བྱང་ཨ་རིའི་ནེའུ་ཡོག་དང་ནེའུ་འཇར་སིའི་གཡུང་དྲུང་བོན་སྲི་ཞུ་ལྷན་ཚོགས་ཀྱི་རྒྱུན་ལས་དང་ས་གནས་དེའི་དད་ལྡན་བོན་འབངས་ཐུན་མོང་ནས་༧རྒྱལ་བ་སྨན་རིའི་བླ་བྲང་དུ་རེ་བསྐུལ་ཞུས་དོན་བཞིན། དེ་རིང་གཤེན་གྱི་འབྱུང་ལྡན་ ༣༠༡ བོད་ཤིང་སྦྲུལ་ལོའི་བོད་ཟླ་བདུན་པའི་ཚེས་པ་ ༢༤ རྩ་བའི་བླ་མ་༸སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༣ པ་རིན་པོ་ཆེ་མཆོག་དགོངས་པ་བོན་དབྱིངས་སུ་གཤེགས་ནས་ལོ་བརྒྱད་འཁོར་བའི་འདས་མཆོད་ཉིན་༧གདན་ས་སྨན་རིའི་དགེ་བཤེས་རྔ་ཟ་ཚང་ཁྱུང་གསས་འཕྲིན་ལས་མཆོག་སྔར་སྲོལ་ལྟར་བླ་མར་ཁྲི་བཞེངས་མངའ་གསོལ་གནང་སོང་།
གོང་ཚེས་ཞོགས་པའི་ཕྱག་ཚོད་ ༨།༣༠ ཐོག་ལམ་སྲོལ་ལྟར་༧དཔལ་གཤེན་བསྟན་སྨན་རིའི་གྲྭ་ཚང་གི་གོ་སྒྲིག་འོག་སྤོས་སྣེ་རྒྱ་གླིང་གིས་དགེ་བཤེས་མཆོག་༧དཔལ་གཤེན་བསྟན་སྨན་རིའི་གླིང་གི་འདུལ་ཁང་དུ་གདན་ཞུས་ཀྱིས་གཅན་ལྔས་བཏེགས་པའི་ཁྲི་ལ་མངའ་གསོལ་ཞིང་བཞུགས་གསོལ་མཛད།
དེ་ནས་ལམ་སྲོལ་ལྟར་སྐྱབས་རྗེ་རྒྱལ་བ་སྨན་རིའི་བླ་བྲང་གཙོས་བོན་གཞིས་ཐོབ་རྒྱལ་གསར་པའི་སྡེ་དགོན་ཟུང་གི་ཚོགས་པ་ཆེ་ཕྲ་ཁག་གི་སྐུ་ཚབ་དང་དབུ་འཛིན་རྣམས་དང་། གཞན་ཡང་བྱང་ཨ་རིའི་ནེའུ་ཡོག་དང་ནེའུ་འཇར་སིའི་གཡུང་དྲུང་བོན་སྲི་ཞུ་ལྷན་ཚོགས་ཀྱི་སྐུ་ཚབ། ཚོགས་པའི་སློབ་སྟོན་པ་ཀུན་དགའ་འཕྲིན་ལས་ལགས་དང་ཕྱི་ནང་གི་དགོན་སྡེ་ཁག་གི་སྐུ་ཚབ་རྣམས་ཀྱིས་རིམ་བཞིན་མ་འདལ་སྐུ་གསུང་ཐུགས་རྟེན་འདེགས་འབུལ་དང་། སེར་སྐྱ་མང་ཚོགས་ཡོངས་ནས་རྟེན་འབྲེལ་མཇལ་ཁ་ཞུས་ཡོད་པ་དང་།
གཡུང་དྲུང་བོན་སྲིད་ཞུ་ལྷན་ཚོགས་དང་ཨ་རི་བོན་གཤེན་གླིང་གཉིས་ནས་སྨན་རིའི་དགེ་འདུན་འདུས་པ་རྒྱ་མཚོར་མང་ཇ་དང་སྐུ་འགྱེད་འབྲས་སིལ་ཕུལ་གནང་ཡོད་པ་བཅས་ཀྱི་གནས་བསྡུས་སུ། གཡུང་དྲུང་བོན་གྱི་དྲྭ་ཚིགས་ཁང་ནས།
སྨན་རིའི་དགེ་བཤེས་རྔ་ཟ་ཁྱུང་གསས་འཕྲིན་ལས་ཀྱི་ལོ་རྒྱུས་མདོར་བསྡུས།
རྔ་ཟ་ཚང་དགེ་བཤེས་ཁྱུང་གསས་འཕྲིན་ལས་ནི་མདོ་སྨད་ཟུང་ཆུའི་སྟོད་ཕྱོགས་སུ་སྐྱང་ཚང་སྡེ་བའི་དུད་ཚང་དཀྱུས་མ་ཞིག་ཏུ་དལ་རྟེན་རྙེད། ཆུང་དུས་ས་གནས་སློབ་ཆུང་འགྲིམ་སྟེ་དབྱར་དགུན་བར་གསེང་ལ་རྒན་དམ་པ་དྲང་སྲོང་བསྟན་པ་ཚུལ་ཁྲིམས་མཆོག་གི་དྲུང་ནས་བོད་ཡིག་འབྲི་ཀློག་སོགས་སྦྱངས། བར་སྐབས་ཤིག་ལ་༧སྐྱབས་རྗེ་རྒྱལ་བ་སྨན་རི་བ་ལུང་རྟོགས་བསྟན་པའི་ཉི་མ་རིན་པོ་ཆེའི་སྐུ་མདུན་ནས་རབ་བྱུང་གི་སྡོམ་པ་ཞུས་ནས་དཔལ་སྐྱང་དགོན་ཕུན་ཚོགས་དར་རྒྱས་གླིང་གི་ཚོགས་གྲལ་དུ་ཞུགས། དགོན་པའི་འདྲེན་པ་དང་དུང་འབུད་སོགས་བྱ་བ་ཙག་ཙིག་གཉེར་ཞོར་རྒན་ཚུལ་ཁྲིམས་དཔལ་འབྱོར་སྐུ་མདུན་ནས་ཤར་རྫ་བའི་གསུང་འབུམ་མཛོད་ཆེན་སོགས་ལའང་གསན་བསམ་བྱས། དགའ་མལ་དགོན་ཆེན་གྱི་མཁན་ཆེན་ཤེས་རབ་མཐར་ཕྱིན་དང་སྐྱོང་སྤྲུལ་དྲི་མེད་འོད་ཟེར་རྣམ་གཉིས་ཀྱི་སྐུ་མདུན་ནས་དྲང་སྲོང་སྡོམ་པ་ཞུས་ནས་སེམས་ཁྲིད་དང་ལོ་གསུམ་བཅད་རྒྱ་དང་དབང་ལུང་གང་ཐུབ་ཞུས། ༢༠༠༧ ལོར་རྒྱ་གར་འབྱོར་ནས་ ༧ སྐྱབས་རྗེ་རྒྱལ་བ་སྨན་རི་བའི་གསེར་ཞལ་སླར་ཡང་མཇལ་བའི་བསྐལ་བཟང་གསར་དུ་ཚེས་ནས་གདན་ས་སྨན་རིའི་དགོན་གྱི་གཡུང་དྲུང་བོན་གྱི་བཤད་སྒྲུབ་འདུས་སྡེར་འཛུལ་ཞུགས་བགྱིས་ནས་ ༢༠༢༤ ལོར་གཡུང་དྲུང་བོན་གྱི་བཤད་སྒྲུབ་འདུས་སྡེའི་སློབ་མཐར་ཕྱིན་ནས་དགེ་བའི་བཤེས་ཀྱི་མཚན་རྟགས་བླངས་པའི་གནས་ཚུལ་མདོར་བསྡུས་སོ། །
