དེ་ཡང་སྐྱབས་རྗེ་སྨན་རིིའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ་མཆོག བྱ་འཕུར་དགེ་བཤེས་ལྷུན་གྲུབ་རྒྱ་མཚོ་ཉིད་ཀྱི་གདན་ཞུས་ཀྱིས་ཨ་རིར་ཟླ་བ་གཅིག་ལྷག་རིང་མཛད་འཕྲིན་བསྐྱངས་ཡོད་པ་རེད།
གཡུང་དྲུང་བོན་གྱི་བསྟན་པའི་གསལ་བྱེད་གསང་གསུམ་བོན་གྱི་མཛོད་འཛིན་༧སྐྱབས་རྗེ་སྨན་རིའི་དཔོན་སློབ་རིན་པོ་ཆེ་མཆོག་ཕྱི་ཟླ་༡༠ཚེས་ ༡༨ ཉིན་ནས་ Costa Rica རུ་ཡོད་པའི་བྱ་འཕུར་ཚང་ཞང་བོད་སྒོམ་སྒྲུབ་གླིང་(ཡུལ་མིའི་སྐད་དུ་མཁར་ས་བྱ་འཕུར་)དུ་བདུན་གཅིག་གི་མཛད་རིམ་བསྐྱངས་ཡོད་པ་དང་། ཕྱི་ཚེས་ ༢༩ ཉིན་ཕྱིར་ཨ་རིར་རྒྱལ་གཤེན་ཞང་བོད་སློབ་གཉེར་ཁང་དུ་ཕེབས་ནས་བཀའ་ཁྲིད་གནངས།
དེ་ཡང་རིན་པོ་ཆེ་མཆོག་ནས་གང་ཟག་གདུལ་བྱའི་སྣོད་སྣ་ཚོགས་ཀྱི་བློ་དང་བསྟུན་ནས། འབྱུང་ལྔའི་ཉམས་ལེན་བྱེད་སྟངས་ཀྱི་གལ་གནད་མན་ངག་ཏུ་བཏབས་ཤིང་། ཕྱི་ནང་འབྱུང་ལྔ་དང་འབྲེལ་ཏེ་ལུས་སེམས་སྙོམས་སྒྲིག་བྱེད་སྟངས། དེ་བསྟུན་འབྱུང་ལྔའི་སྣོད་བཅུད་ཀྱི་རྟེན་འབྲེལ་གྲུབ་སྟངས། བོན་གྱི་གཞུང་ལས་་བྱུང་བའི་འབྱུང་བ་ལྔའི་ཉམས་ལེན་ནི་ཞང་བོད་ཀྱི་ཉམས་ལེན་གྱི་ཆ་ཤས་ཤིག་ཡིན་པ་དང་། དེ་དག་གིས་ལུས་དང་། སེམས་ཀྱི་ནུས་པའི་བར་ཆད་སེལ་བར་རོགས་རམ་བྱེད་ཀྱི་ཡོད་པ་དང་།
ཉམས་ལེན་འདི་དག་འབྱུང་བ་ལྔའི་ས་བོན་དང་། ཡི་གེ ཕྱག་རྒྱ། གཟུངས་སྔགས། ལུས་ཀྱི་སྟངས་སྟབས། དབུགས་ཀྱི་བྱེད་ལས། དམིགས་པ་བཅས་སུ་བེད་སྤྱད་ནས་འབྱུང་བ་རེ་རེ་དབང་དུ་བསྡུ་བ་ན་ལུས་སེམས་ཞི་བདེ་དང་བདེ་སྐྱིད་བསྐྲུན་ཐུབ་པའི་གལ་གནད་སོགས་ནས་བཀའ་ཁྲིད་མཛད་ཡོད་པ་རེད།
ཟླ་འདིའི་ཚེས་༣ཉིན་ཨ་རི་ནས་ལྡི་ལིར་ཕེབས་ཐོན་མཛད་ཡོད་ཅིང་། དེ་རིང་སྟེ་ཕྱི་ལོ་༢༠༢༥ལོའི་ཟླ་༡༡ཚེས་༨ཉིན་རང་དགོན་དུ་ཆིབས་བསྒྱུར་བསྐྱངས་ཡོད་པ་རེད། དེ་ཡང་སོ་ལན་རྫོང་ཁོངས་སུ་གཡུང་དྲུང་བོན་འཛིན་སྐྱོང་ལྷན་ཚོགས་དང་། གཡུང་དྲུང་བོན་གྱི་བཤད་སྒྲུབ་འདུས་སྡེ། སྨན་རྩིས་ཁང་གི་ལས་སྣེ་ལྷན་རྒྱས་བཅས་ཕེབས་བསུ་བཅར་ཡོད་ཅིང་།
བོན་གཞིས་ཐོབ་རྒྱལ་ལ་མགོ་དང་སྨན་རྩིས་ཁང་གི་མདུན་སྒོ སྨན་རིའི་གྲྭ་ཚང་གི་མདུན་ཐང་བཅས་སུ་སེར་སྐྱ་མི་མང་ཡོངས་ནས་ཕེབས་བསུ་རྒྱ་ཆེན་བྱས་ཡོད་པ་རེད། དེ་ཡང་འཆར་ཅན་ལྟར་རིན་པོ་ཉིད་ནས་གྲྭ་མང་ཡོངས་ལ་བསྙེན་བཀུར་མང་ཇ་བཏངས་ཡོད་པ་བཅས་ཀྱི་གནས་བསྡུས་སུ།
