དེ་ཡང་༧གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་འདིར། ༸སྐྱབས་རྗེ་ཞིང་གཤེགས་དམ་པ་སྨན་རིའི་ཁྲི་འཛིན་ ༣༣ པ་རིན་པོ་ཆེ་མཆོག་ནས་བཀའ་བཀོད་གནང་བ་བཞིན། དགོན་པ་གྲྭ་ཚང་སྤྱི་དང་། སྨན་རིའི་བླ་བྲང་སོགས་ལ་རྒྱལ་ཕྱི་ནང་གི་དད་ལྡན་དུ་མ་ཞིག་ནས་རྒྱུན་དུ་སྐྱབས་རྟེན་བསྔོ་འབྲེལ་མི་ཉུང་བ་ཞིག་ཕུལ་དང་འབུལ་བཞིན་པ་དེ་དག་ལ་དུས་ནས་དུས་སུ་སྨན་རིའི་བླ་བྲང་དུ་། སྐྱབས་རྗེ་མཁན་སློབ་རྣམ་པ་དབུ་བཞུགས་ཐོག་བྱང་བུ་དང་གསུར་བསྔོ་སོགས་གནང་དང་གནང་མུས་ལགས་ནའང་།
ཆེད་དམིགས་ཀྱིས་ལོ་རེའི་བོད་ཟླ་ ༦ པའི་ཚེས་པ་ ༡༤ དང་ ༡༥ སྟེ་ཉིན་གཉིས་ཀྱི་རིང་། གྲྭ་ཚང་འདུས་མང་ཡོངས་ནས་རྒྱལ་བ་བྲུ་ཡི་རིང་ལུགས་ཀྱི་ཞི་ཁྲོའི་དཀྱིལ་འཁོར་ཞལ་ཕྱེས་ཏེ་ཚོགས་མཆོད་རྒྱས་འབུལ་དང་། གྲྭ་ཚང་གཉེར་པས་ཀྱང་སྔ་ཕྱིར་བསྔོ་སྨོན་འབྲེལ་རྟེན་བྱུང་རིགས་ཐམས་ཅད་ཀྱི་མིང་བྱང་ཆད་ལུས་མེད་པར་༸སྐྱབས་རྗེ་མཁན་སློབ་རྣམ་པར་གཟིགས་འབུལ་ཞུས་ཐོག གནས་སྦྱང་ཉི་ཟེར་ཞགས་པའི་བྱང་ཆེན་དང་། ཚེ་འདས་ཟས་སྦྱིན་གྱི་གསུར་བསྔོ་ལས་སོགས་དགེ་རྩ་བླ་ན་མེད་པར་གནང་བའི་ལམ་སྲོལ་བཟང་པོ་སྔར་ཡོད་ལྟར།
འདི་ལོར་ཡང་ཁ་རྩང་དང་དེ་རིང་སྟེ་བོད་ཆུ་ཡོས་ལོའི་བོད་ཟླ་ ༦ པའི་ཚེས་པ་ ༡༤ དང་ ༡༥ ཉིན་གཉིས་ཀྱི་རིང་རྒྱལ་བ་སྨན་རིའི་གྲྭ་ཚང་དང་། བཙུན་དགོན་རདྣ་སྨན་གླིང་གཉིས་ནས་ཞི་ཁྲོའི་ཚོགས་མཆོད་རྒྱས་འབུལ་དང་། གསང་གསུམ་བོན་གྱི་མཛོད་འཛིན་༸སྐྱབས་རྗེ་སྨན་རིའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ་དབུ་བཞུགས་ཀྱིས་གནས་སྦྱང་ཉི་ཟེར་ཞགས་པའི་བྱང་ཆེན་བཞུས་ཡོད་པ་དང་། དེ་བཞིན་བསྔོ་བ་བདེ་ལེགས་མ་དང་། གསུར་སྦྱིན་ལ་སོགས་སྔར་སྲོལ་བཞིན་གནང་ཡོད་པའི་གནས་བསྡུས་སུ། གཡུང་དྲུང་བོན་གྱི་དྲྭ་ཚིགས་ཁང་ནས།
