གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་དེང་དུས་སྤྱི་ཚོགས་ཀྱི་གནས་བབ་དང་། ཞིབ་འཇུག་བྱེད་ཕྱོགས་ཐད་ཀྱི་དགོས་པར་དམིགས་ནས། ལོ་ངོ་དུ་མའི་སྔོན་ནས་གཡུང་དྲུང་བོན་གྱི་བཤད་སྒྲུབ་འདུས་སྡེའི་སློབ་གཉེར་བ་དག་ལ་བདུན་རེའི་བགྲོ་གླེང་དང་། རྩོམ་རྒྱུགས་སོགས་གནང་བའི་སྲོལ་བཙུགས་ཡོད་ཅིང་། བར་ལམ་ནས་དགོས་དམིགས་ཀྱིས་བདུན་རེའི་བགྲོ་གླེང་གི་ཚབ་ཏུ་ཟླ་རེའི་བགྲོ་གླེང་གཏན་འབེབས་བྱས་ཤིང་། དེ་ཡང་འཛིན་གྲྭ་གོང་འོག་བར་གསུམ་ནས་སློབ་གཉེར་བ་རེ་རེ་བཅས་མི་གསུམ་ནས་བགྲོ་གླེང་བརྗོད་བྱ་རང་མོས་ནས་བདམ་ཐོན་བྱས་ཐོག་བགྲོ་གླེང་གནང་བཞིན་པ་ལྟར་།
ཕྱི་ལོ་ ༢༠༢༥ ལོའི་ཟླ་ ༩ ཚེས་ ༨ ཉིན་གཡུང་དྲུང་བོན་གྱི་བཤད་སྒྲུབ་འདུས་སྡེའི་ཟླ་རེའི་བགྲོ་གླེང་སྐབས་ ༡༩ པ་འཚོགས་གནང་ཡོད་ཅིང་། དེ་ཡང་༧སྐྱབས་རྗེ་རྒྱལ་བ་སྨན་རིའི་མཁན་སློབ་རྣམ་གཉིས་དབུ་བཞུགས་ཀྱིས་བཤད་སྡེའི་དགེ་རྒན་རྣམ་པ་དང་ དགེ་བཤེས་དང་སློབ་གཉེར་བ་ཚང་འཛོམས་ཐོག
ཐོག་མར་རིག་གནས་འགན་འཛིན་གྱིས་གཙོ་སྐྱོང་ཐོག་ཕྱི་དྲོའི་དུས་ཚོས་ ༥།༣༠ བགྲོ་གླེང་དབུ་འཛུགས་གནང་ཞིང་དང་གཏམ་བཤད་པ་དང་པོ་འཛིན་གྲྭ་གོང་མའི་ཁོངས་ནས་བཀའ་རམས་པ་ཚེ་དབང་རིན་ཆེན་ལགས་ནས་༼ཕར་ཕྱིན་སྐབས་དང་པོ་ལས་གསུང་པའི་“དད་”པའི་སྐོར་༽ཞེས་པའི་བརྗོད་གཞི་དང་འབྲེལ་ནས་ དང་པོ་དད་པའི་མཚན་ཉིད། གཉིས་པ་དད་པ་ལ་དབྱེ་བ། གསུམ་པ་དད་པ་མེད་པའི་སྐྱོན། བཞི་པ་དད་པའི་ཕན་ཡོན་བཅས་སྡེ་ཚན་བཞི་རུ་ཕྱེས་ཏེ་གསུང་བཤད་གནང་ཡོད་པ་དང་།
དེ་རྗེས་རྫོགས་ཆེན་སློབ་གཉེར་བ་ཚུལ་ཁྲིམས་འོད་ཟེར་ལགས་ནས་༼བོན་གྱི་ཚད་མ་རིག་པའི་བྱུང་རིམ་མདོར་བསྡུས་༽ཞེས་པའི་བརྗོད་གཞིའི་ཐོག་ནས། ༡ ཚད་མ་རིག་པ་ཞེས་པའི་གོ་དོན། ༢ཚད་མ་རིག་པའི་བྱུང་རབས། ༣ཚད་མ་རིག་པའི་རྣམ་བཞག་བསྟན་པའི་གཞུང་ངོ་སྤྲོད། ༤ ཚད་མ་རིག་པ་བསྟན་བྱེད་ཀྱི་ལུང་ཚིག ༥གཞུང་དེ་རྣམས་ལས་ཚད་མ་རིག་པ་བསྟན་ཚུལ་བཅས་ཀྱི་སྒོ་ནས་གསུང་བཤད་དང་དྲི་བ་དྲིས་ལན་གནང་།
དེ་རྗེས་ས་ལམ་འཛིན་གྲྭའི་སློབ་གཉེར་བ་ཟླ་བ་དགྲ་འདུལ་ལགས་ནས་༼སྲོལ་རྒྱུན་གྱི་ཁ་ཟས་ལས་མོག་མོག་གི་སྐོར་༽ཞེས་པའི་བརྗོད་བྱའི་ཐོག་ ༡མོག་མོག་གི་བྱུང་རིམ་དང་། ༢ འཛམ་གླིང་ཡུལ་གྲུ་ཁག་ལ་ཇི་ལྟར་དར་ཚུལ། ༣ འཕྲོད་བསྟེན་དང་འབྲེལ་ནས་གཞན་གྱི་ལྟ་ཚུལ་དང་རང་གི་བསམ་ཚུལ་བཅས་ཀྱི་སྒོ་ནས་གཏམ་བཤད་སྐར་མ་བཅོ་ལྔ་དང་། དེ་འབྲེལ་གྱི་དྲི་བ་དྲིས་ལན་སྐར་མ་བཅོ་ལྔ་གནངས་ཏེ་བོད་ཟླ་བདུན་པའི་བགྲོ་གླེང་མཇུག་གྲུབ་ཡོད་པ་བཅས་གཡུང་དྲུང་བོན་གྱི་དྲྭ་ཚིགས་གཙོ་སྒྲུབ་ཁང་ནས།
