཚེས་༨ཉིན་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་དང་བཙུན་དགོན་རདྞ་སྨན་གླིང་བཅས་འདུས་མང་ཡོངས་ནས། ཡང་དག་པར་རྫོགས་པའི་སངས་རྒྱས་རྒྱལ་བ་གཤེན་རབ་མི་བོའི་གདུང་རྒྱུད་དྲི་མ་མེད་པ་གང་དགོངས་པ་བོན་དབྱིངས་སུ་གཤེགས་པར། ༧སྐྱབས་རྗེ་མཁན་སློབ་རྣམ་གཉིས་ཀྱིས་རྒྱལ་གཤེན་བསྟན་པའི་རྩ་ལག་ཉམས་དམས་སུ་མ་སོང་བར་རླབས་ཆེན་གྱི་འཕྲིན་ལས་བསྐྱངས་པའི་མཛད་པ་མཐའ་དག་རྗེས་སུ་དྲན་པའི་སྒོ་ནས་འདུས་མང་ཡོངས་ནས་དམུ་རིགས་གཤེན་ཆེན་རིམ་བྱོན་གྱི་ཐུགས་དམ་མ་རྒྱུད་གསང་མཆོག་མཐར་ཐུག་གི་དཀྱིལ་འཁོར་གྱི་ཞལ་ཕྱེས་ནས་ཚོགས་མཆོད་རྒྱས་འབུལ་ཞུ་དགོས་པའི་བཀའ་གསུང་ཕེབས་པ་གཞིར་བཟུང་། འདུས་མང་ཡོངས་ནས་ཞོགས་པའི་ཆུ་ཚོད་༥།༤༠བཟུང་མ་རྒྱུད་ཚོགས་མཆོད་རྒྱས་འབུལ་ཞུ་བཞིན་པ་བཅས།
ཡང་དག་པར་རྫོགས་པའི་སངས་རྒྱས་རྣམ་འདྲེན་བརྒྱད་པ་རྒྱལ་བ་གཤེན་རབ་མི་བོའི་གདུང་རྒྱུད་དྲི་མ་མེད་པ་གངས་ཅན་བསྟན་པའི་གཙུག་ནོར་དམུ་རྒྱལ་གཤེན་སྲས་ནོར་བུ་དབང་རྒྱལ་རིན་པོ་ཆེ་མཆོག་རང་ཅག་གདུལ་བྱ་ཐུན་མོང་གི་སྣང་ངོར་རྟག་འཛིན་སུན་དབྱུང་ཕྱིར་སྐུ་མི་རྟག་མྱ་ངན་ལས་འདས་པའི་ཚུལ་བསྟན་པ་ནི། སྐྱེ་དགུ་སྤྱི་དང་། བྱེ་བྲག་ཁ་བ་གངས་ཅན་པ།ཡང་སྒོས་རང་རེ་ཞྭ་དཀར་གཡུང་དྲུང་བོན་གྱི་བསྟན་པའི་ཀ་ཆེན་ཞིག་འགྱེལ་བ་ཡིན་སྟབས་ཆེས་བློ་ཕམ་དང་ཡིད་འགྱོད་ཀྱི་གནས་སུ་གྱུར་མོད།
དེ་ལྟར་ནའང་འགྲོ་བའི་སྤྱི་མཐུན་གྱི་ལས་དབང་དང་བསོད་ནམས་ཀྱི་འཕེལ་འགྲིབ་ལ་བརྟེན་ནས་བསྟན་པ་དར་ནུབ་དང་བསྟན་འཛིན་སྐྱེས་བུ་རྣམས་ཀྱི་སྐུ་ཚེ་རིང་ཐུང་ཅི་རིགས་འབྱུང་བ་ནི་དངོས་གཤིས་ཡིན་པས་བྱ་ཐབས་བྲལ། ད་ནི་ངེད་ཅག་རྗེས་འབྲངས་པ་ཡོངས་ཀྱིས་དམུ་གཤེན་རིན་པོ་ཆེ་ཞིང་གཤེགས་དམ་པ་དེ་ཉིད་ཀྱིས་བསྟན་འགྲོར་བསྐྱངས་པའི་རླབས་ཆེན་གྱི་ཕྱག་རྗེས་ལ་བཀའ་དྲིན་རྗེས་སུ་དྲན་པའི་སྒོ་ནས་མཛད་འཕྲིན་གྱི་འཕྲོ་བསྐྱང་ཤིང་། བསྟན་པ་སྤྱི་སྒོས་ཀྱི་དོན་དུ་ལེགས་ཉེས་བླངས་དོར་གྱི་ལམ་སྟོན་བཀའ་སློབ་གནང་བ་ཁག་ལས་འགལ་མེད་ལག་ལེན་བསྟར་རྒྱུ་ལས་ལྷག་པ་གང་ཡང་མ་མཆིས་པ་ཀུན་གྱི་མཁྱེན་གསལ་ལགས། འདིར་དམིགས་སུ་བཀར་ནས་ཞུ་རྒྱུ་ལ། བསྟན་པའི་གསལ་བྱེད་དམ་པ་དམུ་རིགས་གཤེན་གྱི་གདུང་སྲས་རིན་པོ་ཆེ་རྣམ་གཉིས་དབུས་པའི་གདན་ས་གཤེན་ཚང་གི་དབུ་ལས་འདུས་མང་ཡོངས་དང༌།
གསང་ཡུམ་མཆོག་གཙོ་བོར་གྱུར་པའི་ལྟོས་བཅས་ཀུན་ལ་འདི་ག་སྨན་རིའི་གྲྭ་ཚང་གི་དབུ་ལས་འདུས་མང་ཡོངས་ཀྱིས་གདུང་སེམས་མཉམ་བསྐྱེད་ཀྱི༌ཐུགས་གསོ་ཞུ་བཞིན་ཡོད། གཞན་ཡང་ཞྭ་དཀར་བསྟན་པའི་གཙུག་རྒྱན་༧ སྐྱབས་རྗེ་རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་དང་། སྐྱབས་རྗེ་སྨན་རིའི་དཔོན་སློབ་རིན་པོ་ཆེ་རྣམ་གཉིས་ཀྱི་ལམ་སྟོན་ལྟར་འདི་གའི་གྲྭ་ཚང་གི་ངོས་ནས་ཀྱང་དེ་རིང་བོད་ཚེས་༨ཉིན་དམུ་རིགས་གཤེན་སྟོན་རིམ་བྱོན་གྱི་ཐུགས་དམ་མ་རྒྱུད་གསུང་མཆོག་མཐར་ཐུག་གི་དཀྱིལ་འཁོར་ཞལ་ཕྱེ་ནས་ཚོགས་མཆོད་རྒྱས་པར་འབུལ་བཞིན་ཡོད་པའི་མཚོན་མུ་མཐུད་དགོངས་རྫོགས་མཆོད་འབུལ་གང་ལྕོག་ཞུ་རྒྱུ་ལགས་ཤིང། དེ་བཞིན་བོན་འབངས་ཀུན་གྱིས་དགེ་སྒྲུབ་སྡིག་སྤོང་གི་ལས་ལ་འབད་འབུངས་ཡོང་བའི་འབོད་སྐུལ་དང་བཅས།
༧དཔལ་གཤེན་བསྟན་སྨན་རིའི་འདུས་སྤྱི་ནས། སྤྱི་ལོ་༢༠༢༢ལོའི་ཟླ་༢ཚེས་༨ཉིན།
