གཤེན་གྱི་འབྱུང་ལྡན་ ༣༠༡ གི་ནང་ཚན་བོད་རྒྱལ་ལོ་ ༣༡༦༠ ཟླ་ ༡༠ བའི་ཚེས་ ༡༦ དང་། ཕྱི་ལོ་ ༢༠༢༣ ལོའི་ཟླ་ ༡༡ ཚེས་ ༡༦ ཉིན། ༸གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་ཁུངས་གཏོགས་བཙུན་དགོན་རཏྣ་སྨན་གླིང་དུ་སྐབས་གཉིས་པའི་དགེ་བཤེས་མའི་དམ་བཅའི་མཛད་སྒོ་ཚོགས་ཡོད་པ་རེད།
ཞྭ་དཀར་བསྟན་པའི་གཙུག་རྒྱན་༸སྐྱབས་རྗེ་རྒྱལ་བ་སྨན་རིའི་མཁན་རབས་སོ་བཞི་པ་ལུང་རྟོགས་ཟླ་བ་དར་རྒྱས་རིན་པོ་ཆེ་དང་། སྨན་རིའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ། བཤད་སྒྲུབ་མཁན་པོ་དགེ་བཤེས་ཉི་མ་དོན་འགྲུབ། བཤད་སྒྲུབ་སློབ་དཔོན་དགེ་བཤེས་དགེ་ལེགས་རྒྱ་མཚོ། བཙུན་དགོན་རཏྣ་སྨན་གླིང་གི་མཚན་ཉིད་མཁན་པོ་དགེ་བཤེས་བསྟན་འཛིན་ཀུན་ཁྱབ། སྨན་རིའི་རྫོགས་ཆེན་སྒོམ་སྒྲུབ་འདུས་སྡེའི་སློབ་དཔོན་དགེ་བཤེས་སེམས་དཔའ་རྒྱལ་མཚན་བཅས་དབུ་བཞུགས་ཐོག བཙུན་དགོན་རཏྣ་སྨན་གླིང་དུ་སྐབས་སྐབས་གཉིས་པའི་དགེ་བཤེས་མའི་དམ་བཅའ་ཆེན་མོ་དབུ་འཛུགས་གནང་ཡོད་པ་དང་།
དེ་ཡང་སྔ་དྲོའི་ཕྱག་ཚོད་བཅུ་པའི་ཐོག་སྐྱབས་རྗེ་མཁན་སློབ་རྣམ་གཉིས་གཙོས་བཤད་སྒྲུབ་མཁན་སློབ་རྣམ་པ་ཚོགས་མགོན་དུ་གདན་འདྲེན་ཞུས་རྗེས། བཀའ་རམས་མ་བསླབ་པ་རྒན་རིམ་ལྟར། བཀའ་རམས་མ་ཡང་སྟོན་དྲང་སྲོང་མ་རིག་གནས་བརྩོན་འགྲུས་བཟང་མོ་དང་། བཀའ་རམས་མ་ཡང་སྟོན་དྲང་སྲོང་མ་རྣམ་དག་བདེ་ཆེན་ལྷ་མོ། བཀའ་རམས་མ་ཅོག་རོ་དྲང་སྲོང་མ་གཡུང་དྲུང་སྨོན་ལམ་དབང་མོ། བཀའ་རམས་མ་བླ་མ་ཚང་དྲང་སྲོང་མ་བཀྲ་ཤིས་མཚོ་མོ་རྣམ་རྒྱལ། བཀའ་རམས་མ་ཏྲེ་སྟོན་དྲང་སྲོང་མ་ཤེས་རབ་ཕར་ཕྱིན་དགེ་བཅུ་རྣམས་ནས་རིམ་གྱིས་ངག་རྒྱུགས་ཕུལ་བ་དང་། ཕྱི་དྲོའི་ཕྱག་ཚོད་གཅིག་དང་ཕྱེད་ཀ་ནས་བཞི་བའི་བར་དགེ་བཤེས་དང་དགེ་བཤེས་མ་རྣམས་ནས་རྫོགས་ཆེན་གཞུང་ཆེན་སྡེ་བཞི་གཙོས་གཞུང་ཆེན་ཁག་རིགས་པས་འཕྲང་ལ་བཤར་ནས་ཐེ་ཚོམ་དྲྭ་བ་གཅོད་པའི་བརྒལ་བརྟག་ཚུལ་བཞིན་བཏངས་ཡོད་པ་བཅས་ཀྱི་གནས་བསྡུས་སུ།
བཤད་སྒྲུབ་མཁན་པོ་དགེ་བཤེས་ཉི་མ་དོན་གྲུབ་མཆོག་གིས་དངོས་གཞིའི་རྩོད་རྒྱུགས་དམ་བཅའི་སྐོར་ངོ་སྤྲོད་གནང་བ་ཁོལ་དུ་བྱུང་བ་གཤམ་གསལ།
ཞོགས་པ་ཕྱག་ཚོད་བཅུ་པའི་ཐོག་རྡོ་ཏིང་དང་གྷན་དྷེ་དུང་ཆེན་རྣམས་དུས་གཅིག་ཏུ་འབུད་བརྡུང་སྔར་མུས་ལྟར་བྱ། ༸སྐྱབས་རྗེ་སྨན་རིའི་མཁན་སློབ་རྣམ་པ་དང་བཤད་སྒྲུབ་མཁན་སློབ་རྣམས་གདན་ཞུ་བྱ་ཕྱོགས་ཀྱང་སྔོན་འགྲོའི་གཞུང་བཤད་སྐབས་ཀྱི་གདན་ཞུས་གནང་ཕྱོགས་དང་གཅིག་མཚུངས་ཡིན། འདུལ་ཁང་དུ་དགེ་འདུན་འདུས་པ་རྒྱ་མཚོའི་ཚོགས་རྣམས་ཚོགས་གྲལ་དུ་འཁོད་གྲུབ་པའི་རྗེས། འདུས་མང་ནས་བྱམས་མའི་སྔགས་བསྟོད་དང་ཇ་མཆོད་ཟླ་བྲལ་ཨ་དཀར་སོགས་གྱེར་གྲུབ་རྗེས་འབྲས་སིལ་དང་གསོལ་ཇ་ལ་རོལ། ཚོགས་ཆེན་དགེ་སྐོས་ལགས་ནས་སྐབས་བབས་ཀྱི་བཀའ་རམས་པ་གཉིས་ལ་ཆབ་ཕུལ་རྗེས། བཀའ་རམས་པས་གྲལ་མཇུག་ནས་གུས་ཕྱག་ལན་གསུམ་ཕུལ་ཏེ་རྟེན་གཙོ་དང་མཁན་སློབ་རྣམ་པ་མཇལ་ཁ་སྔར་མུས་ལྟར་ཞུས་ཏེ་གྲལ་མཇུག་ཏུ་ཕེབས་ཤིང་འདུལ་ཆས་ལེགས་པར་གསོལ།
སྐབས་དེར་གོ་སྒྲིག་ཚོགས་ཆུང་ནས་དམ་ཁྲི་སྒྲིག་དགོད་བྱ། དཀའ་ཆེན་དཀའ་ཆུང་བཅས་དམ་ཁྲིར་འཁོད་དེ་རྟེན་གཙོའི་སྐུ་བརྙན་མདུན་ཞལ་ཡར་ཕྱོགས་ཏེ་དཀའ་ཆེན་པས་མཚན་ཉིད་དམ་བཅའི་དབུ་འཆད་པད་དཀར་ཆུན་པོ་དང་། དཀའ་ཆུང་པས་དམ་བཅའི་ཚིག་བཤད་མན་དྷ་ར་བའི་འཕྲེང་བ་གཉིས་ངག་རྒྱུགས་གྲུབ་མཚམས་ཞལ་ཕྱིར་བསྒྱུར་ཏེ་བཞུགས་དགོས།
འདུས་མང་ནས་བར་ཆད་ལམ་སེལ་གསུངས་ཏེ་ཚོགས་གྲོལ། ཉིན་གུང་ཕྱག་ཚོད་བཅུ་གཅིག་དང་ཕྱེད་ཀ་ནས་བཅུ་གཉིས་བར་གྱི་འགྲོ་སྟངས་སྔོན་འགྲོའི་གྱེར་རྒྱུགས་སྐབས་དང་གཅིག་མཚུངས་ཡིན།
ཉིན་གུང་ཕྱག་ཚོད་དང་པོའི་ཐོག་མཁན་སློབ་རྣམ་པ་དམིགས་བསལ་གདན་ཞུ་སོགས་བྱ་མི་དགོས་པར་སྒྲིག་རང་འཁུར་གྱིས་ཚུལ་དུ་ཕེབས་སྲོལ་ཡོད། གྷན་དྷེ་བརྡུངས་ནས་ཐམས་ཅད་འདུལ་ཁང་དུ་འཚོགས་དགོས། བཀའ་རམས་པ་རྣམ་གཉིས་དམ་ཁྲིར་བཞུགས་མཚམས། གོང་རིམ་བཞིན་དགག་སྒྲུབ་ཀྱི་མཆོད་འབུལ་གནང་མཁན་རིགས་སྨྲ་བ་དགེ་བའི་བཤེས་གཉེན་རྣམས་དང་།
དེ་ནས་རིམ་བཞིན་སློབ་གཉེར་བ་རྣམས་ལ་ཚོགས་ཆེན་དགེ་སྐོས་ནས་ཆབ་བརྒྱག་དགོས། སྐབས་འདིར་དགེ་བའི་བཤེས་གཉེན་རྣམས་ནས་བླ་མེད་རྫོགས་པ་ཆེན་པོའི་གཞུང་ཆེན་སྡེ་བཞི་གཙོ་བོར་མཛད་དེ། གྲོལ་ལམ་སེམས་ཕྱོགས་ཀྱི་གཞུང་ཆེན་ཁག་ལས་འཕྲོས་པའི་རྟགས་གསལ་གནད་དུ་ཁེལ་བ་རྩོད་དགོས། དེ་རྗེས་ལོ་རིམ་རྒན་གཞོན་བཞིན་སློབ་གཉེར་སྡེ་ཚན་ཁག་སོ་སོས་བསྒྱུར་ལམ་སྔགས་དང་སྤང་ལམ་མདོ་ཡི་སྐོར་ལ་དགག་སྒྲུབ་དཀའ་གནད་འཁེལ་བ་གནང་དགོས། མདོར་ན་མཚན་ཉིད་པོད་ཆེན་དྲུག་དུ་གྲགས་པའི་ཚད་མའི་གཞུང་ཆེན་དང། ཕར་ཕྱིན་གྱི་གཞུང། མཛོད་ཀྱི་གཞུང། འདུལ་བའི་གཞུང། དབུ་མའི་གཞུང། རྗེ་ཡི་གསང་དོན་རྣམ་འབྱེད་གཙོ་བོར་བཟུང་ནས་མདོ་སྔགས་ཀྱི་གཞུང་ཆེན་ཁག་ནས་དགག་སྒྲུབ་ཀྱི་མཆོད་འབུལ་གནང་དགོས། ཕྱིར་རྒྱག་པའི་ལམ་སྲོལ་མེད།
འཁོར་གསུམ་གྱི་བརྡ་ལ་རྔ་བརྡུང་གི་མཆོད་པ་འབུལ་དགོས། ཕྱག་ཚོད་གསུམ་པའི་ཐོག་འདུས་མང་ནས་བར་ཆད་ལམ་སེལ་གསུངས་ནས་སྐར་མ་བཅུ་ཡི་རིང་བར་གསེང་ཆེད་ཚོགས་གྲོལ། དེ་ནས་བསྐྱར་ཚོགས་གནང་སྟེ་ཕྱག་ཚོད་ལྔ་པའི་བར། སྒྲུབ་དང་སུན་འབྱིན་གྱི་གནས་ལ་དགག་བཞག་ཚུལ་བཞིན་གནང་སྟེ་རྒྱལ་བ་དགྱེས་པའི་མཆོད་སྤྲིན་དུ་འགྱུར་ངེས་པ་ཞིག་བྱ་དགོས་སོ། །
