དེ་རིང་༸རྒྱལ་བ་གཤེན་གྱི་འབྱུང་ལྡན་སུམ་བརྒྱ་དང་གཅིག་གི་ཉག་མ་ ༤༢ བོད་ཤིང་སྦྲུལ་ལོའི་བོད་ཟླ་བདུན་པའི་ཚེས་པ་ ༢༩ དང་སྤྱི་ལོ་ ༢༠༢༥ ཟླ་བ་ ༩ པའི་ཚེས་པ་ ༢༠ ཉིན་གྱི་ཕྱི་དྲོར། གཡུང་དྲུང་བོན་གྱི་བཤད་སྒྲུབ་འདུས་སྡེའི་ཚོགས་ཁང་དུ་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་རིན་པོ་ཆེ་དབུ་བཞུགས་ཐོག བཤད་སྒྲུབ་འདུས་སྡེའི་ཚོགས་འདུ་ཆེན་མོ་བསྐང་འཚོགས་གནང་སྟེ། སྐབས་ ༤༥ པའི་གཡུང་དྲུང་བོན་གྱི་བཤད་སྒྲུབ་འདུས་སྡེའི་རྒྱུན་ལས་ཀྱི་ལས་ཡུན་གཙང་རྗེས་སྐབས་ ༤༦ པའི་རྒྱུན་ལས་ཀྱིས་རྩིས་ལེན་དང་། ལས་ཁུར་དབུ་འཛུགས་གནང་ཡོད་པ་རེད།
དེ་ཡང་འཕགས་ཡུལ་བྱང་རྒྱུད་ཧི་མ་ཅལ་དུ་གནས་བཅས་པའི་ ༸ཞྭ་དཀར་གཡུང་དྲུང་བོན་གྱི་གདན་ས་སྨན་རིའི་གླིང་འདི་སྤྱི་ལོ་ ༡༩༧༨ ལོར་བཤད་སྒྲུབ་འདུས་སྡེ་གསར་དུ་བཙུགས་ནས་ལོ་གཉིས་ཀྱི་རྗེས་ཏེ་ ༡༩༨༠ ལོ་ནས་༸རྩ་བའི་བླ་མ་སྐྱབས་རྗེ་སྨན་རིའི་ཁྲི་འཛིན་ ༣༣ པ་རིན་པོ་ཆེ་མཆོག་ནས་འདུས་སྡེ་འདི་ཉིད་ཀྱི་ཤེས་ཡོན་སོགས་གང་ཅིའི་ཐད་ཡར་རྒྱས་དང་ཚགས་ཚུད་ཡོང་ཆེད། བཤད་སྡེའི་རྒྱུན་ལས་ཀྱང་ཚོགས་སྡེ་སྤྱི་མཚུངས་ལྟར་གཏན་འབེབ་གནང་ཡོད་པ་དང་། ད་ལྟའི་ཆར་ལོ་རེར་མང་མོས་ཀྱིས་འོས་འདེམ་བྱས་པའི་རྒྱུན་ལས་མི་དྲུག་རེ་དང་། ཟུང་འབྲེལ་འགན་འཛིན་དུ་འཛིན་སྐྱོང་ཚོགས་པའི་ཚོགས་མི་དགེ་བཤེས་རེ་ཡོད་ཅིང་། དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་སྟངས་འཛིན་འོག ལོ་ལྟར་བོད་ཟླ་བདུན་པའི་ཚེས་ཤར་ལ་དེང་དུས་ཀྱི་ལམ་སྲོལ་ལྟར་ཁྱབ་ཁོངས་འདུས་མང་ནས་འོས་འདེམས་སྔོན་འགྲོ་དངོས་གཞི་གཉིས་བྱས་ཏེ། མི་དྲུག་འདེམ་སྒྲུག་གནང་མཐར་མི་དྲུག་པོའི་ནང་ཁུལ་ཚོགས་གཙོ་དགེ་སྐོས་སོགས་ལས་གནས་སོ་སོར་ཆ་བགོས་གནང་སྲོལ་ཡོད་པ་ལྟར།
ཟླ་གཅིག་ཙམ་གྱི་སྔོན་ནས་སྐབས་ ༤༦ པའི་གཡུང་དྲུང་བོན་གྱི་བཤད་སྒྲུབ་འདུས་སྡེའི་སྐབས་ ༤༦ པའི་རྒྱུན་ལས་རྣམས་གྲྭ་མང་གིས་འོས་འདེམ་བྱས་ཤིང། རྒྱུན་ལས་དྲུག་པོ་ནང་མོལ་ཚོགས་འདུ་འཚོགས་པ་དང་། སྐྱབས་རྗེ་མཁན་སློབ་རྣམ་པར་མཇལ་བཅར་དང་བཀའ་སློབ་ལམ་སྟོན་ཞུས་ཤིང་རྒྱུན་ལས་སོ་སོའི་ལས་བགོས་བྱས་པར། སྐབས་ ༤༦ པའི་གཡུང་དྲུང་བོན་གྱི་བཤད་སྒྲུབ་འདུས་སྡེའི་ཚོགས་གཙོ་བསྟན་པ་མཆོག་ལྡན་དང་། ཚོགས་གཞོན་ཟླ་བ་འཕྲིན་ལས། དྲུང་ཡིག་མིག་དམར་ཚེ་རིང་། གཉེར་པ་ཤེས་རབ་ཀུན་གསལ། རྩིས་པ་མི་འགྱུར་རྒྱལ་མཚན། དགེ་སྐོས་ཚུལ་ཁྲིམས་འོད་ཟེར་བཅས་ལ་གཏན་ཁེལ་ཞིང་།
དེ་རིང་བོད་ཟླ་བདུན་པའི་ཚེས་པ་ ༢༩ དང་སྤྱི་ལོ་ ༢༠༢༥ ཟླ་བ་ ༩ པའི་ཚེས་པ་ ༢༠ ཉིན་གྱི་ཕྱི་དྲོར། གཡུང་དྲུང་བོན་གྱི་བཤད་སྒྲུབ་འདུས་སྡེའི་ཚོགས་ཁང་དུ་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་རིན་པོ་ཆེ་དབུ་བཞུགས་ཐོག བཤད་སྒྲུབ་འདུས་སྡེའི་ཚོགས་འདུ་ཆེན་མོ་བསྐང་འཚོགས་གནང་སྟེ། རྒྱུན་ལས་སྐབས་ ༤༥ པའི་ལོ་གཅིག་གི་རིང་བཤད་སྒྲུབ་སློབ་གཉེར་བའི་ཁྲོད། འཚོགས་འཆད་དང་། དམ་བཅའ་དཔེ་ཁྲིད་སོགས་མ་ཆད་པའི་རིགས་དང་། འཛིན་རིམ་འོག་མའི་ཆོ་ག་འཕྲིན་ལས་དང་། ཡིག་གཟུགས་སློབ་ཚན་གྱི་ཨང་རིམ་སོན་པ་རྣམས་ལ་ལེགས་གསོལ་བྱ་དགའ་དང་།
དེ་བཞིན་སྨན་རིའི་སྒྲུབ་གྲྭ་རྫོགས་ཆེན་སྒོམ་སྒྲུབ་འདུས་སྡེའི་ཚོགས་དང་དཔེ་ཁྲིད་སོགས་མ་ཆད་པའི་སློབ་གཉེར་བ་རྣམས་ལ་མགུར་དར་དང་བྱ་དགའ་བསྩལ་གནང་རྗེས། རྒྱུན་ལས་རྙིང་པས་ཉམས་མྱོང་གི་གཏམ་བཤད་དང་། ལས་བྱེད་གསར་པའི་རྩིས་ལེན་དམ་བཞེས་གནང་བ་དང་། དེ་བཞིན་ཟུང་འབྲེལ་འགན་འཛིན་ཟུར་པ་ཞང་ཞུང་པ་དགེ་བཤེས་འཕྲིན་ལས་རྒྱ་མཚོ་མཆོག་དང་། གསར་པ་དགེ་བཤེས་ཚེ་དབང་རིག་འཛིན་གཉིས་ཀྱི་རྩིས་སྤྲོད་རྩིས་ལེན་གནང་བ་དང་། དེ་ནས་རིམ་བཞིན་དབུས་གཡུང་དྲུང་བོན་འཛིན་སྐྱོང་ཚོགས་པའི་སྐུ་ཚབ་ཀྱི་གསུང་བཤད་དང་། གཡུང་དྲུང་བོན་གྱི་བཤད་སྒྲུབ་འདུས་སྡེའི་མཁན་པོ་མཆོག་གི་བཀའ་སློབ་ལམ་སྟོན་གནང་མཐར།
སྐྱབས་རྗེ་སྨན་རི་བ་མཆོག་ནས། ལས་བྱེད་སོ་སོའི་ལས་འགན་བཞེས་ཕྱོགས་དང་། བསླབ་པ་རྒན་རིན་གྱི་གལ་གནད། གཞན་ཡང་ཤེས་ཡོན་ཡར་རྒྱས་གཏོང་ཕྱོགས་སོགས་ཀྱི་བཀའ་སློབ་ཟབ་རྒྱས་གནང་སྟེ། ཚོགས་འདུ་མཇུག་གྲུབ་པ་དང་༸ཞྭ་དཀར་གཡུང་དྲུང་བོན་གྱི་བཤད་སྒྲུབ་འདུས་སྡེའི་སྐབས་ ༤༦ པའི་རྒྱུན་ལས་རྣམས་ཀྱིས་ལས་ཁུར་དབུ་འཛུགས་གནང་ཡོད་པ་བཅས་ཀྱི་གནས་ཚུལ་དུ་གཡུང་དྲུང་བོན་དྲྭ་ཚིགས་ཁང་ནས།
