ཕྱི་ལོ་ ༢༠༢༣ ལོའི་ཟླ་ ༡༠ ཚེས་ ༡༥ བོད་ཆུ་ཡོས་ལོའི་ཟླ་དགུ་པའི་ཚེས་གཅིག་ཉིན་ནས་གཡུང་དྲུང་བོན་གྱི་གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་གཡས་རུ་འཆད་རྩོད་ཆེན་མོ་ཐེངས་ཐེངས་ཉེར་ལྔ་པ་དེ་ཉིད། དཔལ་ལྡན་བླ་སྤྱི་དང་སྐབས་ ༤༤ པའི་གཡུང་དྲུང་བོན་གྱི་བཤད་སྒྲུབ་འདུས་སྡེའི་རྒྱུན་ལས་རྣམས་ཀྱི་སྟངས་འཛིན་འོག་དངོས་སུ་དབུ་འཛུགས་གནང་ཡོད་པའི་གནས་བསྡུས།
དེ་ཡང་གདན་ས་ཆེན་མོ་གཡས་རུ་དབེན་ས་ཁའི་ཕྱག་སྲོལ་བཞིན་གཡས་རུའི་འཆད་རྩོད་ཆེན་མོ་ཞེས་པ་འདི་ནི། ཐོག་མར་༧གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་ཕྱི་ལོ་༡༩༩༧ལོར་༧གསང་གསུམ་བོན་གྱི་མཛོད་འཛིན་ངེས་པ་དོན་གྱི་བདག་ཉིད་༧སྐྱབས་རྗེ་༧རྒྱལ་བ་སྨན་རི་བའི་ཁྲི་འཛིན་སོ་གསུམ་པ་རིན་པོ་ཆེ་མཆོག་གི་ཐུགས་བསྐྱེད་ཉེར་ལེན་ཟབ་མོ་ལ་བརྟེན་ནས་གསར་འཛུགས་མཛད་གནང་བའི་སྔ་རབས་བོན་གྱི་གདན་ས་ཆེན་མོ་གཡས་རུ་དབེན་ས་ཁའི་སྟོན་པ་བཅོ་བརྒྱད་ཀྱི་ནང་ཚན་སྟོན་པ་བརྒྱད་པ་བོན་གྱི་སྤྱན་ལྡན་ཆེན་པོ་འགྲོ་མགོན་འ་ཞ་བློ་གྲོས་རྒྱལ་མཚན་ (༡༡༩༨།༡༢༦༣) མཆོག་གིས་མཛད་པའི་༼ཚད་མའི་སྙིང་པོ་དེ་ཁོ་ན་ཉིད་ཀུན་ལས་བཏུས་པ་རིག་པའི་གཏེར་མཛོད་༽ཀྱི་གཞུང་དོན་ལ་བཤད་སྒྲུབ་འདུས་སྡེའི་སློབ་གཉེར་བ་ཡོངསརྫོགས་གླིང་སྟོད་དང་། གླིང་སྨད་གཉིས་སུ་ཕྱེས་ཏེ། དཔྱད་གསུམ་རྣམ་པར་དག་པའི་འཆད་རྩོད་གནང་བའི་དམིགས་བསལ་གནང་སྲོལ་ཡོད་པ་ཞིག་ཡིན།
འཆར་ཅན་ལྟར་བོད་ཟླ་དགུ་པའི་ཚེས་གཅིག་ཉིན་ནས་དམིགས་བསལ་གྱིས་བཤད་སྒྲུབ་སློབ་གཉེར་བ་རྣམས་དང་། གཞན་༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་དང་བཤད་སྒྲུབ་མཁན་སློབ་རྣམ་གཉིས་གཙོས་རབ་འབྱམས་དགེ་བའི་བཤེས་གཉེན་རྣམས་རྩོད་པའི་དཔང་པོར་བཞུགས་ཏེ། བདུན་ཕྲག་སོ་སོར་གླིང་སྟོད་སྨད་གཉིས་ཀྱི་སློབ་གཉེར་བ་རྣམས་ཀྱིས། གོང་གསལ་ཚད་མའི་གཞུང་དོན་ལ། རྩོད་པ་བོན་གྱི་འཁོར་ལོ་ཡོངས་སུ་སྐོར་ཏེ། བདུན་ཕྲག་རེ་ལ་རྩོད་ཐུག་ཆེན་མོ་རེ་དང་། དེ་བཞིན་བདུན་རེའི་ཉིན་ལྔ་པ་དང་དྲུག་པ་ལ་དམ་བཅའ་ཆེ་ཆུང་སོ་སོར་འཚོགས་གནང་ཞིང་། མཐའ་མའི་བདུན་ཕྲག་གི་ཐུག་རྒྱབ་ཟིན་རྗེས་ལོ་གཅིག་གི་གཡས་རུའི་འཆད་རྩོད་ཆེན་མོའི་རྩོད་ཐུག་གི་རྒྱལ་ཕམ་དང་ཁྱབ་ལོག་ཁག་འདུས་སྡེའི་ཚོགས་དབུས་སུ་སྒྲོག་སྦྱོང་ཞུ་སྲོལ་ཡོད་པ་ལྟར།
འདི་ལོ་སྟེ་བོད་ཆུ་ཡོས་ལོའི་བོད་ཟླ་དགུ་པའི་ཚེས་ ༡ དང་སྤྱི་ལོ་ ༢༠༢༣ ཟླ་བ་ ༡༠ པའི་ཚེས་ ༡༥ ཉིན་དཔལ་གཤེན་བསྟན་སྨན་རིའི་གླིང་དུ་གཡས་རུ་འཆད་རྩོད་ཆེན་མོ་ཐེངས་ཐེངས་ ༢༥ པ་དེ་ཉིད་དབུ་འཛུགས་གནང་ཡོད་པ་དང་། བཤད་སྡེའི་ཚོགས་དགེ་གཉིས་ནས་སློབ་གཉེར་བ་རྣམས་གླིང་སྟོད་སྨད་ཀྱི་ཆ་བགོས་གནང་ཞིང་གླིང་སྟོད་དཔེ་ཁྲིད་རྒན་ལགས་དགེ་བཤེས་ཤེས་རབ་ཉི་མ་མཆོག་དང་། གླིང་སྨད་དཔེ་ཁྲིད་རྒན་ལགས་བཤད་སྒྲུབ་སློབ་དཔོན་དགེ་བཤེས་དགེ་ལེགས་རྒྱ་མཚོ་རྣམ་གཉིས་ནས་སྐབས་ ༢༥ པའི་གཡས་རུ་འཆད་རྩོད་ཁྲིད་མཚམས། ཚད་མ་ཀུན་བཏུས་ཀྱི་ལེའུ་གཉིས་པའི་ནང་དགག་སྒྲུབ་དངོས་ཤུགས་རྟོགས་པ་བསྟན་པ་ལས། དགག་པ་དངོས་ཤུགས་རྟོགས་པ་ལ་ས་བཅད་གསུམ་དུ་ཡོད་པའི་དང་པོ། “སྤྱི་ལ་ཁེགས་ན་བྱེ་བྲག་ལ་ཁེག་པ་ལ། མངོན་སུམ་ཚད་མའི་བྱེད་པ་དང་། རྗེས་དཔག་གི་བྱེད་པ་དང་། དེ་ལ་རྩོད་པ་སྤང་བ་གསུམ་” ཡོད་པའི། “གསུམ་པ་རྩོད་པ་སྤང་བ་ལ་“ཞེས་པ་ནས་དབུ་འཛུགས་གནངས་ཡོད་པ་རེད།
འཆད་རྩོད་ཆེན་མོའི་མཐའ་མའི་རྩོད་རྒྱུགས་སྐབས་འབྲེལ་ཡོད་དཔེ་ཁྲིད་རྒན་རྣམ་པས་གཞུང་དོན་གྱི་དཀའ་གནད་ཆེ་ཁག་ཤོག་སྒྲིལ་བཟོས་ཏེ་སློབ་གཉེར་བ་སོ་སོས་བླངས་ནས་དཀའ་གནད་གང་བབ་ཀྱི་སྐོར་ལ་རིག་འཕྲུལ་གྱིས་བརྡར་ཤ་ལེགས་པར་བཅད་དེ་བདུན་ཕྲག་གཅིག་གི་རིང་རྩོད་རྒྱུགས་དམ་བཅའ་ཆེན་མོ་འཚོག་སྟེ་༧གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་གཡས་རུ་འཆད་རྩོད་ཆེན་མོའི་མཐའ་མའི་རྩོད་རྒྱུགས་ཆེན་མོ་ལེན་དགོས་པ་བཅས་ཀྱི་གནས་ཚུལ་མདོར་བསྡུས་ཙམ་དུ་གཡུང་དྲུང་བོན་གྱི་དྲ་ཚིགས་ལས་ཁང་ནས།
