སྤྱི་ལོ་ ༢༠༢༥ ཟླ་ ༨ པའི་ཚེས་པ་ ༣ ནས་ ༩ བར་བལ་ཡུལ་༸དཔལ་ལྡན་ཁྲི་བརྟན་ནོར་རྩེའི་འདུས་སྤྱིའི་གོ་སྒྲིགས་གནང་ཐོག ༸ཞྭ་དཀར་བསྟན་པའི་གཙུག་རྒྱན་༸སྐྱབས་རྗེ་མཁན་སློབ་རྣམ་པ་གཙོས་རྒྱ་བལ་གཉིས་ཀྱི་བོན་དགོན་ཁག་གི་དབུ་བླ་མཁན་སྤྲུལ་རྣམས་དང་དད་ལྡན་སེར་སྐྱ་མི་མངས་ལྷན་འཚོགས་ཀྱིས་སྐུ་ཞི་བར་གཤེགས་པ་༸སྐྱབས་རྗེ་རྒྱལ་བ་སྨན་རིའི་ཡོངས་འཛིན་རིན་པོ་ཆེ་མཆོག་གི་སྐུ་གདུང་རིན་པོ་ཞུ་ཞུགས་འབུལ་གྱི་ཆོ་ག་ཀུན་རིག་ལས་བཞི་རྒྱུན་ལྔ་དང་། ཀློག་རྒྱས་ཀྱི་སྦྱིན་སྲེག སྨོན་ལམ་མཐའ་ཡས། མ་རྒྱུད་སོགས་གསུངས་ཏེ། སྐུ་གདུང་རིན་པོ་ཆེ་ཞུགས་འབུལ་གནང་པ་དང་། སྐུ་གདུང་ཞུགས་འབུལ་གྱི་མཛད་རིམ་རྣམས་མཇུགས་ལེགས་པར་གྲུབ་པའི་ཕྱི་ཉིན་ཏེ་
གཤེན་གྱི་འབྱུང་ལྡན་ ༣༠༡ གི་ནང་ཚན་བོད་ཤིང་སྦྲུལ་ལོའི་བོད་ཟླ་ ༦ པའི་ཚེས་ ༡༧ ཉིན་དཔལ་ལྡན་ཁྲི་བརྟན་ནོར་རྩེའི་གྲྭ་ཚང་གི་གོ་སྒྲིག་འོག་༧ ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་ནས་དད་ལྡན་སེར་སྐྱ་མི་མང་ཡོངས་ལ་༧རྗེ་མཉམ་མེད་བླ་མའི་ནང་སྒྲུབ་ཀྱི་བཀའ་དབང་བསྩལ་གནང་ཡོད་པ་དང་།
དེ་ཡང་གོང་ཚེས་ཉིན་གྱི་སྔ་དྲོ་དུས་ཚོད་ ༩ པ་ཙམ་གྱི་ཐོག་སྐྱབས་རྗེ་རྒྱལ་བ་སྨན་རི་བ་མཆོག་རྒྱལ་བསྟན་གཟི་བརྗིད་འོད་འབར་གཙུག་ལག་ཁང་དུ་གདན་ཞུས་ཀྱིས་གཅན་ལྔ་རིན་ཆེན་ཁྲི་ལ་བཞུགས་སུ་གསོལ་གྲུབ་མཚམས། ༸སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་དང་༸དཔལ་ལྡན་ཁྲི་བརྟན་ནོར་བུ་རྩེའི་མཁན་པོ་ལུང་རྟོགས་བསྟན་པ་གཡུང་དྲུང་མཆོག་དང་། དཔོན་སློབ་ཚངས་པ་བསྟན་འཛིན་མཆོག་གཞན་ཡང་བཤད་སྒྲུབ་མཁན་སློབ་རྣམ་པ་དང་། དད་ལྡན་སེར་སྐྱ་མི་མང་ཡོངས་འཚོགས་ཁང་དུ་འདུ་འཛོམས་ཀྱི་དབང་གི་ཆོ་གའི་ལས་རིམ་དགོས་སུ་དབུ་འཛུགས་གནང་ཞིང་།
དབང་བཤད་གནང་སྐབས་༸དཔལ་ལྡན་ཁྲི་བརྟན་ནོར་རྩེའི་མཁན་པོ་མཆོག་ནས་དབྱིན་སྐད་དུ་གསུང་བསྒྱུར་གནང་ཡོད་པ་དང་། དེ་ཡང་སྐྱབས་རྗེ་རྒྱལ་བ་སྨན་རི་བ་མཆོག་ནས་དབང་གི་དམ་ཚིག་སྲུང་རྒྱུ་གལ་ཆེན་ཡིན་པ་དང་། སྤྱི་ཚོགས་འཆམ་མཐུན་དང་། གཞན་ཕན་གྱི་བསམ་བློ་གལ་ཆེན་ཡིན་སྐོར། ཁྱད་པར་དུ་གྲྭ་བཙུན་རྣམ་དང་གཡུང་དྲུང་བོན་གྱི་རྗེས་འཇུག་རྣམས་ནང་ཕན་ཚུན་བླ་སློབ་གཅིག་པའི་འདུ་ཤེས་ཀྱི་ཐོག་ནས་མཐུན་ལམ་དགོས་སྐོར་སོགས་ཀྱི་བཀའ་སློབ་བསྩལ་གནང་ཡོད་པ་དང་།
དེ་རྗེས་དབང་གི་དངོས་གཞི་ངོ་སྤྲོད་སོགས་རིམ་པར་གནང་ཏེ་མཇུག་གྲུབ་ཡོད་པ་བཅས་ཀྱི་གནས་བསྡུས་སུ་གཡུང་དྲུང་བོན་གྱི་དྲྭ་ཚིགས་ཁང་ནས།
