སྤྱི་ལོ་ ༢༠༢༤ཟླ་ ༤ ཚེས་ ༡༩ སྨན་རིའི་སྒྲུབ་ཆེན་ཉིན་དགུ་པའི་སྔ་དྲོ་ཕྱག་ཚོད་༧/༣༠ཐོག་༧སྐྱབས་རྗེ་༧རྒྱལ་བ་སྨན་རིའི་མཁན་སློབ་རྣམ་གཉིས་ཀྱིས་དབུ་འདྲེན་སེར་ཕྲེང་གི་སྒོ་ནས་ཁྲོལ་སྨན་རྣམས་ཞིབ་བརྡུང་གནང་སར་སྤྱན་དྲངས་ནས་བདུད་རྩི་སྨན་གྱི་བཀྲོལ་བསྲེ་ཁྲུས་བརྡུང་བཅས་ཀྱི་རིམ་པ་རྣམས་མཛད་ཡོད་པ་རེད།
དེ་ཡང་ཐོག་མར་སྨན་རིའི་འདུལ་ཁང་གྱི་སྒོ་མདུན་ནས་རིམ་བཞིན་འཕན་དར་དུང་རྒྱ་སྤོས་སྣ་ཚོགས་ཀྱིས་སྣེ་དྲངས་ཏེ་༸སྐྱབས་རྗེ་རྒྱལ་བ་སྨན་རིའི་མཁན་སློབ་རྣམ་གཉིས་དང་སྨན་སྒྲུབ་གྱི་སྒྲུབ་གཤེན་པ། དེ་བཞིན་སེར་སྐྱ་འདུས་མང་ཡོངས་སེར་འཕྲེང་དང་བཅས་ཁྲོལ་སྨན་རྣམས་གསོ་རིག་འབུམ་བཞིའི་མཐོ་སློབ་སྨན་རིའི་གླིང་གི་ཚོགས་ཁང་དུ་གདན་ཞུས་གནང་གྲུབ་གྲུབ་མཚམས།
༸སྐྱབས་རྗེ་མཁན་སློབ་རྣམ་གཉིས་ཀྱིས་སྨན་གྱི་བུམ་པ་དང་། སྨན་ཁུག་སོགས་ཁ་ཕྱེས་ཏེ་ཁྲུས་ཆབ་དང་རིམ་བཞིན་ཁྲོལ་བུ་རྣམས་ཞིབ་བརྡུང་གནང་མཛད་ཡོད་པ་དང་། དེ་རྗེས་བཤད་སྒྲུབ་མཁན་སློབ་རྣམས་དང་སྒྲུབ་གཤེན་པ། དེ་བཞིན་བླ་མ་ཁྲི་པ་བཅས་སེར་སྐྱ་ཡོངས་ཀྱིས་རིམ་པར་ཁྲོལ་སྨན་ཞིབ་བརྡུང་དང་།
༸སྐྱབས་རྗེ་མཁན་སློབ་རྣམ་གཉིས་ཀྱིས་སྨན་འཐག་འཁྲུལ་ཆས་ནས་ཁྲོལ་སྨན་ཞིབ་འཐག་དང་། སྨན་གྱི་བསྲེ་སྦྱོར་སོགས་མཛད་དེ་སླར་སེར་འཕྲེང་གི་ལམ་ནས་སྨན་སྣ་རྣམས་དཀྱིལ་འཁོར་དུ་གདན་འདྲེན་ཞུས་ཤིང་། སྨན་སྒྲུབ་འོད་ཟེར་འཁྱིལ་བའི་ལས་ཆོག་ལྟར་སྨན་བུམ་རྣམས་དང་རྒྱན་རྫས་ཙཀལི་བཅས་པ་ཆ་ཚང་དཀྱིལ་འཁོར་དུ་བཀོད་གནང་སོང་།
དེ་རིང་སྤྱི་ལོ་ ༢༠༢༤ ཟླ་ ༤ ཚེས་ ༢༠ ཉིན་སྔ་དྲོ་ཕྱག་ཚོད་ ༩ ཐོག་༧སྐྱབས་རྗེ་༧རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་ནས་འཆད་ར་གཡུང་དྲུང་དགའ་ཚལ་གླིང་དུ་བོན་འཁོར་ཚིག་བཞིའི་བཀའ་ཁྲིད་གནང་ཡོད་པ་དང་།
ཕྱི་དྲོར་༸སྐྱབས་རྗེ་རྒྱལ་བ་སྨན་རིའི་དཔོན་སློབ་རིན་པོ་ཆེ་མཆོག་ནས་ཟབ་ལམ་སྔགས་ཀྱི་ཐེག་པའི་སྒོ་ནས་ཚོགས་བསག་ཉམས་ལེན་གནང་སྟངས་ཀྱི་སྐོར་བོན་ཁྲིད་བཀའ་དྲིན་བསྩལ་གནང་ཡོད་པ་བཅས་ཀྱི་གནས་བསྡུས་སུ་གཡུང་དྲུང་བོན་དྲྭ་ཚིགས་ཁང་ནས།
