ཁ་སང་སྟེ་བོད་ཟླ་དང་པོའི་ཚེས་བཅོ་ལྔ། དཔལ་༧རྣམ་འདྲེན་བརྒྱད་པ་རྒྱལ་བ་གཤེན་རབ་མི་བོ་ཀུན་ལས་རྣམ་པར་རྒྱལ་བ་མཆོག་གི་སྐུའི་འཁྲུངས་མཆོད་དུས་བཟང་ཁྱད་ཅན་གྱི་ཉིན། བོན་གཞིས་བཙུན་དགོན་རཏྣ་སྨན་གླིང་གི་སྐབས་གཉིས་པའི་དགེ་བཤེས་གཏོང་འཐུས་ཀྱི་སྔོན་འགྲོར་བཙུན་མ་རྣམས་༧དཔལ་ལྡན་སྨན་རིའི་བླ་བྲང་དུ་ཆེད་བཅར་གྱིས། ༧ཞྭ་དཀར་བསྟན་པའི་གཙུག་རྒྱན་དཔོན་གསས་བླ་མ་༧སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་རིན་པོ་ཆེ་མཆོག་གི་དྲུང་དུ་དགེ་བཤེས་གཏོང་འཐུས་ཀྱི་བཀའ་འཁྲོལ་སྐྱབས་འཇུག་ཞུས་པ་དང་། ༧ཞྭ་དཀར་བསྟན་པའི་གཙུག་རྒྱན་སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༤རིན་པོ་ཆེ་མཆོག་ནས་དགེ་བཤེས་གཏོང་འཐུས་ཀྱི་སློབ་གཉེར་བ་བཙུན་མ་རྣམས་ལ་བཀའ་རམས་པའི་མཚན་གསོལ་གསལ་བསྒྲགས་དང་འབྲེལ་དགེ་བཤེས་གཏོང་ཕྱོགས་ཐད་ནས་བཀའ་སློབ་བཀའ་དྲིན་བསྩལ་བ་དང་། དམིགས་བསལ། ལོ་འདིའི་ལོ་འཁོར་གཅིག་གི་རིང་ཚོགས་དང་འཆད་ར། ཐུག་དང་དམ་བཅའ། དཔེ་ཁྲིད་བཅས་ལ་ངེས་ཅན་དུ་ཕེབས་དགོས་པ་མ་ཟད། ཐུན་མོང་རིག་གནས་ཀྱི་སྐོར། དག་ཡིག སྙན་ངག འབྱུང་རྩིས། སྐར་རྩིས། སྒྲ་སྡེབ་སྦྱོར། བཟོ་རིག དཀྱིལ་འཁོར་ཐིག་རྩ། རྒྱལ་བའི་སྐུ་བརྙན་དང་མཆོད་རྟེན་གྱི་གཟུངས་གཞུག་འབུལ་ཐབས། སྨན་དཔྱད་ཐུགས་འབུམ་མཁའ་སྔོན་དང་།
ཉེར་མཁོ་དཔག་བསམ་ལྗོན་ཤིང་སོགས་རིག་གནས་སྦྱང་འབྲས་རྣམས་ཡོངས་སུ་གྲུབ་མིན་རིག་གནས་འགན་འཛིན་ལགས་ནས་གཟིགས་ཞིབ་གནང་དགོས་པ་དང་། སྙན་ངག་སྒྲ་འཁོར་གྱིས་མཚོན་པའི་རིག་གནས་ཀྱི་དཔེར་བརྗོད་རྣམས་སྔོན་ཚུད་ནས་མཇུག་ཡོངས་སུ་གྲུབ་པར་བྱས་ཏེ་རིག་གནས་འགན་འཛིན་རྣམ་པར་ཟླ་དྲུག་སྔ་མའི་ནང་ཚུད་རྩིས་འབུལ་ཞུ་དགོས། བཀའ་རམས་རྣམས་ཀྱིས་མཆོད་ཚིག་དང་ཚིག་བཀྲ་དམ་བཅའ་སོགས་ཟླ་དྲུག་ཕྱི་མའི་ནང་༧དཔལ་ལྡན་སྨན་རིའི་བླ་བྲང་དུ་རྒྱུགས་འབུལ་ངེས་པར་ཞུ་དགོས། གྲྭ་ས་ཆེན་མོའི་གསུང་རྒྱུན་དང་ལམ་སྲོལ་ཇི་བཞིན། “འགྱེད་མང་ཇ་ལ་རྩོད་པ་མེད། ཐུག་དམ་བཅའ་ལ་རྩོད་པ་ཡོད།”ཅེས་གསུང་སྲོལ་ལྟར་དངོས་གཞི་དགེ་བཤེས་དམ་འཇོག་ཆེན་མོའི་སྐབས་སུ་ཕྱི་མཚན་ཉིད་སྡེ་ལྔའི་གཞུང་ཆེན་ཁག་དང་། ནང་སྔགས་སེམས་ཀྱི་གཞུང་ཆེན་གང་ལའང་དགག་བཞག་རྩོད་སྤོང་གི་ཟིན་མཚམས་དང་། རྩ་བའི་གཞུང་ཆེན་ཁག་གི་སྤྱི་སྡོམ་གྱི་གོ་བ་ཡོད་མེད་གལ་ཆེན་དུ་བརྩིས་ནས། རིགས་ལམ་གྱི་ཁྱབ་མཐའ་དང་། གཞུང་དོན་གྱི་གོ་བ། གཞུང་ཚིག་བློ་ངོར་ངེས་ཐབས་བཅས་ལ་ཐུགས་སྣང་གཙོ་བོར་མཛད་དེ་འབད་པ་ལྷོད་མེད་གནང་དགོས་སྐོར་གྱི་བཀའ་སློབ་བསྩལ་བ་དང་བཅས་དྲ་ཚིགས་ལས་གཉེར་པས་གནས་བསྡུས་སུ་སྤེལ།
སྐབས་གཉིས་པའི་བཙུན་དགོན་རཏྣ་སྨན་གླིང་གི་བཀའ་རམས་མ་རྣམས།
༡ ༽ ཡང་སྟོན་དྲང་སྲོང་མ་རིག་གནས་བརྩོན་འགྲུས་བཟང་མོ།
༢ ༽ ཡང་སྟོན་དྲང་སྲོང་མ་རྣམ་དག་བདེ་ཆེན་ལྷ་མོ།
༣ ༽ ཅོག་རོ་ཚང་དྲང་སྲོང་མ་གཡུང་དྲུང་སྨོན་ལམ་དབང་མོ།
༤༽ བར་གླེ་དྲང་སྲོང་མ་བཀྲ་ཤིས་མཚོ་མོ་རྣམ་རྒྱལ།
༥༽ ཏྲེ་སྟོན་དྲང་སྲོང་མ་ཤེས་རབ་ཕར་ཕྱིན་དགེ་བཅུ།
