སྙིགས་མའི་དུས་འདིར་སྤྱིར་སངས་རྒྱས་ཀྱི་བསྟན་པ་སྤྱི་དང་བྱེ་བྲག་གཡུང་དྲུང་གི་བོན་རིན་པོ་ཆེ་ལ་བཀའ་དྲིན་གཞལ་ཟླ་བྲལ་བའི་བསླབ་གསུམ་བསྟན་པའི་་བདག་ཉིད་༸སྐྱབས་རྗེ་རྒྱལ་བ་སྨན་རིའི་ཡོངས་འཛིན་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག་དགུངས་གྲངས་བརྒྱ་ཧྲིལ་བོར་བཞེས་ནས་རེ་ཞིག་གླིང་འདིར་བསྟན་འགྲོའི་དོན་ཡོངས་སུ་གྲུབ་ཅིང་སྤྱི་ལོ་ ༢༠༢༥ ཟླ་ ༦ པའི་ཚེས་པ་ ༡༢ ཞོགས་པར་གནས་མཆོག་བྱ་མ་རི་ཁྲིད་དུ་“མི་རྟག་ཚུལ་བསྟན་དགོངས་པ་མྱ་ངན་འདས། བདེ་ཆེན་དབྱིངས་གཤེགས་མཛད་ལ་ཕྱག་འཚལ་ལོ།” ཞེས་གསུང་པ་བཞིན་བདག་ཅག་གདུལ་བྱའི་སྣང་ངོར་སྐུ་མི་རྟག་མྱ་ངན་ལས་འདས་པའི་ཚུལ་བསྟན་ཏེ་དགུང་ཞག་ཞེ་དགུ་ཡོངས་སུ་མཇུག་གྲུབ་པའི་རྗེས་ཏེ།
སྤྱི་ལོ་ ༢༠༢༥ ཟླ་ ༨ པའི་ཚེས་པ་ ༣ ནས་ ༩ བར་བལ་ཡུལ་༸དཔལ་ལྡན་ཁྲི་བརྟན་ནོར་རྩེའི་འདུས་སྤྱིའི་གོ་སྒྲིགས་གནང་ཐོག ༸ཞྭ་དཀར་བསྟན་པའི་གཙུག་རྒྱན་༸སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༤ པ་རིན་པོ་ཆེ་མཆོག་དབུ་བཞུགས་ཀྱིས་སྐྱབས་རྗེ་རྒྱལ་བ་སྨན་རིའི་དཔོན་སློབ་རིན་པོ་ཆེ་མཆོག་དང་༸དཔལ་ལྡན་ཁྲི་བརྟན་ནོར་བུ་རྩེའི་མཁན་པོ་ལུང་རྟོགས་བསྟན་པ་གཡུང་དྲུང་མཆོག་དང་། དཔོན་སློབ་ཚངས་པ་བསྟན་འཛིན་མཆོག་གཞན་ཡང་བཤད་སྒྲུབ་མཁན་སློབ་རྣམ་པ་གཙོས་རྒྱ་བལ་གཉིས་ཀྱི་བོན་དགོན་ཁག་གི་དབུ་བླ་མཁན་སྤྲུལ་རྣམས་དང་དད་ལྡན་སེར་སྐྱ་མི་མངས་ལྷན་འཚོགས་ཀྱིས་ཀུན་རིག་ལས་བཞི་རྒྱུན་ལྔ་དང་། ཀློག་རྒྱས་ཀྱི་སྦྱིན་སྲེག སྨོན་ལམ་མཐའ་ཡས། མ་རྒྱུད་སོགས་གསུངས་ཏེ། སྐུ་གདུང་རིན་པོ་ཆེ་ཞུགས་འབུལ་གནང་ཡོད་པ་རེད།
ད་ཡང་སྤྱི་ལོ་ ༢༠༢༥ ཟླ་ ༧ ཚེས་ ༣༡ ཉིན་གདན་སྨན་རི་ནས་གདུང་མཆོད་དུ་ཕེབས་པའི་གྲྭ་བཙུན་དགུ་བཅུ་མ་ཟིན་ཙམ་དགོན་པ་གཞུང་གིས་གོ་སྒྲིགས་གནང་བའི་སྤྱི་སྤྱོད་རླངས་འཁོར་ནང་དཔལ་ལྡན་ཁྲི་བརྟན་ནོར་རྩེར་ཕེབས་གནང་ཡོད་པ་དང་། སྤྱི་ཟླ་ ༨ པའི་ཚེས་པ་ ༣ གྱི་སྔ་དྲོའི་བར་བཅའ་བཟོ་མཆོད་བཤམས་ཀྱི་རིམ་པ་རྣམས་གྲུབ་པར་བགྱིས་ཤིང་། (ཉིན་དེར་༸སྐྱབས་རྗེ་རྒྱལ་བ་སྨན་རིའི་མཁན་སློབ་རྣམ་གཉིས་༸དཔལ་ལྡན་ཁྲི་བརྟན་ནོར་རྩེར་ཞབས་སོར་བཀོད་གནང་བའི་གནས་ཚུལ་ལ་གཟིགས།)
ཕྱི་དྲོའི་དུས་ཚོད་གསུམ་པའི་ཐོག་རྒྱལ་བསྟན་གཟི་བརྗིད་འོད་འབར་གཙུག་ལག་ཁང་དུ་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་རིནཔོ་ཆེ་དབུ་བཞུགས་ཀྱིས་༸མཁན་པོ་བསྟན་པ་གཡུང་དྲུང་མཆོག་དང་བཤད་སྒྲུབ་མཁན་པོ་རྣམ་པ་གཉིས་གཞན་ཡང་ཀུན་རིག་དབུ་མཛད་སྒྲུབ་གྲྭའི་མཁན་པོ་མཆོག་གཙོས་དགེ་བའི་བཤེས་གཉེན་རྣམ་པ་མི་ཉུང་བ་ཞིག་གིས་ལས་གཞི་རྒྱུན་ལྔའི་ཀུན་རིག་གི་འཕྲིན་ལས་དབུ་འཛུགས་གནང་ཡོད་པ་དང་།
ཕྱི་ཉིན་སྤྱི་ལོ་ ༢༠༢༥ ཟླ་ ༨ པའི་ཚེས་པ་ ༤ དང་ ༥ བོད་ཤིང་སྦྲུལ་ལོའི་བོད་ཟླ་དྲུག་པའི་ཚེས་པ་ ༡༠ དང་༡༡ གཉིས་ལ་༸སྐྱབས་རྗེ་༸རྒྱལ་བ་སྨན་རི་བ་མཆོག་དབུ་བཞུགས་ཀྱིས་མཁན་སློབ་རྣམ་པ་གཙོས་དགེ་བའི་བཤེས་གཉེན་མི་ཉུང་བ་ཞིག་གིས་ཀུན་རིག་ལས་བཞིན་རྒྱུན་ལྔའི་ཆོ་ག་གསུང་ཞིང་སྤྱི་ཟླ་བརྒྱད་པའི་ཚེས་ ༦ བོད་ཟླ་ ༦ པའི་ཚེས་ ༡༢ ཉིན་སྐུ་གདུང་སྐུ་གདུང་རིན་པོ་ཆེ་ཞུགས་འབུལ་གནང་ཡོད་པ་དང་།་(ཞུགས་འབུལ་ཉིན་གྱི་གནས་ཚུལ་རྣམས་སྔར་བཀོད་ཟིན་པ་དེར་གཟིགས།)
སྤྱི་ལོ་ ༢༠༢༥ ཟླ་ ༨ པའི་ཚེས་ ༩ བོད་ཟླ་ ༦ པའི་ཚེས་ ༡༥ ཉིན་གྱི་སྔ་དྲོར་༸སྐྱབས་རྗེ་རྒྱལ་བ་སྨན་རིའི་མཁན་སློབ་རྣམ་གཉིས་དང་༸དཔལ་ལྡན་ཁྲི་བརྟན་ནོར་རྩེའི་མཁན་སློབ་རྣམ་གཉིས་གཙོས་བླ་མ་རྣམ་པ་དང་ཀུན་རིག་གསུང་མཁན་གྱི་སྒྲུབ་གཤེན་པ་རྣམས་ཀྱིས་སེར་འཕྲེང་དང་བཅས་ཏེ། སྨོན་ལམ་ཤིང་རིང་རྣམས་འཆད་རར་གདན་དྲངས་ཤིང་། གཤེན་རབ་མཆོད་རྔ་གྲུབ་མཚམས་སེར་སྐྱ་མི་མང་ཡོངས་ལ་གསོལ་ཇ་དང་འབྲས་སེལ་འདེགས་འབུལ་ཞུས།
དེ་ནས་རིམ་པར་སྨོན་ལམ་ཤིང་རིང་དང་གྲུབ་མཆོད་སྨོན་ལམསོགས་གསུང་ཞིང་མཇུག་ཏུ་༸སྐྱབས་རྗེ་རྒྱལ་བ་སྨན་རི་བ་མཆོག་ནས་བསྔོ་བ་བདེ་ལེགས་ཀུན་འབྱུང་གསུང་གནང་ཤིང་འདུས་མང་ཡོངས་ནས་བསྔོ་སྨོན་རྣམ་པར་དག་པས་ཡོངས་རྒྱས་གདབ་མཚམས། སེར་སྐྱ་མི་མང་ཡོངས་ནས་སྦྱིན་སྲེག་གི་དཀྱིལ་འཁོར་མཇལ་ཞོར་་དགོན་པར་གླེང་སྐོར་ཕེབས་པ་དང་། ༸དཔལ་ལྡན་ཁྲི་བརྟན་ནོར་རྩེའི་མཁན་པོ་བསྟན་པ་གཡུང་དྲུང་མཆོག་ནས་དེར་ཕེབས་སེར་སྐྱ་ཡོངས་ལ། ༸སྐྱབས་རྗེ་བདེ་བར་གཤེགས་པའི་བྱིན་རྟེན་ན་བཟའ་དང་། གདུང་ཚ་སོགས་གནང་ཞིང་། དེ་རྗེས་གདུང་ཀློང་གཉིས་ཀྱི་ཀུན་རིགས་ལས་བཞི་རྒྱུ་ལྔའི་གཏོང་རག་གི་ཚོགགས་འཁོར་དང་བཀྲ་ཤིས་གཤེགས་སྤྱོད་སོགས་མཇུག་ཡོངས་སུ་གྲུབ་པར་བྱས་ཡོད་པ་བཅས་ཀྱི་གནས་བསྡུས་སུ། གཡུང་དྲུང་བོན་གྱི་དྲྭ་རྒྱ་ལྷན་ཚོགས་ནས།
སྤྱི་ལོ་ ༢༠༢༥ ཟླ་ ༨ ཚེས་ ༡༠ ཉིན་༧རྗེ་མཉམ་མེད་བླ་སྒྲུབ་ཀྱི་བཀའ་དབང་བསྩལ་གནང་བའི་གནས་ཚུལ་འདི་ནས་གཟིགས།
