དེ་རིང་གཤེན་གྱི་འབྱུང་ལྡན་ ༣༠༡ བོད་རྒྱལ་ལོ་ ༣༡༦༢ ཤིང་མོ་སྦྲུལ་ལོའི་ཟླ་བ་གཉིས་པའི་ཚེས་ ༤ ཉིན་ཏེ། ཕྱི་ལོ་ ༢༠༢༥ ཟླ་ ༤ པའི་ཚེས་ ༢ ཉིན་༧བོན་གྱི་གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་གཡུང་དྲུང་བོན་གྱི་བཤད་སྒྲུབ་འདུས་སྡེ་དབུ་བརྙེས་ནས་མི་ལོ་ ༤༧ འཁོར་བའི་དུས་ཆེན་མཛད་སྒོ་འཚོགས་ཡོད་ཅིང་
དེ་ཡང་ཁམས་གསུམ་འགྲོ་བའི་བདེ་སྐྱིད་ཀྱི་རྩ་ལག་ནི་སངས་རྒྱས་ཀྱི་བསྟན་པ་ཡིན་པ་སྨོས་སུ་མེད་ལ། བསྟན་པའི་གསལ་བྱེད་དེ་ཡང་ཐོས་བསམ་འཆད་ཉན་དགོས་པ་གཙོ་བོ་ཡིན། ཐོས་བསམ་འཆད་ཉན་གྱི་གཞི་མ་ཡང་བཤད་སྒྲུབ་ཀྱི་བསྟན་པ་རིན་པོ་ཆེ་འདི་ཉིད་ཡིན་པ་ལྟར། ཐོག་མར་༸སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༣ པ་རིན་པོ་ཆེ་གཙོས་མཁན་སློབ་དམ་པ་རྣམས་ཀྱི་བླ་ན་མེད་པའི་དགོངས་བཞེད་ལས་སྤྱི་ལོ་ ༡༩༧༨ ལོར་༧གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་མདོ་སྔགས་སེམས་གསུམ་ཐུན་མོང་རིག་གནས་དང་བཅས་པར་འཆད་ཉན་སློབ་གཉེར་གནང་ཆེད། གཡུང་དྲུང་བོན་གྱི་བཤད་སྒྲུབ་འདུས་སྡེ་གསར་དུ་བཙུགས་ནས་ད་བར་མི་ལོ་ ༤༧ ཧྲིལ་པོར་འཁོར་ཡོད་པ་ལྟར།
དེ་རིང་ཞོགས་པའི་ཆུ་ཚོད་ ༧ པའི་ཐོག་བཤད་སྒྲུབ་མཁན་སློབ་རྣམ་གཉིས་དབུས་འདུས་མང་ཡོངས་ནས་བསྟན་པའི་དར་ཆེན་སྒྲེང་འཛུགས་དང་རབ་གནས་གནང་རྗེས་ལྷ་རྒྱལ་རི་རྩེར་བསང་གསོལ་དང་ཕྱེ་མར་མཆོད་ཅིང་ལྷ་རྒྱལ་གསོལ། དེ་ནས་བཤད་སྒྲུབ་འདུས་སྡེའི་ཚོགས་ཁང་དུ་སེར་སྐྱ་ཀུན་གྱིས་༸གོང་ས་སྐྱབས་མགོན་ཆེན་པོ་མཆོག་དང་སྨན་རིའི་མཁན་སློབ་རྣམ་པའི་སྐུ་པར་མཇལ་ཁ་ཞུས།
དེ་རྗེས་བཤད་སྒྲུབ་འདུས་སྡེའི་འཆད་ར་གཡུང་དྲུང་དགའ་ཚལ་གླིང་དུ་སེར་སྐྱ་ལྷན་འཛོམས་ཐོག་གཡུང་དྲུང་བོན་གྱི་བཤད་སྡེའི་སྐབས་ ༤༥ པའི་དྲུང་ཡིག་གཡུང་དྲུང་གཙུག་ཕུད་ལགས་ནས་མཛད་སྒོའི་གསུང་བཤད་གཙོ་སྐྱོང་དང་སྦྲག བཤད་སྒྲུབ་འདུས་སྡེའི་ཚོགས་གཙོ་རྒན་གཞོན་གཉིས་ཀྱིས་ལྷ་རྫས་དྲི་མ་མེད་པའི་སྤོས་དར་གྱིས་སྣེ་དྲངས་ཏེ། མཛད་སྒོའི་སྐུ་མགྲོན་གཙོ་བོ་ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་དང་། དེ་བཞིན་༧སྐྱབས་རྗེ་སྨན་རིའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ་རྣམ་པ་གཉིས་གདན་ཞུས་གནང་ཞིང་།
༧སྐྱབས་རྗེ་ཁྲི་འཛིན་རིན་པོ་ཆེ་མཆོག་གིས་བཤད་སྒྲུབ་བསྟན་པའི་དར་ཆེན་མཁའ་དབྱིངས་སུ་བསྒྲེངས་ཏེ། བཀྲ་ཤིས་རྟེན་འབྲེལ་གྱི་མེ་ཏོག་སིལ་མ་མཁའ་ལ་འཐོར་བ་དང་ཆབས་ཅིག་སེར་སྐྱ་མི་མང་ཀུན་གྱིས་གཡུང་དྲུང་བསྟན་པ་རྒྱས་པའི་སྨོན་ལམ་གསུངས། དེ་རྗེས་སེར་སྐྱ་མི་མང་ཡོངས་བཞུགས་གྲལ་དུ་འཁོད་མཚམས་འབྲས་སིལ་དང་གསོལ་ཇ་འདེགས་འབུལ་ཞུས་ཏེ་སྔོན་འགྲོའི་མཛད་རིམ་ལེགས་པར་གྲུབ།
དེ་ནས་དངོས་གཞིའི་མཛད་རིམ་གྱི་ཐོག་མར་༧གཡུང་དྲུང་བོན་གྱི་བཤད་སྒྲུབ་འདུས་སྡེའི་ཚོགས་གཙོ་ཉག་རོང་བསྟན་འཛིན་རྒྱལ་པོ་ལགས་ནས་མཛད་སྒོར་ཕེབས་པའི་ཚོགས་མི་ཡོངས་ལ་འཚམས་འདྲི་དང་འབྲེལ་དུས་ཆེན་ངོ་སྤྲོད་ཀྱི་གསུང་བཤད་གནང་།
དེ་ནས་རིམ་པ་ལྟར་ཚོགས་མགོན་དུ་ཞབས་སོར་འཁོད་པའི་༧སྐྱབས་རྗེ་མཁན་སློབ་རྣམ་གཉིས་དབུས་པའི་བཤད་སྒྲུབ་འདུས་སྡེའི་མཁན་པོ་དང་སློབ་དཔོན། དེ་མིན་ཚོགས་སྡེ་ཁག་གི་གནད་ཡོད་ཀྱི་འགོ་འཛིན་དག་གིས་དུས་ཆེན་དང་འབྲེལ་བའི་གསུང་བཤད་གནང་ཡོད་པ་དང་།
དེ་ཡང་༸སྐྱབས་རྗེ་རྒྱལ་བ་སྨན་རིའི་དཔོན་སློབ་རིན་པོ་ཅེ་མཆོག་ནས་”སྤྱིར་སངས་རྒྱས་ཀྱི་བསྟན་པ་གལ་ཆེན་པོ་ཡིན་པ་དང་དེ་ཉིད་འཛིན་སྐྱོང་བྱེད་པ་ལ་གྲྭ་བཙུན་ཙམ་མ་ཡིན་པར་བསྟན་པ་དེའི་སྒོར་ཞུགས་པའི་སྐྱེ་བོ་ཡོངས་ལ་འགན་ཡོད་ཚུལ་དང་། ད་བར་བཤད་སྒྲུབ་འདུས་སྡེ་འདི་ཐོག་མར་མི་ཉུང་ངུ་ཞིག་ལས་བརྩམ་ནས་དར་རྒྱས་སུ་ཕྱིན་ཡོད་པ་དང་། འདི་ནས་ཐོན་པའི་དགེ་བའི་བཤེས་གཉེན་རྣམས་ཀྱིས་རྒྱལ་ཕྱི་ནང་གང་སར་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་གྱི་ཕྱག་ལས་རྒྱ་ཆེན་པོ་གནང་བཞིན་ཡོད་པ། གཞན་ཡང་སློབ་ཕྲུག་ཚོ་ལ་ནང་ཆོས་དང་རིག་ལམ་བསླབ་ཡ་དེ་ཚོ་གལ་ཆེན་པོ་རེད་ལ། སློབ་གྲྭའི་ཕྲུག་གུ་དང་གྲྭ་བཙུན་བར་ལ་ཕན་ཚུན་ཤེས་ཡོན་བརྗེ་ལེན་དང་བགྲོ་གླེང་གཏམ་བཤད་སོགས་བྱས་ན་དམིགས་བསལ་གྱི་དགོས་ཕན་ཡོད་པ་རེད། དེའི་ཐད་ལ་འབྲེལ་ཡོད་ཚང་མས་ཐུགས་བསམ་བཞེས་དགོས་པ་དང་། བོད་ཀྱི་སྐད་ཡིག་འདི་སངས་རྒྱས་ཀྱི་བསྟན་པ་ལ་ཐོས་བསམ་ཉམས་ལེན་བྱེད་བར་མེད་དུ་མི་རུང་བ་ཞིག་ཡིན་སྟབས་ང་ཚོས་འདི་དག་འཛིན་སྐྱོང་དགོས་པ་གལ་ཆེན་པོ་ཡིན་སྐོར་སོགས་དང་འབྲེལ་ནས་སློབ་བསྩལ་གནང་བ།
དེ་རྗེས་ལོ་འཁོར་གཅིག་གི་རིང་གཡུང་དྲུང་བོན་གྱི་བཤད་སྒྲུབ་འདུས་སྡེ་དང་། བཙུན་དགོན་རཏྣ་སྨན་གླིང་གི་སློབ་གཉེར་བའི་གྲལ་ནས་འཕར་རྒྱུགས་དམིགས་བསལ་ངག་རྒྱུགས་འབུལ་མཁན་དང་། ལོ་འཁོར་གྱི་ཡིག་རྒྱུགས་ཁྲོད་ནས་གནས་རིམ་ཨང་དང་པོ་དང་། ཨང་གཉིས་པ། ཨང་གསུམ་པ་ལེན་མཁན་བཅས་ལ་ ༧སྐྱབས་རྗེ་རྒྱལ་བ་སྨན་རིའི་མཁན་སློབ་རྣམ་གཉིས་ནས་གཟེངས་བསྟོད་ཕྱག་འཁྱེར་དང་ཁ་བཏགས་གསོལ་བསྩལ་གནང་། དེ་རྗེས་གཡུང་དྲུང་བོན་གྱི་བཤད་སྒྲུབ་འདུས་སྡེའི་རྒྱན་ཤོག་ཐོབ་མཁན་རྣམས་ལ་༸སྐྱབས་རྗེ་མཁན་སློབ་རྣམས་གཉིས་ཀྱི་དྲུང་ནས་རྒྱན་ཐོབ་བྱ་དགའ་བཞེས།
དེ་རྗེས་ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༤ པ་རིན་པོ་ཆེ་མཆོག་ནས་མཛའ་བརྩེའི་འཚམས་འདྲི་དང་བཅས་དུས་ཆེན་འདི་དང་འབྲེལ་བཀའ་སློབ་སྩལ་དོན། “བཤད་སྒྲུབ་ཐོས་བསམ་སློབ་གཉེར་དེ་གལ་ཆེན་པོ་ཞིག་ཡིན་པ་དང་། ཁྱད་པར་དུ་བསླབ་པ་གསུམ་དང་ཆོས་ལ་ཉམས་ལེན་བྱེད་དགོས་པ་གལ་ཆེན་པོ་རེད། སང་རྒྱས་བསྟན་པ་འདི་ཡང་དགེ་འདུན་གྱི་སྡེ་ལ་རག་ལས་ཡོད་དུས་དེ་དག་ལ་གུས་བརྩི་དང་རིན་མཐོང་བརྩི་དགོས་པ་གལ་ཆེན་པོ་ཡིན་པ་དང་། གཞོན་སྐྱེས་དང་ལོ་ཆུང་བ་ཚོ་ཡིན་ན་ཡང་བསླབ་བྱ་བཟང་པོ་ཞིག་དང་། ཡ་རབ་བཟང་སྤྱོད་ཀྱི་གོམ་གཤིས་ཀྱིས་མི་ཚེ་དོན་དང་ལྡན་པ་ཞིག་བྱེད་དགོས་ཚུལ་དང་། བོད་མི་རིགས་ཀྱི་སྐད་ཡིག་སྦྱོང་བརྩོན་དང་བདག་སྐྱོང་བྱེད་དགོས་པ་དེ་གལ་ཆེན་པོ་ཡིན་ཚུལ་སོགས་” ཀྱི་སྒོ་ནས་བཀའ་སློབ་ཟབ་རྒྱས་བསྩལ་གནང་ཡོད་པ་རེད།
མཇུག་མཐར་གཡུང་དྲུང་བོན་གྱི་བཤད་སྒྲུབ་འདུས་སྡེའི་ཚོགས་གཙོ་མཆོག་ནས་ཐུགས་རྗེ་ཆེ་ཞུའི་གཏམ་བཤད་གནང་སྟེ་དུས་ཆེན་རྒྱལ་ཁའི་ངང་མཇུག་གྲུབ་པ་ཡོད་པ་དང་།
གཡུང་དྲུང་བོན་གྱི་བཤད་སྒྲུབ་འདུས་སྡེའི་ངོས་ནས་༧གཤེན་གྱི་གསང་སྔགས་སྒོམ་སྒྲུབ་གླིང་དུ་སེར་སྐྱ་མི་མང་ཡོངས་ལ་ཉིན་གུང་གསོལ་ཚིགས་རྒྱས་འབུལ་ཞུས་ཡོད་པ་བཅས་ཀྱི་གནས་བསྡུས་ཙམ་དུ་གཡུང་དྲུང་བོན་གྱི་དྲྭ་ཚིགས་གཙོ་སྒྲུབ་ཁང་ནས།
