ད་ལན་སྤྲུལ་སྐུ་རྣམ་བཞིའི་ཡ་གྱལ་རྒྱལ་དབང་ཀུན་གྲོལ་གྲགས་པའི་སྐུ་ཕྲེང་བདུན་པ་ཀུན་གྲོལ་ནམ་མཁའ་འཕྲིན་ལས་དབང་རྒྱལ་མཆོག་ནས་༸སྐྱབས་རྗེ་རྒྱལ་བ་སྨན་རི་བ་མཆོག་གི་བསྟན་དོན་མཛད་འཕྲིན་མཐའ་དག་དར་ཞིང་རྒྱས་ལ་སྐུ་ཚེ་གཡུང་དྲུང་གི་གཤིས་སུ་བརྟན་པའི་ཆེད་དུ་དང་། ཕྱི་ནང་བོན་འབངས་ཡོངས་སྔར་ལྷག་ཐུགས་མཐུན་ཁྲིམས་གཙང་ཡོང་བ་དང་བསྟན་འགྲོ་སྤྱི་ཡི་དགེ་རྩ་དང་བདེ་སྐྱིད་ཀྱི་ཆེད་དགོངས་པ་ཟབ་བཞེས་ཀྱིས་སྨན་རིའི་སྒྲུབ་ཆེན་གྱི་སྒྲུབ་ཞག་ཉིན་བཅུ་བཞི་པ་སྟེ་སྤྱི་ལོ་ ༢༠༢༤ ཟླ་ ༤ པའི་ཚེས་ ༢༤ ཉིན་
བོད་ཡུལ་ནས་གདན་དྲངས་གནང་བའི་ཁྱུང་པོ་སྟེང་ཆེན་དགོན་གྱི་དཔར་མ་གཡུང་དྲུང་བོན་གྱི་རྒྱལ་བའི་བཀའ་རིན་པོ་ཆེ་པོད་ ༢༠༠ ཡི་བདག་ཉིད་ཅན་དང་། ཧི་མ་ལ་ཡའི་རིག་མཛོད་ཀྱིས་དཔར་དུ་བསྐུན་པའི་“བོད་ཀྱི་བརྡ་སྤྲོད་ཀུན་བཏུས་ཆེན་མོ་པོད་ ༡ ནས་ ༥༧ བར། བོད་ཀྱི་རྩིས་རིག་ཀུན་བཏུས་ཆེན་མོ་པོད་ ༡ ནས་༦༩ བར། བོད་ཀྱི་སྙན་ངག་ཀུན་བཏུས་ཆེན་མོ་པོད་ ༡ ནས་ ༤༦ བར། བོད་དོང་པན་ཆེན་གྱི་གསུང་འབུམ་པོད་ ༡ ནས་ ༩༥ བར་བཅས་གསུང་རབ་ཕོན་ཆེན་དང་། བལ་པོའི་ལྷ་བཟོས་བཞེངས་སྐྲུན་གནང་བའི་བདེར་གཤེགས་གཙོ་བཞིའི་སྐུ་འདྲ་སྤུས་ལེགས་བཞི་དང་། རྒྱུ་ཟངས་གསེར་ལས་གྲུབ་པའི་བསྟན་སྲུང་མི་བདུད་ཀྱི་སྐུ་ཕུ་ཊི ༥ ཅན་གཅིག གཞན་ཡང་རྒྱ་གར་ལྷ་བཟོས་བཞེངས་གནང་བའི་གཡུང་དྲུང་བཀོད་ལེགས་ཀྱི་མཆོད་རྟེན་བརྒྱ་དང་བརྒྱད་བཅས་ཀྱི་སྐུ་གསུང་ཐུགས་རྟེན་གྱི་རྟེན་བཞག་མི་ཉུང་བ་ཞིག་རྒྱལ་བ་སྨན་རིའི་སྒྲུབ་ཁང་དང་། དཔེ་མཛོད་ཁང་སོགས་སུ་ཕུལ་གནང་སོང་།
དེ་ཡང་ཀུན་གྲོལ་སྤྲུལ་སྐུ་མཆོག་ཉིད་ནས་དེ་སྔ་ཡང་སྨན་རིའི་སྒྲུབ་ཁང་དུ་མ་མཆོག་སྲིད་རྒྱལ་ཡེ་ཤེས་དབལ་མོའི་སྐུ་དང་དཔེ་མཛོད་ཁང་དུ་གསུང་རབ་མང་པོ་གདན་འདྲེན་ཞུས་གནང་ཡོད་འདུག
རྒྱལ་དབང་ཀུན་གྲོལ་སྐུ་ཕྲེང་བདུན་པ་ཀུན་གྲོལ་ནམ་མཁའ་འཕྲིན་ལས་དབང་རྒྱལ་མཆོག་ཉིད་ནས་ཇི་ལྟར་ཕུལ་བ་འདི་དག་ཀྱང་སྤྱིར་ན་ཉིད་ཀྱིས་རྒྱལ་བ་སྨན་རི་ནི་རང་ཉིད་ཀྱི་མིག་གཡས་པ་ལྟར་རུ་བརྩི་བཞིན་ཡོད་པ་དང་། རྒྱལ་བ་སྨན་རི་བ་ལ་ང་ཚོ་བོན་འབངས་ཡོངས་ཀྱིས་ཕྱར་གྲུ་མཉམ་འདེགས་ཀྱིས་ཞབས་ཞུ་ཞུ་དགོས་པའི་སྐུལ་མ་དང་མིག་དཔེ་བཟང་པོ་ཞིག་འགྲོ་ཆེད་དུ་ཡིན་ལ། ང་ཚོས་ནམ་ཡང་ཕྱོགས་གང་ཐད་ནས་བསྟན་པ་དགོན་པ་འདི་ལ་ཐུགས་བསམ་བཞེས་དགོས་པ་གལ་ཆེན་པོ་ཡིན་ཚུལ་སོགས་གསུང་གནང་འདུག
