དེ་རིང་ནི༸ཞྭ་དཀར་གཡུང་དྲུང་བོན་གྱི་དབུ་ཁྲིད་བླ་ཆེན་དཔོན་གསས་བླ་མ་དམ་པ་སྐྱབས་རྗེ་༧རྒྱལ་བ་སྨན་རིའི་ཁྲི་འཛིན་ ༣༣ པ་ཆེན་པོ་མཆོག་ཉིད་དགོངས་པ་གཞན་དོན་དུ་གཤེགས་ནས་ད་བར་མི་ལོ་ཧྲིལ་པོ་ ༨ འཁོར་བའི་དུས་ཆེན་ཁྱད་པར་ཅན་ཁེལ་ཡོད་སྟབས་རྒྱལ་ཁབ་ཕྱི་ནང་གང་སར་གནས་པའི་བོན་འབངས་རྣམས་དང་། དད་ལྡན་པ་ཡོངས་ཀྱིས་རིན་པོ་ཆེ་མཆོག་གི་འདས་མཆོད་སྲུང་བརྩི་ཞུས་དང་ཞུ་མུས་ལྟར། བོན་གྱི་༸གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དང་། བཙུན་དགོན་རཏྣ་སྨན་གླིང་གཉིས་སུ་མདོ་གཡུང་དྲུང་ཀློང་རྒྱས་ཀྱི་དཀྱིལ་འཁོར་གྱི་ཆོ་ག་རྒྱས་པར་གསུངས་གནང་ཡོད་པ་རེད།
དེ་ཡང་ཁ་སང་སྟེ་ཉིན་སྤྱི་ལོ་ ༢༠༢༥ ཟླ་ ༩ ཚེས་ ༡༤ བོད་ཤིང་སྦྲུལ་ལོའི་བོད་ཟླ་ ༧ པའི་ཚེས་པ་ ༢༢ ཞོགས་པའི་ཆུ་ཚོད་ ༥།༠༠ ནས་བཟུང་༧སྐྱབས་རྗེ་སྨན་རིའི་ཁྲི་འཛིན་ ༣༤ པ་རིན་པོ་ཆེ་མཆོག་དང་༸སྐྱབས་རྗེ་རྒྱལ་བ་སྨན་རིའི་དཔོན་སློབ་རིན་པོ་ཆེ་རྣམ་གཉིས་དབུ་བཞུགས་ཐོག་འདུས་མང་ཡོངས་ནས་མདོ་གཡུང་དྲུང་ཀློང་རྒྱས་ཀྱི་ཆོ་ག་དབུ་ཚུགས་གནང་ཡོད་པ་དང་།
ཉིན་གཉིས་པ་སྟེ། དེ་རིང་ ༢༠༢༥ ཟླ་ ༩ ཚེས་ ༡༥ བོད་ཤིང་སྦྲུལ་ལོའི་བོད་ཟླ་ ༧ པའི་ཚེས་པ་ ༢༤ སྔ་དྲོར་༸སྐྱབས་རྗེ་རྒྱལ་བ་སྨན་རིའི་མཁན་སློབ་རྣམ་གཉིས་གཙོས་འདུས་མང་སེར་སྐྱ་ཡོངས་ནས་༧སྐྱབས་རྗེ་ཞིང་གཤེགས་དམ་པའི་སྐུ་པར་མཐོང་གྲོལ་རིན་པོ་ཆེ་གདན་ཞུས་ཀྱི་གླིང་སྐོར་སེར་ཕྲེང་དུ་ཕེབས་ཡོད་ཅིང་།
ཕྱིར་ཚོགས་ཁང་མདུན་གྱི་འཆམ་རར་ཕེབས་མཚམས་གཤེན་རབ་མཆོད་རྔའི་སྒོ་ནས་སྙན་པའི་དབྱངས་ཀྱི་མཆོད་པ་ཕུལ་རྗེས། འདུས་མང་ཡོངས་ཚོགས་ཁང་དུ་ཕེབས་ནས་མཚན་ལྡན་བླ་མ་མཆོད་ཐབས་ཀྱི་ཚིག་བཤད་དང་༧སྐྱབས་རྗེ་ཞིང་གཤེགས་དམ་པའི་གསོལ་འདེབས་དབྱངས་སུ་གྱེར་ཡོད་པ་རེད།
དགོང་མོའི་ཕྱག་ཚོད་ ༧།༣༠ ཐོག་༧སྐྱབས་རྗེ་༸རྒྱལ་བ་སྨན་རིའི་མཁན་རིན་པོ་ཆེ་དབུས་བོན་གཞིས་སེར་སྐྱ་མི་མང་ཡོངས་༧དཔལ་གཤེན་བསྟན་སྨན་རིའི་ཚོགས་ཁང་ཆེན་མོའི་མདུན་ཐང་དུ་། མཚན་ལྡན་བླ་མ་མཆོད་ཐབས་ནོར་བུའི་ཕྲེང་བ་དབྱངས་སུ་གྱེར་བཞིན་རིན་ཆེན་རྫས་ཀྱི་མཆོད་པ་རྣམ་ལྔ་དང་མ་འདལ་ཚིག་བཤད་ལྟར་མཆོད་པ་ཇི་སྙེད་སྤུངས་ཤིང་སྣང་གསལ་སྒྲོན་མེའི་མཆོད་སྤྲིན་ཕུལ། མཚན་ལྡན་བླ་མ་མཆོད་ཐབས་ཀྱི་ཚིག་བཤད་དང་༧སྐྱབས་རྗེ་དཔོན་གསས་བླ་མ་དམ་པའི་གསོལ་འདེབས་གྲུབ་རྗེས།
འདུལ་ཁང་དང་། སྒྲུབ་ཁང་། བླ་བྲང་བཅས་སུ་རིམ་པར་གཤེན་རབ་མཆོད་རྔའི་སྒྲ་དབྱངས་ཀྱི་མཆོད་པ་ཕུལ་ནས་སེར་སྐྱ་མི་མང་ཡོངས་༧སྐྱབས་རྗེ་དཔོན་གསས་བླ་མ་༧རྒྱལ་བ་སྨན་རིའི་ཁྲི་འཛིན་ ༣༣ པ་མཆོག་གི་༼གཟིམ་ཆུང་འོད་འབར་རྗེས་དྲན་དད་རྟེན་ཁང་༽དུ་བཞུགས་པའི་སྐུ་གདུང་དང་བྱིན་རྟེན་རྣམས་དང་། གཙུག་ལག་ཁང་མདུན་གྱི་སྨན་རིའི་མཁན་རབས་ཀྱི་སྐུ་ཐང་དང་མཆོད་བཤམས་སོགས་ལ་མཇལ་ཁ་གྲུབ་རྗེས་བཀྲ་ཤིས་གསོལ་ཇ་མཆོད་ནས་མཛད་སྒོ་མཇུག་གྲུབ་ཡོད་པ་རེད།
གཞན་ཡང་དེ་རིང་གི་དུས་ཁྱད་པར་ཅན་དང་འབྲེལ། གཡུང་དྲུང་བོན་གྱི་དཔེ་མཛོད་ཚོགས་ཁང་དུ་“གསོ་རིག་འབུམ་བཞིའི་མཐོ་སློབ་སྨན་རིའི་གླིང་”གི་སྐབས་བཞི་པ་དང་ལྔ་པའི་སྨན་པ་བཀའ་བཅུ་པའི་བསླབ་པ་མཐར་སོན་གྱི་མཛད་སྒོ་འཚོགས་པའི་གནས་ཚུལ་འདི་ནས་གཟིགས།
