གཤེན་གྱི་འབྱུང་ལྡན་ ༣༠༡ གི་ནང་ཚན་བོད་ཤིང་སྦྲུལ་ལོའི་བོད་ཟླ་ ༡ པོའི་ཚེས་ ༡༠ ཉིན་སྟེ། ཕྱི་ལོ་ ༢༠༢༥ ཟླ་ ༣ ཚེས་ ༩ རེས་གཟའ་ཉི་མའི་ཉིན་གྱི་ཞོགས་པའི་ཆུ་ཚོད་དགུ་བའི་ཐོག་ནས་
༧ཞྭ་དཀར་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་༧སྐྱབས་རྗེ་མཁན་སློབ་རྣམ་གཉིས་དབུ་བཞུགས་འོག་གཤེན་གྱི་གར་འཆམ་ཆེན་མོ་དབུ་འཛུགས་གནང་ཡོད་པ་རེད།
དེ་ཡང་ཉིན་འདིའི་མཛད་སྒོའི་སྐུ་མགྲོན་དུ་ས་རན་གནས་ཉེན་རྟོག་ལས་ཁུངས་ཀྱི་འགོ་འཛིན་(SHO Saranh)དང་གཞན་ཡང་རྒྱ་གར་ས་གནས་འགོ་འཛིན་གཙོས་འབྲེལ་ཡོད་དཔོན་རིགས་ཁག་གཅིག་དང་། བོན་གཞིས་ཐོབ་རྒྱལ་གསར་པའི་ས་གནས་འགོ་འཛིན་དང་། གཞན་ཡང་ཚོགས་པ་ཁག་གི་འགན་འཛིན་དང་སྐུ་ཚབ་བཅས་གཤེན་གྱི་གར་འཆམ་ཆེན་མོར་ཕེབས་བཅར་ཞུས་ཡོད་པ་དང་།
དེ་ཡང་གོང་ཚེས་ཆུ་ཚོད་དགུ་པ་ནས་བོན་གཤེན་རྔ་ཐོགས་ཀྱིས་སྣེ་དྲངས་པའི་སྲིད་རྒྱལ་དུས་དྲུག་དང་། རྣམ་བརྒྱད། ཤ་འཆམ་གྲུབ་རྗེས་ཉུང་ཇ་མཆོད་ཡོད་ཅིང་། དེ་རྗེས་ཀེང་འཆམ། མ་རྒྱུད་ཀྱི་གར་འཆམ་གྲུབ་མཚམས་སྔ་དྲོའི་མཛད་རིམ་གྲུབ་ནས་ཉིན་གུང་གསོལ་ཚིགས་མཆོད་ཡོད་པ་རེད།
ཉིན་རྒྱབ་ཆུ་ཚོད་གཉིས་པ་ནས་གཤེན་རབ་དགུ་འཆམ། རྒྱལ་པོ་ཤེལ་ཁྲབ། རྒྱ་ནག་ཧ་ཤང་། ཨ་ཙ་ར། གཟེ་གྱད་སྤར་གསུམ། སྟག་གཡག་སེང་གསུམ་དང་། ཁྱུང་རྩེད་བཅས་གྲུབ་མཚམས་གནའ་བོའི་ཞང་ཞུང་ཡུལ་གྲུ་ཁག་ཏུ་དར་ཁྱབ་ཆེ་བའི་ཤོན་རྩེད་འཁྲབ་རྗེས་ཉིན་འདིའི་གལ་ཆེའི་མཛད་སྒོ་བདེ་ལེགས་དང་རྒྱལ་ཁའི་ངང་ནས་ཡོངས་སུ་མཇུག་གྲུབ་ཡོད་པ་བཅས་ཀྱི་གནས་བསྡུས་སུ།
