༸ གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་༧སྐྱབས་རྗེ་མཁན་སློབ་ཉི་ཟླ་ཟུང་གི་ལམ་སྟོན་དང་ཐུགས་བཀོད་འོག་སྨན་རིའི་གླིང་ནས་འཆར་ཅན་གྱི་བསླབ་པ་འཆད་ཉན་ཐོན་རྗེས། དངོས་གཞིའི་ཉམས་ལེན་གྱི་སྡེ་གལ་གནད་དུ་གཟིགས་ནས་ ༢༠༢༡ ལོའི་ཕྱི་ཟླ་༤སྤྱི་ཚེས་༡༥ཉིན་ཚོགས་འདུ་སྐོང་ཚོགས་བརྒྱུད་སྨན་རིའི་སྒྲུབ་གྲྭ་རྫོགས་ཆེན་སྒོམ་སྒྲུབ་འདུས་སྡེའི་བཅའ་ཁྲིམས་གཏན་ལ་ཕབ་ཤིང་། ལོ་དེའི་བོད་ཟླ་ ༣པའི་ཚེས་༡༩ཉིན་ནས་བཟུང་སྐབས་དང་ལོ་སོ་སོར་སྒྲུབ་གྲྭར་འཛུལ་ཞུགས་པ་རྣམས་ཀྱིས་སྔོན་འགྲོ་གསོག་སྦྱོང་ནས་བཟུང་འཕོ་བའི་ལག་ལེན་དང་ཐུན་བཞིའི་ཉམས་ལེན། རྩ་རླུང་དང་མུན་མཚམས་སོགས་གནངས་དང་གནང་མུས་ལྟར།
འདི་ལོར་སྐབས་ལྔ་པའི་སྒྲུབ་གྲྭ་བ་རྣམ་པ་བཞི་ནས་ཀྱང་ཐོག་མར་༧ སྐྱབས་རྗེ་རྒྱལ་བ་སྨན་རི་བ་མཆོག་གིས་གཟའ་སྐར་འཕྲོད་སྦྱོར་གྱི་རྟེན་འབྲེལ་ཐུགས་བརྟགས་གནང་བ་ལྟར་2025 ཟླ་ 4 པའི་ཚེས་ 9 ཉིན་སྔོན་འགྲོ་ཞག་བརྒྱའི་དབུ་འཛུགས་ཀྱི་ཚུལ་དུ་དགེ་རྒན་དགེ་བཤེས་གཡུང་དྲུང་ཡོན་ཏན་མཆོག་དབུ་བཞུགས་ཀྱིས་༧རྗེ་མཉམ་མེད་ཆེན་པོའི་བླ་སྒྲུབ་ཀྱི་ཚོགས་འཁོར་ཕུལ་ཞིང་།
༢༠༢༥ ཟླ་ ༤ པའི་སྤྱི་ཚེས་ ༡༠ ནས་ ༢༠༢༥ ཟླ་ ༧ པའི་ཚེས་ ༢༠ བར་ཉིན་གྲངས་བརྒྱའི་རིང་ཐུགས་རྟེན་སྐུ་གདུང་ལྷ་ཁང་དུ་ཐུན་དུ་བཅད་དེ་བར་མ་ཆད་པར་ཉིན་རེར་སྡེ་ཚན་དགུ་པོ་མ་མཐའ་སྟོང་རེ་བཅས་འབུམ་གཅིག་གི་གྲངས་ཚང་པར་བྱས་ཏེ། སྤྱི་ལོ་ ༢༠༢༥ ཟླ་ ༧ པའི་ཚེས་ ༢༠ དང་གཤེན་གྱི་འབྱུང་ལྡན་སུམ་བརྒྱ་གཅིག་གི་ནང་ཚན་བོད་ཤིང་སྦྲུལ་ལོའི་བོད་ཟླ་ ༥ པའི་ཚེས་ ༢༥ ཉིན་རྒྱུད་མ་སྨིན་པ་སྨིན་པར་བྱེད་པའི་བོན་སྤྱོད་སྔོན་འགྲོ་འབུམ་དགུ་གསོག་སྦྱོང་གི་དགེ་ཚོགས་ཆེན་པོ་ཡོངས་སུ་མཇུག་གྲུབ་ཡོད་ཡོད་པ་དང་། སྤྱི་ཟླ་ ༧ པའི་ཚེས་ ༢༡ དང་བོད་ཟླ་ ༥ པའི་ཚེས་ ༢༦ ཉིན་གཏོང་རག་དུ་༧རྗེ་མཉམ་མེད་ཆེན་པོའི་བླ་སྒྲུབ་ཀྱི་ཚོགས་འཁོར་ཕུལ་ཞིང་། སྐྱབས་རྗེ་༧རྒྱལ་བ་སྨན་རིའི་མཁན་སློབ་རྣམ་པར་མཇལ་ཁ་ཞུས།
འབུམ་དགུ་སོ་སོར་ཉིན་རེ་བཞིན་གསོག་་ཚུལ།
འདིར་སྐབས་སུ་བབ་པར་སྨན་རིའི་སྒྲུབ་གྲྭ་“རྫོགས་ཆེན་སྒོམ་སྒྲུབ་འདུས་སྡེའི་”སློབ་གཉེར་བ་རྣམས་ཀྱིས་ཉིན་གྲངས་བརྒྱའི་རིང་། སྔོན་འགྲོ་འབུམ་དགུ་གསོག་སྦྱོང་བྱེད་ཚུལ་ལ་ཡང་གྲངས་དང་ཐུན་མཚམས་གཉིས་ཀའི་དགོངས་པ་དང་མཐུན་པར་ཉིན་གྲངས་བརྒྱའི་རིང་ཐུན་དུ་བཅད་དེ་བར་མ་ཆད་པར་ཉིན་རེར་སྡེ་ཚན་དགུ་པོ་ཉིང་མཐར་་སྟོང་རེ་བཅས་འབུམ་གཅིག་གི་གྲངས་ཚང་པར་བྱེད་པ་ཡིན་ལ། དེ་ཡང་ཐོག་མར་ཉིན་རེ་བཞིན་ཐོ་རངས་དུས་ཚོད་བཞི་པ་ནས་ངེས་འབྱུང་རྒྱུད་ལ་སྐྱེ་ཞིང་འཁོར་བ་ལ་ཞེན་པ་ལྡོག་པའི་ཐབས་བློ་ལྡོག་རྣམ་བཞིའི་དམིགས་རིམ་གྱི་སྒོ་ནས་ཨ་ཁྲིད་ལྟར་མི་རྟག་པའི་ཚིག་བཤད་རྣམས་བརྗོད།
དེ་ནས་རྒྱ་ཆེ་ལ་གྲངས་མང་བའི་སེམས་ཅན་འདི་དག་ཐམས་ཅད་སྐྱེ་བ་གྲངས་མེད་ནས་རྒྱུད་པས་བདག་གི་ཕ་མ་མ་བྱས་པ་གང་ཡང་མེད་ལ། སེམས་ཅན་རྣམས་ཀྱི་སྡུག་བསྔལ་དང་ཉེས་དམིགས་དག་བསམ་ཞིང་སྙིང་རྗེ་ཡང་དག་པས་ཀུན་ནས་སློང་སྟེ་སྡུག་བསྔལ་ཐ་དག་དང་བྲལ་བ་ནི་ཡང་དག་པ་ཐར་པ་སངས་རྒྱས་ཀྱི་གོ་འཕང་ཉིད་ཡིན་ལ། དེ་ཐོབ་པར་བྱ་བའི་དོན་བདག་གིས་བྱའོ་སྙམ་པའི་སེམས་བསྐྱེད་ཅིང་དེ་ཡང་སེམས་ཅན་གྱི་དོན་ལ་སྐད་ཙམ་རེ་ཡང་སྔ་འཕྱི་ཡོད་པས་ད་ལྟ་ཉིད་ངས་འདིའི་དོན་སྒྲུབ་དགོས་སྙམ་པའི་སེམས་བསྐྱེད་ཀྱི་གཞི་བཟུང་ལ། སྡུག་བསྔལ་འདི་དག་ལས་སྐྱོབས་པའི་ནུས་པ་ནི་སྐྱབས་གནས་ཡུལ་མཆོག་གནས་བཞི་ལ་ཡོད་པས། དེ་དག་ལ་སྐྱབས་སུ་འགྲོ་བའི་སྒོམ་རིམ་གསལ་གདབ་དང་ཚིག་བཤད་རྣམས་བརྗོད་ལ། ཐོབ་བྱའི་སངས་རྒྱས་ཀྱི་འབྲས་བུ་ནི་སྐུ་གསུམ་ཉིད་ཡིན་པས་དེ་ཡི་སྙིང་པོ་དུ་ཏྲི་སུ་དང་། མ་ཏྲི། ས་ལེ་འོད་བཅས་ཀྱི་སྒོམ་བཟླས་བརྗོད་ཅིང་། དེ་ལྟར་ཡིད་ཀྱིས་སྐྱབས་འགྲོ་དང་སྙིང་པོ་རྣམ་གསུམ་གྱི་སྒོམ་རིམ་དང་མ་འབྲལ་བར་བདག་དང་མཉམ་དུ་གྲངས་མེད་པའི་སེམས་ཅན་ཇི་སྙེད་ཅིག་གི་ཕྱག་བཙལ་བར་དམིགས། ངག་གིས་ཀྱང་དེ་བཞིན་ཟླ་བའི་སྒོ་ནས་ལུས་གུས་པས་སྙེ་མ་རླུང་གིས་བསྐྱོད་པ་ལྟར་ཡན་ལག་སྨད་ལྔས་ཕྱག་སྟོང་གཅིག་བཙལ། གཞུང་ལས་“གང་ཞིག་དགེ་བ་ལ་སྤྱོད་ཅིང་སྒྲུབ་པ་མཐའ་དག་ཀྱང་ཤིན་ཏུ་ངོ་མཚར་ཆེ་ཞིང་རབ་ཏུ་ཡིད་རང་ངོ་སྙམ་པའི་བསམ་པ་བཟུང་། བདག་དང་འགྲོ་བ་ལས་སོགས་བྱ་སྟེ། རྗེས་སུ་ཡིད་རང་དགེ་རྩ་བསམ་གྱིས་མི་ཁྱབ”ཅེས་གསུངས་པ་ལྟར་རྗེས་སུ་དགེ་བ་དེ་དག་ལས་སོགས་སེམས་ཅན་ཀུན་གྱིས་དུས་གསུམ་དུ་བསགས་པའི་དགེ་རྩ་ཐམས་ཅད་བྱང་ཆུབ་ཏུ་བསྔོ་བ་ཚིག་བཤད་དང་བཅས་པ་བྱའོ།།
དེ་རྗེས་དུས་ཚོད་དགུ་པ་དང་ཕྱེད་ནས། བསོད་ནམས་དང་ཡེ་ཤེས་ཀྱི་ཚོགས་གཉིས་བསག་པའི་ཐབས་མ་འདལ་འབུལ་བ་ལ། གཞུང་ལས་“འབུལ་བའི་དུས་སུ། དང་པོར་སེམས་བསྐྱེད་སྐྱབས་འགྲོ་སྡིག་བཤགས་ལས་སོགས་བྱ་ཞིང་། ཅེས་གསུང་པ་ལྟར། དེ་ཡང་སེམས་བསྐྱེད་ནི་དགེ་བ་ཐམས་ཅད་ཀྱི་སྔོན་དུ་འགྲོ་དགོས་པས་ཐོག་མར་ཨ་ཁྲིད་ཀྱི་སྔོན་འགྲོའི་ཚིགས་བཤད་ལྟར་སེམས་བསྐྱེད་ནས་ཕྱག་སྐྱབས་འགྲོ། སྡིག་བཤགས། མ་འདལ་འབུལ་བའི་ཚིགས་བཤད་རྣམས་བརྗོད་ཅིང་གཞུང་ལས་གསུང་པ་ལྟར་མ་འདལ་བཤམས་བཀོད་དང་དམིགས་རིམ་ལེགས་པར་བྱ་ལ། “ཨེ་མ་འབྱུང་ལྔའི་”སོགས་ཀྱི་ཚིགས་བཤད་ཀྱིས་མ་འདལ་གྲངས་སུ་བསགས་ཅིང་། མཇུག་ཏུ་ཞུང་ལས། “དེ་ནས་མྱ་ངན་མི་འདའ་ལས་སོགས་པས་གསོལ་བ་བཏབ། བདག་གི་ལུས་སྐུ་ལས་སོགས་པས་སྨོན་ལམ་བཏབ། རྗེས་སུ་དགེ་བ་བྱང་ཆུབ་ཏུ་བསྔོ་ཞིང་། བསྡུ་ན་མཐའ་ནས་གཡོན་བསྐོར་དུ་མ་འཁྲུགས་པར་བླང་ལ། བོན་ཉིད་སེམས་ཉིད་ལས་སོགས་པའི་ཚིག་བཤད་བྱ།”ཞེས་གསུང་ལྟར་ཐོག་མར་མ་འདལ་འབུལ་བའི་ཚིག་བཤད་“ཨེ་མ་འབྱུང་ལྔའི་”ཅན་ལན་གཉིས་དབྱངས་སུ་གྱེར་ལ། གསོལ་འདེབས་ཀྱི་སྒོམ་རིམ་དང་སྨོན་ལམ། དེ་རྗེས་མ་འདལ་བསྡུ་བའི་ཚིགས་བཤད་བརྗོད་ཅིང་མཐར་བསྔོ་བ་སྨོན་ལམ་གྱིས་རྒྱས་གདབ་བྱའོ།།
ཕྱི་དྲོར་དུས་ཚོད་ ༢།༣༠ ནས་སེམས་བསྐྱེད་ཀྱི་སྒོམ་རིམ་དང་བཅས་ཏེ་གྲངས་སུ་བསག་པ་ལ། ཐོག་མར་བདག་གི་དྲིན་ཅན་ཕ་མ་སེམས་ཅན་ཐམས་ཅད་འཁོར་བའི་རྒྱ་མཚོ་ཆེན་པོ་འདི་ལས་ཐར་བར་བྱེད་པའི་ལས་ནི་བདག་གིས་བྱ་འོས་ལ་དེ་ཡང་སངས་རྒྱས་སྒྲུབ་པའི་ཐབས་ཁྱད་དུ་འཕགས་པའི་མན་ངག་འདིའི་སྒོར་ཞུགས་ཏེ། དུས་ད་ལྟ་སོ་མ་ཉིད་ནས་ཉེ་རིང་ཆགས་སྡོང་དང་བྲལ་བའི་སེམས་ཅན་གྱི་དོན་བྱ་དགོས་སོ་སྙམ་པའི་སེམས་བསྐྱེད་ཅིང་། ཨ་ཁྲིད་ལྟར་ཚིག་བཤད་“ན་མོ་ཕྱོགས་བཅུ་ན་”སོགས་བརྗོད་ཅིང་། ཡིད་དམིགས་པ་དང་མ་བྲལ་ཞིང་། ལུས་ཚུལ་དང་ལྡན་པའི་སྒོ་ནས་ངག་གིས་“ཅི་ལྟ་རྒྱལ་བ་”གྲངས་སྟོང་རེ་འགྲོ་ངེས་པར་བསགས། མཇུག་ཏུ་ཡང་སེམས་བསྐྱེད་ཀྱི་ཚིག་བཤད་ཅི་ལྟ་རྒྱལ་བ་ལན་གཉིས་དབྱངས་སུ་གྱེར་ཞིང་ཨ་ཁྲིད་ལྟ་སེམས་བསྐྱེད་ཀྱི་ཚིག་བཤད་བརྗོད་ལ། ཞུ་ཐིམ་གྱི་དམིགས་རིམ་སོགས་གཞུང་ལྟ་བྱ་ཞིང་བསྔོ་བའི་ཚིགས་བཤད་བརྗོད། དེ་ལྟར་གྱི་དགེ་ཚོགས་ཅི་མཆིས་པ་ཐམས་ཅད་མ་གྱུར་འགྲོ་བ་ཀུན་གྱི་དོན་དུ་མི་དམིགས་པའི་བསྔོ་བས་རྒྱས་གདབ་པར་བྱའོ།།
ཕྱི་དྲོ་དུས་ཚོད་ ༤།༣༠ ནས་བཤགས་པའི་སྙིང་པོ་ཡི་གེ་བརྒྱ་པ་གསོག་སྦྱོང་ལ་འཇུག་པ ཐོག་མར་གོང་ལྟར་གྱི་སྐྱབས་ཡུལ་རྣམ་རང་གི་སྤྱི་གཙུག་སམ་མདུན་གྱི་ནམ་མཁའ་ལ་སྒོམ་ཞིང་བདག་དང་མཁའ་མཉམ་སེམས་ཅན་ཐམས་ཅད་ཀྱིས། སྐྱེ་བ་གྲངས་མེད་པ་ནས་ད་ལྟའི་བར་མ་རིག་མ་རྟོགས་པའི་དབང་གིས་ལུས་ངག་ཡིད་གསུམ་གྱིས་སྡིག་པ་མི་དགེ་བའི་ལས་གང་དང་ཅི་ཞིག་བགྱིས་པ་འདི་དག་གིས་དབང་གི་འཁོར་བར་འཁྱམས་ཞིང་སྡུག་བསྔལ་འདི་དག་མྱོང་བ་ཡིན་པས། དེ་དག་ཐམས་ཅད་ལ་མགྱོད་པ་དྲག་པོས་ཕྱིས་མི་བྱེད་པའི་དམ་བཅའ་བའི་སྒོ་ནས་ཨ་ཁྲིད་ལྟར་བཤགས་པའི་ཚིག་བཤད་བརྗོད་ཅིང་། དེ་ནས་ “གཟུངས་ཀྱི་རྒྱལ་པོ་ཡི་གེ་བརྒྱ་རྩ་གཅིག་པ་འདིས་ནི་ཚེ་རབ་གཅིག་གི་སྒྲིབ་པ་ནི་སྨོས་ཅི་བསྐལ་པ་དུ་མའི་སྒྲིབ་པ་ཡང་དུས་གཅིག་དུ་བྱང་བར་འགྱུར་”ཞེས་གསུང་པ་ལྟར། ཡི་གེ་བརྒྱ་གྲངས་སུ་བསགས་ཅིང་། ཚེ་རབས་ནས་བསགས་པའི་བག་ཆགས་སྡིག་སྒྲིབས་ཐམས་ཅད་རང་གི་བ་སྤུའི་བུ་ག་ནས་ནག་ནུར་གྱིས་བུད་ཅིང་། རང་དང་སེམས་ཅན་ཐམས་ཅད་ཀྱི་ལུས་ཤེལ་དཀར་ལྟར་དཀར་གཙང་ངེར་སོང་བར་བསམ་པའི་སྒོ་ནས་གྲངས་སྟོང་དུ་བསགས་ཅིང་། མཐར་ཡིག་ཚར་གཉིས་དབྱངས་སུ་གྱེར་ཞིང་གཞུང་ལྟར་གོང་གི་ཚིག་བཤད་བརྗོད་ལ། ཞུ་ཐིམ་བྱ། དགེ་བ་ཀུན་གྱི་རྗེས་སུ་བསྔོ་བས་ཟིན་པ་བྱ་དགོས་པ་ལྟར་ཨ་ཁྲིད་སྔོན་འགྲོ་ལྟར་བསྔོ་བའི་ཚིག་བཤད་རྣམས་བརྗོད་པའོ།
ཨ་ཁྲིད་ཐུན་མཚམས་བཅོ་ལྔ་པ་ལས། “དེ་ཡང་སྔ་དགོང་གསོལ་བ་འདེབས་པར་འབད་ཅིང་། གུང་དུས་མ་འདལ་སྐྱབས་སེམས་ལས་ སོགས་བྱ་ཆ་གཞན་ཡང་ཅི་ལྕོགས་སུ་བྱའོ།”ཞེས་གསུང་པ་ལྟར། དགོང་མོར་བླ་མའི་རྣལ་འབྱོར་ལ་བརྩོན་པར་བྱ་སྟེ། དེ་ཡང་མདོ་དྲི་མེད་ཀྱི་ལུང་བཀའ་ལུང་རྒྱ་མཚོ་རུ་དྲངས་པ་ལས། “བླ་མས་མ་བསྟན་སངས་རྒྱས་ཞལ་གསུང་མེད། །བླ་མ་མ་བྱོན་སངས་རྒྱས་ཞལ་མཐོང་མེད། ། བླ་མས་མ་བཀྲོལ་བཀའ་ལུང་མན་ངག་མེད། །དེཕྱིར་ཐམས་ཅད་བླ་མ་དག་ལ་བསྟེན།”།ཞེས་གསུངས་པ་ལྟར་དཔོན་གསས་བླ་མ་དེ་ཉིད་ལ་མ་རྟེན་པར་གདམ་ངག་གྱི་ཡོན་ཏན་དང། ཉམས་རྟོགས་དང་བྱིན་རླབས་གང་ཡང་མི་འབྱུང་བས། མ་རིག་གི་མུན་པ་སེལ་བའི་བླ་མ་དམ་པ་ལ་གསོལ་འདེབས་ཅིང་མོས་གུས་ཀྱིས་སྐྱབས་ཡུལ་རྣམས་དང་ཁྱད་པར་རྩ་བའི་བླ་མ་རྒྱུད་པ་དང་བཅས་པ་སྒོམ་ཞིང་ཨ་ཁྲིད་ལྟར་“བླ་མ་བདེར་གཤེགས་”སོགས་ཚིགས་བཤད་བརྗོད་ཅིང་བདག་དང་སེམས་ཅན་ཐམས་ཅད་ཀྱིས་བླ་མའི་གསོལ་འདེབས་ཀྱི་སྒྲ་འུར་འུར་དུ་སྒྲོག་པས་དམིགས་ཏེ་གྲངས་ཚང་པར་བསགས་ལ། མཇུག་ཏུ་དེ་ལྟར་གྱི་བརྒྱུད་པའི་བླ་མ་དང་བཅས་ཐམས་ཅད་རྩ་བའི་བླ་མ་ལ་ཐིམས། རྩ་བའི་བླ་མ་གདན་ཁྲི་དང་བཅས་པ་འོད་དུ་ཞུ་ནས་སེམས་ཅན་ལ་ཐིམས་པས་སྐུ་གསུང་ཐུགས་ཀྱི་དངོས་གྲུབ་ཐམས་ཅད་ཐོབ་པར་བསམ་པ་སོགས་ཀྱིས་ཞུ་ཐིམ་གྱི་རིམ་པ་རྣམས་བྱ་ལ། རྗེས་སུ་མི་དམིགས་པའི་བསྔོ་བས་རྒྱས་གདབ་པའོ། དེ་ལྟར་ཉིན་ཞག་བརྒྱ་ལ་བརྩོན་པས་གྲངས་ཚད་ཀྱིས་དབང་དུ་བྱས་ན་འབུམ་གཅིག་དང་ཐུན་མཚམས་ཀྱིས་ཞགས་བརྒྱའི་ཐུན་དུ་འགྲོ་བ་ཡིན་ནོ།།
