དེ་རིང་སྟེ་ཕྱི་ཚེས་༤ཉིན་སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་བལ་ཡུལ་གློ་དོལ་སོགས་ཀྱི་མཛད་འཕྲིན་གྲུབ་ནས་རང་དགོན་དུ་ཞབས་སོར་འཁོད་ཡོད་པ་རེད།
དེ་ཡང་༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་གློ་དོལ་ཕྱོགས་ཀྱི་བླ་དགེ་སྔགས་གསུམ་དང་ཆོས་ལུགས་རིས་སུ་མ་ཆད་པའི་སྐྱེས་ཆེན་མང་པོས་ཞུ་སྐུལ་ལན་མང་བྱས་ངོར། ཕྱི་ཟླ་༧པའི་ཚེས་༣༠ཉིན་རང་དགོན་ནས་ཆིབས་ཐོན་གྱིས་གློ་དོལ་ཕྱོགས་སུ་བོན་གྱི་མཛད་འཕྲིན་བསྐྱངས་པ་དང་། བོན་དགོན་ཁག་དང་བོན་གྱི་གནས་རི་རྩ་ཆེན་རྣམས་སུ་གནས་སྐོར་སོགས་ཟླ་གཉིས་ལྷག་རིང་བསྐྱངས་ནས། དེ་རིང་སྟེ་ཕྱི་ཚེས་བཞི་ཉིན་རང་དགོན་དུ་ཆིབས་ཞལ་བསྒྱུར་ཡོད་པ་དང་། བོན་གཞིས་མང་ཚོགས་དང་བོན་བུ་ཁྱིམ་ཁང་གི་སློབ་ཕྲུག་དག་གིས་ཐོབ་རྒྱལ་ལ་མགོར་ཕེབས་བསུའི་བསྟར་ཕྲེང་བསྒྲིགས་ཤིང་།
སྨན་རིའི་བཤད་སྒྲུབ་མཁན་པོ་དགེ་བཤེས་ཉི་མ་དོན་འགྲུབ་གཙོས་འདུས་མང་ཡོངས་དང་། བཙུན་མ། བོན་ཕྲུག་བདེ་དོན། བཤད་སྡེའི་གཞི་རིམ་མཛིན་གྲྭ་བཅས་ནས་དགོན་པའི་མདུན་སྒོར་སེར་ཕྲེང་རོལ་མོའི་མཆོད་པ་རྒྱ་ཆེན་དང་། གཤེན་རབ་མཆོད་ལྔའི་རོལ་མོའི་དབྱངས་ཀྱིས་བསུས་ནས་ཚོགས་ཁང་དུ་གདན་ཞུས་ཁྲི་གསོལ་གྲུབ་མཚམས།
བླ་མ་མཆོད་ཐབས་དང་མ་འདལ་འདེགས་འབུལ་གྱི་མཛད་རིམ་གྲུབ་ནས། སྐྱབས་རྗེ་དཔོན་སློབ་རིན་པོ་ཆེ་མཆོག་ནས་སྔར་སྲོལ་ལྟར་འདུས་མང་ཡོངས་ལ། འགྱེད་མང་ཇ་བཏངས་ཡོད་པ་བཅས་ཀྱི་གནས་བསྡུས་སུ།
པར་པ། ཁྲི་གཙུག་རྣམ་རྒྱལ།
