༧གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་སློབ་གཉེར་གྱི་མཐུན་རྐྱེན་དང་སློབ་སྦྱོང་ཡར་སྐུལ་གྱི་ཆ་རྐྱེན་དུ་དམིགས་ནས་ཟླ་རེར། གཡུང་དྲུང་བོན་གྱི་བཤད་སྒྲུབ་འདུས་སྡེའི་ཟླ་རེའི་བགྲོ་གླེང་ཞེས་གཏམ་བཤད་ཀྱི་བརྗོད་གཞི་སློབ་གཉེར་བ་སོ་སོས་རང་མོས་ལྟར་བདམ་ཐོག་དཔྱད་རྩོམ་སྤེལ་ཞིང་བགྲོ་གླེང་གནང་སྲོལ་ཡོད་པ་དང་།
དེ་ཡང་ཚོགས་ཐེངས་རེར་འཛིན་གྲྭ་གོང་འོག་བར་གསུམ་ནས་སློབ་གཉེར་བ་རེ་རེ་བཅས་མི་གསུམ་རེ་དང་། མི་རེར་གཏམ་བཤད་ཀྱི་དུས་ཡུན་སྐར་མ་བཅོ་ལྔ་དང་། དེ་འབྲེལ་གྱི་དྲི་བ་དྲིས་ལན་སྐར་མ་ ༡༥ རེ་གནང་དང་གནང་མུས་ལྟར་བོད་ཤིང་སྦྲུལ་ལོའི་ཟླ་བ་གཉིས་པའི་བགྲོ་གླེང་གི་གཏམ་བཤད་པ་གསུམ་པོས་སོ་སོའི་དུས་ཚོད་ལྟར་གཏམ་བཤད་གནང་ཡོད།
དེ་ཡང་གཤེན་གྱི་འབྱུང་ལྡན་ ༣༠༡ སྤྱི་ལོ་ ༢༠༢༥ ཟླ ༤ པའི་སྤྱི་ཚེས་ ༣ དང་། བོད་ཟླ་ ༢ པའི་ཚེས་པ་ ༦ ཉིན་གྱི་ཕྱི་དྲོའི་དུས་ཚོད་ ༥།༣༠ པའི་ཐོག ༸སྐྱབས་རྗེ་རྒྱལ་བ་སྨན་རིའི་དཔོན་སློབ་རིན་པོ་ཆེ་དབུ་བཞུགས་ཐོག་གཡུང་དྲུང་བོན་གྱི་བཤད་སྒྲུབ་འདུས་སྡེའི་མཁན་པོ་མཆོག་དང་བཤད་སྡེའི་དགེ་རྒན་རྣམ་པ། དེ་བཞིན་བླ་གྲྭ་དགེ་བཤེས་གང་མང་མཉམ་ཞུགས་དང་བཅས་རིག་གནས་འགན་འཛིན་གཡུང་དྲུང་ཉི་མས་གཙོ་སྐྱོང་འོག་གཡུང་དྲུང་བོན་གྱི་བཤད་སྒྲུབ་འདུས་སྡེའི་བོད་ཤིང་སྦྲུལ་ལོའི་བོད་ཟླ་ ༢ པའི་བགྲོ་གླེང་དབུ་འཛུགས་གནང་ཡོད་པ་དང་།
དེ་ཡང་གཏམ་བཤད་པ་དང་པོ་བཀའ་རམས་པ་བཤད་སྒྲུབ་བསྟན་འཛིན་ལགས་ནས་གངས་ཏི་སེ་འམ་གངས་རིན་པོ་ཆེའི་སྐོར་ལ་ ༡ གངས་ཏི་སེའི་ངོ་བོ་དང་ཆགས་ཚུལ་སྐོར་གླེང་བ། ༢ ཆུ་བོ་བཞི་འདུས་ཀྱི་འགོ་ཁུངས་ཡིན་ཚུལ། ༣གངས་རི་མཚོ་གསུམ་དང་ཞང་ཞུང་སྒོ་ཕུགས་བར་གསུམ་བཅས་ཀྱི་སྐོར། ༤ བོན་དང་ཆོས་རྒྱ་གར་བཅས་ཀྱི་དད་མོས་སྐོར། ༥གངས་ཏི་སིའི་དཀར་ཆག་ཚངས་དབྱངས་ཡིད་འཕྲོག་གི་ས་བཅད་ངོ་སྤྲོད། ༦བསྐོར་ར་ཕྱི་སྐོར་ནང་བསྐོར་བཅས་ཀྱི་སྐོར་བཅས་སྡེ་ཚན་དྲུག་གི་སྒོ་ནས་གཏམ་བཤད་དང་དྲི་བ་དྲིས་ལན་གནང་ཡོད་པ་དང་།
གཏམ་བཤད་པ་གཉིས་པ་རྫོགས་ཆེན་འཛིན་གྲྭའི་སློབ་གཉེར་བ་བརྩོན་འགྲུས་རྒྱ་མཚོ་ལགས་ཀྱིས་<<རླུང་རྟའི་སྐོར་གླེང་བ་>>ཞེས་པའི་བརྗོད་གཞིའི་ཐོག ༡ རླུང་རྟའི་བྱུང་ཁུངས། ༢ རླུང་རྟ་ཞེས་པའི་དོན། ༣ རླུང་རྟའི་ཐོག་གི་སྲོག་ཆགས་ཀྱི་རི་མོའི་སྐོར། ༤ རླུང་རྟའི་ཕན་ཡོན། ༥ རླུང་རྟ་དང་ཀླུང་རྟ་གཉིས་ཀྱི་ཁྱད་པར་བཅས་ཀྱི་སྒོ་ནས་གཏམ་བཤད་དང་དྲི་བ་དྲིས་ལན་གནང་།
གཏམ་བཤད་པ་གསུམ་པ་ས་ལམ་འཛིན་གྲྭའི་སློབ་གཉེར་བ་འབྲུག་ལྷ་གཡུང་དྲུང་ལགས་ནས་བརྗོད་གཞི་《 ཟ་ཁུ་གཅིན་སྙིའི་ན་ཚའི་སྐོར་གླེང་བ་》ཞེས་པའི་ཐོག་ནས་ ནད་དེའི་སྐོར་བཤད་པའི་དགོས་པ་དང་། ནད་དེ་ཡི་ནད་རྟགས། དེའི་རྒྱུ་རྐྱེན། ནད་དེའི་སྐྱོན་གྱི་སྐོར། དེ་ཉིད་ཀྱི་བཅོས་ཐབས་བཅས་སྡེ་ཚན་ལྔ་ཡི་སྒོ་ནས་གཏམ་བཤད་སྐར་མ་བཅོ་ལྔར་གནང་མཚམས་དྲི་བ་དྲིས་ལན་སྐར་མ་ ༡༥ གནང་མཐར་གཡུང་དྲུང་བོན་གྱི་བཤད་སྒྲུབ་འདུས་སྡེའི་ཟླ་རེའི་བགྲོ་གླེང་སྐབས་ ༡༦ པ་མཇུག་གྲུབ་ཡོད་པ་བཅས་ཀྱི་གནས་བསྡུས་སུ་གཡུང་དྲུང་བོན་གྱི་དྲྭ་ཚིགས་ཁང་ནས་ ༢༠༢༥། ༤། ༣ ཉིན།
