ཁ་སང་སྟེ་གཤེན་གྱི་གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་༧སྐྱབས་རྗེ་མཁན་སློབ་དག་གིས་རིན་པོ་ཆེ་ཉིད་དགོངས་པ་བོན་དབྱིངས་སུ་གཤེགས་པར་མཆོད་འབུལ་སྨོན་ལམ་གྱི་མཛད་རིམ་བཀའ་དགོངས་ལྷུག་པོར་བསྩལ་བ་དང་བསྟུན།
གདན་ས་སྨན་རིའི་གྲྭ་ཚང་གི་ལས་སྣེ་ལྷན་རྒྱས་ནས་བཙུན་དགོན་རདྣ་སྨན་གླིང་དང་། བོན་གཞིས་མི་མང་། སམ་བྷོ་ཌའི་ཉིན་སློབ་ཀྱི་སློབ་དགེ། བོན་བུ་ཁྱིམ་ཁང་། བོན་ཕྲུག་བདེ་དོན་སོགས་གསལ་བསྒྲགས་སྔོན་ཚུད་ནས་བྱས་ཤིང་། ཆུ་ཚོད་༧།༣༠སྟེང་འཆམ་རར་ཚང་འཛོམས་ཀྱིས་བླ་མ་མཆོད་པ་དང་། ཚེ་དབང་སྨོན་ལམ། སྐུ་ཞི་བར་གཤེགས་པ་༧ཡོངས་འཛིན་སྨྲ་བའི་དབང་པོ་ཉིད་ཀྱི་གསོལ་འདེབས་བཅས་སེར་སྐྱ་མི་མང་ཡོངས་ཀྱིས་དབྱངས་སུ་གྱེར་ནས་མཆོད་འབུལ་སྨོན་ལམ་ཞུས་ཡོད་པ་དང་།
དེ་རིང་སྟེ་ཕྱི་ལོ་༢༠༢༥ལོའི་ཟླ་༦ཚེས་༡༣ཉིན་རིན་པོ་ཆེ་ཉིད་དགོངས་པ་བོན་དབྱིངས་སུ་གཤེགས་པའི་ཉིན་གཉིས་པར་༧དཔལ་གཤེན་བསྟན་སྨན་རིའི་གྲྭ་ཚང་སྤྱི་དང་བཙུན་དགོན་རདྣ་སྨན་གླིང་། བོན་ཕྲུག་བདེ་དོན་བཅས་ནས་ཨ་སྙན་རྫོགས་གསུམ་ཉིན་འགྱངས་གཅིག་རིང་འདུས་མང་ཡོངས་ནས་ཚིག་དོན་དབྱེར་མེད་དུ་བསྲེས་ནས་གདུང་མཆོད་ཕུལ་ཡོད་པ་དང་།
དགོང་དྲོའི་ཆུ་ཚོད་༧།༣༠སྟེང་ཁ་སང་བཞིན་དགོན་གཞིས་འདུས་མང་ཡོངས་ནས་བླ་མ་མཆོད་ཐབས་སོགས་ཀྱི་གདུང་མཆོད་རྒྱུན་ཆགས་སུ་གནངས་ཤིང་། ༧སྐྱབས་རྗེ་མཁན་སློབ་རྣམ་གཉིས་ནས་བཀའ་གསུང་ཕེབས་པ་གཞི་བཟུང་འོག་སང་གནངས་བཅས་ཉིན་གཉིས་རིང་མ་རྒྱུད་བྲུ་ལུགས་ཀྱི་དཀྱིལ་འཁོར་ཞལ་ཕྱེས་ནས་བླ་མ་དང་ཡི་དམ་དབྱེར་མེད་པའི་འདུ་ཤེས་ཀྱི་སྒོ་ནས་བདག་ཅག་ཐམས་ཅད་ལ་ནམ་ཡང་བླ་མ་མཆོག་དང་འབྲལ་མེད་དུ་གནས་ཤིང་།
བཙུན་དགོན་རདྣ་སྨན་གླིང་གི་བཙུན་མ་རྣམས་ནས་ཨ་སྙན་རྫོགས་གསུམ་གསུང་བཞིན་པ།
ལྷ་འབངས་ཡོངས་ནས་ཀྱང་ཚོགས་བསག་སྒྲིབ་སྦྱོང་གི་ལས་ལ་འབད་ན། རང་གི་སྒྲིབ་པ་དག་ཅིང་། དམ་པ་ཁོང་གི་ཐུགས་ཀྱི་བཞེད་དགོངས་རྫོགས་པའི་རྒྱུར་འགྲོ་བ་ཡིན་པས།
དེ་ཡང་སློབ་འབངས་ཡོངས་ནས་སྐུ་མྱ་ངན་གྱི་ཀློང་ནས་སྡུག་གི་མཆི་མ་སྐྱིལ་ནས་འདུག་པ་མ་ཡིན་པར། འདུས་བྱས་ཐམས་ཅད་ཀྱི་ངོ་བོ་འདི་སྙམ་པའི་མི་རྟག་པའི་ཉམས་ལེན་ལ་བརྩོན་ཞིང་། རིན་པོ་ཆེ་མཆོག་གི་ཐུགས་དགོངས་ཡོངས་སུ་རྫོགས་པའི་རྣམ་དཀར་དགེ་བའི་བྱ་བ་རྒྱུན་མི་ཆད་ཅིང་།
ཁོང་གི་མཛད་སྲོལ་དམ་པ་མི་ཉམས་གོང་དུ་འཕེལ་བའི་བདག་རྐྱེན་རྗེས་འཇུག་རྣམས་ཀྱིས་ནམ་ཡང་མ་དོར་ན་བླ་མའི་སྐུ་དྲིན་འདི་ལས་ལྷག་པའི་མཆོད་འབུལ་མེད་པ་སོགས་ཀྱི་བཀའ་སློབ་རིམ་པར་བསྩལ་ཡོད་པ་བཅས་ཀྱི་གནས་བསྡུས་སུ།
