༄༅། གཡུང་དྲུང་བོན་གྱི་ཕྱི་ནང་གསང་གསུམ་གྱི་བརྒྱུད་པའི་མངའ་བདགྋརྒྱལ་བ་མཉམ་མེད་ཆེན་པོའི་རྒྱལ་ཚབ། ༸ཞྭ་དཀར་བསྟན་པའི་གཙུག་རྒྱན་ྋསྐྱབས་རྗེ་རྒྱལ་བ་སྨན་རིའི་ཁྲི་འཛིན་སོ་བཞི་པ་ྋདཔལ་ལུང་རྟོགས་ཟླ་བ་དར་རྒྱས་དཔལ་བཟང་པོ་རིན་པོ་ཆེ་མཆོག་ལ་༸དཔལ་གཤེན་བསྟན་སྨན་རིའི་གྲྭ་ཚང་དང་༧གཡུང་དྲུང་བོན་གྱི་བཤད་སྒྲུབ་འདུས་སྡེ། དེ་བཞིན་ཕྱི་གླིང་གི་སློབ་ཚོགས་འགའ་ཞིག་ནས་ྋགསང་སྔགས་མ་རྒྱུད་ཀྱི་བཀའ་དབང་ཟབ་མོ་བསྩལ་རྒྱུའི་གསོལ་བ་ཕུར་ཚུགས་སུ་བཏབ་པ་བཞིན་ཞལ་བཞེས་བཀའ་དྲིན་བསྐྱངས་གནང་སྟེ། སྤྱི་ལོ་ ༢༠༢༥ སྤྱི་ཟླ་ ༡༠ པའི་ཚེས་ ༠༥ ནས་ ༠༨ བར་དང་། བོད་ཤིང་སྦྲུལ་ལོའི་བོད་ཟླ་བརྒྱད་པའི་ཚེས་ ༡༣ ནས་ ༡༦ བར་ཏེ་ཉིན་བཞིའི་རིང་༸གདན་ས་སྨན་རིའི་གླིང་གི་འདུལ་ཁང་ཆེན་མོར་དད་ལྡན་སེར་སྐྱ་མི་མང་ལ། གསང་སྔགས་མ་རྒྱུད་ཕྱི་ནང་གསང་བ་ཡང་གསང་ཚེ་སྒྲུབ་དང་བཅས་པའི་བཀའ་དབང་རྒྱས་སྐུར་གྱི་བཀའ་དྲིན་བསྩལ་གནང་མཛད་ཡོད་པ་དང་།
དེ་ཡང་སྤྱི་ལོ་ ༢༠༢༥ ལོའི་ཟླ་བ་ ༡༠ པའི་ཚེས་ ༠༥ བཀའ་དབང་ཉིན་དང་པོ། སྔ་དྲོ་དུས་ཚོད་ ༨།༣༠ ཐོག་༸དཔལ་གཤེན་བསྟན་རིའི་གྲྭ་ཚང་ནས་༸སྐྱབས་རྗེ་རྒྱལ་བ་སྨན་རི་བ་མཆོག་འདུལ་ཁང་ཆེན་མོར་སྤོ་རྒྱ་དུང་གླིང་གིས་གདན་ཞུས་དང་བཅས། གསང་སྔགས་མ་རྒྱུད་ཀྱི་སྔོན་འགྲོའི་བཀའ་དབང་བཀའ་དྲིན་བསྩལ་གནང་ཞིང་།
ཉིན་གཉིས་པ། སྤྱི་ལོ་ ༢༠༢༥ ཟླ་བ་ ༡༠ ཚེས་ ༠༦ ཉིན་མ་རྒྱུད་གསང་མཆོག་མཐར་ཐུག་གི་ཕྱི་ཀུན་བཟང་བདེ་ཆེན་གྱི་ལུང་དབང་སྟེ། དེ་ཡང་མ་རྒྱུད་ཀྱི་དབང་ཆོག་“ཟབ་ཡངས་གཏེར་དང་། དགའ་དབང་ཏོག རྣལ་འབྱོར་རོལ་བ། སྡོང་པོ་དགུ་འདུས་”སོགས་ཀྱི་སྒོ་ནས་ལུང་ཆེན་སྡེ་བཞི་དང་། མ་རྒྱུད་གསས་མཁར་མཆོག་ལྔའི་བཀའ་དབང་སོགས་ཏེ་ཕྱི་དབང་དོན་སྐོར་བརྒྱད་ཅུ་རྩ་བདུན་ཆ་ཚང་བཀའ་དྲིན་བསྩལ་བའི་གནང་མཛད།
ཉིན་གསུམ་པ། སྤྱི་ལོ་ ༢༠༢༥ ཟླ་བ་ ༡༠ པའི་ཚེས་ ༠༧ ཉིན་གསང་མཆོག་མ་རྒྱུད་དབང་བཞི་ལས་ནང་དབང་གཞི་ཡེ་སངས་རྒྱས་པའི་བཀའ་དབང་སྟེ། “ལུང་སྒོ་ལ་འཇུག་པ་བདུན། ཐིག་ལེ་རྩ་བའི་དབང་། ཡེ་ཤེས་སྣང་སྟོང་གི་དབང་། ཀུན་འབྱུང་ལྟ་སྤྱོད་ཀྱི་དབང་། འཕྲིན་ལས་གསལ་བའི་དབང་”སོགས་ནང་ལུང་དབང་གཞི་ཡེ་སངས་རྒྱས་པའི་དབང་བརྒྱད་ཅུ་རྩ་བདུན་ཆ་ཚང་བསྩལ་གནང་མཛད།
ཉིན་བཞི་པ། སྤྱི་ལོ་ ༢༠༢༥ ཟླ་བ་ ༡༠ པའི་ཚེས་ ༠༨ ཉིན་ སྔ་དྲོར་“རྒྱུད་ཀྱི་ཐིག་ལེ་རིག་པ་ཐབས་ཆེན་མཆོག་”ཅེས་པ་ལྟར། རྒྱུད་ལ་འཇུག་པ་དང་། ཐིག་ལེ་ཚོགས་ལམ་རྩ་བའི་དབང་དང་། རིག་པ་ཤར་བ་སྦྱོར་ལམ་གྱི་དབང་དང་། ཐབས་ཆེ་བ་མཐོང་ལམ་གྱི་དབང་དང་། མཆོག་ཏུ་གྱུར་པ་སྒོམ་ལམ་གྱི་དབང་སོགས། གསང་བ་ལམ་མངོན་སངས་རྒྱས་པའི་དབང་ཆ་ཚང་དང་། དབང་བཞི་པ་ཡང་གསང་གི་དབང་སྟེ། འབྲས་བུ་རྫོགས་སངས་རྒྱས་པའི་དབང་ལ་“མན་ངག་ཐིག་ལེ་ཡང་དག་ངེས་པར་གསལ། ”ཞེས་གསུངས་པ་ལྟར། མན་ངག་སྒོ་ལ་འཇུག་པ་དང་། ཐིག་ལེ་རྩ་བ་འབྲས་བུའི་དབང་དང་། ཡང་དག་ཚད་མེད་བཞིའི་དབང་དང་། ངེས་པ་ཐུགས་རྗེ་བཞིའི་དབང་དང་། གསང་བ་གསང་མཆོག་རིགས་ལྔའི་དབང་སོགས་གསང་བ་དང་ཡང་གསང་གི་དབང་རྣམས་རྫོགས་པར་བསྩལ་གནང་བ་དང་།
ཉིན་གུང་སེར་སྐྱ་མི་མང་ཡོངས་ལ་གཏོང་རག་གི་ཚུལ་དུ་གསོལ་ཚིགས་རྒྱས་འབུལ་གྲུབ་མཚམས། དུས་ཚོད་ ༡།༣༠ ནས་མ་རྒྱུད་མཁའ་འགྱིང་ཚེ་སྒྲུབ་གཡུང་དྲུང་འཁྱིལ་བའི་དབང་”བཅས་བསྩལ་གནང་ཞིང་། དེ་ལྟར་མ་རྒྱུད་གསང་མཆོག་མཐར་ཐུག་གི་དབང་བཞི་ལས་“ཕྱི་དབང་ལ་དོན་སྐོར་བརྒྱད་ཅུ་རྩ་བདུན། ནང་དབང་ལ་བརྒྱད་ཅུ་རྩ་བདུན། གསང་དབང་ལ་ཉིས་བརྒྱ་དང་བཅུ་གཅིག ཡང་གསང་དོན་སྐོར་ཉིས་བརྒྱ་དང་དྲུག་ཅུ་རྩ་ལྔ། ཚེ་སྒྲུབ་བཅས་ཀྱི་བཀའ་དབང་རྣམས་མཇུག་ལེགས་པར་གྲུབ་ཡོད་པ་བཅས་ཀྱི་གནས་བསྡུས་སུ། གཡུང་དྲུང་བོན་གྱི་དྲྭ་ཚིགས་ཁང་ནས།
