ས་གསུམ་ན་འགྲན་པའི་ཟླ་མ་མཆིས་པ་༧རྣམ་འདྲེན་༸རྒྱལ་བ་གཉིས་པ་མཉམ་མེད་ཤེས་རབ་རྒྱལ་མཚན་ཞེས་གྲགས་པའི་སྙན་པ་དཀར་པོ་སྲིད་པ་གསུམ་ལ་འབར་བའི་མགོན་པོ་གང་གི་༸གདན་ས་དཔལ་གཤེན་བསྟན་སྨན་རིའི་གླིང་དུ་ལོ་རེའི་ལོ་མཇུག་ཏུ་ཁྲོ་ཕུར་གཉིས་ཀྱི་དགུ་གཏོར་ཆེན་མོ་འཚོགས་ཤིང་ཉི་ཤུ་དགུར་དགུ་ཟློག་འཕེན་སྲོལ་ཡོད་པ་བཞིན།
འདི་ལོ་གཤེན་གྱི་འབྱུང་ལྡན་ ༣༠༡ བོད་ཤིང་ཕོ་འབྲུག་ལོའི་བོད་ཟླ་བཅུ་གཉིས་པའི་ཚེས་ ༢༧ ནས་ ༢༩ བའི་ཉིན་གྲངས་གསུམ་གྱི་རིང་ ༸རྒྱལ་བ་སྨན་རིའི་ཚོགས་ཁང་དུ་ཡི་དམ་ཁྲོ་ཕུར་གཉིས་ཀྱི་དགུ་གཏོར་ཆེན་མོ་དང་། སྨན་རིའི་སྒྲུབ་ཁང་དུ་སྒྲུབ་གཤེན་པ་བཅུ་གྲངས་ལྷག་གིས་ཡི་དམ་ཕུར་པའི་སྲུང་ཟློག་དང་། གཤེན་གྱི་གསང་སྔགས་སྒོམ་སྒྲུབ་གླིང་དུ་ཡི་དམ་གསས་མཁར་མཆོག་ལྔའི་ཚོགས་མཆོད་དང་སྲིད་པ་རྒྱལ་མོའི་ཚོགས་མཆོད་སོགས་ཕུལ་གནང་མཛད་ཡོད་པ་རེད།
དེ་ཡང་བོད་ཚེས་ ༢༧ སྤྱི་ལོ་ ༢༠༢༥ ཟླ་ ༢ ཚེས་ ༢༥ དགུ་གཏོར་གྱི་ཉིན་དང་པོའི་ཐོ་རངས་དུས་ཚོད་ ༤ དང་ཕྱེད་ཙམ་ནས་༸དཔལ་གཤེན་བསྟན་སྨན་རིའི་གླིང་གི་ཚོགས་ཁང་ཆེན་མོར་ཡི་དམ་ཁྲོ་བོ་ངོ་མཚར་རྒྱས་པ་དང་།
དབལ་ཕུར་དྲག་པོ་གཏིང་རྫོགས་སྤྱི་དོན་ཉི་ཤུ་རྩ་ལྔ་གཉིས་ཀྱི་གཞུང་བསྲངས་ཏེ་<ཁྲོ་ཕུར་གཉིས་ཀྱི་གདངས་དབྱངས་འབྲུག་མོ་ལྡིར་བའི་>སྒྲ་དབྱངས་ལ་དྲངས་ཏེ་ཚོགས་འཁོར་ཡོངས་སུ་མཇུག་གྲུབ་པར་གསུངས་གནང་ཡོད་པ་དང་། ཉིན་གཉིས་པ་སླར་ཡང་ཕུར་པའི་ཚོགས་འཁོར་རྒྱས་འབུལ་དང་། བོན་སྐྱོང་གྱེར་ཆེན་སོགས་གནང་ཞིང་།
ཕྱི་ནང་གསང་གསུམ་གྱི་མཚམས་བཅད་སྐབས་ཀྱི་སྟག་འགྲོས་སེང་སྟབས། གཡུང་དྲུང་ལུ་གུ་རྒྱུད་ཀྱི་འགྱིང་འགྲོས། ཉིན་སོ་སོར་ཕུར་སྒྲིལ་སོགས་འཆམ་གནང་ཞིང་།
བོད་ཟླ་ ༡༢ པའི་བོད་ཚེས་ ༢༩ སྤྱི་ལོ་ ༢༠༢༥ ཟླ་ ༢ པའི་ཚེས་པ་ ༢༧ ཉིན་དྲོ་གཞུང་དུ་ཡངས་པའི་རྒྱལ་ཁམས་ཀུན་ཏུ་གནས་པའི་སྐྱེ་འགྲོ་ཡོངས་ལ་འཚེ་བར་བྱེད་པ། ཕྱི་ལས་ལ་གྱུར་པའི་དགྲ། ནང་རྣམ་རྟོག་ལས་གྱུར་པའི་བགེགས། གསང་བ་མ་རིག་པ་ལས་གྱུར་པའི་བདུད་ཚོགས་རྣམས་བསྒྲལ་ནས་བླ་མ་ཡི་དམ་མཁའ་འགྲོ་བོན་སྐྱོང་དམ་ཅན་རྒྱ་མཚོའི་ཐུགས་དབྱིངས་སུ་བསྟིམ་པའི་བརྡ་མཚོན་དུ་དབལ་ཕུར་བསྒྲལ་བསྟབ་ཀྱི་གར་འཆམ་དང། གཤེན་རབ་དགུ་འཆམ་སོགས་འཁྲབ་གནང་མཛད་པ་མ་ཟད། ༧ཞྭ་དཀར་བསྟན་པའི་གཙུག་རྒྱན་སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༤ པ་རིན་པོ་ཆེ་མཆོག་གིས་བྱད་ཐག་བཅད་པ་དང་། ཟློག་ཁྲུས་གནང་ཞིང་། ༸སྐྱབས་རྗེ་སྨན་རིའི་དཔོན་སློབ་རིན་པོ་ཆེ་ནས་ཟློག་དབང་བཅས་གནང་གྲུབ་རྗེས།
གཤེན་རབ་དགུ་འཆམ་པ་རྣམས་ཀྱིས་སྣེ་དྲངས་ཏེ་བླ་གྲྭ་འདུས་མང་ནས་མེ་རིའི་གར་འཆམ་གྱི་སེར་འཕྲེང་གཡུང་དྲུང་དགའ་འཁྱིལ་དང་བཅས་གཏོར་རྒྱག་ཏུ་ཕེབས་གནང་ཡོད་པ་རེད།
དེ་རྗེས་འཆམ་ར་ཆེན་མོར་འཆམ་པོ་བ་རྣམས་ཀྱིས་གཤེན་བྲོ་བརྡུང་ཞིང་འདུས་མང་ནས་ཁྲོ་ཕུར་གཉིས་ཀྱི་བྲོ་བརྡུང་གྱེར་གྲུབ་མཚམས་ཀི་བསྭོ་ལྷ་རྒྱལ་གྱི་ཕྱེ་མར་མཆོད་གནང་རྗེས་ཡི་དམ་ཁྲོ་ཕུར་གཉིས་ཀྱི་དགུ་གཏོར་ཆེན་མོ་མཇུག་ཡོངས་སུ་གྲུབ་པར་གནང་ཡོད་པ་བཅས་ཀྱི་གནས་བསྡུས་སུ་གཡུང་དྲུང་བོན་གྱི་དྲྭ་ཚིགས་ཁང་ནས།
