༸སྐྱབས་རྗེ་རྒྱལ་བ་སྨན་རིའི་དཔོན་སློབ་རིན་པོ་ཆེ་མཆོག སོག་པོའི་བོན་དགོན་དཔལ་གཤེན་བསྟན་སོག་གཡུང་དྲུང་རིན་ཆེན་གླིང་གི་མཁན་པོ་སྨན་རིའི་དགེ་བཤེས་བཟོད་པ་རྒྱ་མཚོ་མཆོག་གཙོས་འབྲེལ་ཡོད་རྣམས་ནས་གསོལ་འདེབས་ཞུས་དོན་བཞིན་སྤྱི་ལོ་ ༢༠༢༥ ཟླ་པའི་ ༧ པའི་ཚེས་ ༨ ནས་ ༢༢ བར་སོགས་ཡུལ་དུ་བསྟན་འགྲོའི་མཛད་འཕྲིན་བསྐྱངས་གནང་ཡོད་པ་རེད།
སྐྱབས་རྗེ་མཆོག་སྐུ་འཁོར་ལྷན་རྒྱས་ཕྱི་ལོ་ ༢༠༢༥ ཟླ་ ༠༧ ཚེས་ ༨ ཉིན་རྒྱ་གར་རྒྱལ་ས་ལྡི་ལི་ནས་མཁའ་ལམ་བརྒྱུད་ཧོང་ཀོང་ (HONG Kong ) དང་དེ་ནས་ཆེན་པོ་ཧོར་གྱི་རྒྱལ་ས་ཨུ་ལན་བྷ་ཊར་ (Ulaanbaatar) གྱི་རྒྱལ་སྤྱིའི་གནམ་ཐང་དུ་ཞབས་སོར་བདེ་བར་བཀོད། དེར་སོག་པོའི་བོན་དགོན་དཔལ་གཤེན་བསྟན་སོག་གཡུང་དྲུང་རིན་ཆེན་གླིང་གི་མཁན་པོ་སྨན་རིའི་དགེ་བཤེས་བཟོད་པ་རྒྱ་མཚོ་མཆོག་གཙོས་འབྲེལ་ཡོད་རྣམས་ནས་ཕེབས་བསུ་ཞུས་ཤིང་།
དེ་ནས་སྣུམ་འཁོར་བརྒྱུད་དཔལ་གཤེན་བསྟན་སོག་གཡུང་དྲུང་རིན་ཆེན་གླིང་དུ་གདན་ཞུས་གནང། འདི་ནི་༸སྐྱབས་རྗེ་མཆོག་དགོན་འདིར་ཕེབས་ཐེངས་གཉིས་པ་དེ་ཡིན། ཕྱི་ཚེས་ ༡༡ ཉིན་རྒྱལ་སར་ཨུ་ལན་བྷ་ཊར་ (Ulaanbaatar )དུ་ཆེན་པོ་ཧོར་གྱི་དབྱར་སྟོན་ཆེན་མོ་གནའ་ངྷམ་ (NAADHM) དུས་ཆེན་ལ་མཉམ་ཞུགས་དང་། དེ་བཞིན་དགའ་ལྡན་དགོན་ཆེན་དང། ཇིང་གིར་རྒྱལ་པོའི་འགྲེམ་སྟོན་ཁང་ (CHINGGIS KHAAN MUSEUM)ཆེན་མོ་སོགས་སུ་གཟིགས་སྐོར་སོགས་མཛད།
ཕྱི་ཚེ་ ༡༢ ཉིན་ཨ་རི་ནས་ཕེབས་པའི་སློབ་མ་རྣམས་དང་ལྷན་སོག་པོའི་སྤྱི་གླིང་དང་ཇིང་གིར་རྒྱལ་པོའི་དྲན་རྟེན་སྐུ་བརྙན་ཆེན་པོ་དང་། གཞན་ཡང་བདག་མེད་ཡན་འགར་དུ་གནས་པའི་རིའི་རྟ་རྒོད་ཀྱི་ཁྱུ་ཚོགས་དང། སོག་པོའི་རྟ་ལུག་ར་དང་འདོད་འཇོའི་བ་མོ་དང་རྔ་མོང་བཅས་ཀྱི་འཚོ་བར་རོལ་པའི། འབྲོག་ཕྱོགས་སུ་གཟིགས་སྐོར་གྱིས་ཞག་བཞུགས་མཛད།
ཕྱི་ཚེས་ ༡༥ ནས་ ༡༩ ཉིན་གྱི་བར་ཕྱི་གླིང་གི་སློབ་མ་རྣམས་གཙོས་པའི་དད་ལྡན་སློབ་མ་རྣམས་ལ་འཁོར་ལོ་བཞི་སྦྲགས་ཀྱི་གདམས་ཁྲིད་དང་རྫོགས་ཆེན་བཀའ་རྒྱུད་སྐོར་བཞིའི་ལྗགས་ལུང་སོགས་གནང་།
ཕྱི་ཚེས་ ༢༠ ཉིན་༧དཔལ་གཤེན་བསྟན་སོག་གཡུང་དྲུང་གླིང་གི་མཁན་པོ་དགེ་བཤེས་བཟོད་པ་རྒྱ་མཚོ་མཆོག་དབུས་པའི་དད་ལྡན་མང་ཚོགས་ལ་ཚེ་དབང་བྱ་རི་མའི་བཀའ་དབང་དང་དགེ་སྡིག་བླང་དོར་གྱི་བོན་འཁོར་རྒྱ་ཆེན་བསྐོར་གནང་མཛད་ཅིང། དེར་མི་རབས་རྒན་གཞོན་རྣམས་ཀྱིས་སོག་པོའི་གླུ་གར་བྲོ་གསུམ་དང་སྒྲ་སྙན་སོགས་རིགས་གཞུང་སྣ་ཚོགས་འཁྲབ་སྟོན་གཟིགས་འབུལ་ཞུས་པ་སོགས་ཀྱི་དགའ་སྟོན་བྱས།
ཕྱི་ཚེས་ ༢༡ ཉིན་མཁན་པོ་དགེ་བཤེས་བཟོད་པ་རྒྱ་མཚོ་མཆོག་གི་ཐུགས་རེ་ལྟར་རིས་མེད་བསྟན་པ་འཛིན་པའི་སྐྱེས་ཆེན་རྣམས་ཀྱི་མཛད་པ་འཕྲིན་ལས་རྒྱས་པ་དང་། ཡུལ་འདིའི་སྣོད་བཅུད་ཐམས་ཅད་བདེ་སྐྱིད་ལོ་ལེགས་འབྱུང་སླད་དགོན་པའི་རྒྱབ་རིའི་སྐུ་གསུམ་སྐྱེད་ཚལ་དུ་རྩི་ཤིང་སྣ་ཚོགས་འདེབས་འཛུགས་མཛད།
ཕྱི་ཚེས་༢༢ ཉིན་ཆེན་པོ་ཧོར་གྱི་རྒྱལ་ས་ནས་ཧོང་ཀོང་བརྒྱུད་(HONG KONG )རྒྱ་གར་རྒྱལ་ས་ལྡི་ལི་དང་། ཕྱི་ཚེས་ ༢༤ ཉིན་སྐུ་འཁོར་ལྷན་རྒྱས་རང་དགོན་༸གདན་ས་སྨན་རིར་ཞབས་སོར་བདེ་བར་བཀོད་གནང་ཡོད་པ་བཅས་ཀྱི་་གནས་ཚུལ་རགས་བསྡུས་སུ།
གནས་ཚུལ་དང་པར་རིས་མཁོ་འདོན་པ། བྱ་འཕུར་དགེ་བཤེས་ཚེ་དབང་རིག་འཛིན།
