གདན་ས་ཆེན་མོ་༧དཔལ་གཤེན་བསྟན་སྨན་རིའི་གླིང་དུ་དེང་དུས་སྤྱི་ཚོགས་ཀྱི་གནས་བབ་དང་། ཞིབ་འཇུག་བྱེད་ཕྱོགས་ཐད་ཀྱི་དགོས་པར་དམིགས་ནས། ལོ་ངོ་དུ་མའི་སྔོན་ནས་གཡུང་དྲུང་བོན་གྱི་བཤད་སྒྲུབ་འདུས་སྡེའི་སློབ་གཉེར་བ་དག་ལ་བདུན་རེའི་བགྲོ་གླེང་དང་། རྩོམ་རྒྱུགས་སོགས་གནང་བའི་སྲོལ་བཙུགས་ཡོད་ཅིང་། བར་ལམ་ནས་དགོས་དམིགས་ཀྱིས་བདུན་རེའི་བགྲོ་གླེང་གི་ཚབ་ཏུ་ཟླ་རེའི་བགྲོ་གླེང་གཏན་འབེབས་བྱས་ཤིང་། དེ་ཡང་འཛིན་གྲྭ་གོང་འོག་བར་གསུམ་ནས་སློབ་གཉེར་བ་རེ་རེ་བཅས་མི་གསུམ་ནས་བགྲོ་གླེང་བརྗོད་བྱ་རང་མོས་ནས་བདམ་ཐོན་བྱས་ཐོག་བགྲོ་གླེང་གནང་བཞིན་པ་ལྟར་།
ཕྱི་ལོ་ ༢༠༢༥ ལོའི་ཟླ་ ༡༠ པའི་ཚེས་ ༡༠ ཉིན་གཡུང་དྲུང་བོན་གྱི་བཤད་སྒྲུབ་འདུས་སྡེའི་ཟླ་རེའི་བགྲོ་གླེང་སྐབས་ ༢༠ པ་འཚོགས་གནང་ཡོད་ཅིང་། དེ་ཡང་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་དབུ་བཞུགས་ཀྱིས་བཤད་སྒྲུབ་མཁན་སློབ་རྣམ་པ་གཉིས་དང་བཤད་སྡེའི་དགེ་རྒན་རྣམ་པ། གཞན་ཡང་དགེ་བཤེས་དང་སློབ་གཉེར་བ་ཚང་འཛོམས་ཐོག
ཐོག་མར་རིག་གནས་འགན་འཛིན་འཇིགས་མེད་དབང་རྒྱལ་གྱིས་གཙོ་སྐྱོང་ཐོག་ཕྱི་དྲོའི་དུས་ཚོས་ ༥།༣༠ བགྲོ་གླེང་དབུ་འཛུགས་གནང་ཞིང་གཏམ་བཤད་པ་དང་པོ་འཛིན་གྲྭ་གོང་མའི་ཁོངས་ནས་བཀའ་རམས་པ་ངག་དབང་ཤེས་རབ་ལགས་ནས་༼གསོ་བ་རིག་པའི་གཞུང་ལུགས་ལས་“ཟས་སྤྱོད་”ཀྱི་སྐོར་བཤད་པ་༽ ཞེས་པའི་བརྗོད་གཞི་དང་འབྲེལ་ནས། དང་པོ་
གསོ་རིག་འབུམ་བཞིའི་སྐོར་རག་ཙམ་གླེང་བ། གཉིས་པ་འབུམ་བཞི་ལས་ཟས་སྤྱོད་ཀྱི་དོན་ཅུང་ཙམ་གསལ་བར་བྱེད་པ། གསུམ་པ་གསོ་རིག་དཔྱད་འབུམ་ཁྲ་བོ་ལས་སྤྱོད་ལམ་གྱི་སྐོར་བཤད་པ། བཞི་པ་ལུས་རྩལ་དང་འབྲེལ་བའི་སྐོར་མདོར་ཙམ་བཤད་པ། ལྔ་པ་ལུས་ཀྱི་ཆ་ཤས་དང་འདུ་བ་ཆ་སྙོམས་ཀྱི་སྐོར་གསལ་ཁ་གཏོད་ཁུལ་བགྱི་བ་བཅས་སྡེ་ཚན་ལྔ་རུ་ཕྱེས་ཏེ་གསུང་བཤད་གནང་ཡོད་པ་དང་།
དེ་རྗེས་རྫོགས་ཆེན་སློབ་གཉེར་བ་མཁས་གྲུབ་རིན་ཆེན་ལགས་ནས་༼བོན་ཞེས་པའི་ཐ་སྙད་གླེང་བ་༽ཞེས་པའི་བརྗོད་གཞིའི་ཐོག་ནས། ༡ སྤྱིར་བོན་ཞེས་པའི་ཐ་སྙད་ཀྱི་འཇུག་ཚུལ། ༢ཡ་ཐོག་སྲིད་པའི་བོན་དང་གཡུང་དྲུང་བོན་གྱི་ཁྱད་པར། ༣ བོན་དང་ཆོས་གཉིས་ཀྱི་ཁྱད་པར། ༤ བོན་ཞེས་པའི་ཐ་སྙད་ཀྱི་བདག་པོ་ཡིན་པའི་ད་ལྟའི་འགན་ཁྲི་བཅས་ཀྱི་སྒོ་ནས་གསུང་བཤད་དང་དྲི་བ་དྲིས་ལན་གནང་།
དེ་རྗེས་ས་ལམ་འཛིན་གྲྭའི་སློབ་གཉེར་བ་གནམ་གང་ཚེ་རིང་ལགས་ནས་༼དོལ་པོ་བོན་གྱི་སློབ་གཉེར་ཁང་གི་སྐོར་༽ཞེས་པའི་བརྗོད་བྱའི་ཐོག་ས་བཅད་དང་པོ་ ༡ སློབ་གཉེར་ཁང་དེ་ཉིད་ཕྱག་བཏབ་པའི་ལོ། ༢ སློབ་གཉེར་ཁང་དེ་ཉིད་ཕྱག་འདེབ་པ་པོ། ༣ སློབ་གཉེར་ཁང་དེའི་ས་གནས། ས་བཅད་གཉིས་པར་ ༡ སློབ་གཉེར་ཁང་དེའི་ད་ལྟའི་གནས་བབ། ༢ སློབ་གཉེར་ཁང་དེའི་མ་འོངས་པའི་དམིགས་ཡུལ་བཅས་ཀྱི་སྒོ་ནས་གཏམ་བཤད་སྐར་མ་བཅོ་ལྔ་དང་། དེ་འབྲེལ་གྱི་དྲི་བ་དྲིས་ལན་སྐར་མ་བཅོ་ལྔ་གནངས་ཏེ་བོད་ཟླ་བརྒྱདཔའི་བགྲོ་གླེང་མཇུག་གྲུབ་ཡོད་པ་བཅས་གཡུང་དྲུང་བོན་གྱི་དྲྭ་ཚིགས་གཙོ་སྒྲུབ་ཁང་ནས།
