འཆར་ཅན་ལྟར་སང་ལོར་དགེ་བཤེས་གཏོང་དགོས་ཀྱི་ལོ་རིམ་བཅུ་གསུམ་པའི་རྫོགས་ཆེན་སློབ་གཉེར་བ་རྣམས། དུས་ཆེན་ཁྱད་པར་ཅན་༧རྒྱལ་བ་མཉམ་མེད་ཆེན་པོའི་འཁྲུངས་མཆོད་བོད་ཟླ་དང་པོའི་ཚེས་༥ཉིན་གྱི་ཞོགས་ཚོགས་གྲོལ་རྗེས།
དགེ་བཤེས་གཏོང་འཐུས་ཀྱི་སྔོན་འགྲོར་༧དཔལ་ལྡན་སྨན་རིའི་བླ་བྲང་དུ་ཆེད་བཅར་གྱིས་རྟེན་འབྲེལ་ལྷ་དར་རིང་མོའི་སྣེ་དྲངས་ནས། ༧ཞྭ་དཀར་བསྟན་པའི་གཙུག་རྒྱན་དཔོན་གསས་བླ་མ་༧སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་རིན་པོ་ཆེ་མཆོག་གི་དྲུང་དུ་དགེ་བཤེས་གཏོང་འཐུས་ཀྱི་བཀའ་འཁྲོལ་སྐྱབས་འཇུག་ཞུ་དགོས་པ་དང་། དེ་མཚུངས་༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་གི་དྲུང་ནས་ཀྱང་དགེ་བཤེས་གཏོང་འཐུས་ཀྱི་བཀའ་འཁྲོལ་སྐྱབས་འཇུག་ཞུ་བའི་སྔོན་རིམ་གྲུབ་རྗེས།
ཉིན་རྒྱབ་དཔལ་ལྡན་སྨན་རིའི་ཚོགས་ཆེན་དགེ་སྐོས་མཆོག་ནས་སྲིད་པ་སྐོས་ཀྱི་ཆག་ཤིང་གི་ཆེ་བཤད་གྲུབ་མཚམས་སུ། ཐུགས་དམ་བཅའ་ཡིག་རིན་པོ་ཉན་སྐུལ་གྱི་ཚོགས་གཏམ་དང་འབྲེལ། གྲྭ་ཚང་གཉེར་བ་མཆོག་ནས་བཅའ་ཡིག་རིན་པོ་ཆེ་སྒྲ་དག་ཚིག་གསལ་གྱིས་སྙན་སྒྲོན་ཞུས་པ་དང་འབྲེལ། ༧ཞྭ་དཀར་བསྟན་པའི་གཙུག་རྒྱན་སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༤རིན་པོ་ཆེ་མཆོག་ནས་དགེ་བཤེས་གཏོང་འཐུས་ཀྱི་སློབ་གཉེར་བ་རྣམས་ལ་བཀའ་རམས་པའི་མཚན་ཕུལ་གསལ་བསྒྲགས་དང་འབྲེལ་དགེ་བཤེས་གཏོང་ཕྱོགས་ཐད་ནས་བཀའ་སློབ་བཀའ་དྲིན་བསྩལ་བ་དང་། བོད་ཟླ་དང་པོའི་ཚེས་བཅོ་ལྔ་༧རྣམ་འདྲེན་བརྒྱད་པ་རྒྱལ་བ་གཤེན་རབ་མི་བོ་ཀུན་ལས་རྣམ་པར་རྒྱལ་བ་མཆོག་གི་སྐུའི་འཁྲུངས་མཆོད་ཉིན། དགེ་བཤེས་གཏོང་འཐུས་ཀྱི་སློབ་གཉེར་བ་རྣམ་པས་རྟེན་འབྲེལ་གསོལ་ཇ་འདེགས་འབུལ་དང་བཀའ་རམས་པ་ཞེས་ཡོངས་ལ་གསལ་ཁྱབ་ཀྱི་བཀའ་གསུང་ཆེད་ཕེབས་བཀའ་དྲིན་བསྩལ་བའི་དངོས་གཞི་གྲུབ་རྗེས།
ལོ་འདིའི་ལོ་འཁོར་གཅིག་གི་རིང་ཚོགས་དང་འཆད་ར། ཐུག་དང་དམ་བཅའ། དཔེ་ཁྲིད་བཅས་ལ་ངེས་ཅན་དུ་ཕེབས་དགོས་པ་མ་ཟད། ཐུན་མོང་རིག་གནས་ཀྱི་སྐོར། དག་ཡིག སྙན་ངག འབྱུང་རྩིས། སྐར་རྩིས། སྒྲ་སྡེབ་སྦྱོར། བཟོ་རིག དཀྱིལ་འཁོར་ཐིག་རྩ། རྒྱལ་བའི་སྐུ་བརྙན་དང་མཆོད་རྟེན་གྱི་གཟུངས་གཞུག་འབུལ་ཐབས། སྨན་དཔྱད་ཐུགས་འབུམ་མཁའ་སྔོན་དང་། ཉེར་མཁོ་དཔག་བསམ་ལྗོན་ཤིང་སོགས་རིག་གནས་སྦྱང་འབྲས་རྣམས་ཡོངས་སུ་གྲུབ་མིན་རིག་གནས་འགན་འཛིན་ལགས་ནས་གཟིགས་ཞིབ་གནང་དགོས་པ་དང་། སྙན་ངག་སྒྲ་འཁོར་གྱིས་མཚོན་པའི་རིག་གནས་ཀྱི་དཔེར་བརྗོད་རྣམས་སྔོན་ཚུད་ནས་མཇུག་ཡོངས་སུ་གྲུབ་པར་བྱས་ཏེ་རིག་གནས་འགན་འཛིན་རྣམ་པར་ཟླ་དྲུག་སྔ་མའི་ནང་ཚུད་རྩིས་འབུལ་ཞུ་དགོས། བཀའ་རམས་རྣམས་ཀྱིས་མཆོད་ཚིག་དང་ཚིག་བཀྲ་དམ་བཅའ་སོགས་ཟླ་དྲུག་ཕྱི་མའི་ནང་༧དཔལ་ལྡན་སྨན་རིའི་བླ་བྲང་དུ་རྒྱུགས་འབུལ་ངེས་པར་ཞུ་དགོས། གྲྭ་ས་ཆེན་མོའི་གསུང་རྒྱུན་དང་ལམ་སྲོལ་ཇི་བཞིན། “འགྱེད་མང་ཇ་ལ་རྩོད་པ་མེད། ཐུག་དམ་བཅའ་ལ་རྩོད་པ་ཡོད།”ཅེས་གསུང་སྲོལ་ལྟར་དངོས་གཞི་དགེ་བཤེས་དམ་འཇོག་ཆེན་མོའི་སྐབས་སུ་ཕྱི་མཚན་ཉིད་སྡེ་ལྔའི་གཞུང་ཆེན་ཁག་དང་། ནང་སྔགས་སེམས་ཀྱི་གཞུང་ཆེན་གང་ལའང་དགག་བཞག་རྩོད་སྤོང་གི་ཟིན་མཚམས་དང་། རྩ་བའི་གཞུང་ཆེན་ཁག་གི་སྤྱི་སྡོམ་གྱི་གོ་བ་ཡོད་མེད་གལ་ཆེན་དུ་བརྩིས་ནས། རིགས་ལམ་གྱི་ཁྱབ་མཐའ་དང་། གཞུང་དོན་གྱི་གོ་བ། གཞུང་ཚིག་བློ་ངོར་ངེས་ཐབས་བཅས་ལ་ཐུགས་སྣང་གཙོ་བོར་མཛད་དེ་འབད་པ་ལྷོད་མེད་དུ་གནང་སྲོལ་ཡོད་པ་བཅས་བཤད་སྒྲུབ་མཁན་པོ་དགེ་བཤེས་ཉི་མ་དོན་འགྲུབ་མཆོག་གིས་བརྩམས་པའི་གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་གི་དགེ་བཤེས་མཛད་སྒོའི་ངོ་སྤྲོད་ལས་དྲྭ་ཚིགས་ལས་གཉེར་པས་ཉུང་བསྡུས་སུ་བྱས་ཏེ་སྤེལ།
༧ གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་གི་སྐབས་༢༢པའི་བཀའ་རམས་པའི་མཚན།
༡༽ སྤྱང་རུ་དྲང་སྲོང་ཡེ་ཤེས་རྒྱལ་བ་རྒྱ་མཚོ།
༢ ཁྱུང་པོ་དྲང་སྲོང་གཡུང་དྲུང་འཕྲིན་ལས་རྒྱ་མཚོ།
༣ དབྲ་ཚ་དྲང་སྲོང་གཙུག་ཕུད་འཇིགས་མེད་རྒྱལ་མཚན།
༤ མགར་རུ་དྲང་སྲོང་ཡེ་ཤེས་ཀུན་བཟང་རྒྱ་མཚོ།
༥ རྒྱལ་ལྷའི་དྲང་སྲོང་ཚུལ་ཁྲིམས་རྒྱལ་མཚན་རྣམ་གྲོལ།
༦ མེ་ཉག་དྲང་སྲོང་དྲི་མེད་གཡུང་དྲུང་རྣམ་དག
༧ ཁྱུང་པོ་དྲང་སྲོང་གཡུང་དྲུང་འཕྲིན་ལས་རྣམ་རྒྱལ།
༨ དབྲ་ཚ་དྲང་སྲོང་ཤེས་རབ་གཡུང་དྲུང་གྲགས་པ།
༩ བྲ་བོ་དྲང་སྲོང་ཆགས་མེད་ཨ་ཀྲོང་སྨོན་ལམ་རྣམ་རྒྱལ།
༡༠ ཁྱུང་པོ་དྲང་སྲོང་སྐལ་བཟང་ནམ་མཁའ་རྒྱལ་མཚན།
༡༡ རག་ཤི་དྲང་སྲོང་ནམ་མཁའ་ཀུན་གསལ་རྒྱལ་མཚན།
༡༢ ཟིང་ཆུ་དྲང་སྲོང་བློ་གྲོས་བསྟན་པ་དར་རྒྱས།
༡༣ ཁྱུང་དཀར་དྲང་སྲོང་བསྟན་འཛིན་འཇིགས་མེད་དབང་འདུས།
༡༤ ཧོར་འཕེན་དྲང་སྲོང་ལུང་རྟོགས་བསྟན་པ་འབྲུག་གྲགས།
༡༥ བྲག་འགོ་དྲང་སྲོང་གཡུང་དྲུང་དོན་ལྡན་རྣམ་དག
༡༦ བྲག་འགོ་དྲང་སྲོང་གཡུང་དྲུང་བསྟན་པའི་རྒྱལ་མཚན།
༡༧ རྔ་ཟ་ཚང་དྲང་སྲོང་ཁྱུང་གསས་འཕྲིན་ལས་རྣམ་རྒྱལ།
