༸གདན་ས་སྨན་རིའི་གླིང་དུ་བོད་ཤིང་འབྲུག་ལོའི་ཟླ་བཅུ་གཅིག་གི་ཚེས་བདུན་དང་བརྒྱད་སྤྱི་ལོ་ ༢༠༢༥ ལོའི་ཟླ་བ་དང་པོའི་ཚེས་ ༦ དང་ ༧ ཏེ་ཉིན་གཉིས་ཀྱི་རིང་བོན་གྱི་གྲྭ་ས་འོག་མ་རབ་ལེགས་གཡུང་དྲུང་གླིང་ཕྱག་འདེབས་པ་པོ་སྣང་སྟོན་༸སྐྱབས་མགོན་ཟླ་བ་རྒྱལ་མཚན་མཆོག་དགོངས་པ་བོན་དབྱིངས་སུ་ཐིམ་ནས་མི་ལོ་ ༡༦༠ འཁོར་བའི་འདས་མཆོད་དུ་༸སྐྱབས་རྗེ་མཁན་སློབ་རྣམ་པ་དང་བླ་གྲྭ་དགེ་བཤེས་རྣམས་ནས་མདོ་གཡུང་དྲུང་ཀློང་རྒྱས་ཀྱི་དཀྱིལ་འཁོར་ཞལ་ཕྱེས་ཏེ་གསུང་འདོན་གནང་ཡོད་པ་དང་།
བོད་ཚེས་ ༨ ཉིན་གྱི་ཞོགས་པར་རྣམ་དག་འདུལ་བའི་གསོ་སྦྱོང་དང་། དེ་ནས་སྔ་དྲོར་༸སྐྱབས་མགོན་ཟླ་བ་རྒྱལ་མཚན་གྱི་སྐུ་འདྲ་གདན་ཞུས་ཀྱིས་དགོན་པའི་གླིང་སྐོར་དུ་སེར་འཕྲེང་རྒྱས་པ་ཕེབས་ནས་ཕྱིར་གཙུག་ལག་ཁང་གི་སྒོ་འཁྱམས་སུ་གཤེན་རབ་མཆོད་རྔ་གྲུབ་མཚམས། དད་ལྡན་མི་མང་རྣམས་ནས་ཕྱག་སྐོར་དང་། འདུས་མང་ནས་མཚན་ལྡན་བླ་མའི་མཆོད་ཐབས་སོགས་གསུངས། དེ་རྗེས་ཀློང་རྒྱས་ཀྱི་སྨད་ཆོག་དང་། སྔོན་འགྲོ་ལས་གཞི་ལ་སོགས་འཇུག་ཡོངས་སུ་གྲུབ་པར་གསུངས་གནང་ཡོད་པ་དང་།
གཞན་ཡང་སྨན་རིའི་དགེ་བཤེས་རྣམས་པས་སྨན་རིའི་སྒྲུབ་ཁང་དུ་སྐྱབས་མགོན་བླ་སྒྲུབ་ཀྱི་ཚོགས་འཁོར་རྒྱས་འབུལ་དང་། དགོང་མོར་སེར་སྐྱ་མི་མང་ཡོངས་ནས་སྣང་གསལ་སྒྲོན་མེའི་མཆོད་འབུལ་རྒྱ་ཆེར་གནང་ཡོད་པ་རེད།
དེ་ཡང་༸སྐྱབས་མགོན་ཟླ་བ་རྒྱལ་མཚན་ནི། བོན་གྱི་༸གདན་ས་གོང་འོག་བར་གསུམ་ཞེས་སུ་གྲགས་པའི་ནང་ཚན་༸གདན་ས་འོག་མ་རབ་ལེགས་གཡུང་དྲུང་གླིང་དགོན་པ་དེ་ཉིད་ཕྱག་འདེབ་ ༡༨༣༤ པ་པོ་ཡིན་ལ་དེ་ནས་བཟུང་ད་བར་༸གདན་ས་འོག་མའི་མཁན་རབས་བཅུ་གཅིག་བར་བྱོན་ཡོད། དམ་པ་ཁོངས་ནི་མེ་ཕོ་འབྲུག་སྤྱི་ལོ་ ༡༧༩༦ ལོར་འཁྲུངས་ཤིང་། ༡༨༣༤ ལོར་གདན་ས་འོག་མ་རབ་ལེགས་གཡུང་དྲུང་གླིང་ཕྱག་བཏབ་ཅིང་བསྟན་འགྲོའི་དོན་རྒྱ་ཆེར་མཛད་མཐར་སྤྱི་ལོ་ ༡༨༦༢ ལ་དགོངས་པ་བོན་དབྱིངས་སུ་བསྡུས་ཚུལ་མཛད་དོ། གཡུང་དྲུང་བོན་དྲྭ་ཚིགས་གཙོ་སྒྲུབ་པས།
