དེ་ཡང་སྤྱིར་འཇིག་རྟེན་སྐྱེ་འགྲོ་ཡོངས་ཀྱི་ཕན་བདེའི་འབྱུང་གནས་སངས་རྒྱས་ཀྱི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པ་དང་། སྒོས་སུ་འབྲེལ་ཆགས་དད་ལྡན་སློབ་འབངས་ཡོངས་ཀྱིས་ཇི་ལྟར་གསོལ་བ་བཏབ་པ་བཞིན་༧ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༤ པ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་ཟླ་བ་གཉིས་མ་ཟིན་ཙམ་ཡུ་རོབ་བོན་ཚོགས་རྣམས་དང་། དེ་མིན་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་དུ་མས་ཇི་ལྟར་གསོལ་བ་བཏབས་དོན་ལྟར་ རིས་སུ་མ་ཆད་པའི་དད་ལྡན་སྟོང་ཕྲག་མང་པོར་བོན་ཁྲིད་དང་། བཀའ་དབང་། ལེགས་ཉེས་བླང་དོར་གྱི་ཞལ་གདམས་བཀའ་སློབ་སོགས་གང་ལ་གང་དགོས་དེ་ལ་དེར་སྟོན་གྱི་བསྟན་འགྲོའི་མཛད་འཕྲིན་ཁག་ལེགས་པར་གྲུབ་ནས་དེ་རིང་སྟེ་ཕྱི་ལོ་༢༠༢༥ལོའི་ཟླ་༦་ཚེས་༢༤ཉིན་གྱི་སྔ་དྲོའི་ཆུ་ཚོད་༡༡།༣༠སྟེང་ཕྱིར་རང་དགོན་སྨན་རིའི་གླིང་དུ་ཞབས་སོར་བདེ་བར་འཁོད།
དེ་ཡང་ཕྱི་ལོ་༢༠༢༥ལོའི་ཟླ་༤ཚེས་༢༧ཉིན་ཞྭ་དཀར་བསྟན་པའི་གཙུག་རྒྱན་སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༤པ་རིན་པོ་ཆེ་མཆོག་ཡུ་རོབ་བོན་ཚོགས་དག་གིས་ཇི་ལྟར་གསོལ་བ་བཏབས་པ་བཞིན་རང་དགོན་ནས་ཆིབས་ཐོན་གྱིས་ཕེབས་ཤིང་ལྡི་ལིར་ཉིན་གཉིས་ཐུགས་ངལ་གསོས་རྗེས་ཚེས་༣༠ཉིན་ལྡི་ལིར་ནས་པེ་རི་སིར་ཕེབས།
ཕྱི་ཟླ་༥ཚེས་༡ནས་ཉིན་བཞིའི་རིང་པོ་ལན་ཌི་ལིག་མི་རྐྱ་བོན་ཚོགས་བྱམས་མ་གླིང་གིས་གདན་ཞུས་ཀྱིས་བོན་ཚོགས་དེར་སྨན་རིའི་དགེ་བཤེས་ཤེས་རབ་དཔལ་ལྡན་ལགས་དང་ས་གནས་བོན་ཚོགས་ཀྱི་ཚོགས་གཙོ་ཚོགས་མི་དང་བཅས་སུ་འཛམ་ལྷ་མཆེད་བརྒྱད་ཀྱི་བཀའ་ཁྲིད་དང་བྱམས་མ་མདོ་ལུགས་ཀྱི་བཀའ་དབང་བསྩལ་ཡོད་པ་རེད།
ཕྱི་ཟླ་༥ཚེས་༥ཉིན་ཝ་སོར་པོ་ལན་ནས་པེ་རི་སུའི་རྒྱལ་སྤྱིའི་གནམ་ཐང་དུ་གཤེན་བསྟན་དར་རྒྱས་གླིང་གི་མཁན་པོ་དགེ་ལེགས་དང་། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་མང་པོ་ཕེབས་བསུར་བཅར་ཡོད་ཅིང་། ཉིན་དེར་པེ་རི་སིར་བཞུགས་ཤིང་། ཕྱི་ཚེས་༦ཉིན་གཤེན་བསྟན་དར་རྒྱས་གླིང་དུ་ཕེབས་ཤིང་། གཤེན་བསྟན་དར་རྒྱས་གླིང་གི་དགེ་སློབ་དག་གི་བཀོད་སྒྲིག་འོག་བདུན་གཅིག་རིང་རྒྱུད་བུ་ཆུང་བཅུ་གཉིས་ཀྱི་ཟབ་ཁྲིད་བསྐྱངས་པ་དང་། མཁན་དགེ་ལེགས་སྦྱིན་པ་གཙོས་བླ་སློབ་ཡོངས་ནས་སྐུ་གསུང་ཐུགས་རྟེན་གྱི་མ་འདལ་གྱི་བརྟན་བཞུགས་བསྟར་འབུལ་ཞུས།
ཕྱི་ཚེས་༡༤ཉིན་གཤེན་བསྟན་དར་རྒྱས་གླིང་ནས་ཕྱིར་པེ་རིར་ཆིབས་ཞལ་བསྒྱུར་ནས་ས་གནས་དེར་བཞུགས། ཕྱི་ཚེས་༡༥ཉིན་པེ་རིར་སིར་ནས་འཇར་མན་ནིས་སྦར་ལིན་ལ་ཕེབས་ཤིང་། གནམ་ཐང་དུ་རྒྱལ་སྤྱིའི་ལིག་མི་རྐྱའི་བོན་ཚོགས་བྱམས་མ་གླིང་གི་དབུ་འཛིན་དགེ་བཤེས་བསྟན་འཛིན་དབང་རྒྱལ་མཆོག་དང་ཚོགས་གཙོ Oliver Wirtzབཅས་ཚོགས་མི་དག་ནས་ཕེབས་བསུས་ས་གནས་བོན་ཚོགས་སུ་གདན་ཞུས་མཛད། ཉིན་གསུམ་རིང་རྨི་བ་ལམ་འཁྱེར་སྐོར་ནས་བཀའ་ཁྲིད་རྗེས་དྲིན་བསྐྱངས་ཤིང་། སྐད་བསྒྱུར་འབུམ་རམས་པ་གུ་རོང་སྐལ་བཟང་ནོར་བུ་ནས་གནངས།
ཕྱི་ཚེས་༢༡ཉིན་འཇར་མན་སྦར་ལིན་ནས་ཧང་ཀི་རེས་ཕེབས་ཤིང་། ཧང་གི་རེས་རྒྱལ་སྤྱིའི་ལིག་མི་རྐྱའི་ས་གནས་ཚོགས་གཙོ་Olivia Zsambokiནས་བོན་ཚོགས་སུ་ཕེབས་བསུ་དང་བཅས་ཉིན་གསུམ་རིང་ལུང་ནོན་བཀའ་ཁྲིད་དང་མཉམ་མེད་བླ་སྒྲུབ་ཀྱི་དབང་ལུང་བསྩལ། སྐད་བསྒྱུར་བ་འབུམ་རམས་པ་སྐལ་བཟང་ནོར་བུ་ལགས་གནས་གནངས།
ཕྱི་ཚེས་༢༨ཉིན་ཧང་ཀི་རེས་ནས་ཕྱིར་པེ་རིར་སིར་ཕེབས་ཤིང་གནམ་ཐང་དུ་བོན་ཕྲུག་བདེ་དོན་སློབ་ཟུར་དག་གིས་སྣེ་ལེན་དང་། ཡུ་རོབ་སྤྱི་འཐུས་ཐུབ་བསྟན་རྒྱ་མཚོ་དང་རང་དགོན་གྱི་དགེ་བཤེས་དང་འབྲེལ་ཡོད་དག་གིས་མཇལ་བཅར། ཉིན་གཉིས་རིང་ས་གནས་དེ་གའི་ལྗོངས་རྒྱུ་བྱེད་ས་གྲགས་ཆེན་ཁག་ཏུ་བླ་སློབ་མཉམ་འཛོམས་ཀྱིས་གཟིགས་སྐོར་དུ་ཕེབས།
ཚེས་༣༠ཉིན་རྟག་གཟིགས་བསམ་གཏན་གླིང་གི་དབུ་འཛིན་སྨན་རིའི་དགེ་བཤེས་བསམ་གཏན་ཡེ་ཤེས་དང་བོན་ཚོགས་ཚོགས་གཙོ་སོགས་ཀྱི་གསོལ་བ་བཏབས་དོན་ལྟར་ཁོང་གི་བོན་ཚོགས་སུ་ཕེབས་ནས་ཉིན་གསུམ་རིང་སངས་རྒྱས་སྨན་ལྷའི་བཀའ་དབང་དང་། བར་དོ་ཐོས་གྲོལ་གྱི་བཀའ་ཁྲིད་གནད་སྨིན་གནངས།
ཕྱི་ཟླ་༦ཚེས་༣ཉིན་པོ་ལན་ཌི་ཕེབས་ཤིང་ཤར་རྫ་གླིང་བོན་ཚོགས་ཀྱི་དབུ་འཛིན་བླ་ཁྲི་མཁན་པོ་དགེ་བཤེས་ཉི་མ་གྲགས་མཆོག་དང་ཁོང་གི་བོན་ཚོགས་ཀྱི་ཚོགས་གཙོ་གཡུང་དྲུང་ཉི་མ་བཅས་ནས་གནམ་ཐང་གི་དམིགས་བསལ་སྐུ་མགྲོན་ཕེབས་ལམ་བརྒྱུད་ནས་ཕེབས་བསུ་ཞུས་ཤིང་། ས་གནས་དེ་གའི་མགྲོན་ཁང་དུ་ཞག་བཞུགས་གནངས།ཕྱི་ཚེས་༤ཉིན་ཤར་རྫ་གླིང་བོན་ཚོགས་ཀྱི་ཚོགས་ཁང་རབ་གནས་གནངས་རྗེས་པེ་ཆི་ཀེའི་ཤར་རྫ་སྒོམ་སྡེ་གླིང་དུ་ཕེབས་ནས་ཡི་དམ་སྟག་ལ་མེ་འབར་དང་ཁྱུང་དམར་གྱི་བཀའ་ཁྲིད་བཀའ་དྲིན་བསྩལ།
ཕྱི་ཚེས་༡༠ཉིན་ཕྱིར་པེ་རིར་སིར་ཕེབས་ནས་བྷེལ་རྗེམ་དུ་ཕེབས་ཤིང་། ས་གནས་དེ་གའི་བོན་འབངས་རྣམས་ཀྱིས་ཕེབས་བསུ་དང་བཅས་དད་ལྡན་པ་ཁག་ཅིག་གིས་རང་ཁྱིམ་ལ་གདན་ཞུས་དང་རང་རང་གི་འདོད་མོས་ལྟར་ཁྲིད་ལུང་གང་འཚམས་བསྩལ།
ཕྱི་ཚེས་༡༤ཉིན་ཕྱིར་པེ་རི་སིར་ཕེབས་ཤིང་སྨན་རིའི་དགེ་བཤེས་འཁོར་ལྡན་ལྷུན་གྲུབ་རྒྱལ་མཚན་གྱི་གདན་ཞུས་ཀྱིས་ཁོང་གིས་དབུ་འཛུགས་གནངས་པའི་བོན་ཚོགས་བོད་ཀྱི་ཤེས་རབ་སློབ་གླིང་དུ་སྨྲ་སེང་དཀར་པོ་ཆིག་སྒྲུབ་དང་སྙིང་པོ་རྣམ་གསུམ་གྱི་བཀའ་ཁྲིད་དང་། གཞན་ཡང་སྨན་རིའི་མཁན་རབས་རིམ་བྱོན་གྱི་མཛད་འཕྲིན་སོགས་ཀྱི་སྐོར་ནས་བཀའ་སློབ་བཀའ་དྲིན་བསྩལ།
ཡུ་རོབ་ཁག་གི་མཛད་འཕྲིན་གནད་བསྡུས་མཁོ་འདོན་པ་སྐུའི་ཕྱག་ཞབས་པ་གཡུང་དྲུང་རྒྱལ་མཚན།
དེ་ནས་བལ་ཡུལ་དུ་ཕེབས་པའི་གནས་ཚུལ་སྐུའི་ཕྱག་ཞབས་པ་འཐེ་བོ་ཚང་ཤེས་རབ་ཀུན་གསལ་ལགས་ཀྱིས་གནས་ཚུལ་མཁོ་སྤྲོད་ཞུས་པ་གཤམ་གསལ།
༧ཞྭ་དཀར་གཡུང་དྲུང་བོན་གྱི་བསྟན་པའི་གཙུག་རྒྱན་ ༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༤ པ་ཆེན་པོ་མཆོག ཉེ་ལམ་བལ་ཡུལ་དུ་༧སྐྱབས་རྗེ་ཡོངས་འཛིན་ཞིང་ཁམས་དམ་པའི་གདུང་མཆོད་ཆེད་ཆིབས་བསྒྱུར་བཀའ་དྲིན་བསྐྱངས་པའི་མཛད་འཕྲིན་གནས་བསྡུས།
དེ་ཡང་སྤྱིར་༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་སྐུ་འཁོར་བཅས་ནུབ་ཕྱོགས་ཡོ་རོབ་ཁུལ་དུ་བསྟན་འགྲོའི་དོན་ཆེན་སྐྱོང་བཞིན་ཡོད་ཀྱང། ༢༠༢༥ ཟླ་ ༠༦ ཚེས་ ༡༢ ཉིན་ ༧སྐྱབས་རྗེ་སྨན་རིའི་ཡོངས་འཛིན་སྨྲ་དབང་བསྟན་འཛིན་རྣམ་དག་རིན་པོ་ཆེ་མཆོག་སྐུ་མྱ་ངན་ལས་འདས་པའི་ཆེས་ཡིད་སྐྱོ་བའི་གནས་ཚུལ་༧དཔལ་ལྡན་ཁྲི་བརྟན་ནོར་བུ་རྩེའི་མཁན་པོ་བསྟན་པ་གཡུང་དྲུང་མཆོག་གིས་རྒྱལ་བ་སྨན་རི་བ་མཆོག་ལ་དེ་དོན་སྙན་སེང་ཞུས་དོན་ལྟར། ༧སྐྱབས་རྗེ་མཆོག་ནས་ཀྱང་ཐུགས་སྐྱོ་བའི་གནས་ཚུལ་དེ་གསན་འཕྲལ་དབྱིན་ཇི་དང་ཨ་རི་སོགས་ཀྱི་བསྟན་འགྲོའི་མཛད་འཆར་ཀུན་མཚམས་འཇོག་གནང་ཏེ་ཚེས་ ༡༦ ཉིན་ཧྥ་རིན་སུ་(France)ནས་རྒྱ་གར་དུ་ཕེབས་གནང་མཛད།
དེ་བཞིན་ཚེས་ ༡༨ ཉིན་སྔ་དྲོའི་ཆུ་ཚོད་ ༡༡: ༣༠ ཐོག་བལ་ཡུལ་རྒྱལ་སའི་གནམ་ཐང་དུ་ཆིབས་བསྒྱུར་ཞབས་སོར་འཁོད་མཚམས་༧དཔལ་ལྡན་ཁྲི་བརྟན་ནོར་རྩེའི་མཁན་པོ་ལུང་རྟོགས་བསྟན་པ་གཡུང་དྲུང་མཆོག་གིས་གཙོས་༧དཔལ་ལྡན་ཁྲི་བརྟན་ནོར་བུ་རྩེའི་བླ་བྲང་དང་གྲྭ་ཚང་གི་ལས་སྣེ་ལྷན་རྒྱས་དང་སེར་སྐྱ་མང་ཚོགས་ནས་ཕེབས་བསུ་ཞུས་ཤིང་༧སྐྱབས་རྗེ་བདེ་བར་གཤེགས་པ་སྨན་རིའི་ཡོངས་འཛིན་སྨྲ་བའི་དབང་པོ་སྐུ་ཞི་བར་གཤེགས་པའི་གནས་བྱེ་མ་རི་ཁྲོད་དུ་གདན་འདྲེན་ཞུས། ཉིན་རྒྱབ་ཆུ་ཚོད་ ༠༡: ༡༥ སྟེང་རི་ཁྲོད་དུ་ཕེབས་འབྱོར་བྱུང་ཏེ་༧སྐྱབས་རྗེ་མཆོག་ནས་སྐུ་གདུང་རིན་པོ་ཆེར་མཇལ་གཟིགས་དང་མཚན་ལྡན་བླ་མའི་མཆོད་ཐབས་བཅས་གསུངས་ཏེ་ཐུགས་སྨོན་རྒྱ་ཆེར་མཛད་པ་དང་འབྲེལ་ཡོད་ཀུན་ལ་ཐུགས་གསོ་བླ་མེད་མཛད།
དེ་རྗེས་༧སྐྱབས་རྗེ་ཁྲི་འཛིན་རིན་པོ་ཆེ་ ༧དཔལ་ལྡན་ཁྲི་བརྟན་ནོར་བུའི་རྩེར་གདན་དྲངས་ཏེ་སེར་སྐྱ་མི་མང་ཡོངས་ཀྱིས་ཕེབས་བསུ་ཞུས། དགོང་མོ་ཆུ་ཚོད་༢༠:༠༠ ཐོག་ ༧སྐྱབས་རྗེ་རྒྱལ་བ་སྨན་རི་བ་མཆོག་དབུ་བཞུགས་ཐོག ༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་དང་ ༧དཔལ་ལྡན་ཁྲི་བརྟན་ནོར་བུའི་རྩེའི་དཔོན་སློབ་མཆོག་དང། བཤད་སྒྲུབ་མཁན་སློབ་ཀྱིས་གཙོས་དགེ་འདུན་འདུས་པ་རྒྱ་མཚོ་དང་དད་ལྡན་མི་མང་ཡོངས་མཉམ་འཛོམས་ཀྱིས་མཚན་ལྡན་བླ་མའི་མཆོད་ཐབས་ཀྱི་སྒོ་ནས་༧སྐྱབས་རྗེ་ཡོངས་འཛིན་བདེ་བར་གཤེགས་པའི་གདུང་འདེབས་ཀྱི་མཆོད་པ་ཕུལ་བ་སོགས་མཛད། དེ་རྗེས་ཀུན་གྱིས་༧སྐྱབས་རྗེ་ཡོངས་འཛིན་བདེ་བར་གཤེགས་པའི་གསོལ་འདེབས་དབྱངས་སུ་གྱེར་བཞིན་བསྐོར་བ་ལན་གསུམ་ཕེབས་རྗེས་ཉིན་དེའི་མཛད་རིམ་གྲུབ།
ཚེས་ ༡༩ ཉིན་སྔ་དྲོ་ཆུ་ཚོད་༡༠ ཐོག་ ༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་སླར་ཡང་དབེན་གནས་བྱེ་མ་རི་ཁྲོད་དུ་ཕེབས་མཛད་ནས་ “མཉམ་མེད་བླ་མའི་ཚོགས་མཆོད་ཅིག་འབུལ་དགོས་” ཞེས་བཀའ་གསུང་ཕེབས་པ་ལྟར་བླ་གྲྭ་རྣམས་ཀྱིས་མཆོད་རྫས་སྟ་གོན་ལེགས་པར་བཤམས། དེ་ནས་༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་སྐུ་དངོས་སུ་དབུ་བཞུགས་མཛད་དེ། ༧རྒྱལ་བ་གཉིས་པ་མཉམ་མེད་བླ་མའི་ནང་སྒྲུབ་ཀྱི་ཚོགས་མཆོད་རྒྱ་ཆེར་ཕུལ་གནང་མཛད་རྗེས་མེ་ཏོག་གི་ཆར་བབ་ཅིང་འཇའ་ཚོན་གྱི་རྟེན་འབྲེལ་ཤར་བ་དང་ལྷན་དུ་༧སྐྱབས་རྗེ་ཡོངས་འཛིན་རིན་པོ་ཆེ་ཐུགས་དམ་ལས་གྲོལ་བའི་རྟགས་མཚན་བྱུང་རྗེས། སྐུ་གདུང་རིན་པོ་ཆེ་ཁྲི་བརྟན་ནོར་རྩེ་རུ་གདན་འདྲེན་ཞུ་རྒྱུ་གཏན་འབེབ་བྱས་པ་ལྟར་ཚེས་ ༢༡ ཉིན་སྐུ་གདུང་རིན་པོ་ཆེ་ཁྲི་བརྟན་ནོར་རྩེ་རུ་གདན་དྲངས་ཤིང་བླ་བྲང་དུ་བཞུགས་གསོལ་མཛད། དེ་དང་ཆབས་ཅིག་ ༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་ནས་འཛམ་གླིང་བོན་འབངས་ཡོངས་ལ་ཐུགས་གསོའི་གསུང་འཕྲིན་བསྩལ།
ཚེས་ ༢༢ ཉིན། མཁན་པོ་བསྟན་པ་གཡུང་དྲུང་མཆོག་ཆེད་བཅར་གྱིས་ ༧སྐྱབས་རྗེ་རྒྱལ་བ་སྨན་རི་བ་མཆོག་དགོན་པའི་ཚོགས་ཁང་གསར་པའི་ཡང་སྟེང་དུ་གདན་འདྲེན་ཞུས་ཏེ་སྐུ་གདུང་མཇལ་གཟིགས་དང་། དེར་མཚན་ལྡན་བླ་མའི་མཆོད་ཐབས་དང་ཐུགས་སྨོན་མཛད་གནང་སོང་།
དེའི་རྗེས་༧སྐྱབས་རྗེ་རྒྱལ་བ་སྨན་རི་བ་མཆོག་གིས་༧དཔལ་ལྡན་ཁྲི་བརྟན་ནོར་བུ་རྩེའི་འདུལ་ཁང་གསར་པའི་ཕྱི་ནང་གི་རྟེན་དང་རྟེན་གསུམ་ཡོངས་ལ་མངའ་དབུལ་རབ་གནས་དང་རྟེན་འབྲེལ་ཤིས་བརྗོད་བསྩལ་གནང་མཛད།
༧སྐྱབས་རྗེ་རྒྱལ་བ་སྨན་རི་བ་མཆོག་ནས་༧དཔལ་ལྡན་ཁྲི་བརྟན་ནོར་བུ་རྩེའི་ཚོགས་ཁང་གསར་པའི་ཕྱི་ནང་ཡོངས་ལ་རབ་གནས་རྒྱས་པར་མཛད་པ་དང། དེ་བཞིན་བོད་ཕྱི་ནང་གཉིས་ནས་ཕེབས་པའི་བོད་རིགས་དང་། རྒྱལ་ཕྱི་ནང་ཡུལ་གྲུ་གང་ས་ནས་ཕེབས་པའི་དད་ལྡན་མང་ཚོགས་ལ་མཇལ་ཁ་བསྩལ་ཞིང། དད་ལྡན་མི་མང་འགའ་ཞིག་གིས་ཇི་ལྟར་གསོལ་བ་བཏབས་པ་བཞིན་སྔོན་འགྲོའི་ཕྱག་ཁྲིད་དང་། སྐྱབས་འགྲོ་སེམས་བསྐྱེད། སྙིང་པོ་རྣམ་གསུམ། མདོ་གཡུང་དྲུང་ཀློང་རྒྱས་ཀྱི་བསྙེན་པ་སོགས་ཀྱང་ལྗགས་ལུང་བཀའ་དྲིན་བསྩལ་གནང་མཛད། ལྷག་པར་དུ་ ༧དཔལ་རྒྱལ་དབང་ཀརྨ་པ་ཨོ་རྒྱན་ཕྲིན་ལས་རྡོ་རྗེ་རིན་པོ་ཆེའི་སྐུའི་ལྕམ་སྲིང་རྗེ་བཙུན་མ་དངོས་གྲུབ་དཔལ་འཛོམས་མཆོག་དང་། གནས་མདོ་རྒྱ་མཚོ་རིན་པོ་ཆེ། བལ་ཡུལ་གཏེར་སྒར་འོད་གསལ་གླིང་གི་མཁན་པོ་འགྱུར་མེད་དབང་ཆེན་མཆོག་དང་རྡོ་རྗེ་སློབ་དཔོན་སོགས་སྐུ་འཁོར་རྣམས་མཇལ་འཕྲད་དང་བཀའ་མོལ་ལྷུག་པོར་གནངས། སྐབས་དེར་༧སྐྱབས་རྗེ་མཆོག་གིས་༧རྒྱལ་དབང་ཀརྨ་པ་མཆོག་ལ་<སྨན་རིའི་ཁྲི་འཛིན་རིམ་བྱོན་གྱི་རྣམ་ཐར> ཞིག་སྐུ་ཡི་ལྕམ་སྲིང་རྗེ་བཙུན་མའི་ཕྱག་ཏུ་བསྐུར་གནང་མཛད། རྗེ་བཙུན་མ་མཆོག་ལ་ཡང་སྟོན་པའི་སྐུ་དང་སྨན་སྒྲུབ་འོད་ཟེར་འཁྱིལ་བའི་བྱིན་རྟེན་བཅས་ཕུལ་གནང་མཛད།
དེ་རྗེས་ ༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་མཆོག་ལ། ལིག་མི་རྐྱ་བོན་ཚོགས་ཀྱི་དབུ་འཛིན་དགེ་བཤེས་བསྟན་འཛིན་དབང་རྒྱལ་དང་བོན་ཕྲུག་ཟུར་པ་རྡོ་རྗེ་དབང་ཕྱུག་སོགས་ཀྱིས་གསོལ་འདེབས་ཞུས་དོན་ལྟར། བལ་ཡུལ་གནས་བཞུགས་བོན་གཞིས་ཐོབ་རྒྱལ་གསར་པའི་ཉིན་སློབ་ཀྱི་བོན་ཕྲུག་ཟུར་པ་རྒན་གཞོན་གང་མཚམས་མཉམ་འཛོམས་ཐོག།༧སྐྱབས་རྗེ་མཆོག་ནས་དགེ་སྡིག་སྤང་བླང་གི་བསླབ་བྱ་དང།
ལས་དོན་སྒྲུབ་སྐབས་དྲངས་བདེན་གྱི་ལམ་ལ་འབད་རྒྱུ། ཆང་རག་དང་ཐ་མག་སོགས་འཕྲོད་བསྟེན་ལ་གནོད་པའི་རིགས་མི་བསྟེན་པ། རང་བས་གཞན་གཅེས་ཀྱི་བསམ་བློ་དགོས་ཚུལ། ཕན་ཚུན་མཐུན་སྒྲིལ་དང་དཔུང་རོགས་གནང་རྒྱུ་སོགས་གལ་ཆེ་བའི་བཀའ་སློབ་ལམ་སྟོན་ཟབ་རྒྱས་བསྩལ་ཞིང་ཀུན་ལ་བྱིན་རྟེན་དུ་སྨན་སྒྲུབ་དང་སྲུང་མདུད་བཅས་བསྩལ་གནང་མཛད།
དེ་ལྟར་སྐྱབས་རྗེ་མཆོག་གི་བལ་ཡུལ་གྱི་མཛད་འཕྲིན་རེ་ཞིག་གྲུབ་ནས་ཚེས་ ༢༣ ཉིན་བལ་ཡུལ་ནས་རྒྱ་གར་དུ་ཆིབས་བསྒྱུར་བསྐྱངས་ཤིང། ཚེས་༢༤ཉིན་༧སྐྱབས་རྗེ་མཆོག་སྐུ་འཁོར་བཅས་ཧི་མ་ཅལ་མངའ་སྡེའི་སོ་ལན་(solan)རྫོང་ཉེ་འཁྲིས་ཕེབས་འབྱོར་བྱུང་སྐབས། བོད་ཀྱི་བོན་པོ་ཚོགས་པའི་ཚོགས་གཞོན་དང་བོན་གཞིས་ས་གནས་འགོ་འཛིན་དང་། དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་དྲུང་ཆེ་གཙོས་པའི་ལས་སྣེ་དང་།
དེ་བཞིན་ཚོགས་སྡེ་ཁག་གི་ལས་སྣེ་ལྷན་རྒྱས་ཕེབས་བཅར་བྱུང་ཏེ་༧སྐྱབས་རྗེ་མཆོག་གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་ཕེབས་བསུ་གདན་ཞུས་གནང་། གདན་སར་ཞབས་སོར་འཁོད་པ་དང་ ༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་གིས་གཙོས་པའི་གདན་ས་སྨན་རིའི་སེམས་དཔའ་འདུས་སྡེ་རྒྱ་མཚོ་དང་།
དེ་བཞིན་བཙུན་དགོན་རཎྚ་སྨན་གླིང་གི་བཙུན་མའི་སྡེ་དང་། གཤེན་གྱི་གསང་སྔགས་སྒོམ་སྒྲུབ་གླིང་གི་སྔགས་པ་རྣམས་ཀྱིས་གཙོས་མི་མང་ཡོངས་ནས་ལྷ་དར་དཀར་པོས་སྣེ་
དྲངས་ཤིང་གཤེན་རབ་མཆོད་རྔའི་སྒྲ་ཡི་མཆོད་པའི་སྒོ་ནས་ཕེབས་བསུ་ཟབ་རྒྱས་ཞུས་ཏེ་༧དཔལ་གཤེན་བསྟན་སྨན་རིའི་གླིང་གི་གཅན་ལྔ་རིན་ཆེན་ཁྲི་ལ་བཞུགས་གསོལ་དང་མཎྚལ་སྐུ་གསུང་ཐུགས་རྟེན་འདེགས་འབུལ་ཞུས།
དཔལ་ལྡན་སྨན་རིའི་བླ་བྲང་ནས་ཀྱང་དགེ་འདུན་པའི་སྡེ་ལ་མང་ཇ་དང་སྐུ་འགྱེད་ས་གནས་མི་མང་ཡོངས་ལ་གསོལ་ཇ་བཅས་བསྩལ་གནང་མཛད་པའི་གནས་བསྡུས་སུ།
ཕྱི་ལོ་ ༢༠༢༥ ཟླ་ ༠༦ ཚེས་ ༢༤ ཉིན།
