དེ་ཡང་༧གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་འཆར་ཅན་ལྟར་ཟླ་རེར། གཡུང་དྲུང་བོན་གྱི་བཤད་སྒྲུབ་འདུས་སྡེའི་ཟླ་རེའི་བགྲོ་གླེང་ཞེས་གཏམ་བཤད་ཀྱི་བརྗོད་གཞི་སློབ་གཉེར་བ་སོ་སོས་རང་མོས་ལྟར་བདམ་ཐོག་དཔྱད་རྩོམ་སྤེལ་ཞིང་བགྲོ་གླེང་གནང་སྲོལ་ཡོད་པ་དང་།
དེ་ཡང་ཚོགས་ཐེངས་རེར་གཏམ་བཤད་པ་འཛིན་གྲྭ་རྒན་གཞོན་བར་གསུམ་ནས་སློབ་གཉེར་བ་རེ་རེ་བཅས་མི་གསུམ་རེ་དང་། མི་རེར་གཏམ་བཤད་ཀྱི་དུས་ཡུན་སྐར་མ་བཅོ་ལྔ་དང་། དེ་འབྲེལ་གྱི་དྲི་བ་དྲིས་ལན་སྐར་མ་ ༡༥ རེ་གནང་དང་གནང་མུས་ལྟར།
དེ་རིང་གཤེན་གྱི་འབྱུང་ལྡན་ ༣༠༡ སྤྱི་ལོ་ ༢༠༢༤ ཟླ་ ༠༧ པའི་སྤྱི་ཚེས་ ༡༢ དང་། བོད་ཟླ་༦ སྔ་མའི་ཚེས་ ༦ ཉིན་གྱི་ཕྱི་དྲོའི་དུས་ཚོད་ ༥:༣༠ པའི་ཐོག ༸ཞྭ་དཀར་བསྟན་པའི་གཙུག་རྒྱན་༸སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་དབུ་བཞུགས་ཐོག བཤད་སྒྲུབ་མཁན་པོ་མཆོག་དང་བཤད་སྡེའི་དགེ་རྒན་རྣམ་པ། དེ་བཞིན་བླ་གྲྭ་དགེ་བཤེས་གང་མང་མཉམ་ཞུགས་དང་བཅས་རིག་གནས་འགན་འཛིན་འཇིགས་མེད་དབང་རྒྱལ་གྱིས་གཙོ་སྐྱོང་འོག གཡུང་དྲུང་བོན་གྱི་བཤད་སྒྲུབ་འདུས་སྡེའི་བོད་ཤིང་འབྲུག་ལོའི་བོད་ཟླ་ ༦ པ་སྔ་མའི་བགྲོ་གླེང་དབུ་འཛུགས་གནང་ཡོད་པ་དང་།
དེ་ཡང་གཏམ་བཤད་པ་དང་པོ་རྫོགས་ཆེན་སློབ་གཉེར་བ་གཡུང་དྲུང་རྣམ་རྒྱལ་ལགས་ཀྱིས་《རྣམ་སྨིན་རིག་འཛིན་དང་ཚེ་དབང་རིག་སྐོར་བཤད་པ་》ཞེས་པའི་བརྗོད་གཞིའི་ཐོག དང་པོ་རིག་འཛིན་གྱི་ངོ་བོ། གཉིས་པ་རིག་འཛིན་གྱི་རྣམ་གྲངས། གསུམ་པ་ཁྲོ་བོ་རྒྱུད་དྲུག་དབང་དུ་བྱས་ཏེ་རྣམ་སྨིན་རིག་འཛིན་དང་ཚེ་དབང་རིག་འཛིན་གཉིས་ཀྱི་ཁྱད་པར་ཞེས་སྡེ་ཚན་གསུམ་གྱི་སྒོ་ནས་གཏམ་བཤད་དང་། དྲི་བ་དྲིས་ལན་གནང་ཡོད་པ་རེད།
དེ་རྗེས་རྫོགས་ཆེན་འཛིན་གྲྭའི་སློབ་གཉེར་བ་གཡུང་དྲུང་རྒྱལ་མཚན་ལགས་ཀྱིས《འཆི་ཁ་དུས་ཀྱི་བར་དོའི་སྐོར་》ཞེས་པའི་བརྗོད་གཞིའི་ཐོག་དང་པོ་བར་དོའི་འགྲེལ་བཤད། གཉིས་པ་འཆི་དུས་ཀྱ་བར་དོའི་སྐོར། གསུམ་པ་འབྱུང་བ་འཇིགས་ཚུལ་སོགས་ཀྱི་སྒོ་ནས་གཏམ་བཤད་དང་། དྲི་བ་དྲི་ལན་གནང།
གཏམ་བཤད་པ་གསུམ་པ་ཕར་ཕྱིན་སྐབས་གཉིས་པའི་སློབ་གཉེར་བ་རྣམ་རྒྱལ་བཀྲ་ཤིས་ལགས་ནས་བརྗོད་གཞི་《དད་པ་གླེང་བ་》ཞེས་པའི་ཐོག ༡ དད་པའི་ངོ་བོ། ༢ དད་པའི་དབྱེ་བ། ༣ དད་པའི་ཕན་ཡོན། ༤དད་པ་མེད་པའི་སྐྱོན་བཅས་ཀྱི་སྒོ་ནས་གཏམ་བཤད་གནང་ཡོད་པ་དང་། དེ་རྗེས་དྲི་བ་དྲི་ལན་སྐར་མ་ ༡༥ གནང་མཐར་།
ཕྱི་དྲོའི་དུས་ཚོད་ ༧:༠༠ ཐོག་གཡུང་དྲུང་བོན་གྱི་བཤད་སྒྲུབ་འདུས་སྡེའི་འཆར་ཅན་གྱི་ཟླ་རེའི་བགྲོ་གླེང་སྐབས་ ༡༢ པ་མཇུག་གྲུབ་ཡོད་པ་བཅས་ཀྱི་གནས་བསྡུས་སུ་གཡུང་དྲུང་བོན་གྱི་དྲྭ་ཚིགས་ཁང་ནས་ ༢༠༢༤། ༧ །༡༢ ཉིན།
