དེ་ཡང་ཐེངས་འདི་ཡི་ལྷ་མཆོག་ཤེས་རབ་སྨྲ་བའི་སེང་གེའི་སྒྲུབ་མཆོད་དང་འབྲེལ་བའི་གནས་ཚུལ་ཞིབ་པ་སྔོན་བསྒྲགས་བཞིན། དེ་རིང་སྟེ། བོད་ཟླ་༠༡པའི་བོད་ཚེས་༣༠ཉིན་ནི་གདན་ས་ཆེན་མོ་དཔལ་གཤེན་བསྟན་༢སྨན་རིའི་གླིང་གི་སྐབས་༤༣པའི་ཤེས་རབ་སྨྲ་སེང་གི་སྒྲུབ་པ་འཚོགས་པའི་ཉིན་མཐའ་མར་འཁེལ་ཡོད་པ་དང་།
དེ་རིང་ཞོགས་པའི་ཆུ་ཚོད་དྲུག་པ་ནས་རྗེ་རིན་པོ་ཆེ་༧མཉམ་མེད་ཆེན་པོའི་བླ་སྒྲུབ་དང་། ཤེས་རབ་སྨྲ་བའི་སེང་གེའི་སྒྲུབ་གཞུང་སོགས་སྦྲགས་ཏེ་གཏང་རག་གི་ཚོགས་འཁོར་རྒྱས་འབུལ་གྲུབ་རྗེས། སྔ་དྲོའི་ཕྱག་ཚོད་༩/༣༠ཐོག་འཆར་ཅན་ལྟར། ༧ཞྭ་དཀར་གཡུང་དྲུང་བོན་གྱི་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་༧སྨན་རིའི་ཁྲི་འཛིན་༣༤པ་དཔལ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་ནས་བོན་གཞིས་སེར་སྐྱ་མི་མང་ཡོངས་དང་།
ཕྱི་གླིང་གི་ཡུལ་གྲུ་ཁག་ནས་ཆེད་བཅར་གནང་བའི་དད་ལྡན་རྣམས་དང་། དེ་བཞིན་ས་གནས་སློབ་ཕྲུག་བཅས་ལ་རིག་པའི་ལྷ་མཆོག་ཤེས་རབ་སྨྲ་བའི་སེང་གེའི་གཞུང་དང་གཡུང་དྲུང་ཚེ་དཔག་མེད་ཀྱི་ཚེ་སྒྲུབ་དང་བཅས་པའི་བཀའ་དབང་ཟབ་མོའི་བཀའ་དྲིན་བླ་མེད་ཆེ་ཆེར་བསྐྱངས་གནང་བའི་གནས་བསྡུས་སུ་ཕུལ་བ་ལགས་སོ། །
